Laithiangtho Dokna (Thupulaakna 5-6)

1. Akua khut sungah laizial kimu ziam?
a. Tokhum tung a to pa
b. Vantungmi
c. John

2. Laisia ii tung ah tepteena bangza om ziam?
a. 7
b. 12
c. 3

3. Laizial baltham in ahong thei tu pa sia bang nam sung pan ziam?
a. Israel
b. Epharaim
c. Judah

4. Tuuno in kii bangza nei ziam?
a. 7
b. 12
c. 2

5. Kumpi tokhum, nganhing li le upate kiimkot ah akuate ding ziam?
a. Vantung lalang
b. Minam tatuam
c. Thuummite

6. Vaang, hauna, ciimna asaang tu in a kiphu sia se ___ hi.
a. Vantungmi
b. Tealtuamte
c. Tuuno a kithatlum sia

7. Siphu kaang  tungah a to pa in ___ toai hi.
a.  thal khat
b. naamsau
c. lum khat

8. Siphu san tung a to pa in ___ toai hi.
a. naamsau
b. thaltang
c. aksi

9. Siphu vom tung topa in ___ toai hi.
a. naamsau
b. thaltang
c. khaikhin kop khat

10. Siphu puang tungah a to pa ii min sia ___ hi.
a. Thina
b. thupha
c. hilna nam 7

11. Tuuno in tepteena a lukna a hon ciang ___ hi.
a. Zinh hong liing
b. khua leng
c. huisuangval kipan

12. Mihing theampo sia ___ ah bu uh hi.
a. leinuai kawhawng
b. senneal ngam sung
c. suangpite nuai

Thu Pualaakna 5
Laizial le Tuuno
1Kumpi tokhum tung a to pa ziatsang khut sungah laizial khat ka mu hi; tasia in a lang nii dim lai ki at a, tepteena sali taw kituum hi. * 2Taciangin vantung lalang a hat mama khat ka mu a, ama in awnging tak taw, “Akua in hi tepteenate a baltham tu le laizial a hong tu in kiphu ziam?” ci in au hi. 3Ahihang vantung ah ahizong, leitung ah ahizong, leinuai ah ahizong, tua lai sia hongin a sungah a ki atte a en thei tu a om bua hi. 4A hong thei tu le, a sung a en thei tu a kiphu kuama kimu ngawl ahikom nasia takin ka kap hi. 5Tua zawkciang upate khat in, kei tungah, “Kap heak in, En in! Judah minam sung panin Tawpi ahi, David suan a lian pa in zawna nga zo a, ama in tepteena salite baltham in laizial hong thei tu hi,” hong ci hi. *

6Tua zawkciangin kumpi tokhumte zanglai, nganhing lite le upate ii a kiim uumna sungah Tuuno khat a ding ka mu hi. Tuuno in a kithatlum sa bang keak ahi hi. Ama in kii sali nei a, mittang sali nei hi, tuate sia Pathian ii thaa salite hi a, leitung theampo ah a kipai sakte ahi hi. * 7Tuuno in pai in kumpi tokhum tungah a to pa ziatsang khut pan in, laizial sia la hi. 8Tabang a vawt ciangin, nganhing li teng le upa kul le li teng sia tengtong khat le ngimnamtui taw a kidim khamvaan khat taw Tuuno mai ah kunsuk uh hi. Tuate sia Pathian mihingte thungetna ahi uh hi. * 9Amate in la thak sa uh a:

“Nangma in laizial la tu le
tepteena hong tu in na kilawm hi.
Banghangziam cile nangma hong kithatlum zo a, na kipumpiak biakpiakna taw,
Pathian atu in, be sung phung sung sim, kam namcin sim, ngamsim le minam sim panin, mihingte na lei zo hi. *
10Nangma in amate sia Pathian atu
a seam tu in thiampi ngam mite na suak sak zo a,
taciang amate in leitung uk tu uh hi.” *
11Taciangin ka et kik le, tul tam mama le mak tam mama a pha vantung lalangte aw ka za hi! Amate in kumpi tokhum, nganhing li teng le upate kiimkot ah dingin, * 12nging takin la sa uh hi:

“Tuuno a kithatlum sia in
vaang letna, hauna, ciimna, le thahatna upatna, minthanna le
pokna, a saang tu in kiphu hi!” ci uh hi.
13Taciangin vantung, leitung, leinuai, tuipi sung-vannuai ah nuntakna a nei theampo in hi bangin la a sak ka za hi:
“Kumpi tokhum tungah a to pa le
Tuuno tungah pokna,
upatna, minthanna le
thahatna a tawntung le
a tawntung in om tahen!”
14Nganhing nungta li teng in “Amen!” ci in zo uh hi. Taciangin upate in bok sukin, bia uh hi.

