Laithiangtho Dokna (Isaiah 43-44)

1. ___le Seba sia Israel taw kitheak tu hi.
a. Ethiopia
b. Egypt
c. Moab

2. Ni suana le ni tumna pan Israelte ___ tu hi.
a. kithat lum
b. ki zawngsak
c. kikaikhawm

3. Pathian in, Israelte ngup natu koi sung ah ngalkapte pai sak tu ziam?
a. Egypt
b. Canaan
c. Babylon

4. TOPA in,"___thute ciamtee heak vun" ci hi.
a. Nungsang
b. Siatsonna
c. Pianna

5. ___ in Pathian pokna la sa tu uh hi.
a. Israelte
b. Vantungmi
c. Ngamsate

6. Israel in a ___ in biakna ninsak ahikom, lalcipna theng tu hi.
a. mipite
b. Thiampite
c. ukte

7. Mihingte,  in, ___ taw kipawl tu in hong pai tu uh hi.
a. Israel mite
b. Pathian
c. Thuummite

8. Misim in ___ ah TOPA min at hi.
a. pangtung
b. a innmai
c. a baan

9. ___ na a sep ciang, ngilkial dangtaak in toi hi.
a. Kumpipa
b. Lettamapa
c. Thikseakpa

10. ___ in azak tu in cedar kungte phuk tu hi.
a. Lettama
b. Meingongnu
c.  Isaiah

11. Akuana “Nang in ka pathian ni hi, hong ngum tan!” ci ziam?
a. Kumpipa
b. Thikseakpa
c. Letama

12. Topa in, ___tungah, keima luangin a uk tu pa na hi ci hi.
a. Nayman
b. Judah
c. Cyrus



Isaiah 43
Pathian in A mite Suaktak tu Kamciam
1Israel awng, nang hong bitphua TOPA in,
“Lau heak in– Kong ngum tu hi.
Na min taw kong sam zo hi– nang sia Keima mi na hi hi.
2Tui thukte na kantan ciang, nang taw kong omkhawm tu hi;
na thuaknate in hong zo zo ngawl tu hi.
Mei na kantan ciang, na kaang batu hi;
vawtsiat, haksatnate in nang hong na sak ngawl tu hi.
3Banghangziam cile keima in TOPA na Pathian,
Israelte ii a thiangtho Pathian, nangma hong ngumpa ka hi hi.
Nangma kong suatak natu in Egypt ka thasua tu a,
nangma kong the natu in Ethiopia le Seba ka thasua tu hi.
4Na nuntakna ngum tu in minamte theampo ka thasua tu hi.
Banghangziam cile nang sia kei atu in manpha ni hi.
Nang kong it a kong upat hi.
5Lau heakin– nangma hong ompui khi hi!
“Ni suana a khualana pan le nitumna sang a khuala belna panin,
na mite inn ah kong ciapui tu hi.
6Saksangte tungah amate pai sak vun ka ci tu a;
thangsang te tungah amate khaktan nawn heak vun ka ci tu hi.
Ngam khuala na pan le leitung mun theampo panin ka mite heak kik tahen.
7Amate sia keima mite hi a,
keima hong minthang sak tu in ka bitphua ahi hi,” ci hi.
Israel sia TOPA ii Tetti
8Pathian in,“Ka mite zum ah sam vun.
Amate in mittang nei hi napi, a mit uh taw hi;
amate in bil nei hi napi, a nangong uh hi!
9Thu kisitna munah hong pai natu in minamte sam vun.
Amate ii pathiante sung pan
akua in maisang thu son khol thei ziam?
Amate sung pan akua in tu a, a piang thu sia sonkhol ziam?
Hi pathiante in a son khol thute maanin,
amate kammalte maan hi, ci in a kilangh natu in, a tetti te hong paipui tahen.
10“Israel mite awng, note in ka tetti te na hi uh hi;
Ka naseam tu in kong teal hi, tua ahikom kei hong he in nong um tu uh a,
keima bekma Pathian ka hi sia na tel tu uh hi.
Keima sim ngawl pathian dang om ngawl hi;
om ngei ngawlin, maisang zongh ah om ngei ngawl tu hi.
11“Nang hong hun thei tu sia TOPA ahi,
keima khat bekma ka hi hi.
12Bang hong piang tu cisia ka sonkhol zo a,
taciang nang hong hu tu in kong pai hi.
Ngamdang pathian in hi bang vawt ngei ngawl hi;
note in ka tettite na hi uh hi.
13Keima in Pathian ka hi a, a tawntung in ka hi tu hi.
Kuama in ka vaangletna panin suakta thei ngawl tu hi;
ka septe kuama in kheal thei ngawl tu hi,” ci hi.
Babylon pan Suatakna
14Israelte ii a thiangtho Pathian, note hong ngum TOPA in,

