Laithiangtho Dokna (Samuel Khatna 11-12)

1. Ammon kumpipa in akuate thakhat sung umci ziam?
a. Jabesh
b. Israel
c. Moab

2. Akuate lampuipa in, Israel mibup ii mittang ziatsang khei sak tu thu son ziam?
a. Jabesh
b. Israel
c. Ammon

3. Saul in akhuital kap bangza ngo ziam?
a. 7
b. 2
c. 1

4. Akuana Saul athin so sak ziam?
a. Philestine
b. Pathian
c. Satan

5. Israel Judah kingawm ngalkap bangza pha ziam?
a. 330, 000
b. 600, 000
c. 700, 000

6. Saul sia kumpi pa hi ci'n koi sung ah ki tangko ziam?
a. Gilgal
b. Jerusalem
c. Hebron

7. Samuel in asepkhial a om le akua te ii mai ah maw hong sot ta vun ci ziam?
a. Topa mai ah
b. Saul mai ah
c. Topa le Saul

8. Samuel in akuate tung ah Topa nilkhia nu hi ci ziam?
a. Judah
b. Saul le anaseamte
c. Israel te ung

9. Samuel in Israelte ii kumpi anget huu a ___  tu ci hi.
a. ki pha sak
b. ki sik kik
c. Topa in hong kalsuan pui

10. Bangbangh hun laitak Samuel in Israelte atawpkhakbel paupui ziam?
a. Khuakhaal
b. Khuatuuk
b. Phalbi

11. Samuel in bang thu apian natu thu ngen ziam?
a. Ngal zaw natu
b. Nguazuh natu
c. Saul thupha ngaa natu

12. Israel te in bang ahi ngawl natu Samuel in thungen sak ziam?
a. Ngal lelh
b. Kial atun
c. A thi
Samuel Khatna 11
Saul in Ammonte Zothal
1Tha khat bang zawkciang Ammon Kumpipa Nahash in Gilead ngamkhen sung, Jabesh sangah a ngalkapte kuanpui in tua khuapi uumci hi. Jabesh mite in Nahash munah, “Ko taw kiciamna hong vawt tan a, taciang ka ukpa tu in kong saang tu uh hi,” ci uh hi.
  2Nahash ii zo kikna pan, “Thu khat na lungkim uh le no taw kiciamna khat vawt ma tawng: Israel mibup tung ah maizumna a pian natu in khat sim ii mittang ziatsang hong khel sak tu khi hi,” ci hi.
  3Jabesh lampuite in, “Israel ngambup ah kamtai ka pai sak natu uh in ni sali hun hong pia tan. Kuama in hong hu tuak bale kong tum tu uh hi,” ci uh hi.
  4Kamtaite Saul ii tenna Gibeah hong theng uh a, a thu a kison ciang mihingte sia thinkiamin hong kap uh hi.  5Saul sia a khuitalte taw lo panin hong cia zawk hiat bek hi a, “Bangtat nu ziam? Banghang mihingte theampo kap ziam?” ci in dongh hi. Amate in ma ii munah Jabesh pan a, kamtaite ii thupuak teng son uh hi.  6Saul in hi thu a zaak ciang, Pathian ii thaa in ama uk a, a thin so sakkeak hi.  7Ama in khuital nii la in, a bak in a at zawkciang, Israel ngam bup ah kamtai te sabak kengin pai sak a, kidop natu thu puak sak hi: “Ngal kisimna sungah Saul le Samuel ii nung a zui ngawl peuma a khuital tek uh tabangma in kivawt sak tu hi,” ci hi.
 Israel mite in TOPA in bang po hong law tha bana him ci in lau uh a, khat zongh kikhe ngawlin hong paikhawm tek uh hi.  8Saul in amate Bezak ah khawmtua hi; Israel pan 300,000 le Judah pan 30,000 pha uh hi.  9Amate in Jabesh panin kamtai te munah, “Na mipuite munah son vun, zing ciang sun maa in amate kisuatak tu hi.” Jabesh a mite in a thupuak uh a saan uh ciangin amate sia lungdam leilam uh a,  10taciang Nahash munah, “Zing ciangin hong tum tu khu hi, nong law nop po hong law tan,” ci uh hi.
  11A khuavak ni zingtuung in Saul in a mite sia pawl thum in khen a, Ammonte ngiaphual ah tum ngawpin Ammonte thatlum uh hi. Ni sun hun in amate thatlum uh hi. A suakta sun te amate nguak tekin tai thaap uh hi.
  12Tasia ciang Israel mite in Samuel munah, “Saul sia ih kumpi seam sak ngawl tu hi a ci te koi sungah om siat ziam? Ko tungah hong aap tavun, thatlum siat tu khu hi!” ci hi.
  13Ahihang Saul in, “Tuni in kuama kithi sak ngawl tu hi, banghangziam cile tuni in TOPA in Israel suatak hi,” ci hi.  14Taciang Samuel in amate munah, “Ih vekpi in Gilgal ah pai in, Saul sia ih kumpipa hi ci in khat vei taangko tawng,” ci hi.  15Tua ahikom amate a vekpi in Gilgal ah pai uh a, tua sung mun thiangthona ah Saul sia kumpipa hi ci in thang sak uh hi. Amate in kipawlkhop biakpiakna pia uh a, taciang Saul le Israek mite theampo in tua thu hangin poai khaam uh hi.

