Laithiangtho Dokna (Thupulaakna 3-4)

1. Pathian in akua tung ah kam vaitha ziam?
a. Thaa le aksi sali a neipa
b. Kham lukhu anei pa
c. Thik milim khat ah

2. Sardis khua-te in, abang thiangtho sak ziam?
a. A laltin
b. A Puan
c. A thinsung

3. Philadelphia ah Jew mi hi ngawl napi Jew ci'n akison om hi.
a. Laodicea
b. Sardis
c. Philadelphia

4. ___pawlpite sia sa la sa ngawl vot la vot ngawl hi.
a. Laodicea
b. Philadelphia
c. Sardis

5. Laodicea pawlpi tung ah akua ii kam vaithak ziam?
a. Vantungmi
b. Amen
c. Muvanlai

6 Ka it te a vekpi, ___ pia hi.
a. thupha
b. kham mei vak ka
c.  tei in daan ka

7. Bangtaw akibang awnging in "Hi sung hong pai to tan..." ci ziam?
a. Lemle
b. Tawpi aw
c. Huisuangval taw

8. Kumpi tokhum ii kiimkot ah kumpi tokum bangza om ziam?
a. 7
b. 12
c. 24

9. ___ pan khualeng vazal te hong pai a, nging valum in vanto hi.
a. Saksang
b. Vantung
c. Kumpi tokhum

10. Kumpi tokhum a pang khat sim panin ___ uumci hi.
a. Vantungmite
b. Meikuang
c. nganhing li in

11. Nganhing 4 ii  a mai theampo bangtaw kidim ziam?
a. Meima
b. Mittang
c. Chisan

12. Nganhingteng in Topa apok uh ciang upa te bang hi ziam?
a. Naamsau dok
b. Topa mai ah bok suk
c. Meila det tu kipan

Thu Pualaakna 3
Sardis tungah Kam vaithak
1“Sardis khua pawlpi ii kamtai vantung lalang tungah hi kam vaithak teng at in:

“Hisia in Pathian ii thaa sali a neipa le aksi sali a neipa ii hong kam vaithak hi. Nang in bangteng vavawt ci in kong he hi; thi nginge na hihang na nungta hi, ci in na minthanna kong he hi! 2Tua ahikom khanglo in a, na nei sunteng a thi cip ma in tha kho sak in. Banghangziam cile na sep teng sia ka Pathian mai ah cing tak ngawl lai hi, ci in kong mu hi. 3Tua ahikom note hong kihil sa le na zaak sate phawk kik tavun; tua thute ni vun a, na mawna uh pan kisiik kik vun. Na khanglo bua uh le, note kungah nguta bangin kong pai tu a, kong pai tu a hun ngangawn zongh na he batu uh hi. * 4Ahihang tua sung Sardis khua ah a om pawlkhatte in, na puansilh uh na thiang sak zo uh hi. Puankaang silh in kei taw na vak khawm tu uh hi, banghangziam cile tabang tu in na kilawm uh hi. 5Zawna a ngate in hi bang puankaang a silh tu hi, taciangin amate min sia a nungtate min khumna laibu sung pan ka phiat batu hi. Ka Pa le a vantung lalangte mai ah amate sia keima neisa ahi hi, ci in a kilangh takin ka thangsak tu hi. *

6“Bil na nei uh le pawlpite tungah Thaa paunate ngai vun!

Philadelphia tungah Kam vaithak
7“Philadelphia khua pawlpi ii kamtai vantung lalang tungah hi kam vaithak teng at in:

“Hi kam vaithak sia a thiangthopa le a thumaanpa tung pan ahi hi. Ama in David ii neisa tawtang nei a, kongkha a hon ciang kuama in a khak thei bua hi, taciang kongkha a kha ciang kuama in a hong thei bua hi. * 8Note bang vawt ci sia kong he hi; vaangletna tawm nei hi ci in kong he hi; ka hilnate nong zui uh a, kei tungah nong thumaan uh hi. Na mai uh ah kuama ii kha thei ngawl kongkha khat ka hong zo hi. 9Ngai vun! Jew mi ahi papeu ngawl bul Jew mi ka hi ci a, a leeilot, tua Satan pawlte ahile, na peang uh ah a bok tu in kong pai sak tu hi. Amate theampo in note kong it sia he tu uh hi. * 10Thuak kenkon natu kong thupiakte, keamcing na hi uh komin, leitung bup mihingte ze-et tu in, ngimna hong pai ciang, note zongh kong keamcing tu hi. 11Hong pai pal tu khi hi, kuama in na zawna tel uh hong suu zawk ngawl natu in, na neisun uh teng keamcing tavun. 12A zo pa sia ka Pa Pathian Biakinn khuam ka suak sak tu a, ama in a nusia batu hi. Ama tungah ka Pa Pathian min le ka Pathian omna van pan a hong tuaksuk tu Jerusalem khua thak, ka Pathian khuapi thak ii min ka at tu hi. Ama tungah ka minthak zongh ka at tu hi. *

13“Bil na nei uhle pawlpite tungah Thaa ii paunate ngai vun!

