Laithiangtho Dokna (Samuel Masa 13-14)

1. Philestine ngalkapte bangza pha kici ziam?
a. 500,000
b. 1, 200, 000
c. Tuipi hui senneal za

2. Saul taw ___ ah a om mite in Philistinete lau in liing hi.
a.  Gilgal
b.  Jerusalem
c.  Hebron

3. Saul ii Samuel ni bangza ngak ziam?
a. 3
b. 7
c. 12

4. Saul in Samuel ngak ngawl in bang hi masa ziam?
a. Philistinete sim
b. Ngalkap kaaikhawm
c. Meihalbiakna vawt

5. Hebrew te ii namsau le tei banghang nei ngawl ziam
a. Philistinete in khaam
b. Pathian in pia ngawl
c. Vawt Thei ngawl

6. Saul te pata ngawl Israelte in bang nei ngawl ziam?
a. Upna
b. Nam
c. Launa

7. Akua in, Jonathan sia Philestinete ngiaphual vil tu in sawl ziam?
a. Saul
b. Kuama
c. Pathian

8. Lo acre ___ azai sung ah Philestine te 20 bangh Jonathan le alawm in that hi.
a. khat
b. lang
c. sawm

9. Philistinete ataai amu ciang Saul in bang hi ziam?
a. Topa tung ah lungdamko
b. delh in sim
c. Jonathan zong

10. Hebrew pawlkhat in Saul bang hun ciang pawm ziam?
a. Ngal kipat ciang
b. Ngalkap akaikhop ciang
c. Philistinete atai ciang

11. Jonathan in Khuaitui aneak huu in Saul in ___ hi.
a. lungdam
b. phunsan
c. thalup sawm

12. Saul in bangbangh te ngalkap sung tum sak ziam?
a. Israel tangval peuma
b. Pathian teal teng
c. Thahat le a hang pasal


Samuel Khatna 13
Philistinete taw Ngalkisimna

1 * 2Saul in pasal tulthum teal a, ama in tulnii sia Michmash ah ama taw a om tu le Bethel mualtung ngam atu in koi a, tulkhat sia a tapa Jonathan taw Benjaminte ngam khen Gibeah ah puak hi. Tua ngawl teng Saul in a inn tek ah cia sak hi.

3Jonathan in Philistinete ngalkap ukpa Geba ah that hi, taciang Philistine theampo in tua thu za uh hi. Tua zawkciang Saul in kamtai pai sak a, ngambup sungah Hebrew mi a om theampo ngal sim tu samna in lemle tum sak kakoai hi. 4Saul in Philistinete ngalkap ukpa that a, Israel mite theampo sia thu kiza sak a, taciang Philistinete in amate ensan hi, ci in Israel theampo tungah thu kison hi. Tua ahikom mite in Gilgal ah Saul pawm tu in a kisamh bangin pai uh hi.

5Philistinete in Israel te sim tu in kikhawmtua uh hi; amate in ngalleang tul sawmthum nei uh a, siphu ngalkap tulluk, lei ngalkap sia tuipi hui a sen za in tam hi. Amate in Bethaven ii nisuana sang Michmash ah kuanin, tua sungah ngiaphual saat uh hi. 6Tua zawkciang amate in Israelte nasia takin sim a, Israelte a cimaw dinmunah koi hi. Israel mi pawlkhatte sia suanghawng, leihawng le suangpi kawm, leidum le tuikhuk sungah buu uh a; 7a dangte Jordan ngun kan in, Gad le Gilead te ngamkhen zuan uh hi.

Saul sia Gilgal ma ah omlai in, ama taw a om mite lau in liing uh hi. 8Ama in ni sali sung Samuel ii sawl bangin Samuel ngak hi. Ahihang Samuel Gilgal ah hong pai peang bua hi. Mipite in Saul taisan tu hong kipan uh hi, * 9tua ahikom ama in amate munah, “Meihal biakpiakna le kipawlkhop biakpiakna ka kungah hong paipui tavun,” ci hi. Ama in meihal biakpiakna khat vawt a, 10a man lian laitakin Samuel hong theng hi. Saul in pai in muak a, 11ahizong Samuel in, “Bang ka vawt ci ni ziam?” ci in dongh hi.

Saul in zo a, “Mihingte in hong taisan a, kong pai tu na ci bangin nang hong pai ngawl ni hi; tua ban ah Philistine te sia Michmash ah kikhawmtua hi. 12Tua ahikom, ‘Philistinete in hi sung Gilgal ah kei hong sim tu in om a, taciangin kei in TOPA ii maipha ka nga natu sep ka nei bua hi. Tua ahikom sangaw biakpiakna khat ka piak kul vak,’ ci in ka na ngaisun hi,” ci hi.