Samuel Khatna 12
Samuel ii Kikhen Thu Vaithakna

1Taciang Samuel in Israel mite munah, “Nong nget uh theampo hong vawt sak zo khi hi. Kumpipa khat no hong uk tu in hong pia zo khi hi,  2tu in no lam hong pui tu ama nei zo nu hi. Kei ka hi le huai in ka puak kaang zo hi, taciang ka tate sia no taw omkhawm nu hi. Ka khangno lai pan kipan tu dong na lampui uh hong seam zo khi hi.  3Hi sungah om khi hi. Ka sep ka vawt khat po ahi ngawl a om le TOPA le kumpipa a teal pa mai ah maw hong suan tavun. Mihing khat po ii khui ahizong, laa ahizong kong laak thong sak ngei ziam? Akua khat po hong theam ngei ziam? Ahibale kong nengniam ngei ziam? Khat po tung pan sumnguk kong saang ngei ziam? Hi bangin ka ngamta ngei le ka laak babang hong piak kik tu khi hi,” ci hi.
  4Mipite in zo a, “Hong theamin hong nengniam ngei ngawl ni hi. Kuama tung pan bangma hong la ngei ngawl ni hi,” ci uh hi.
  5Samuel ii a zo kikna pan, “Kei a sit baang ngawl het in nong mu uh sia TOPA le ama ii teal sa kumpipa in tetti hong pang tahen,” ci hi.
 “Hi ma hen, TOPA sia ka tetti uh hi,” amate in ci uh hi.  *
  6Samuel in zom suak a, “TOPA sia Moses le Aaron teal khia a, Egypt pan na pu na pate uh hong pusuapui sia hi.  7Tu in na omna tek ah ding vun, TOPA mai ah maw kong sot natu in na phaw kik tu uh thu kong son masa tu hi, TOPA ii na pute uh a hutkhiat natu nasep lianpi hong sepna thu no kong phawk sak tu a, TOPA mai ah note maw kong suan tu hi.  8Jacob le a innkuanpuite Egypt ah a pai uh ciang Egyptte in na nengniam uh a, na pute uh in TOPA munah hu ngenin au uh hi, taciang ama in Moses le Aaron pai sak a, amate in Egypt ngam panin amate pusua in, hi ngamah teang sak hi.  *  9Ahihang a mite in TOPA a Pathian uh mangil a, tasia ciang ama in Philistine te le Moab kumpipa le Hazor khuapi a teang ngalkap hon ukpi pa Sisera te in na pute uh sim sak in, zo sak hi.  *  10Tua zawkciang amate in TOPA tungah au in hu ngen uh a, hi bangin ci uh hi, ‘Ko sia maw zo khu hi, banghangziam cile nang kung panin kiheak khu hi, TOPA, taciang Baal le Astarte te ii milim ka bia uh hi. Ka ngalte uh kung pan hong suatak tan, tasia ciang nangma kong bia tu uh hi!’  *  11Taciang, TOPA in Gideon pai sak, a zawkciang Barak, tua zawkciang Jephthah, a khak bel in kei hong sawl hi. Ko khat ii sim in na ngalte khut sung pan no kong suatak uh hi, taciangin ngam muang takin na teang uh hi.  *  12Ahihang Ammonte kumpipa Nahash in no hong sim tu in a kithoai laitakin, TOPA sia na Kumpipa ahina pan na nilkhia uh hi, taciang kei munah, “Ko hong uk tu kumpipa khat dei khu hi,” nong ci uh hi.  *
  13“Tu in hi sungah na teal sa na kumpipa om hi; na nget uh sia ama hi a, taciang TOPA in ama sia no hong pia hi.  14TOPA na Pathian atu sep sak in, a thu ngai in, a thupiak na ni uh a, no le na kumpipa in ama nung na zui uh le na theampo a dik a pha in hong piang tu hi.  15Ahihang TOPA ii pau na ngai bua uh a, a thupiakte na ni bua uh le ama sia no le na kumpipa hong langpan tu hi.  16Tua ahikom na dinmun uh kholet vun, tua hile TOPA ii sep tu na lianpite na mu tu uh hi.  17Tu hun sia khuakhal laitak hi kana ngawl ziam? Ahihang thu kong ngen tu a, TOPA in vanto le ngua hong puak tu hi. Hi bangin hong pian ciang kumpipa khat na nget thong uh sia TOPA tungah nasia takin maw nu hi ci in na kiphawk tu uh hi,” ci hi.
  18Tua ahikom Samuel in thu ngen a, tua ni ma in TOPA in vanto le ngua pai sak hi. Taciang mipi theampo in TOPA le Samuel kiita uh hi,  19taciang Samuel tungah, “Nong hesuakna in, ka thi ngawl natu TOPA na Pathian munah thu hong nget sak tan. Tu in mawna dangte tungsia ah kumpipa khat ka nget uh maw ka hi uh hunlam ka phawk uh hi,” ci uh hi.
  20Samuel in, “Lau heak vun, siatna khaatna taza in vawt na hi uh hangin, TOPA kung panin kiheak heak vun, ahihang na lungtang theampo uh taw ama na sep sak vun.  21A maan ngawl pathian te zuan heak vun; amate in hong hu thei ngawlin, hong hunkhia thei ngawl hi, banghangziam cile amate sia a tak hi ngawl hi.  22TOPA in ciliap huai takin kamciamna vawt zo a, ama in no hong nusia ngawl tu hi, banghangziam cile ama in no sia ama ii mite in hong hi sak tu a khensat zo hi.  23Kei ka hile note atu thunget sak nawn ngawl mawna ka vawt tu sia TOPA in khaam hi. Tua hi ngawl zaw in, no atu a pha le a maan thute kong hil tu hi.  24TOPA thu ni vun a, thumaan takin na lungtang theampo uh taw ama na sep sak vun. Na lianpi no atu hong sep sak te ciamtee vun.  25Ahihang mawna na vavawt lai uh le no le na kumpipa uh sia hong kisusia tu hi.

0 comments:

Post a Comment