Laithiangtho Dokna (Samuel Masa 5-6)

1. Philistinete khuapi sia ___ hi.
a. Ashdod
b. Gath
c. Gaza

2. Philistinete ii pathian min bangziam?
a. Baal
b. Ashilon
c. Dagon

3. Banghun laitak milim sia Thukham Thingkuang mai ah lutu ziam?
a. Zingtuung
b. Zankim
c. Khuazing

4. Ashdod kiim le paam a mite sia TOPA in___ sak hi.
a. ta sel
b. atacil tha lup
c. meima pui vei

5. Thukham Thingkuang sia ___ pan Gath ah paipui uh hi.
a. Ashdodte
b. Jerusalem
c. Hebron

6. Philistia ngam ah Thukham Thingkuang tha bangza om ziam?
a. 3
b. 5
c. 7

7. Bangbangh khuite in, Thukham Thingkuang pua sak ziam?
a. Kanhak kibul ngawl khuipui
b. A tal cidam
c. Khuital cilngetsa

8. Akuate in, Thukham Thingkuang sia letsong ngawltaw heak kik ngawl tu ci ziam?
a. Philistinete
b. Levite
c. Mitbum he te

9. Beth Shemesh-te, bang ahi laitak Thukham Thingkuang theng ziam?
a. Zungtaang at laitak
b. Kikhop laitak
c. Ngal kingin laitak

10. Thukham Thingkuang taw kisai Beth Shemesh mite ii nasepna akuate in en ziam?
a. Israelte
b. Gathte
c. Philistine kumpi nga

11. TOPA in Beth Shemesh khua mite 70 banghang thatlum ziam?
a. Thukham Thingkuang a et hang
b. Thukham Thingkuang tham
c. Pathian awlmawk ngawl

12. Beth Shemesh te in, Akuate tung ah Thukham Thingkuang la in sawl ziam?
a. Ashilon
b. Gath
c. Kiriath Jearimte

Samuel Khatna 5
Philistinete sungah Thukham Thingkuang
1Philistinete in Thukham Thingkuang a mat sak zawkciang, Ebenezer panin amate khuapi Ashdod ah pua uh a, 2amate ii pathian Dagon ii biakinn sungah tumpui in, a milim hui ah koi uh hi. 3A zing ciang zingtuungin Ashdod mite in milim sia Thukham Thingkuang mai ah lutu in a liik mu uh hi. Tua ahikom amate in phongto in a omna ngei ah koi kik uh hi. 4A zing kik ciang zingtuungin amate in a milim sia Thukham Thingkuang mai ah a liikin mu kik uh hi. Tusia ciang a lu le a khutte nii taltan in kongkha hui ah liik a; a pumpi bekma kinusia hi. 5(Tua hu in tuni dong ma Dagon ii thiampite le Ashdod a biakpiakna a vawt a mite theampo in tua mun sia pai ngei po in pai ngawlin kan valian uh hi.).

6TOPA in Ashdod a mihingte sia nasia takin daan pia a, lau sak ngawp hi. Amate le kiim le paam a mite sia TOPA in ngim pia a, meima pui veu vei sak hi. 7Amate in tua thupiangte a mu uh ciang, “Israelte ii Pathian in ei le ih pathian Dagon daan hong pia hi. Thukham Thingkuang ei kungah ki om sak thei nawn ngawl tu hi,” ci uh hi. 8Tua ahikom amate in Philistine kumpi nga teng samin, “Israelte ii Pathian Thukham Thingkuang sia bang law tu hi ziam?” ci in dongh uh hi.

Amate in, “Gath ah paipui tavun,” ci in zo uh hi; tua ahikom amate in Philistinete ii khuapi dang khat ahi Gath ah paipui uh hi. 9Ahihang tua sung a thet ciang TOPA in tua khuapi sia daan ma pia a, patauna nasia takin om hi. Khuapi sungah mihing theampo, a huai a moi kibangin meima pui vei sak hi. 10Tua ahikom amate in Thukham Thingkuang sia Ekron a kici Philistinete khuapi dang khat ah puak uh hi; ahihang tua sung a thet ciang, mihingte hong au uh hi, “Israelte Pathian ii Thukham Thingkuang sia ei theampo hong thatlum tu in hi sungah hong puak hi,” ci uh hi. 11Tua ahikom Philistine kumpite theampo samin, “Israelte ii Thukham Thingkuang sia, ei le ih innkuanpuite hong thalup ngawl natu in, ama ii omna ngei ah puak kik tavun,” ci uh hi. Pathian in nasia takin daan pia ahikom khuapi sung bup ah patauna om hi. 12A thi ngawlte zongh meimapui vei ahikom mihingte in amate ii pathiante munah hu ngen uh hi.

Samuel Khatna 6
Thukham Thingkuang A heak kikna
1Philistia ngam ah Thukham Thingkuang tha sali a om zawkciang, 2mihingte in thiampite le mitbum he te sam uh a, “TOPA ii Thukham Thingkuang sia bang law tu hi ziam? Ama ii omna ngei ah puak kik tu ih hile, bang taw puak tu hi ziam?” ci in dongh uh hi.

