Laithiangtho Dokna (Isaiah 55-56)

1. TOPA in,  “A dangko theampo awng, hong ___tavun ci hi.
a. pai
b. en
c. kisin

2. TOPA in "hong pai tavun tua hile ___ na nga tu uh hi!" ci hi.
a. lungdamna
b. thupha
c. nuntakna

3. TOPA in kua tung ah ka kamciam thupha kong pia tu ci ziam?
a. Adam
b. David
c. Abraham

4.  Ka kammal in van pan ___ taw kibang hi.
a. aksi tangte
b. meeikhuamte
c. taaksuk vuuk le nguatui

5.  ___in la sa tu uh a,  thingkungte au tu uh hi.
a. Mualliante le mualnote
b. Suangtumte
c. Silate

6. ___te omna munah cypress kungte po tu hi. 
a. Khaumaw
b. Aisa
c. Ling

7. TOPA in a sia bangma a ngamta ngawlte ___tu hi,” ci hi.
a. ngualzawna ngaa
b. thupha ka pia
c. sum hau

8. Akua te sia TOPA ii mite taw biakpiakna nei khawm thei tu ziam?
a. Egypte
b. Amonte
c. Ngamdangmi khat

9. Pathian ii mite sung ah akihel thei tute sia___te hi.
a. A kingetsa pasal
b. tealsate
c. Israel

10. TOPA in Ka Biakinn sia minam theampo atu in ___ hi,” ci hi.
a. suaktakna inn
b. kikaikhopna
c.  thungetna inn kici tu

11. Israelte taw kipawl in ___te cia kik tu hi.
a. Judah
b. ngamdangmite
c. Moab le Amon

12. TOPA in lampui theampo sia ___ te taw tengat hi.
a. ngul
b. vakthap nganhing
c. inn cing ui mang aman


Isaiah 55
Pathian ii Piak Hesuakna

1TOPA in,  “A dangko theampo awng, hong pai tavun– hi lai ah tui om hi!
 Hong pai tavun, no sum nei ngawlte awng– antang lei vun a ne vun!
 Hong pai tavun! zu le khuinoai lei vun–
bangma manh piak kul ngawl hi!  *

2Banghangin ngilva dangva na ngawl po in sum zangh thathong nu ziam?  Banghang na thalaw sa sumte zangh napi ngilkial lalai nu ziam?
 Hong ngai tavun a, kong ci bangin seam vun,
 tua hile an lim bel na ne tu uh hi.

3“Tu in ngai vun, ka mite awng, ka kungah hong pai tavun!  ka kungah hong pai tavun tua hile nuntakna na nga tu uh hi!
 Note taw kiciamna kho khat ka vawt tu a,
 David tungah ka kamciam sa thuphate kong pia tu hi.  *

4Keima in ama sia minamte lampui le a ukpa khat in ka koi a,  ama tungtawn in mihonpite tungah ka vaangletna ka lak hi.

5Tu in note in ngamdang mite na sam tu uh hi;  khatvei lai in amate in note hong he ngawl uh hi,
 ahihang tu in note taw kizom tu in hong zuan tu uh hi!
 Keima, TOPA na Pathian, Israelte ii a thiangtho Pathian in,
 hi te theampo ka piang sak tu a, minthanna le upatna note kong pia tu hi,” ci hi.

6TOPA hong nai laitakin  ama kung zuan vun a, ama tungah thungen vun.

7Mi ngilote in amate ii nuntakna zia nusia tahen a,  a ngaisutna siate kheal tahen.
 TOPA ih Pathian kung amate in zuan tahen;
 TOPA in hong hesuak thei a, khialnate hong mai sak papai hi.

8TOPA in, “Ka ngaisutnate no a taw kibang ngawl a,  ka paiziate no a taw kilamdang hi.

9Leitung panin vantungte a kikhualat za in,  keima paizia le ka ngaisut ziate sia
 no ii paizia le na ngaisutna ziate taw kikhuala hi.