13“Tasia mawmawt nasep hi,” ci in Samuel in zo hi. “Nang in na TOPA Pathian ii thupiak bangin ngamta ngawl ni hi. A thu mang hi thong lete nang le na suan na paalte in Israel a tawntungin hong uk sak tu hi. 14Ahizong na ukna sia kizom suak ngawl tu hi. Nangma in a thu ni ngawl na hikom ama in ama ii dei bang mihing zong tu a, a mihingte uk tu in vawt tu hi,” ci hi. *

15Samuel in Gilgal nusia a, ama ii pai natu ah pai hi. A dang mihingte in Saul sia a ngalkap uap tu in a pai ciang zui uh hi. Amate in Gilgal pan Benjamin te ngamkhen sung Gibeah ah pai uh hi. Saul in a ngalkap zaluk khawng sia vil hi. 16Saul, a tapa Jonathan le a mihingte sia Benjamin te ngamkhen Geba ah ngiaphual saat uh hi; Philistinete ngiaphual sia Michmash ah om hi. 17Philistinete in pawl thum kisua in a ngiaphual uh pan veu ngalnguk seam uh hi: pawlkhen khat in Shual te ngamkhen Ophrah ah pai uh a, 18a dang pawlkhat in Beth Horon zuanin, taciang a dang khatte in Zeboim Kuam le duisung a kimuna ngamngi ah pai uh hi.

19Israelte sungah thikseak kuama a om bua hi, banghangziam cile Hebrew te ii namsau le tei a nei ngawl natu in Philistinete in nasia takin khak uh hi. 20(Israelte in a hei, a tu, a phiau uh a hiam sak nop ciangin Philistinete kung veu ah pai uh hi. 21A seak manh sia hei le ngan hawlna ciang dawn ah a kisuan thik ahile ngun dangkaa tang khat, lo thawna le tumanh ahile nguntang tang nii pia sak uh hi.) 22Tua ahikom ngal kido ni in Saul le a tapa Jonathan simngawl ngalkap dangte in namsau le tei a nei bua uh hi.

23Philistinete in ngalkap pawlkhat Michmash mualciangh cing tu in pai sak hi.


Samuel Khatna 14

Jonathan ii Ngalhan Nasepna

1Nikhat ni in Jonathan in ngalvanh a pua pa munah, “Philistinete ngiaphual kantan in pai tawng,” ci hi. Ahihang Jonathan in a pa Saul munah a son bua hi, 2ama sia Gebeah pan a khuala ngawl Migron khua, talee kung nuai khat ah ngiaphual saat hi; ama in mihing zaluk bang ama taw kithua in nei hi. 3(Ephod a silh thiampi sia Ichabod ii suapuipa Ahitub ii tapa Ahijah hi a, tua pa sia Phinehas ii tapa, Eli ii tupa, Shiloh ah TOPA ii thiampi ahi hi. Jonathan ii pai hunlam sia a mite in he ngawl hi.

4Philistinete ngiaphual a thet thei natu in a kantan tu a kul Michmash mualciangh ah suangpi dawn hiam nii a lang le a lang ah om a: tua suangpite khat sia Bozez kici a, a dang khat sia Seneh kici hi. 5Khat zaw sia Michmash maingat a, mualciangh ii sak sangah om in, a khat sia Gebeah sang nga a, a thang sangah om hi.

6Jonathan in a tangvalpa munah, “Pathian he ngawl Philistine te ii ngiaphual kantan in pai tawng. TOPA in hong hu tha tu hi; hong hu a ahile bangza in ih tawmbel hang, zawna hong piak natu sia bangma in khak ngawl tu hi,” ci hi.

7Tangvalpa in, “Na vawt nop babang hi hen, kei sia nangma taw pang khi hi,” ci hi.

8Jonathan in, “Pha hi. Ei ih paitan tu a Philistinete in ih mu sak tu hi. 9Ama te in ei kungah hong pai tu ngakin hong sawl le ih omna mun san ah ih om nginge tu hi. 10Ahihang amate kungah pai in hong sawl ahile ih pai tu hi, banghangziam ci le tasia in TOPA ii ngal zaw natu lim hong piak hi tu hi,” ci hi.

11Tabangin amate sia Philistinete in mu sak uh a, tuate in, “En vun! Hebrew mite pawlkhat leihawng sung a buhna pan hong pusuak hi!” ci hi. Tua zawkciang amate in Jonathan le tangvalpa oksan in, “Hi sungah hong paito tavun! Kong son nop bang ziam maw khat om hi,” ci uh hi. 12Taciang amate in Jonathan le tangvalpa tungah, “Hi sungah hong pai tavun, thu hong son nuam khu hi!” ci in sam uh hi.

