Laithiangtho Dokna (Isaiah 41-42)

1.  A khuala ah a om ngamte bangba ki om sak ziam?
a. Kiliinthawn
b. Thimdide
c. Ngal kinging sa in

2. ___ te in ka sep sate mu zo hi.
a. Israel
b. A khuala ngam mihing
c. Leitung mihingte

3. Akuate  khat le khat kihu in ki hanthawn ziam?
a. Israelte
b. Ngamdangmi
c. Khutthiamte sia

4. Lettama pa in kham seakpa tungah bang ci ziam?
a.  ‘Kipawl khawm tawng’
b.  ‘Pha mama hi!’
c.  ‘Kidawm in’

5. Koi sung ah ngunte ka luang sak tu ziam?
a. Ceder kungte omna
b. Mualkolte laizang
c. Canaan ngam sung

6. Akuate thazawm in vaang nei ngawl ziam?
a. Israel
b. Egyptte
c. Milimte

7. Ama au ngawlin, ___ ngawl hi.
a. ngilo
b.  a aw saang sak
c. kiphasak

8. Ama sia ___ lawpin kithoai hi.
a. biakna vawt tu in
b. ngal do tu
c. zi nei tu in

9.  ___ a muangte theampo, ki maizum in, ki maimawl sak tu hi.
a. Baal
b. Ama le ama
c. Milimte

10. TOPA in abang hang thukhamte le a thu hilnate thupi sak ziam?
a. PATHIAN ahi lakna
b. Hong ngum nuam
c. Hong it man

11. Amite sia leisung thong ah kikalhcip in koi sung kiphual ziam?
a. Senneal ngam
b. Thong sungah
c. Ngamdang ah

12. Ama ii thin uukna sia mei bangin ___ ah kuang hi.
a. amate
b. PATHIAN he ngawlte sung
c. Israelte sung

Isaiah 41
Israel tungah Pathian ii Kamciam
1Pathian in hi bangin ci hi,
“A khuala ah a om ngamte awng, thimdide in om vun a
ka thu hong ngai tavun!
Zum ah na thu sung tu in kinging vun;
thu son thei natu hun nga tu nu hi.
Akua thumaan ziam ci in khensat tu in pai tek tawng.
2“Nisuana sang panin ngalzo pa hong paipui a,
a paina theampo ah ngal a zo sak sia akua ziam?
Kumpite le minamte tungah ama zawna a pia sia akua ziam?
Leivui bang keakin amate sia a namsau in saatsuk hi.
Taangphaw sia vui ii letkeak bangin a thaltangte in amate thethaang hi.
3Ngal muangin ama in a nung pan delin zui a,
a peang in lei thutha man ngawl tu za in manlang hi!
4Hi bangin, a piang sak sia akua ziam?
Tangthu suak tu in a ngaisun sia akua ziam?
A kipatciil pan kipan Keima TOPA ka om a,
Keima TOPA Pathian sia a khakbel dongin ka om tu hi.
5“A khuala ngam mite in ka sep sate mu zo hi;
amate kiitakna taw lau in liing uh hi.
Tua ahikom amate a vekpi kikhawm in hong pai uh hi.
6Khutthiamte sia khat le khat kihu in ki hanthawn uh hi.
7Lettama pa in kham seakpa tungah ‘Pha mama hi!’ ci hi.
Milim a neal tu a seakpa in thikpim taw a kilh pa hanthawn hi.
Amate in, ‘A kipeena pha hi’ ci uh hi–
taciang amate in milim sia a koina munah kho takin kilh uh hi.
8“Ahihang nang, ka naseampa Israel awng,
kong tealsa mi na hi a,
ka lawmpa Abraham ii suan le paalte na hi hi. *
9Leimong panin nang kong paipui hi;
a khuala bel a kingh panin kong sam a,
‘Nang sia ka naseam pa ni hi’ kong ci hi.
Kei in nang kong nial bua a, ahihang nang kong teal hi.
10Lau heak in– nang kong ompui hi!
Keima in na Pathian ka hi hi– bangma in nang lau sak heak in!
Kong thahat sak tu a, kong hu tu hi;
kong keamcing tu a, kong ngum tu hi.
11“Nang tungah hong thin ukte sia
ngallel maizumna he tu uh hi.
Nang hong sim mite thi tu a,
12leitung panin mang vadi tu uh hi.
13Keima in na TOPA Pathian ka hi hi;
nang kong thahat sak a,
‘Lau heak in; hong hu tu khi hi’ ci in kong son hi,” ci hi.
14TOPA in hi bangin ci hi,

