Laithiangtho Dokna (Psalm 83-84)

1. Pathian awng, ___ in om heak in.
a. lawp
b. thazawm
c. thim khipkhep

2. Pathian a ensante in Pathian ___ hi.
a. nuisan
b. zia tel ngawl
c. leedo

3. Ngalte in Israel ngam suthamh le Israel sia ki ___ tu ci hi.
a. taangthu sung ki-at
b. mangil
c. huu

4. Pathian Endor te luang ___ sak hi.
a. lei ah a muat
b. vacim in ne
c. tuipi tung ah lam

5. Akuate in  “Pathian neisa leitangh theampo eima atu in la tawng” ci ziam?
a. Laphuakpa
b. Israelte
c. Ngalte

6. Laphuakpa in TOPA sia ___ ahi hunlam ngalte na he le uk hi.
a. Israelte Pathian
b. Vaang nei
c. leitung bup ukpipa

7. Laphuak pa in koi sung thangai mama ziam?
a. Hermon mual
b. Biakinn
c. Vantung ngam

8. ___ taw a nungta Pathian tungah lungdam in la ka sa hi.
a. Ka nuntakna theampo
b. Ka hatna theampo
c. Ka hi thei zaza

9. Biakinn naina ah ___ in bu sa hi.
a. vaakte
b.  Tonbawmte
c. thelei

10. Biakinn sungah teang a, ___ in mi lungdamte ahi uh hi.
a. ama na aseamte
b. a tawntung pokna lasate
c. Topa a zongte

11. Mihing ngilote inn sungah ka ten sangin ___ ka uk zaw hi.
a. Zion mual ah ten tu
b. Pathian inn kongkha cing pa
c. khutdawnget tu

12. ___ tungah ama in na phate khat zongh a haza bua hi.
a. A it te
b. A maan a seamte
c. Israelte


Psalm Late 83

Israelte ii A ngalte A zaw natu Thungetna

1Pathian awng, thim khipkhep in om heak in;

        huthe ngawlin om heak in, daitakin om heak in!

2En in! Na ngalte in leedo tu in hong tho a,

        nang hong ensante in nang hong leedo hi.

3Amate in na mite lang khat panin thuku vaihawmna vawt uh a;

        nangma ii na dal mite sungah sawmna vaihawm uh hi.

4Amate in, “Hong pai tavun, amate ngam sutham tawng,

        tua hile Israelte sia a tawntungin ki mangil tu hi,” ci uh hi.

5Amate in a ngealna tungah lungkim tek a,

        nang lang khat ah pang tek uh hi:

6Tuate sia Edom le Ishmaelte;

        Moab le Hagrite mite;

7Gebal, Ammon le Amalek mite le

        Philistia le Tyre mite ahi uh hi.

8Lot ii suan Ammon le Moab ii pawlpui

        a thahat Assyriate zongh amate sangah pang hi.

9Midian mite tung,

        Kishon Ngun a Sisera le Jabin tungah
        na vawt bangin amate tungah vawt in. *

10Endor ah nangma in amate na zothal a,

        amate luang lei ah a muat uh hi.

11Amate lampuite tungah

        Oreb le Zeeb tung a, na vawt bangin vawt in;
        Zebah le Zalmunnate na zaw thal bangma in amate a ukte theampo zo thal in, *

12Amate in; “Pathian neisa

        leitangh theampo eima atu in la tawng” ci uh hi.

13Pathian awng, amate sia

        leivui bangin thezau in a, vui ii seamkeak taangphawte bang hi sak in.

14Mei ii duithuk a kak bang,

        mualte meikuang in a kak sak bangin

15na vuipi suangval taw amate del in a,

        a kiitak huai na vuipi taw amate lau sak in.

16Amate maitang sia maizumna taw na dim sak in,

        TOPA awng, amate in na vaangletna tel sak in.

17Amate lelna thuakin a tawntungin lau ngawp tahen a,

        minsiat cipna sungah amate thi tahen.

18Nangma bekma in TOPA na hi hunlam

        leitung bup ukpi lianbelpa na hi hunlam amate in he tahen.

-------------------------------------------------

Psalm Late 84

Pathian Inn Thangaina

1Vaanglianbelpa TOPA awng,

        na Biakinn ka thangai mama hi.

2Tua munah ka om nuam mama hi!

        TOPA Biakinn sungah om tu ka thangai hi.
    Ka nuntakna theampo taw
        a nungta Pathian tungah lungdam in la ka sa hi.

3Tonbawmte ngangawn in bu sa a,

        pialpiate in amate buk tek nei hi;
        amate in na biaktau taw a kinaina ah a note koi uh hi,
        Vaanglianbelpa TOPA ka kumpipa le ka Pathian awng.

4Na Biakinn sungah teang a, a tawntung nang tungah

        pokna la a sate in mi lungdamte ahi uh hi.

5A thahatna nangma kung pan a ngate le

        a thiangtho Zion mualvum ah Pathian biak tu a lawpte in thupha ngate ahi uh hi.

6Amate in Baca kongaw kuam a kantan uh ciangin

        tua mun sia ciktui phulna mun hong suak a;
        tangngam ngua in ninghnote dim sak siat hi.

7Amate a papai uh ciang, hat va-ial uh a,

        amate in pathiante Pathian sia
        Zion mual tungah a mu tu uh hi.

8Ka thungetna hong za tan, TOPA

    Vaanglianbelpa Pathian awng.
        Hong ngai tan, Jacob Pathian awng,

9Pathian awng, na teal sa kumpipa

        kote kumpipa thupha hong piak sak tan.

10Ni khat na Biakinn sungah hun zakna sia

        leidang mun khat papo ah kum tulkhat zak sangin pha zaw hi;
    Mihing ngilote inn sungah ka ten sangin
        ka Pathian inn kongkha cing pa ka uk zaw hi.

11TOPA in ei hong sungsia pa le a minthang kumpipa hi,

        ama in cikna le minphatna taw eite thupha hong pia hi.
    A maan a seamte tungah
        ama in na phate khat zongh a haza bua hi.

12Vaanglianbelpa TOPA awng,

        nang hong muangte in bangza in a lungdam uh ziam!

0 comments:

Post a Comment