Thu Pualaakna 6
Tepteenate
Tua zawkciang Tuuno in teptenate sali sung pan a masabel sia a hon ka mu a, nganhing nungta lite sung pan khat in, vanto bang ahi aw taw, “Hong pai tan!” hong ci hi. 2Ka et le, siphu kaang khat ka mu hi. A tungah a to pa in thal khat toai a, kumpi lukhu khat kipia hi. Ama in ngalzopa ii ngal zo tu in a kuan bangin siphu tungah to in kuan hi. *

3Taciangin Tuuno in tepteena a niina sia hong hi, tasia ciang nganhing a niina sia in, “Hong pai tan!” hong ci hi. 4Siphu dang khat hong pusuak a, a san ahi hi. Mihingte khat le khat a kithalup natu in, a tungah a to pa sia leitung ah ngal kidona pian sak natu vaang kipia hi. Ama sia namsau lian khat kipia hi. *

5Tasia zawkciang Tuuno in tepteena a thumna sia hong hong a, nganhing a thumna sia in, “Hong pai tan!” hong ci hi. Ka et le siphu vom khat om hi. A tungah a to pa in a khut sungah khaikhin kop khat toai hi. * 6Nganhing lite sung pan khat ii aw tu bangin ka zaak khat in, “Ni khat thaman sia zungtaang hai khat, ni khat thaman tu mangtaang hai thum hi. Ahihang olive thingte le sapit nguite na lal sak heak vun!” hong ci hi.

7Tua zawkciang Tuuno in tepteena a lina sia hong a, nganhing nungta a lina sia in, “Hong pai tan!” hong ci hi. 8Ka et ciang, siphu puang khat ka mu hi. A tungah a to pa ii min sia Thina hi a, a nung panin Hell in zui hi. Leitung ah a teangte see li sua see khat sia amate in ngal taw, kialpi taw, natna le ngamsate taw thalup thei natu in thu kipia hi. *

9Tua zawkciang Tuuno in tepteena a ngana hong baltham hi. Biaktau nuai ah, Pathian kammalte a than sak uh hu le thumaanna taw tetti a panna hu a, a kithatlum te ii thaa te ka mu hi. 10Amate in awnging tak taw au uh a, “Vaanglianpipa Topa, a thiangtho a maan pa awng! Leitung ah kote hong that mihingte tungah thu na khen tu le, daan a piak tu sia bang tan vei khua ngei lai tu ziam?” ci uh hi. 11Amate khat sim sia puantual kaang khat tek kipia hi. Taciangin amate a kithalup bangma in a nasep puite le a suapuite a kicing za dong a kithalup mateng a ngak zii lai natu in sawl uh hi.

12Tua zawkciang Tuuno in tepteena a lukna a hon ka mu hi. Zin nasia takin hong liing a, ni sia puansia vom bangin hong vom a, tha sia chi bangin sancip hi. * 13Vui nasia takin va a, theikungte a thin ngawp ciang, a nga ungte lei ah a pul bangin aksite lei ah taaksuk uh hi. * 14Van sia laidal pheak bangin kizial in bomang a, mual theampo le tuikulh theampo amate omna mun pan kikhiin siat hi. * 15Tasia ciang leitung kumpite le ngam ukte, ngalkap mangte, sumhaute, a thahatte, a dang mihing theampote, silate, sila ahi ngawlte, leihawng sung le mualtung ah suangpite nuai ah bu uh hi. * 16Amate in mualte le suangpite munah, “Ko tungah hong cimsuk ka heu vun. Kumpi tokhum tungah a to pa ii mittang pan le Tuuno ii thin uukna panin, hong seal tavun. * 17Amate ii thin uukna a kiitak huai mama Ni sia hi sungah hong theng hi. Akua in thuak zo tu ziam?” ci uh hi

0 comments:

Post a Comment