Laithiangtho Dokna (Isaiah 45-46)

1. Cyrus tungah TOPA in, ___ ci hi.
a. kong ngum tu hi
b. na lampi ka pua tu
c. keima in Pathian ka hi hi

2. A kua tung ah a kiphual sumngumte nang kong pia tu kici ziam?
a. Cyrus
b. Israelte
c. Judah

3. Israel huu tu in, TOPA in ___ sawl hi.
a. Cyrus
b. Syria
c. Judah

4. Beal in ama a vawt beal seakpa ___ ci thei ngawl hi.
a. thiam ni hi
b. hong seak lai tan
c.  thiam bate

5. TOPA ii ___ te son thei natu thu na nei bua hi!
a. son sa
b. vawt tu a kilawm
c. na lamdang lak na

6. ___ in khuapi, Jerusalem sa kik tu hi.
a. Cyrus
b. Israelte
c. Judah

7. Bel le Nebo sia khatvei lai in ___ hi.
a.  kibia
b. sila suak ngei
c. ngalkisimna

8. Na huai na teak na puakkan dong kong ___ tu hi.
a. lamsang
b. nusia cip
c. ou kong keam

9. ___ in “Akua taw hong tee ngat tu nu ziam?” ci hi.
a. Cyrus
b. Israel
c. TOPA

10. Bang hong piang tu cisia taanghlai pek panin ___zo hi.
a. kilak
b. thukun om
c. ka son khol

11. ___sang panin mihing khat hong pai tu in ka sam hi.
a. Nitumna
b. Thang
c. Nisuana

12. Ama in ___ hong tuak sukin ka tup sate  tangtung sak tu hi.
a. muvanlai bangh
b. vaangletna taw
c. muthi bangin

Isaiah 45

TOPA in Cyrus Nasep pia


1TOPA in Cyrus sia kumpi tu in teal zo hi.

        TOPA in minamte zo tu in ama sawl zo hi;
        kumpite ii vaangletna hawkkeak tu in TOPA in ama puak hi;
        TOPA in khuapi kongpite Cyrus atu in hong tu hi.
    Cyrus tungah TOPA in,

2“Keima in muallian mualnote tamkim sakin,

        na lampi ka pua tu hi.
        keima in taungo kongpite thiaktan in
        a thikzawlte ka saattham tu hi.

3A zingna munah a kikoi sumngumte le

        a thimtham munah a kiphual sumngumte nang kong pia tu hi;
        tasia ciang keima in TOPA ka hi hunlam le
        Israel ii Pathian in na minlo in
        nang hong sam zo hi cisia na tel tu hi.

4Ka teal sa mi ahi Israel ka naseam pa hu tu in nang kong sawl hi,

        nang in kei hong he ngawl na hitazong
        upatna lian kong pia hi.

5“Keima in TOPA ka hi hi; pathian dang om ngawl hi.

        Na kitaangsap thahatna sia,
        nang in kei hong he ngawl na hihang kong pia tu hi.

6Leimong khat pan leimong khat dongah a om mihing theampo in

        keima sia TOPA ka hina thu le
        pathian dang om ngawl a hina thu
        a heak thei natu in hi bangin ka vawt ahi hi.

7Keima in khuavak le khuazing ka bitphua khawm hi;

        thupha le thusia ka puak khawm hi.
        TOPA ahi, Keima in hite theampo ka vawt hi.

8Keima in ngalzawna sia ngua bangin vantung pan ka zu sak tu a,

        a saang tu in lei kihong tu a
        thutanna le suatakna paak hong palh tu hi.
        TOPA ahi, Keima in hisia ka tung sak tu hi,” ci hi.

Bitphua TOPA le Tangthu

9A dangte theampo taw ma a kibang leibeal khat in

        ama a vawtpa kam nial ngam tu ziam?
    Tungman in beal seakpa tungah
        bang vawt ni ziam ci in dongh ziam?
        Beal in ama a vawt beal seakpa tungah thiam bate ci in phunsan ziam? *

10Akua in a nu a pate tungah,

        “Banghang hi bang keak a hong piangsak nu ziam?” ci ngam tu ziam?

11Israelte ii a thiangtho Pathian ahi,

        TOPA maisang atu thu a piangsak pa in,
    “Ka tate taw kisai in kei tungah thu nong dok natu hi kale
        kei in bang vawt tu kilawm hi ci in nong son thei natu thu na nei bua hi!

12Keima in leitung a vawtpa le

        tua tungah a teang tu minam a bitphuapa ka hi hi.
    Ka vaangletna taw vante ka phalkeak a;
        ni, tha le aksite ka uk hi.

13Ka sawmna bang a tangtut thei natu le

        nate thumaan a sua natu seam tu in Cyrus ka sawl hi.
    Ama khualhawna lampi theampo ka tangtan sak tu hi.
        Ama in ka khuapi, Jerusalem sa kik tu a,
        ka mi koltaangte suakta sak tu hi.
    Hi thu vawt tu in kuama in ama cial ngawlin, sumnguk pia ngawl hi” ci hi.
    Vaanglianbelpa TOPA in son zo hi.

14TOPA in Israel tungah,

        “Egypt le Ethiopiate hauna sia no atu hi tu a,
        a tun saang Seba mite sia na sila uh suak tu hi;
        thikkol kibul in na nung uh hong zui tu hi.
    Amate in note mai ah kunin,
        ‘Pathian sia note taw om khawmin– ama bekma Pathian hi’.