“Israel awng, note in mi cii tawmte le a thazawmte na hi uh hi.
lau heak vun; hong hu tu khi hi.
Keima, Israel ii a thiangtho Pathian sia
nang hong ngumpa ka hi hi.
15Hiam in ha thak a nei ancilna bangin kong vawt tu hi.
Note in mualliante cilin na susia tu uh hi;
mualnote leivui suak tu hi.
16Amate sia vui sungah na lawn tu uh hi;
vui va in amate seamkeak a,
vuipi in amate thethaang tu uh hi.
Tasia ciang keima in
na Pathian uh ka hikom na lungdam tu uh hi;
Israel ii a thiangtho Pathian ahi keima nong pok tu uh hi.
17“Ka mite tuidu in tui a zon uh ciang, a dang a ko ciang,
TOPA ahi, Keima in, amate thungetna ka zo tu hi;
Israelte ii Pathian ahi Keima in,
amate ka nusia ngei batu hi.
18Mualkolte laizang ah ngunte ka luang sak tu a,
zaangtamte sungah ciktui ka luang sak tu hi.
Senneal ngam sia tuili ka suak sak tu a,
leiko na mun sia ciktui luang ka suak sak tu hi.
19Senneal ngamah cedar kungte, acacia, myrtle le olive kungte ka posak tu hi.
Ngamkolna ah taam taakthingte juniper le cypress thingte po tu hi.
20TOPA ahi Keima in hi nate vawt zo hi ci sia
mite in mu in he tu uh hi.
Israelte ii a thiangtho Pathian in
hi thute a pian sakna amate in he tu uh hi,” ci hi.
TOPA ii Pathian Maan ngawlte a Thatona
21Israelte ii kumpi ahi, TOPA in son tu nei hi;

“No minamte ii pathiante awng,
na thu uh hong sung tavun.
Na kinialpina na thute hong paipui tavun!
22Hi sungah hong pai tavun a
bang piang tu ziam hong sonkhol tavun,
tua hile hong pian ciang ih he tu hi.
A piang sa thute zum ah thiang son vun a,
amate ii cinopna hong son tavun.
23Note sia pathiante hi ci in kong heak thei natu in
mai sangah bang thu hong piang tu– ci sia hong son tavun!
Thupha pawlkhat vawt vun a, ahibale siatna pawlkhat theng sak vun.
Launa le liinna taw hong kidim sak tavun.
24Nang le na vawtte theampo bangma hi ngawl hi;
Nang hong biate kiihuai hi!
25Nisuana sangah a teang mihing khat ka teal zo hi.
Saksang pan sim tu in ama ka puak tu hi.
Beal seakpa khat in tungman a totcil bangin,
ama in ngam ukte buan bangin tuancil tu hi.
26Maan tatak nu hi kong ci thei tu uh in
hi thu piang tu hi ci in akua in son khol nu ziam?
Tabang kuama in son ngawl nu hi.
Kam khat zongh pau ngawl nu hi;
khat zongh in na kampau za ngawl hi!
27Zion mite tungah tua thu a son phit bel sia,
TOPA ahi, Keima ka hi hi;
‘Na mite hong pai hi! Amate inn ah hong cia uh hi!’ ci thu
son tu in Jerusalem ah kamtai khat ka puak hi.
28Pathiante sung ka et ciang,
son tu a nei kuama om ngawl a;
ka thudokte khat zongh in hong zo thei ngawl hi.
29Hi pathiante sia a vekpi in a luithathong ahi hi;
amate in bangma vawt thei vet ngawl hi–
hi milimte sia thazawm in vaang nei ngawl hi,” ci hi


