Laithiangtho Dokna (Psalm 91-92)

1. Laphuak pa in ___ muanna kong nei ci  hi.
a. Pathian sungah
b. a lamdang
c. lametna le

2. Ama in bangbangh hong keamcing ziam?
a. Athakhui nuam
b. Bit takin
c. muthun nei ngawl in

3. ___te daan a kipiak sia na mu tu hi.
a. A kiphasak
b. Seksol
c. Mihing ngilo

4. ___ nai ah ngoltolna hong theng batu hi.
a. Na inn
b. Ngiaphual
c. Nang ma vakna

5. A kiitak huai tawpite le ___te na siikcil tu hi.
a. tui nganhingte
b. ngul ngu hang
c. vakthap nganhingte

6. Pathian in ama a itte le Topa in asaangte ___hi.
a. encik
b. thupha pia
c. hung

7. A lian mama na nasepnate in kei hong ___ hi.
a.  ciim sak tuam
b.  lungdam sak
c.  lamdang sak

8. Mihing ngilote sia ___bangin po tu hi.
a. mitsa
b. lopa
c. senneal

9. A maan ngawl naseamte akhanto hang ___ hi.
a. in siatna hong then
b. alui thathong
c.  kilalcip sak tu

10. ___ theampo ki zothal tu hi.
a. Mihing ngilo
b. A paktat
c. Leilot thuson

11. ___bangin nong hatsak zo hi.
a. Tawpi
b. Ngam khuital
c. Ngamsa

12. Thutangte sia ___ bangin pung tu hi.
a. ngasate
b. mitsa
c. palm kungte



Psalm Late 91
Ei hong Dalpa Pathian
1Ngammuan natu in TOPA kung a pai
a kua po ahizong Vaanglianbelpa dalna sungah a om pa po in
2ama tungah: “Nangma in ka hunpa le ka kidalna na hi hi;
Nangma in ka Pathian na hi a; nang sungah muanna kong nei hi,” ci thei hi.
3Ama in a kiseal launa theampo pan le
thi thei natna theampo panin, bit takin nang hong keamcing tu hi.
4Ama in a thakhui taw nang hong uap tu a;
ama kepcingna sungah na ngammuang tu hi;
Ama thumaanna in nang hong dal tu a, hong hung tu hi.
5Zan in launate le
suntangin thakhat thu a hong sim theite na kiita batu hi,
6khuazing sungah hong vaat thei pulpi natnate ahizong
suntang a hong thatlum thei a ngilote ahizong na kiita batu hi.
7Mihing tulkhat na kungah pukin a thi zong,
na kiimkot ah tulsawm a thi zong nang bangma hong kilaw ngawl tu hi.
8Mihing ngilote daan a kipiak sia na en tu a, na mu tu hi.
9Nangma in TOPA sia nang hong hung pa in na nei zo a,
a Saang Belpa sia nang hong dalpa in na nei zo hi,
10tua ahikom lalna bangma in nang hong phuk ngawl tu a,
na inn nai ah ngoltolna hong theng batu hi.
11Na paina papo ah nang hong dal tu in Pathian in a vantung lalangte
nang atu in a ki tavaw sak tu hi. *
12Na peang in suang a sui thaak ngawl natu in amate in
a khut taw nang hong toai tu hi. *
13Tawpite le ngulte,
a kiitak huai tawpite le ngul ngu hangte na siikcil tu hi. *
14Pathian in, “Kei hong itte ka hun tu a,
TOPA a hong saangte ka hung tu hi.
15Hong biapui ciangin amate ka zo tu hi;
ngim a nga ciangin amate taw ka omkhawm tu hi.
Amate ka suatak tu a, ka upat tu hi.
16Amate sia khan sauna letsong ka pia tu a,
amate ka ngum tu hi,” ci hi.

Psalm Late 92
Pokna La khat
1TOPA awng, Nang tungah lungdamna ko tu le
nangma pokna la sak tu sia pha mama hi, Saang Bel Pathian awng,
2zingsim in tatsat ngawl na itna thang sak tu,
zan simin na thumaanna sonlaak tu le
3khau taw a kithua tum theite taw la awte tumin
tengtong taw aw hoite
lungdam kona in sak tu sia pha mama hi.
4A lian mama na nasepnate in
kei hong lungdam sak hi, TOPA awng;
na sep sa na vawt sate hu in lungdam in la ka sa hi.
5TOPA awng, na tuk na diannate lian mama hi!
Na ngaisutnate thuk mama hi!
6Hi thu in mihing mamaw khat ii heak zawk hi ngawl a;
a ciim ngawl khat in tel zo ngawl hi.
7Mihing ngilote sia lopa bangin po tu a,
a maan ngawl naseamte khangto tu hi;
ahitazong amate sia kilalcip sak tu hi,
8banghangziam cile TOPA awng,
nang sia a tawntungin a lian bel na hi hi.
9Na ngalte thi tu hi ci in ka he uh a,
mihing ngilo theampo ki zothal tu hi.
10Ngam khuital bangin nong hatsak zo a,
lungdamna taw thupha nong pia zo hi.
11Ka ngalte ngallelna ka mu zo a,
a ngilote kaana ka za zo hi.
12Thutangte sia palm kungte bangin pung tu a;
amate sia Lebanon mual tungah Cedar thingkungte bangin khang tu hi.
13Amate sia TOPA inn sungah a kisuan,
ih Pathian Biakinn sungah a limci,
14khan haam napi nga a nga lai le
a tawntungin hingin a kho thingkungte bang ahi hi.
15Hisia in TOPA thumaan a,
kei hong hung pa sungah
bangma thumaan ngawlna om ngawl hi ci in lak hi.

0 comments:

Post a Comment