Laithiangtho Dokna (Isaiah 49-50)

1. Ka pian ma, TOPA in ___ hi.
a. kei hong teal zo
b. sim lei bitphua
c. thupha hong pia

2. Ama in ka kammalte ___ sak hi.
a. namsau bangin hiam
b. hong pua
c. vaang hong piak

3. Note ngup tu hun hong thet ciang ___ pia tu hi.
a. suataakna lam
b. mukhol theina
c. maipha kong

4. Keima in mualliante kantan in ___ tu hi.
a. ka pai
b. lampi lian khat ka vawt
c. nguntui ka luang sak

5. ___ nang kong mangil thei ngei bua hi!
a. Israel awng
b. Jerusalem awng
c. Judah

6. Keima ii hu tu a ngak peuma ___ tu uh hi.
a. thin kiam ngawl
b. suaktakna ngaa
c. ngupna ngaa

7.  ___ in ama in kei hong lawp sak hi.
a. Zingsim
b. Nitaksim
c. Khuangai ciang

8. Kei hong saatte ka ___ hi.
a. nungzaang ka ngat
b. ngimh angaa  tu
c. thuk kik tu

9. Selno a, cilphii ciangin ___ hi.
a. khua ka ngaisun
b. Topa ka ko
c. ka ngat nginge

10. Pathian in ___ thu pualaak tu hi.
a. a vaangletna
b. mawna ka nei ngawlna
c. atealsa ka hi na

11. Langpante tung ah bang ki ci ziam?
a. Kadawm in
b. Zumh ah pai tawng
c. Kilemna vawt tawng

12. Langpante sia ___ puan bangin bo tu uh hi.
a. a kisawp thiang
b. chisan abaang
c. nget ii neak

Isaiah 49
Israel sia Minamte atu Khuavak
1Ngam khuala ah a teang minamte awng, ka thuson hong ngai tavun!
Ka pian ma in, TOPA in kei hong teal zo a, a naseam tu in kei hong see khol zo hi. *
2Ama in ka kammalte namsau bangin hiam sak hi.
Ama ii khut taw kei hong khoi hi.
Ama in thaltang bangin kei hong vawt a,
zaktawm thei tu in hong hiam sak hi. *
3Ama in ka tungah, “Israel awng, ka naseampa na hi hi;
nangma hangin, mihingte in kei hong pok tu hi,” hong ci hi.
4Keima in, “Ka seam zo hi, ahihang kimanna om ngawl hi!
Ka thatang theampo zangh siat zo hi veang i,
ahihang bangma ka tangtun bua hi,” ka ci hi.
Tua hi kale ka vaite hong panpui tu in
TOPA ka muang thei veve hi; Ama in ka sepna thaman hong pia tu hi.
5Ka pian ma in TOPA in nasep tu hong see hi;
ama in keima sia a mite kaikhawm kik tu le,
a kithethaang Israel mite kaikhawm kik tu in a naseam hong suaksak hi.
TOPA in upatna kei hong pia hi;
ama in ka thahatna bulpi ahi hi.
6TOPA in kei tungah,
“Nangma sep tu in nasep lian zaw khat ka nei hi. Ka naseampa awng.
A suakta lai Israel mite laamto tu bek hi ngawlin,
minamte tungah khuavak ahi tu in nang kong vawt tu hi–
tabangin leitung theampo in ngupna nga tu uh hi,” hong ci hi. *
7A ki thusim ngawlhet pa,
minamte ii etsat pa le ngam ukte ii naseam pa tungah
Israelte ii a thiangtho Pathian le ngumpa in hi bangin ci hi.
“Kumpite in na suatak hong mu tu a,
nang tungah zatakna hong lak tu in ding tu uh hi.
Kumpi tate zongin hong mu tu uh a,
nangma mai ah zatakna taw hong kun tu uh hi,” ci hi.