Isaiah 42
1TOPA in, “A tha ka hat sak ka naseampa sia hi sungah om hi-
Keima in ama tealin, ka lungkim hi.
Ka tha taw ama ka dimh zo a,
minam theampo tungah thumaanna puak tu hi. *
2Ama au ngawlin, a aw saang sak ngawl in,
lampi ah a ngingin pau ngawl tu hi.
3Ama in pumpa kungkoai khat thiaktan ngawlin,
lalciin meitaang phe valep sia mit sak ngawl tu hi.
Ama in mihing theampo tungah a kip thutanna theng sak tu hi.
4Ama in thin kiam ngawl tu hi;
leitung ah thumaanna piang sak tu hi.
A khuala ngamte in ama ii thuhilna ngakla uh hi,” ci hi. *
5Pathian in vantungte bitphua in, phalkeak hi;
ama in leitung le leitung ah a teangte theampo vawt hi;
a mite theampo tungah nuntakna le husanna pia hi.
Taciang tu in, TOPA Pathian in a naseampa tungah, *
6“TOPA ahi, Keima in, leitungah
thumaan na kiseam ziam kiseam ngawl ziam ci thu
en tu in nangma kong sam a vaangletna kong pia zo hi.
Nangma tungtawn in mite theampo taw thuciamna khat ka vawt tu hi;
nangma tungtawn in minamte tungah khuavak ka pia tu hi. *
7Mittawte ii mitte na hong tu a
a zing thong sungah a tote nangma in na suatak tu hi.
8“Keima bek ma TOPA na Pathian ka hi hi.
Pathian dang khat tungah ka minthanna kihawm ngawl tu hi;
kei hong kipoknate sia milimte ka hawm sak batu hi.
9Ka son khol thute tu in tangtung hi.
Tu in a piang ngawl lai thu thakte
hong pian ma ngangawn in, kong son tu hi.” ci hi.
Pokna la
10TOPA tungah la thak khat sa vun;
leitung theampo awng, ama pokna la sa vun!
Tuipi tung khualhawte awng, ama pok vun!
Tuipi sungah nganhingte theampo awng; ama pok vun!
ngam khuala nate le tua munah a teangte theampo awng, la sa vun!
11Senneal ngam le a khuapite in Pathian pok hen;
Kedar mite in ama pok hen!
Sela khuapi sungah a teangte in
mualdawnte pan lungdam in au hen!
12Ngam khuala na sungah a teangte in
TOPA tungah pokna le minthanna pia hen!
13TOPA sia ngalhang pa bangin ngalsim tu in kuan hi;
Ama sia ngal do tu lawpin kithoai hi.
Ama in ngal phawngin au a, hanla sam hi.
Ama in a ngalte tungah a vaangletna lak hi.
Pathian In A mite Hu tu in Kamciam
14Pathian in,
“Khua ngei hial po ma ka thim dide hi; ka mite ka paupui bua hi.
Ahitazong tu in ka sep tu hun hong theng zo hi;
numei naungil tun tu bangin ka au hi.
15Mualnote le mualliante lalcip sak tu in
lopa le thingkungte ka kongaw sak tu hi.
Ngundungte senneal ngam suak sakin,
tuilite ka kang sak tu hi.
16“Mittaw ka mite sia
amate tot ngei ngawl lampite tawnin lam ka pui tu hi.
Amate khuazing sia khuavak suak sakin
a tam kim ngawl ngam sia amate mai ah tamin ka neal sak tu hi.
Hite sia ka kamciam hi a, peal ngawlin ka tangtung sak tu hi.
17Milimte a muangte theampo,
milimte a pathian hi a cite theampo ki maizum sakin,
ki maimawl sak tu hi.” ci hi.
Israelte ii Thuheak Ngawlna
18TOPA in,
“Ngai vun, no nangong mite awng!
A nai in en vun, no mittawte awng!
19Ka naseampa sang khuamu ngawl zaw khat papo om ziam?
Kamtai in ka sawlpa sang nangong zaw khat papo om ziam?
20Israel awng, nang in tam mama mu zo ni hi,
ahihang nang atu in bang khiakna nei ziam?
Na khuazaak natu in bil na nei hi,
ahihang bang tatak na za ziam?” ci hi.
21TOPA sia hong ngum nuam mama Pathian hi a,
tua ahikom a thukhamte le a thu hilnate thupi sak hi,
taciang ama in tate a mite ii zatak tu dei hi.
22Ahihang tu in mite kisuttol zo in,
leisung thong ah kikalhcip in thong sungah kiphual hi.
Amate ii vanhte kiphul in ki suttol a,
amate hun tu in kuama hong pai ngawl hi.
23Note sung pan akua in hi thu ngai tu nu ziam?
Tu pan kipan pha takin, ngai ngawl tu nu ziam?
24A sut ngawpte tungah Israelte a pia sia akua ziam?
Eite ii a tungah ih khial TOPA mama in pia hi!
Ama deina bangin ih nungta bua a,
ama hong hilna bang ih mang bua hi.
25Tua ahiciang ama ii thin uuk mama nate
eite hong phawk sakin, ngal kisimna hong thuak sak hi.
Ama ii thin uukna sia mei bangin
Israel mite theampo sungah kuang hi,
ahihang bang thu piang ziam cisia eite in ih he ngei bua hi;
tua ih thuakna panin eite in bangma ih phawk thei tuan bua hi.

0 comments:

Post a Comment