Laithiangtho Dokna (Psalm 85-86)

1. TOPA in __ hesuak zo hi.
a. leitangh
b. kei
c. Israel

2. ___ kik ba po leang kilemna hong kamciam hi.
a. Mawmawtna lampi tawn
b. Pathian atu ii-ciil
c. Ngal nei

3. Thutanna le kilemna ___ tu hi.
a. om khawm
b. om khawm ngawl
c. kingawngkoai

4. Mihingte thumaanna in ___banto tu hi.
a. lei panin van
b. mihing tun khat
c. leidawn dong bek

5. Pathian thutanna in vantung panin ___tu hi.
a. mu ngawl
b. ensuk
c. kicing

6. Leitangh in ___ piang sak tu hi.
a. zia-etna
b. mawna
c. anlaak tu tam mama

7. ___ nang tungah thu kong ngen hi.
a. Sunkhua teak
b. Zankhua teak
c. Zingsang sim

8. Ngimna hun sungah ___ hi.
a. nang kong ko
b. hong cia kik ka hi
c. suangpi na hi

9. ___theampo in na mai ah kun tu hi.
a.  Mihing
b. Minam
c. Ngam

10. Kheet nei ngawl het, ___natu hong hil tan.
a. na na ka sep
b. ka ciim
c. mi manpha ka hi

11. Mihing ___te in kei langpang tu in hong pai hi.
a. cimaw
b. kiphasak
c. siatson thei

12. Hong ensante in huna nong piak a mu uh ciangin ___ hi.
a. lamdang sa
b. ki sik kik uh
c. a mai zum tu uh

Psalm Late 85
Minam Nopsak natu Thungetna

1TOPA awng, na leitangh na hesuak zo hi;
        nangma in Israelte na nuamsa sak kik zo hi.

2Nangma in na mite mawnate na mai sak zo a,
        amate tatkhialna theampo na seal sak zo hi.

3Amate tungah na thin uukna teng na thai sak zo a,
        na thin uuk thangsiatna zongh na iip kik zo hi.

4Hong ciapui kik tan, Pathian kote hunpa awng,
        kote nong dik sak ngawlna bo sak in.

5Ko tungah a tawntungin nong thin uuk tu ziam?
        Na thin uukna thai ngei nawn ngawl tu ziam?

6Kote hong thahat sak kik tan;
        tua hile ko na mite in nangma kong pok kik tu uh hi.

7Tatsat ngawl a nong itna hong lak tan,
        TOPA awng, taciang nangma ngupna le huna kote hong pia tan.

8TOPA Pathian paunate ka ngai hi;
        ih mawmawtna lampi tawn kik ba po leang
        ama in ei a mite tungah kilemna hong kamciam hi.

9Ama a thasiate hun tu in ama kinging tatak a,
        ama hong ompuina taw hong huutna in ih ngam sungah kho tu hi.

10Ki itna le thumaanna ki situa tu a;
        thutanna le kilemna kingawngkoai tu hi.

11Mihingte thumaanna in lei panin van banto tu a,
        taciang Pathian thutanna in
        vantung panin ensuk tu hi.

12TOPA in eite hong nuamsa sak tu a,
        ih leitangh in anlaak tu tam mama piang sak tu hi.
13Thutang suana sia TOPA mai ah pai tu a,
        ama atu lampi sial khol tu hi.



Psalm Late 86
Hu ngetna Thungetna
1TOPA awng, hong ngai tan a, hong zo tan,
        banghangziam cile kei sia cimaw in thazawm khi hi.

2Kei sia na tungah hong thumaan ka hikom thina pan hong hun tan;
        kei sia na naseampa hi a nang hong muang ka hi ciang, hong hun tan.

3Nangma in ka Pathian na hikom,
        kei hong hesuak tan; sunkhua teak nang tungah thu kong ngen hi.

4Topa awng, na naseampa hong lungdam sak tan,
        banghangziam cile ka thu ngetnate nang kungah hong paito hi.

5Nangma in ko tungah nong dik a nong mai sak hi,
        nang tungah thu hong ngente tungah
        tatsat ngawl itna taw na kidim hi.

6TOPA awng, ka thungetna hong ngai tan a;
        hu ngen a kong auna hong za tan.

7Ngimna hun sungah nang kong ko hi,
        banghangziam cile nangma in ka thungetna nong zo hi.

8Topa awng, nang taw a kibang Pathian om ngawl hi,
        nang sep bang a seam kuama om ngawl hi.

9Na bitphua sa ngam theampo in
        hong pai in na mai ah kun tu a;
        amate in na letna hong pok tu hi. *

10Nangma in thahat in a lamdang nate na vawt hi;
        nangma bek Pathian na hi hi.

11Seam a nong oaite hong hil tan, TOPA awng,
        thumaan takin na thu kong ni tu hi;
        kheet nei ngawl hetin, na na ka sep natu hong hil tan.

12Ka thin theampo taw nang kong pok tu hi,
    Topa ka Pathian awng;
        Na letna sia a tawntung in ka thang sak tu hi.

13Tatsat ngawl a kei nong itna lian mama hi!
        thaankuul pan mama in nangma in kei nong suatak hi.
14Mihing kiphasakte in kei langpang tu in hong pai hi,

        Pathian awng;
        mihing tatkha hon pawl khat
        kei thatlum tu in hong hanciam hi
        nang hong thusim ngawl mihingte ahi uh hi.

15Ahihang Topa awng,
        nang sia, mihing a hesuak le
        a it Pathian na hi hi, a tawntungin a thin uai,
        a tawntungin a cingh le a thumaan na hi hi.

16Kei sang hong nga tan a kei hong hesuak tan;
        hong thakho sak tan a hong hun tan,
        banghangziam cile ka nu bangma in kei in na na kong seam hi.

17Na phatna a kitelna hong lak tan, TOPA awng;
        kei hong ensante in
        heenepna le huna nong piak a mu uh ciangin a mai zum tu uh hi.

0 comments:

Post a Comment