15A mite a ngum, Israelte ii Pathian sia,

        ama le ama a kisealcip Pathian ahi hi.

16Milim a vawtte a vekpi in a mai uh kizum sak tu hi;

        amate a vekpi a mai uh kimawl sak tu hi.

17Ahihang Israel ahile TOPA in ngumin,

        a ngal zawna a tawntung in kip hi.
        Ama mite a mai uh kimawl sak ngei ngawl tu hi,’ ci in pualaak tu uh hi,” ci hi.

18TOPA in vantungte bitphua a–

        ama sia Pathian ahi hi!
    Ama in leitung vawt a–
        a kip a kho suak sak hi.
    Ama in leitung a awngthong ngamtul vawt ngawlin,
        mihing tenna mun tu in piang sak hi.
    “Keima in TOPA ka hi a, Pathian dang om ngawl hi,

19Keima ii ka tupnate thu ku in

        ka son ngei bua a, ka phualseal bua hi.
    Kuama ten ngawl a awngthong ngam tulna munah
        kei hong zong tu in Israelte ka sawl bua hi.
    Keima in TOPA ka hi a, thumaan son in,
        A maan nate ka pualaak hi,” a ci pa sia ama ahi hi.

Leitung ii TOPA le Babylon ii Milimte

20TOPA in,

    “Kumpi ngam lal in a suakta minamte theampo awng,
        hong pai tek tavun; thu kisit tu in no mama om vun!
    A thing milimte taw thuangsia khawmin
        amate a ngum thei ngawl pathian tungah thungen mite–
        hi mite in bangma heak nei ngawl uh hi!

21Hong pai tavun a, na thu uh zum ah son vun;

        thu neite khat le khat kikum hen.
    Thupiang tute akua in taanglai in son khol ziam?
    A mite a ngum Pathian, TOPA sia Keima hi ngawl kana khi ziam?
        Keima ngawl pathian dang om ngawl hi.

22“Leitung mihing theampo te awng,

        tu in kei kungah hong kiheak tavun a, ngupna nga tavun!
    Keima bek Pathian ka hi hi.

23Ka kamciam sia maanin, kikheal ngawl tu hi.

    Keima in ciliaphuai takin ka kiciam hi.
        Mihing theampo hong pai in ka mai ah hong khupdin tu uh a,
        kei tungah thumaan tu in hong kiciam tu uh hi. *

24“Amate in keima taw bekin ngalzawna om a

        thahatna kinga hi ci tu uh hi;
        ahihang kei hong ngaimawte theampo in
        maimawlna thuak tu uh hi.

25TOPA ahi, Keima in,

        Jacob ii suan le paalte theampo ka suatak tu a,
        amate in kei hong pok tu uh hi.

Isaiah 46

1Hisia in Babylon ii pathiante bona thu ahi hi!

    Bel le Nebo sia khatvei lai in kibia a,
        ahihang tu in amate sia late tungah kisuan in,
        a toi ngannote vanhngit khat suak hi.

2Milimte in amate le amate kingum thei ngawl hi;

        amate kiman in ki paipui hi.
    Hi thu sia Babylon ii pathiante bona thu ahi hi!

3“Ka mite sung pan a taanglai

        Jacob suan le paalte theampo awng, hong ngai tavun.
    Na sua uh pan kipan kong ou kong pau hi.

4Keima in note Pathian ka hi a,

        na huai na teak na puakkan dong kong ou kong keam tu hi.
    Keima in note kong vawt a kong keamcing tu hi;
        note kong hu tu a, kong suatak tu hi.

5“Akua taw hong tee ngat tu nu ziam?” TOPA in ci hi.

        “Kei taw a kibang akua dang om ziam?

6Mihingte in a dangka ipte hongin khamte suakeak hi;

        toaiteena taw ngunte tee uh hi.
    Amate in milim pathian vawt tu in khamseak khat cial hi; taciang amate kunin tua milim bia uh hi.

7Amate in a liangko tungah suanto in pua uh hi;

        Ama om natu munah koi in, tua lai ah om a,
        koima dangah kin thei ngawl hi.
    Khat papo in ama tungah thungen le ama in zo thei ngawlin,
        ahibale ngimna khamna panin ngum thei ngawl hi.

8“Hi thu ciamtee vun, no mihing khialte awng;

        ka vawt sate ngaisun vun.

9Nidang lai a, a piang thute phawk vun;

        Keima bekma Pathian hi a,
        kei taw a kibang kuama dang om ngawl a hina thu phawk tavun.

10A kipatna panin a piang tu thu ka son khol zo hi;

        bang hong piang tu cisia taanghlai pek panin ka son khol zo hi.
    Ka tupnate tangtung ngawlin om ngei ngawl tu a,
        vawt tu ka sawm theampo ka vawt tu hi, ka ci hi.

11Nisuana sang panin mihing khat hong pai tu in ka sam hi;

        Ama in muthi bangin hong tuak sukin ka tup sate tangtung sak tu hi.
    Keima ii ka son sa bangma in, kivawt tu hi.

12“Ngal zaw natu khuala mama lai hi

        ci in a ngaisun no mihing thinpuite awng,
        kei hong ngai tavun.

13Zaw natu ni, kong theng sak pal tu a–

        khuala nawn ngawl het tu hi.
    Ka mualsuana ki haisaang sak ngawl tu hi.
        Jerusalem ka ngum tu a
        Israelte tua munah minthanna ka pia tu hi,” ci hi.

0 comments:

Post a Comment