Laithiangtho Dokna (Isaiah 57-58)

1. Ngamtatna pha a ngamtate in ___ thin nopna mu uh hi.
a. thina sungah
b. TOPA sungah
c. Upna sungah

2. Bang ii nuai ah paktatna vawt uh ziam?
a. Siatna ii nuai
b. Thiangtho thingkung
c. Thupha ii

3. A kuate in thahatna hong pia ci'n ngaisun uh ziam?
a. Tha vakthapte
b. Pumnguak om milimte
c. Vantung lalangte

4. TOPA in khuangei hial ka thim hu in kei hong ___! ci hi.
a. upat ngawl
b. phong hi
c. taisan hi

5. TOPA in, Keima in ___munah ka teang hi, ci hi.
a. a saang le a thiangtho na
b. Vantung
c. nangma omna

6. Vuimut khat in abang seamkeak tu ziam?
a. Thingkung
b. Mihingte
c. Milim

7. TOPA in, Israel ka mite tungah ___son vun! ci hi.
a. a daatham thu
b. a siatnate
c. a khialnate

8. Mihonpite banghang antang nuam ngawl ziam?
a.  TOPA in phawk ngawl sa
b.  Maipha mu ngawl
c.  Daatham

9. Mite in a antanna sia ___ atu tang hi.
a. amate aituam
b. lametna
c. TOPA

10. Topa dei antangna sia ___ natu hi.
a. Thaa Letsong ngaa
b. zawthawk thuakte suaktaak
c. na lamdang pian


11. ___te na hu tu uh nial heak vun.
a. mizawngte
b. meingongte
c. Na be

12. Bang a hi uh le  khuazing sia sun kong suak sak tu ci ziam?
a. Kamsia pau kheal
b. Thu angen zo uh le
c. Sumpi aman uh le


Isaiah 57
Israelte ii Milim Biakna sia Kipuavawk
1Miphate thi a, kuama in tua thu tel ngawlin ngaisut zongin nei ngawl uh hi. Ahihang amate thi ciang, khuangai tuasiatna in amate bangma law thei ngawl hi. 2Ngamtatna pha a ngamtate in thina sungah thin nopna le tawlngakna mu uh hi.

3No mawneite awng, thu khenna thuak tu in hi munah hong pai tavun! Note in aisaante, nupa kipalngulte, le pumpi zuak numeite sangin na pha zaw tuan bua uh hi. 4Note in akua ciammui zazan nu ziam? No leeilot mite in akua selno nu ziam? 5Leitangh pha sak tu milim pathiante ka bia uh hi ci in, biakna taw kisai a thiangtho thingkungte nuai ah nu le pa khialna na vawt uh hi. Luihui ah a om suang hawngte sungah na tate biakpiakna in na pia uh hi. 6Tua mun panin suangnealte la in pathiante bangin na bia uh hi. Biakpiakna in zu amate na buak uh a antang biakpiakna na puak uh hi. Hi bang teng theampo diksa tu in nong um uh ziam? 7A saang mualte tungah biakpiakna pia tu le nu le pa khialna vawt tu in na pai uh hi. 8Na innmai kongkha sung sangah pumnguak a om na milimte na koi uh hi. Noma in kei nong nusia uh hi; Note in na puante suutin noma taw lumkhawm tu a na cial na it uhte taw, na lupna zai tungah na lumkhawm uh hi. Tabangin tua munah na pumpi deina uh na lung na kim sak uh hi. 9Note in paaknamtui le sathaute kinoai in Molech pathian bia tu in na pai uh hi. Biak tu pathiante zong tu in mun theampo, mithite khua ngangawn ah kamtaite na pai sak uh hi. 10Milim pathian dangte na zonna uh in na toi uh a, ahizong na tawp thong ngei bua uh hi. A pumnguak a om na milimte uh in thahatna hong pia ci in ngaisun na hikom na tha zawm ngei bua hi.

11TOPA in, “Kei nong theam a kei nong makngil cip natu uh in note hong lau sak tua pathiante sia akuate ziam? Khuangei hial ka thim om hithiat manin kei hong upat nawn ngawl nu ziam? 12Na ngamtatna uh a maanin na ngaisun uh hi, ahihang na ngamtatna ka pholaak tu a, tasia ciang na milimte in nang hong hu zo ngawl tu hi. 13Huna ngen a na au ciang, tua na milimte in nang hong ngum hen! Vuimut khat in amate seamkeak tu hi! Ahihang kei hong muangte sia tua leitangh tungah teang tu a ka Biakinn sungah kei hong bia tu uh hi,” ci hi.

Pathian ii Huna le Dam sakna Kamciam
14TOPA in, “Ka mite ka kungah hong heakkik tahen. Amate lampi a nokkhak sak theampo khin vun! Lamzik vun a, a zak vahial thei tu koi vun!

