Laithiangtho Dokna (Isaiah 53-54)

1. TOPA in naseampa sia koisung ah zung atha thingkung hi le uk ziam?
a. Luithiangtho hui
b. Leingum sungah
c. Olive mual

2. Ama in ih natna tu teng thuakin, ih ___ teng pua hi.
a. mawna
b. lampi
c. ngimna tu

3. Ih mite ii khialnate hu in ama ___ hi.
a. hong kilangh
b. leitung hong tuak
c. kithatlum

4. Ama in leeilot thu son ___ ngawl hi.
a.  ngei
b.  nuam
c.  sak

5. Ama sia akuate sungah upatna dinmun kipia tu ziam?
a. Jews minamte
b. Milian lemi thahatte
c. Gentilete

6. Ama in mimawte ii mawna a kimai sak natu in ___ hi.
a. a tapa sawl
b. thu pia
c.  thunget sak

7. ___ awng, ta tam mama na nei tu hi.
a. Israel
b. Numei nu
c. Jerusalem

8. Noah tung ah TOPA in bang kamciam ziam?
a. Tuiliim nawn ngawltu
b. Teambaw vawt natu
c. Nguazuh sak tu

9. Jerusalem awng, na phungkawngte ___ ka ciang kik tu hi.
a. lametna
b. suangmanpha taw
c. uksuang taw

10. TOPA in hiam a seak thikseak pa, ___ hi.
a. thuhil
b. thatlum tu
c. bitphua

11. ___zongh in bangma hong law zo ngawl tu hi.
a. Huisuangval
b. Doaite
c. Ngalhiam pha bel

12. Ka naseamte ka panpui tu a, ___ ka pia tu hi.
a. zawna
b. thahatna
c. ngamlua


Isaiah 53
1Mihingte in,
“Tu a ih thupuak akua in um thei tu ziam?
Hi thu sungah TOPA ii khut akua in mu thei tu ziam? *
2Leingum sungah zung a tha thingkung no khat bangin
ama ii naseampa a khanto sia TOPA deina ahi hi.
Ama ih et nop natu in a zatak huai a meal ip laak tu bangma om ngawl hi,
ih thinbot natu bangma om ngawl hi.
3Ama ih zawngsak a, ih nial hi; ama in natna ngimna thuak hi.
Ama sia kuama in en beak ngawlin– bangma in ih heang bua hi.
4“Ahihang ama in ei ih natna tu teng thuakin, ih ngimna tu teng pua hi.
Tua kimlai in ama thuakna sia
Pathian ii daan piak hi ci in ih ngaisun hi. *
5Tabang hi ngawlin eite khialna hangin ama in liamna thuak a,
ih siatna hangin vuakna thuak ahi hi.
Ama daan thuakna hangin eite ih dam a,
ama vuak a thuakna hangin eite ih ciidam hi. *
6Eite ih vekpi in a mangthang tuute taw ih kibang a,
eima santek ah ih pai hi.
Ahihang eite theampo ii thuak tu a kilawm
daan thuakna sia ama ii tungah TOPA in suan hi. *
7“Ama sia nasia tak kivawtsia a, ahihang ki niamkhiakna taw thuak hi;
kam khat zongh huthe ngawl hi.
Ngaw tu a a kipaipui tuuno khat bang le
a mul meet tu a kipaipui tuu khat a haam ngawl bangin,
ama in kam khat beak pau ngawl hi. *
8Ama sia kiman in thina thuak tu in thu kikhen hi,
ama tung a piang tu thu sia kuama in awlmawk ngawl hi.
Ih mite ii khialnate hu in ama kithatlum hi. *
9Ama in leeilot thu son ngei ngawlin,
khialna khat zongh vawt ngei ngawl hi napi,
mi ngilote taw thaan sungah kisial khawmin,
sumhaute taw kiphum khawm hi,” ci in zo uh hi. *
10TOPA in, “Hi bang a thuakna sia keima deina ahi hi;
a thina in mawna mai sak natu a biakpiakna ahi hi.
Tua ahi ciang ama in a suan le a paalte mu tu hi;
Ama a khan sau in, ama sung panin ka tupna tangtung tu hi.
11Haksatna a thuak zawkciang ama in lungdamna nga kik tu hi.
A thuakna a luithathong ahi ngawl sia ama in he tu hi,
Ama sia a thumaan keima naseampa hi a ka lungdam hi.
Mihing tam mama taangin ama in daan piakna thuak tu a, ama hangin amate mawna ka mai sak tu hi.
12Tua ahiciang ama sia milian le mi thahatte sungah upatna dinmun kipia tu hi.
Ama in lungkim takin a nuntakna pia a, mihing pha ngawlte thuak bangin thuak hi.
Ama in mimaw mikhial tam mamate ii luangin ding a,
amate ii mawna khialna a kimai sak natu in thunget sak hi,” ci hi. *