3Amate in, “Israelte Pathian ii Thukham Thingkuang na heak kik sak tu uh le na mawna uh te hu in letsong khat taw na kikop sak uh kul tu hi. Thukham Thingkuang sia letsong khat ngawl taw heak kik thei ngawl tu hi. Tabangin note na dam tu uh a, banghangin ama in no daan hong pia tawntung ziam ci in na he tu uh hi,” ci uh hi.

4“Bang letsong pia tu hi ziam?” ci in mite in dongh uh hi.

Amate in zo kik a, “Kham taw kivawt meimapui lim nga le Philistine kumpi khat sim atu kham sanchiim nga hi tu hi. Ngimna lianpi sia a kibangin no tung le kumpi nga teng tungah hong tung hi. 5Meima pui le sanchiim, na ngam buppi ah ngim hong piate ii lim te vawt in, Israelte Pathian sia upat vawt tu nu hi. Tua hile ama in noma, na pathian te uh le na leitangh daan hong piakna tawp tha tu hi. 6Egypt kumpipa le a mite bangin banghangin na thin uh sah sak tu nu ziam? Israel mite ii Egypt a nusiat dong Pathian in Egyptte a mamaw bangin a vawt sia ciamtee vun. 7Tua ahikom leang thak khat vawt vun a, kanhak a kibul ngei ngawl khuipui nii la in, leang ah thua vun, a khuinote sia khuibuk sungah beng kik vun. 8TOPA ii Thukham Thingkuang sia la in, leang tungah suan vun, taciang na mawna uh hu in letsong na piak tu uh, kham limnote sia thingkuang dang khat sungah a kungah koi vun. A pai natu lampi ah ama le ama a pai natu a leang sia kipan sak vun. 9Tua zawkciang en vun, Beth Shemesh sang a zuan le Israel Pathian in, hi a kiitak huai tuasiatna hong puak hi ci in ih he tu hi. Tabang ahibale, ngimnate sia ama ii hong puak hi ngawl a, a hun taw kizui in a piang hi, ci in ih he tu hi,” ci uh hi.

10Amate in a kisawl bangin ngamta uh hi: amate in khuipui nii la in leang ah thua uh a, khuinote sia khuibuk sungah khumcip uh hi. 11Amate in Thukham Thingkuang sia leang tungah, meimapui le sanchiim limte kikoina thingkuang taw a koi khawm uh hi. 12Khuipuite in Beth Shemesh sang zuan tu in dingkhia a, tangtan in pai a, lam a pial bua hi. Amate sia a pai kawmin haam uh hi. Philistine kumpipa nga teng in Beth Shemesh ngamngi dong zui uh hi.

13Beth Shemesh khua mite, kuam sungah zungtaang at in a om laitak thakhat thu in a etto uh le Thukham Thingkuang mu uh hi. Amate in a mu ciangin lungdam leilam uh hi. 14Beth Shemesh khua ah a teang Joshua a kici pasal khat ii lo sungah a leang hong pai a, suangpi khat ii hui ah tawlnga hi. Mihingte in leang sia sem tham in, khuipuite ngo a, TOPA tungah meihal biakpiakna in nei uh hi. 15Levite in TOPA ii Thukham Thingkuang le kham limnote a kikoi thingkuang sia laamto in, suangpi lian sia ii tungah koi uh hi. Tua zawkciang Beth Shemesh khua mite in meihal biakpiakna le a dang sangaw biakpiakna te TOPA tungah vawt uh hi. 16Philistine kumpi nga teng in hisia en uh a, tua zawkciang tua ni ma in Ekron ah cia kik uh hi.

17Philistine mite in a khuapi ngate Ashdod, Gaza, Ashkelon, Gath, le Ekronte atu in khua khat ah khat tek a kham meima pui nga sia TOPA tungah mawmai natu in pia uh hi. 18Philistine kumpi ngate ii uk ahi a ki uum khuapite hi kale, a ki uum ngawl khua note hi kale khuapi sim atu in kham sanchiim khat tek zongh pia sii hi. TOPA ii Thukham Thingkuang koina Beth Shemesh khua mi Joshua ii lo sungah a om suangtumpui sia tua lai ah a piang thu te heak natu in tuni dongin omlai hi.

19Thukham Thingkuang sung a et hu in Beth Shemesh khua mite TOPA in mihing sawmsali thatlum hi. Taciang TOPA in tabangin nasia tak thalupna a thuak sak hu in a mite tau uh hi.

Kiriath Jearim ah Thukham Thingkuang
20Tua ahikom Beth Shemesh mite in, “Hi a thiangtho Pathian, TOPA mai ah akua peuma dingtang zo tu hi ziam? Ei taw a kikhuala thei natu in ama koi sungah puak tu hi ziam?” ci uh hi. 21Amate in kamtaite pai sak a, Kiriath Jearimte munah, “Philistine te in TOPA Thukham Thingkuang hong heak sak kik zo hi. Hong paisuk tavun a la vun,” ci uh hi.

0 comments:

Post a Comment