“Note hong ngum tu in, Babylon a sim tu ngalkapte kong puak tu hi.
Khuapi kongpite ka sia sak tu a,
amate auna awte in kaana aw suak tu hi.
15Keima in TOPA a thiangtho na Pathian ka hi hi.
Israel awng, no kong bitphua a, keima in note kumpi ka hi hi,” ci hi.
16Nidang lai pekin TOPA in tuipi kantan in lampi khat vawt a
tui peite kantan in lamzin khat vawt hi.
17Ama in a thahat ngalkap hon khat sia sak in,
tuate sia siphu ngalleang le siphu ngalkapte ahi hi.
Amate pukin tho kik nawn ngawl a,
meivak kuang muutmit bang ahi hi.
18Ahizong TOPA in,
“Nungsang thute ciamtee heak vun a,
taanglai a piang thute ngaisun heak vun.
19A thak na khat ka vawt tu sia en vun.
Tasia hong piang zo hi– tu in mu thei nu hi!
Ngam tawngtol sungah lampi khat ka vawt tu a,
tualai ah note atu in tui ka luang sak tu hi.
20Ngamsate ngangawn in kei hong upat tu hi;
ka teal sa mite tui pia tu in senneal ngam sungah
nguntui ka luan sak ciang ngiate le vacim kalauh te in kei hong pok tu uh hi.
21Amate sia keima atu in ka vawt mite hi a,
amate in keima hong pokna la sa tu uh hi!” ci hi.
Israel ii Mawna
22TOPA in,
“Israel awng, ahihang nang in kei nong cimtaak zo hi,
nang in kei nong bia bua hi.
23Nangma in tuu taw na meihal biakpiaknate kei kungah nong paipui bua hi;
na biakpiakna taw kei nong upat bua hi.
Biakpiakna te ngen in vanhngit kong suan bua a;
ngim namtui ngen in, thinngim kong pia bua hi.
24Nang in kei atu in ngim namtui na lei bua a,
na nganhingte ii thau taw nong lungkim sak bua hi.
Ahihang na khialna taw kei tungah vanhngit nong suan zaw pum a,
khialna na vawtnate tawin ka thin nong ngim sak hi.
25Ahitazong, na mawna hong mai sak sia keima Pathian hi in,
keima ka hikom in hi bangin ka vawt hi.
Na khialnate ka ciamtee batu hi.
26“Zum ah pai tawng; nang hong kimaw sakna thu hong paipui tan!
Nangma in thumaan na hina thu lak tu in na thu sung in!
27Na pu na pa masa belpa uh khial hi;
na lampuite ka tungah hong khial hi,
28no hong ukte in ka biakna mun thiangtho sia ninsak uh hi.
Tua ahikom Israel tungah lalcipna kong theng sak hi;
ka mite selnona ka thuak sak hi,” ci hi.


Isaiah 44
TOPA bekma Pathian hi
1TOPA in, “Israel, ka naseampa,
ka teal mi, Jacob suan le paalte awng, tu in ngai vun.
2Nang hong bitphua TOPA ka hi hi;
na sua hun pan kipan, kong hu zo hi.
Lau heak in; nangma in
kong it kong teal sa ka naseam pa na hi hi.
3“A dangko leitangh tungah tui ka pia tu a
leiko tungah luitui ka luang sak tu hi.
Na tate tungah ka tha ka bua tu a,
na suan na paalte tungah ka thupha ka pia tu hi.
4Amate in pha takpi in tui a kibuak lopate le,
luitui luangte hui ah a po pakngiam thingte bangin khang tu uh hi.
5“Mite, khat zawkciang khat in, ‘Keima in TOPA aa ka hi hi,’ ci tu hi.
Amate in Israel mite taw kipawl tu in hong pai tu uh hi.
Misim in a baan tungah TOPA min at in ama le ama sia
Pathian ii mihing khat ka hi hi,’ ci tu hi.” ci hi.
6Israel dalin, a uk TOPA, Vaanglianbelpa TOPA in,
“Keima in a masa bel, a khakbel, Pathian khat bek ka hi hi.
Keima sim ngawl pathian dang om ngawl hi. *
7Keima sep bangin akua dang in seam thei ziam?
A kipatna pan a tawpna hun dong
a piang tu thu theampo akua in son khol thei ziam?
8Lau heak vun, ka mite awng!
Taanglai hun pan kipan tu hun dong hong piang tu theampo
ka son siat sa thu note in na he uh a,
taciang, note in ka tetti na hi uh hi.
pathian dang a om ziam?
Ka zaak ngeingawl a vaanglian pathian dang om ziam?,” ci hi.
Milim Biakna Kinunau
9Milim a vawt mite theampo mannung ngawlin, amate ii manh nei sak pathiante sia luithathong hi. Hi bang pathian a biate sia a mit uh taw in, bangma he ngawl uh a– amate kimaimawl sak tu hi. 10pathian bangin biak tu in thik milim vawt tu sia bangma manna om ngawl hi! 11Tabangte a bia theampo in maizumna nga tu hi. Milim a vawt mite sia mihing ma hi lel uh hi. Amate hong pai sak tavun a thu sitna thuak sak vun– amate kilau sak tu a, maimawlna thuak tu uh hi.