Jonathan in tangvalpa munah, “Hong zui tan. TOPA in amate tungah Israelte zawna hong pia hi,” ci hi. 13Jonathan in mualciangh tungah a khut le a khup taw peang li nei in kaato a, tangvalpa in zui hi. Jonathan in Philistinete simin, tangvalpa in zongh that hi. 14Kithalupna mun masa phitbel tua sung lo acre lang bang a zai na munah mihing kul bang thatlum uh hi. 15Ngam sungah a om Philistinete theampo lau ngawp uh hi; ngal nguk sim tu te le ngalkap, ngiaphual a om ngalkap theampo lau in liing uh hi; lei liing liangin patauna lianpi om hi.
Philistine ii Lelna

16Benjamin ngamkhen sung Gibeah a om, Saul ii mite in Philistine ii patau keakin a tai mu uh hi. 17Tua ahikom Saul in a mite munah, “Ih ngalkapte sim sin vun, a om ngawl kua teng om ziam?” ci hi. Amate in tabangin ahi uh ciang Jonathan le a ngal vanh pua khangmoipa a om ngawl hunlam he uh hi. 18“Ephod sia hi sungah hong paipui tavun,” Saul in Ahijah thiampi sia ii munah ci hi. (Tua ni in Ahijah in tua vanh sia Israelte mai ah pua hi.) 19Saul in Ahijah taw a papau laitakin, Philistine ngiaphual ah hong buai va-ial a, tua ahikom Saul in, “TOPA thu dok tu a hun om nawn ngawl hi!” ci hi. 20Taciangin ama le a mite sia amate le amate tel meal om ngawlin a kido Philistinete ngiaphual sangah ngalsim tu in hong kuan uh hi. 21Hebrew mi pawlkhat Philistinete sang pang phot a, amate ngiaphual ah a pai sa te heak kikin, Saul le Jonathan sangah hong pang kik uh hi. 22A dang, Ephraim mual tungah a om te in Philistinete tai keak hi ci in za uh a, tua ahikom amate zongh hong kipawlin Philistinete sim a, 23Bethaven kalh dongin do uh hi. TOPA in tua ni in Israel hunkhia hi.
Ngal kisim Zawkciang Thupiangte

24Israelte sia tua ni in ngilkial in zawm uh hi, banghangziam cile Saul in ciliap huai kiciamna taw thu pia hi: “Ka ngalte tungah phu laakna ka nei mateng an a ne sia haamsiatna thuak tahen,” ci hi. Tua ahikom ni buppi an a ne kuama om ngawl hi. 25Thingtang omna mun khat hong theng uh a, mun theampo ah khuaitui om hi. 26Ahihang kuama in tua zongh a ne bua hi, banghangziam cile amate in Saul ii haamsiatna sia kiita uh hi. 27Ahihang Jonathan in a pa ii kiciamna za ngawl ahikom ciangkang khat taw khuaiphaang sungah sun in tawm ne hi. Thakhat thu in ama hong hat zaw hiat paih hi. 28Ahihang a mite khat in, “Ko sia ngilkial in pukhong khu hi, ahihang na pa in haamsiatna taw hong tawng hi, ‘Tuni in an a ne peuma tungah haamsiatna tung tahen ci hi,’ ” ci in son hi.

29Jonathan in, “Ka pa in ih mite tungah bang zata in, a kiitak huai mama in ngamta thong ziam? En vun, khuaitui tawm ka neak hu in bangza in ka om nuam tuam paih ziam! 30Ih ngalkapte in ngalte a zaw uh ciang a laak uh ante ne le bangza in pha tuam seseam tu ziam? Philistinete bangza a tam zaw that zo seseam tu ziam?” ci hi.

31Tua ni in Israelte in Philistinete zo a, Michmash pan Aijalon dong sim uh hi. Hi sia hunin Israelte sia ngilkial in zawm mama uh hi, 32tua ahikom amate in ngalte khut sung pan a matte la tu in del uh a, tuu le kealte la in tua munah ngo paih uh a, a chi thai ngawlin a sa ne uh hi. 33Saul munah hi thu kikhia a, “En in, ih mite in sa le a chi ne khawmin TOPA tungah mawna vawt hi,” ci uh hi.