hi thu piang nanak tu hi, banghangziam cile
TOPA in a naseampa teal zo hi;
Israelte ii a thiangtho Pathian in a thuciamnate
Jerusalem a kipua kikna
8TOPA in a mite tungah,
“Note ngup tu hun hong thet ciang, maipha kong pia tu a,
huna nong ngette kong pia tu hi.
Note kong keam, kong hu tu a,
note tungtawn in mite theampo taw thuciamna khat ka vawt tu hi.
Tu laitakin a kinusia na ngam sungah,
note kong teang sak kik tu hi. *
9Keima in thongtaak mite tungah,
‘Suakta takin pai vun!’ ka ci tu a,
khuazing sungah a omte tungah,
‘Khuavakna ah pusuak vun!’ ka ci tu hi.
Amate sia mual tungah a taa tuute taw kibang tu uh hi;
10amate ngilkial ngei ngawlin dangko ngei ngawl tu hi.
Nisa le senneal sa in amate bangma tat sak ngawl tu hi,
banghangziam cile amate a itpa in lampui hi.
Ama in amate sia ciktui ah paipui tu hi. *
11“Keima in mualliante kantan in lampi lian khat ka vawt tu a,
ka mite khualhaw natu in lam khat ka pua tu hi.
12Ka mite sia ngam khuala, saksang le nitumna sang le
thang sangah a om Aswan khuapi panin hong pai tu uh hi,” ci hi.
13Vantungte awng, la sa vun! Leitung awng, lungdam in au vun!
Mualliante la sa in au hen!
TOPA in a mite heeneam in, ngimna a thuak a mite hesuak tu hi.
14Ahihang Jerusalem mite in,
“TOPA in eite hong nusia zo hi!
Ama in eite hong mangil zo hi,” ci uh hi.
15Tasia ciang TOPA in,
“Numei khat in ama ii tasen mangil in
ama ii hin le toai nausen it ngawlin om thei tu ziam?
A nu in a tasen a mangil zezen tha hial zongin,
keima in note kong mangil ngei batu hi.
16Jerusalem awng, nang kong mangil thei ngei bua hi!
Ka khutza lamlai ah na min ka at zo hi.
17“Nang hong pua kik tu mite hong theng nai zo a,
nang hong lalcip sakte tai tu uh hi.
18Na kiim na paam khuadak kakoai in bang thupiang ziam en in!
Na mite kikhawm uh a– inn ah hong cia uh hi!
Keima in a nungta Pathian ka hi tatak bangma in,
mothak khat in a kizepna suangmanpha a ki phatsak pui bangma in
na mite hangin na kiphasak tu hi.
19“Na ngam sia kisiacip in kinusia a–
ahihang tu in tualai ah
a teang tu hong pai mite atu in toi lei tu hi.
A kisiacip in nang hong nusia mite in
nang taw a kikhuala na ah kikhin tu uh hi.
20Ngamdang saltanna pan a piang na mite in
ni khat ni ciang, na tungah,
‘Hi leitangh toi lei hiat a–
ih ten natu a zaizaw kisamh hing!’ hong ci tu uh hi.
21Taciang nangma le nangma,
‘Patang hite theampo kei atu in akua in piang sak ziam?
Kei in ka tate bosua zo a ka nei thua zo nawn bua hi,
saltang in kei hong kinot keak a–
hi patangte akua in vaak thong ziam?
Keima nguak hong kinusia a–
hi patangte koisung pan hong pai hi thong ziam?’
na kici tu hi,” ci in zo kik hi.
22Vaanglianpipa TOPA in a mite tungah,