Laodicea tungah Kam vaithak
14“Laodicea pawlpi ii kamtai vantung lalang tungah lai at in:

“Hisia in Pathian ii bitphua sa theampo ii pian kipatna, a maan tetti, a thumaan Amen ii hong kam vaithak ahi hi. * 15Na vawtsate ka he hi: Nang sia sa le sa ngawl, vot le vot ngawl, ci in hong he khi hi. Na sa le sa vet, na vot le vot vet lete kong oai hi. 16Ahihang sa le sa ngawl, vot le vot ngawlin a lum bek na hikom ka kam sung pan hong sia kik tu khi hi! 17Nang in ‘Kei sia hau in ki mangthei ngawp ing; ka kisap theampo nei ing,’ ci ni hi. Ahihang bangza in zawngkhal in, hesuak huai na hi hunlam na kihe bua hi! Nangma in zawng a puansilh sel in mittaw ni hi. 18Tua ahikom ngaisutna pha kong piakna panin, na hau natu in kei kung pan kham, kham ciitak hong lei tan. A maizum huai pum nguaktang a na om sia na kiseal natu in, puankaang zongh hong lei tan. Khua na mu thei natu in, na mittang a na noi tu, za pawlkhat hong lei tan. 19Ka it te a vekpi in, tei in daan ka pia hi. Tua ahikom na thin takpi taw in, na mawna pan kisiik kik in. * 20Ngai vun! Keima in kongkha ah dingin ka kingh hi; khat po in ka aw hong za in kongkha hong hon le, inn sungah tumin, ama taw an ne khawmin ama zongh kei taw an ne khawm tu hi. 21Kei zongh zawna nga zo a, tu in ka Pa kung kumpi tokhum tungah ka to bangma in zawna a nga po ii tungah keima kung ka kumpi tokhum tungah to thei natu thu ka pia tu hi.

22“Bil na nei uh le pawlpite tungah Thaa ii paunate ngai vun!

Thu Pualaakna 4
Vantung ah Biakpiakna
1Hi santak ah mu kholna dangkhat ka nei a, vantung ah kongkha khat kihong sa in a om ka mu hi.

Taciangin lemle aw taw a kibang ka zaak ngeisa ahi kei hong paupuina awnging in “Hi sungah hong paito tan, tua zawkciangin bangteng piang tu ziam, ci in kong lak tu hi,” hong ci hi. 2Thakhat thu in Thaa in kei hong uk hi. Tua mun vantung ah kumpi tokhum khat om a, a tungah mihing khat to hi. * 3Ama maitang sia jasper le carnelian suangmanphate bangin, taang a, tasia ciang a kumpi tokhum buppi kiimkot ah emerald suanghing bang ahi sangun in uumci hi. 4Kumpi tokhum ii kiimkot ah a beam in, kumpi tokhum dang kul le li om a, tuate tungah upa kul le li puankaang silh in, kham kumpi lukhu khu in to uh hi. 5Kumpi tokhum panin khualeng vazal te hong pai a, nging valum in vanto hi. Pathian thaa salite ahi meisip sali a kide te kuang hi. * 6A kumpi tokhum mai ah crystal suangmanpha bangin a thiang vakil limlangh tuipi taw a kibang khat zongh ka mu hi.

Kumpi tokhum kiim a pang khat sim panin a nungta nganhing li in uumci a, a nung a mai theampo mittang taw kidim hi. * 7A masa bel sia tawpi taw kibang hi; a niina sia khuital taw kibang hi; a thumna sia mihing maitang nei hi; a lina sia muvanlai leang bang ahi hi. 8Nganhing lite khat simin tha luk tek nei a, taciang tua thate sungsang le puasang ah mittang taw kidim uh hi. Sun taw zan taw amate in la sak a tawlnga ngei bua uh hi:

“Thiangtho, thiangtho, thiangtho hi
Topa Pathian vaanglianpipa
a om sa, a omlai, hong pai pheang tu pa hi,” ci uh hi. *
9Kumpi tokhum tungah a to pa, a tawntung pan a tawntung dong, a nungta pa tungah nganhing li teng in vaangletna, upatna le lungdam kona la sa uh hi. 10Tabangin a sep uh ciangin upa kul le lite sia kumpi tokhum tung a to Topa mai ah boksuk in, tawntung pan tawntung dong a nungta pa bia uh hi. Amate in a kumpi lukhute sia kumpi tokhum mai ah nga suk in,

11“Ka Topa le ka Pathian!
Minthanna, upatna le vaangletna saang tu in na kilawm hi.
Banghangziam cile nangma in
na theampo na bitphua hi.
Taciangin nangma deina taw
amate tungah pianna le
nuntakna na pia hi,” ci uh hi.

0 comments:

Post a Comment