15“Keima in a saang le a thiangtho, a tawntung a nungta Pathian ka hi hi. Keima in a saang le a thiangtho na munah ka teang hi, ahihang mite ii hong muanna le lametna a nga kik thei natu in mawna kisiik kik a, a kiniamkhiak vadeam mite taw zongh in ka teangkhawm hi. 16Keima in ka mihingte nuntakna ka pia a, amate mawsiat nawn ngawl in, amate tungah ka thin uuk ngei nawn ngawl tu hi. 17Amate ii mawna le duhopna hu in amate tungah ka thin uuk a, tua hu in amate daan pia in ka nusia hi. Ahihang amate a thin uh sah in a ngamtat ngei bangin ngamta veve uh hi.

18“Amate ngamtatnate ka mu zo hi, ahihang amate ka dam sak tu hi. Amate lampui in hu in, a hee a kapte ka heeneam tu hi. 19A naina le a khuala na ah a om mihingte theampo tungah, thin nopna ka pia hi! Ka mihingte ka dam sak tu hi. * 20Ahihang mi ngilote sia a tawlnga ngei ngawl, a kilok tawntung a tuihual ii buan le nin a paipui tuipi taw kibang hi. 21Mawneite atu in thin muanna om ngawl hi,” TOPA in ci hi. *


saiah 58
A maan An tanna
1TOPA in, “A nging theiza in au vun! Israel ka mite tungah a khialnate son vun! 2Amate in ni simin kei hong bia uh a, ka pai ziate heak tu le ka thukhamte zui tu sia ka lawp uh ci hi. Amate in kei hong biak sia nuamsa ahikom a maan thukham ka piak tu sia ka dei uh hi ci uh hi,” ci hi.

3Mihonpite in, “TOPA in hong phawk ngei ngawl ahile eite in banghangin an tang tu hi ziam? Ama in hong awlmawk ngawl ahile banghangin eite in anne ngawlin om tu hi ziam?” ci in dongh uh hi.

TOPA in amate tungah, “A maan tak ci leang an na tan kawmin noma aituam phattuam natu na zong uh a, na naseamte na zawthawk vawt uh hi. 4Na an tanna in nang hong ngoltol sak a ngual taw kihau in hong kibuan sak hi. Hi bang a an tannate taw nong thungetnate ngai tu in nong um uh ziam? 5An na tan ciang nangma le nangma ngim kipia na hi hi; lopate bangin na lu na kunsuk uh a na lup natu in khau-ip puan le vutte na pha uh hi. Tua sia an tang na ci uh sia ahi ziam? Tasia taw lungkim tu in nong um uh ziam?

6“Kei dei an tanna sia hi bang ahi hi; zawthawk na thikkolte le a maan ngawl a kivawtna hakkolte suutin, zawthawk vawt a thuakte suatak sakna ahi hi. 7Ngilkialte na an uh hawm vun a inn nei ngawl mizawngte atu in na inn uh hon vun. Puan silh tu a nei ngawl mite puan pia vun a, na bete na hu tu uh, nial heak vun. *

8“Kong dei sakna sia zingsang ni bangin na tungah hong taang tu a, na liamna mate dam pal tu hi. Note hong ngum tu in note taw kong omkhawm tawntung tu hi; keima in na kiim na paam theampo panin kong dal tu hi. 9Thu nong nget uh ciang, kong pia tu hi. Nong sam uh ciang kong zo tu hi.

“Ngual zawthawk vawtna te ngual zawnsaknate theampo le kam sia paunate theampo na kheal uh le; 10ngilkialte an pia in, kitaangsapna a nei mite tungah a kitaangsapnate na pia uh le; na kiimkot uh a khuazing sia sun khuavak suak tu hi. 11Taciang note lam kong pui tawntung tu a na phate taw kong lungkim sak tu hi. A ciidam a thahat in kong koi tu hi. Tui tam a nga huan khat, a kang ngei ngawl ciktui khat taw na kibang tu uh hi. 12Taanglai pekin a siate na mite in sa kik tu a, phung kiciang a luite tungah ding sak kik tu uh hi. Note sia khua uumna pang sa kik a inn a sia sate a pua kik, mihingte hong kici tu hi,” ci hi.

Sabbath Tanna Thaman
13TOPA in, “Sabbath sia thiangtho sakin tua ni in noma meet natu bek zong ngawlin, ka ni thiangtho ni sia manh nei sakin zakta in khualhaw ngawl, naseam ngawl, tua ni in kam mannung ngawl pau ngawlin na om uh le, 14keima na na sepna uh thaman in lungdamna na mu tu uh hi. Leitung mun theampo ah hong ki upat tu in kong vawt tu a, na pu Jacob tungah ka piak leitangh sia lungdam nuamsa in na lua tu uh hi. TOPA, Keima in ka son zo hi,” ci hi.

0 comments:

Post a Comment