12Thik seakpa in thikthem khat la in pum taw zaap hi. Ama ii a thahat khut taw ama dei bang lim a sua natu in, sek vikin seak hi. Ama in na a sep ciang, ngilkial dangtaak in toi hi.

13Lettama pa in thing pitee hi. Ama inn sungah a koi tu in, ama in leikaang taw lim khat at in, ama na zakte taw khuakin, a meal pha mihing lim khat vawt hi. 14Ama in a zak tu in cedar kungte phuk tu hi, tua ahibale limthing ahizong cypress thing ahizong taam sung panin teal tu hi. Tua ahibale a hing sitset thingkung nam khat (laurel kung) suanin a khan natu in nguatui ngak tu hi. 15Mihing khat in thingkung khat sia thingthu tu le milim vawt natu in zangh hi. Ama in thing khen khat sia a meilum oai tu le anluum em natu in zangh hi; khen khat taw pathian vawtin bia hi. 16Ama in thing pawl khat sia meikhuk ah thut hi; sa em in ne a, lungkim hi. Ama in mei oai in, “Khualum a bang zata nuam ziam! Mei sia pha mama ta a!” ci hi. 17Thing a om lai teng taw ama in milim khat vawt a, taciang a mai ah kun in bia hi. Ama in milim tungah thungen in, “Nang in ka pathian na hi hi– hong ngum tan!” ci hi.

18Tabang mite sia mamaw leilam ahikom amate in bangteng vawt khu ziam ci zongh he ngawl hi. Amate in thumaan thutak a mu thei ngawl natu in, a mit uh si in, a tel thei ngawl natu in a ngaisutna khak uh hi. 19Milimte a vawtpa in hi bangin a ci tu ciimna heakna nei ngawl hi, “Thing kim khat ka thuttum hi. Meikam tungah anluum pawl khat ka em a, sa zongh em in ka ne hi. A omlai thingte sia milim in ka vawt hi. Hi munah thingtawng khat ii mai ah ka kun hi!”

20Ama sia vut ne te taw kibang lel hi. Ama ii mawmawt ngaisut nate in lamkhial sak zo a ama sia kihu zo nawn ngawl hi. A khut sungah a toai milim sia pathian hi ngawl het ahi hunlam ama in he ngawl hi.

TOPA A Bitphuapa le Ngumpa
21TOPA in, “Israel awng, hi thu ciamtee in;
nangin ka naseampa na hi sia ciamtee in,
Ka naseam tu in nang kong bitphua a,
bangma hunin nang kong mangil ngei batu hi.
22Na khialnate meeikaai bangin ka bo sak zo hi.
Ka kungah hong cia kik tan; keima in nang hong ngumpa ka hi hi,” ci hi.
23Lungdam in au vun, no vantungte awng!
Au vun, lei thuk munte awng!
Lungdam in au vun, muallian te le ngam sungah a om thingkungte theampo awng!
TOPA in a letna sia a mi Israelte ngupna taw in hong lak zo hi.
24“Keima in TOPA nang hong ngumpa ka hi hi.
Keima in nang hong bitphuapa ka hi hi.
Keima in TOPA, na theampo A bitphuapa ka hi hi.
Keima nguakin vante ka zalhkeak hi;
leitung ka vawt lai in, kuama in kei hong hu ngawl hi.
25Maisang thu tu aisaan theite ka mamaw sak a,
aksi en thiamte ii thuson kholnate ka melmang hi.
Mipilte ii kammalte ka nial a
amate pilna sia a mawmawt huai ahi hunlam ka langh sak hi. *
26Ahihang ka naseampa in
thuson kholna khat a nei ciang ka tupnate pualaak tu in,
kamtai khat ka puak ciang tua tupnate le sonkhol nate ka tangtung sak hi.
Jerusalem ah mite teang kik tu hi ci in Jerusalem tungah ka son a,
Judah ngam khuapite kisa kik tu hi ci in Judah ngam khuapite ka son hi.
Tua khuapite sia a kisiacip na sung pan tho to tu hi.
27Thupiakna kam khat taw tuipi ka kangcip sak hi.
28Keima in Cyrus tungah, ‘Nangma in keima luangin a uk tu pa na hi hi;
Keima dei bangin na seam tu hi:
Jerusalem khua a kisak kik natu le Biakinn tawdappha a ki pha kik natu in thu na pia tu hi,’ ka ci hi,” ci hi.

0 comments:

Post a Comment