“Keima in minamte tungah lim ka lak tu a,
amate in na tate inn ah hong puak tu uh hi.
23Kumpite sia no tungah pate bang hong hi tu hi;
kumpinu te sia nute bang hong hi tu hi.
Amate in na mai uh ah kun sukin hong upat tu uh hi;
amate in note zatakna hong lak tu uh hi.
Tasia ciang TOPA ka hina thu na he tu uh hi;
keima ii hu tu a ngak peuma thin kiam ngawl tu uh hi,” ci hi.
24Ngalkap khat ii sutol sa vanhte na la kik thei tu ziam?
A thahat khat pa ii mat sa koltaangte na suatak thei tu ziam?
25TOPA in,
“Hong piang tu thute sia tabang keak ahi hi.
Ngalkapte ii mat sa thongtaakte ki lak sak tu a,
a thahatte ii sutol sate kimat sak tu hi.
Nang hong do peuma ka sim tu a, na tate ka suatak tu hi.
26Nang hong vawtsiate khat le khat ka kithatlum sak tu hi;
amate mihing thalup nopna le thin uukna taw a thin uh so tu hi.
Taciang minam theampo in kei sia, nang hong ngumpa le
hong suatak pa, TOPA ka hina thu he tu uh hi.
Amate in kei sia Israelte ii a thahat Pathian
ka hina thu he tu uh hi,” ci in zo kik hi.

Isaiah 50
1TOPA in, “Pasal khat in a zi a khul bangin
keima in ka mite hawlkeak hong sa nu ziam?
Tua ahile, zi khulna laite koisung ah om ziam?
Mihing khat in a tate sila in a zuak bangin,
keima in note saltang tu in zuak hong sa nu ziam?
Hi ngawl hi, noma mawna hangin saltang in a pai na hi uh a,
noma khut khialna hangin hong kihawl khia ahi hi.
2“Ka mite hun tu kong pai ciang
banghangin ka mite khat zongh in hong awlmawk ngawl ziam?
Ka sap ciang amate in banghang hong zo ngawl ziam?
Amate hun tu in keima thazawm lei ka hi ziam?
Ka thupiakna taw in tuipi tui ka kang sak thei a–
ngunte senneal ngam suak sakin, tui ki sap hu in
tua sungah a om ngasate thi hi.
3A thi sate atu khuangai bang keakin,
vantung sia ka zing sak thei hi,” ci hi.
TOPA ii Naseampa ii Thunitna
4Vaanglianpipa TOPA in a ngim a toite
ka thahat sak thei natu in ka pau tute hong hil zo hi.
Ama ii hong hil tute ka ngai thei natu in
zingsim in ama in kei hong lawp sak hi.
5TOPA in thu tel theina kei hong pia zo a,
keima in ama langpan ngawlin ka nungngat bua hi.
6Kei hong saatte ka nungzaang ka ngat hi.
Amate in kei hong selno zazan a, ka khamulte hong phai sak ciang le
ka maitang hong cilphii ciangin ka ngat nginge hi. *
7Ahihang amate ii hong zawnsak vawtna in kei bangma hong tat sak zo ngawl hi,
banghangziam cile Vaanglianpipa TOPA in kei hong hu hi.
Hong vawtsiatna ka thuak tenton hi.
Kei hong kimaimawl sak ngawl tu cisia ka he hi.
8Banghangziam cile Pathian hong nai a,
ama in mawna ka nei ngawlna thu pualaak tu hi.
Kei tungah akua in thu hong vawt ngam tu ziam?
Zum ah pai tek tawng!
Hong langpan tu in hong kuan tahen! *
9Vaanglianpipa TOPA mama in kei hong panpui a—
tua hi le akua in kei sia mawnei hi ci in tetti pang thei tu ziam?
Kei tungah thu hong vawtte theampo bo mang tu hi;
amate sia nget ii neak puan bangin bo tu uh hi.
10TOPA zakta in, a naseampa thu a ni note theampo awng,
na paina uh lampi zing tatak tha tu hi.
Ahihang TOPA muangin na Pathian uh suang vun.
11Ngualdangte lalcip sak tu a sawm note theampo sia
noma ii sawmnate in noma hong lalcip sak tu uh hi.
TOPA ama mama in hi thu piang sak tu hi;
thinngim lungmanna na thuak tu uh hi.

0 comments:

Post a Comment