Isaiah 54
TOPA ii Israel A Itna
1Jerusalem awng, nang in tasel numei khat bang na hi zo a,
ahihang tu in lungdam in la sa in na au thei hi.
A pasal taw a omkhawm tawntung numei khat sangin
tu in nang in ta tam na nei zaw tu hi. *
2Na tenna puanbuk khan in; a khau sausak in khetphinte khen kip in!
3Na ngamkiim theampo ah na ngamngite na keak tu hi;
tu laitak a minam dangte tenna ngam sia na mite in lua kik tu hi.
Tu laitak a a kinusia khuapite sia mihing taw kidim kik sak tu hi.
4Lau heak in– na mai hong kimawl sak kik ngawl tu hi;
hong kizawngsak ngawl tu hi.
Na pasal nei tuung a na pasal tung a na thumaan ngawnate le,
meingong khat bangin, thinkiam a na lunglen mama nate na mangil tu hi.
5Nangma hong bitphuapa in na pasal bang hong hi tu a–
ama min sia Vaanglianbelpa TOPA ahi hi.
Israelte ii a thiangtho Pathian in nangma hong ngum tu a–
ama in leitung buppi ukpa ahi hi.
6Israel awng, nang sia a pasal ii taisat thinngim mama in a om zimoi khat taw na kibang hi.
Ahihang TOPA in ama kungah nang hong sam kik a,
7“Tawmvei no sung nang kong nusia hi; itna lian taw kong pui kik tu hi.
8Ka thin uuk hangin tawmvei no sung kong nungngat a,
ahihang a tawntungin nang kong itna kong lak tu hi,” hong ci hi.
Nang hong ngum TOPA in tabangin ci hi.
9“Leitung ah tuipi liim kik nawn ngawl tu hi ci in
Noah hun lai in kong kamciam hi.
Na tungah hong thin uuk kik ngawl tu khi hi ci in tu in kong kamciam hi,
nang kong tei batu a daan kong pia batu hi. *
10Mualliante le mualnote a cimh ta zongin, nang kong itna bo ngei ngawlin,
thinnop natu kong kamciam sia ka len tawntung tu hi,” hong ci hi.
Nang hong it TOPA in tabang ci hi. *
Mailam Jerusalem
11TOPA in,
“Nang hong heeneam tu om ngawl,
ngimna a thuak, a hu tu om ngawl khuapi,
Jerusalem awng, na phungkawngte suangmanpha taw ka ciang kik tu hi. *
12Na tausaangte suangmanpha san taw, na kongpite mei bang a taang suangmanpha taw,
na kulh theampo a manpha suang taw ka vawt tu hi.
13“Keima mama in na mite ka hil tu a, nop sakna le thinnopna ka pia tu hi. *
14Thutanna le thumaanna in na tha hong kho sak tu hi.
Zawthawk vawtna le launa, patauna taw na kipeal tu hi.
15Khat po in nang hong sim le, kei thukimna om ngawlin hong sim hi a;  nang hong sim papo puk tu hi.
16“Pumzaapna meikhuk vawtin hiam a seak thikseak pa, ka bitphua hi.
Ngual thalup natu in hiam te a zangh ngalkap pa zongh ka bitphua hi.
17Ahihang ngalhiam pha bel sia zongh in nang bangma hong law zo ngawl tu hi;
nang hong mawsiatte theampo na nial thei tu hi.
Ka naseamte ka panpui tu a, zawna ka pia tu hi,” ci hi.
TOPA in ci zo hi.

0 comments:

Post a Comment