Saul au in, “No sia pawl zuakte nu hi! Sungtumpui khat hi munah hong lumliik tavun,” ci hi. * 34Taciang ama in a dang thupiakna khat pia a, “Mihingte sungah pai tavun a, khui le tuute hi sungah hong paipui siat tahen. Amate in tua ngante hi munah ngo in hi sung ma ah ne tu hi; amate in sa le chi neak khop mawna TOPA tungah vawt thei ngawl tu hi,” ci hi. Tua ahikom tua ni zanin amate in a nganno uh te hong paipui a tua munah ngo uh hi. 35Saul in TOPA atu biaktau khat sa a, a masa bel a vawt biaktau ahi hi.

36Saul in a mite munah, “Zan a paisuk in, Philistinete sim tawng, khuavak dong a neisa te phuulin, thatlum siat tawng,” ci hi.

“Pha na sak bel bang po vawt in,” amate in ci uh hi.

Ahizong thiampipa in, “Pathian dongh phot tawng,” ci hi.

37Tua ahikom Saul in TOPA dongh a, “Philistinete ka sim tu ziam? Zawna nong pia tu ziam?” ci hi. Ahihang Pathian in tua ni in zo ngawl hi. 38Tua zawkciang Saul in mihingte a lampuite munah, “Hong pai tavun a, akua in tu ni in mawna vawt hi ziam, kan vun. 39Israel sungah zawna hong pai a nungta TOPA min taw kamciam vawt khi hi, ka tapa Jonathan keak ahizong, a maw sia kithatlum tu hi,” ci hi. Ahihang kuama in bangma son ngawl hi. 40Taciang Saul in amate tungah, “Na vekpi in zia lai ah va ding tavun, Jonathan le kei hi sungah kong ding tu uh hi,” ci hi.

Amate in, “Pha bel tu na ngaisut papo vawt in,” ci in zo uh hi.

41Saul in TOPA Israelte Pathian munah, “TOPA, banghangin tuni kei hong zo ngawl ni ziam? TOPA Israel Pathian awng, biakna taw kisai a thiangtho suangte tungtawn in hong zo tan. Mawna sia Jonathan ahibale kei mawna ahile, Urim panin hong zo tan; ahizong a mihing Israelte ii mawna hang ahile Thummim pan hong zo tan,” ci hi. A zona sia Jonathan le Saul ii tungah cia a, mipite thiang sak hi. * 42Taciang Saul in, “Ka tapa Jonathan le kei akua hi zaw khu ziam hong khensat tan,” ci hi. Taciang Jonathan hong kikawk hi. 43Taciang Saul in Jonathan munah, “Bang vawt ni ziam?” ci in dongh hi.

Jonathan in, “Khuaitui tawm ne khi hi. Hi lai ah om khi hi– a thi tu in kinging khi hi,” ci in zo hi.

44Saul in Jonathan tungah, “Nang tuni in hong kithi sak bua le, keima Pathian in hong vaatlum tahen,” ci hi.

45Ahihang mipite in Saul munah, “Israel atu ngal zawna lianpi hong nei sak Jonathan sia thatlum tu hi ziam? Hi thei bo! A nungta TOPA min taw kiciam khu hi, a samzam khat zongh a lu tung pan taan thei ngawl tu hi. Tuni in a sep a vawt theampo, Pathian ii hu na taw vawt hi,” ci uh hi. Tabangin mipite in Jonathan sia thi natu pan hunkhia uh hi.

46Tua zawkciang Saul in, Philistinete a del tawp in, amate ngamkhen ah cia kik uh hi.
Saul ii Ngam ukna le a Baangkua

47Saul sia Israelte kumpipa a sua zawkciang, mun theampo ah a ngalte sim hi; Moab mite, Ammonte le Edomte kumpipa Zobah le Philistinete kumpipate do hi. Ngal a simna po ama in zo tawntung hi. 48Ama in hangsan takin ngalsim a Amalekte ngangawn zo hi. Ama in Israelte, a sim theampo panin hunkhia hi.

49Saul ii tapate sia, Jonathan, Ishvi le Malchishua ahi hi. Ama ii tanu uzaw sia ii min Merab hi a, a nau zaw sia Michal hi. 50A zi sia Ahimaaz ii tanu Ahinoam hi a; a ngalkap ukpipa sia a pano Ner ii tapa, a suapui seal Abner ahi hi. 51Saul ii pa Kish le Abner ii pa Ner sia Abiel ii tate ahi uh hi.

52A nuntak sung tawntung Saul in Philistinete hangsan takin sim tawntung hi. Tua ahikom a thahat le a hang pasal khat a mu na le a ngalkap sungah tum sak hi.

0 comments:

Post a Comment