10“Ka kammal in leitung tuibuak tu a  van pan hong taaksuk vuuk le nguatui taw kibang hi.
 Amate in ankungte khangto sakin
 neak tu an le ciin tu anciite piang sak hi.  *

11Keima kam panin a pusuak kammal zongh tabangma hi tu a–  a hawm nguakin ka kungah hong heak kik ngawl tu a,
 sep tu a ka ngealna bangin tangtung a;
 ka sawl teng theampo seam tu hi.

12“Lungdamna taw Babylon na nusia tu uh hi;  thinnopna taw khuapi pan hong kipaipui tu hi.
 Mualliante le mualnote in la sa tu uh a,
 thingkungte in lungdam in au tu uh hi.

13Tu laitak in lingte omna munah cypress kungte po tu hi;  lingkungte luangin myrtle kungte poto tu hi.
 Tua in a tawntung a kho tu lim khat hi tu a,
 Keima TOPA ii sep sate phaw kikna khat hi tu hi,” ci hi.

Isaiah 56
Pathian ii Mite sungah Minam Theampo Kihel tu
1TOPA in a mihingte tungah, “Khuangei ngawlin note hong ngum tu ka hikom, thumaan thutang seam vun.  2Sabbath tang tawntungin a zangh khial ngawl mite thupha ka pia tu hi. A sia bangma a ngamta ngawlte thupha ka pia tu hi,” ci hi.
  3Pathian ii mite taw a kipawl sa ngamdang mi khat in, “TOPA in kei sia ama ii mite taw Pathian hong biakhawm sak ngawl tu hi,” ci heak hen.
 A kinget sa pa khat in ta nei thei ngawl tu ahikom, Pathian ii mite sungah kihel thei ngawl tu khi hi ci in ngaisun ngei heak hen.  4TOPA in tabang a ngaisun pa tungah, “Sabbath ni na tanna taw kei nong zatak vawt a, ka thuciamna sia thumaan tak lenin kei nong lungdam sak le,  5Ka Biakinn sung le ka mihingte sungah tanu tapa nei a na minthan tu sangin na min khuangei zaw kiciamtee tu hi. Nang hong kimangil ngei nawn ngawl tu hi,” ci hi.
  6TOPA in ama mihingte sungah a kihel, ama it in a na a seam, Sabbath ni tang a, ama ii thuciamna kip takin a len ngamdang mite tungah,  7“Biakna taw kisai a thiangtho ka mual ahi, Zion ah kong paipui tu a, ka thungetna inn sungah kong lungdam sak tu a, biakpiakna ka tau tungah nong piak biakpiaknate kong saang tu hi. Ka Biakinn sia minam theampo atu in thungetna inn kici tu hi,” ci hi.  *
  8Ngamdang a saltanna pan ama mihing Israelte inn ah a ciapui pa ahi Vaanglianpipa TOPA in, amate taw kipawl tu in midangte kong paipui lai tu hi ci in kamciam pia zo hi. 
Israel ii Lampuite Kipuavawk
9TOPA in ngamdang minamte ngamsa bangin hong pai in ama mite netum tu in sawl hi.  10Ama in, “Ka mite kidop natu thupia tu in, a kingaisun lampuite theampo, a mit uh taw siat hi! Amate in bangma he ngawl hi. Amate in ngual a nak ngawl inn cing uite taw kibang a amate sia lulum in mang man uh hi. Amate in mumut ma nuamsa uh hi!  11Amate sia a dei zaa nga ngei a kisa ngawl a duhop uite taw kibang uh hi. Hi lampuite in thu heakna bangma nei ngawl uh hi. Amate uk bang tekin ngamta in amate phattuamna tu tek zong uh hi.  12Hi zu khamte in, ‘Zu tawm la tawng i, ih dawn zawkza dawn tawng! Tuni sangin zing ciang nuam zaw kan tu hi!’ ci uh hi,” ci hi.

0 comments:

Post a Comment