Laithiangtho Dokna (Thupulaakna 13-14)

1. Nganhing in kii___ le lutang sali nei hi.
a. 10
b. 12
c. 24

2. Lutang khat sim tungah ___ min khat tek om hi.
a. Vantung lalang ii
b. Israel nam teng ii
c. Pathian selnona

3. Nganhing sia ___ natu le tha 42 sung thunei  tu in thu kipia hi.
a. ki phat vawt
b. kumpi sep
c. ki phatsak

4. Mihing te ii ziatsang khut le a talki te tungah ___ki vawt sak hi.
a. mitang
b. tepteena
c. lim

5. Nambat tepteena a nei ngawl peuma ___thei ngawl tu hi.
a. khualhaw
b. nungta
c. sum lei sum zuak

6. Nambat 666 sia ___ ii min hi.
a. Akiphualseal khat
b. Satan
c. mihing khat

7. Tuuno sia Zion Mual tungah  mi 144,000 taw,a min le a Pa min ___ hi.
a. a talki tungah ki at
b. son
c. pang tung ah at

8. Mihing 144,000 te sia koi sung ah nganhing li le upa 24 taw ding ziam?
a. Zion mual
b. Vantung
c. Kumpi tokhum mai

9. Vantung lalang a niina sia in a masa sia zui a, ___ ci hi.
a.  “Kidawm in”
b.  “Nambat hawm in”
c. “Numeinu lal zo”

10. Pathian mihingte atu in ___kisamh hi.
a. upna
b. thuak zawkna
c. ki pawlkhopna

11. Taciang meei tung a to sia in, a phiau taw, ___hi.
a. ngulpui that
b. dum sung taak suk
c. leitung an hong at

12. Sapitzu sukna chisan sia laam khat bang thukin, ___dong luang hi.
a. tai sawmnga
b. tai za khat
c.  tai za nii


Thu Pualaakna 13
Nganhing Niite


1Tua zawkciang nganhing khat, tuipi sung pan hong pusuak ka mu hi. Ama in kii sawm le lutang sali nei hi; a kiite khat sim tungah kumpi lukhu khat tek om a, a lutang khat sim tungah Pathian selnona min khat tek om hi. * 2Tua nganhing sia pawlbeam bang hi a,. a peang sia vom peang bang hi in, a kam sia tawpi kam bang ahi hi. Ngulpui in tua nganhing tungah, ama vaangletna, a kumpi tokhum le a thuneina teng pia hi. * 3Nganhing lutang khat sia thidek takin a liam taw kibang napi a liam ma sia dam kik zo hi. Leitung theampo in lamdang sa in hi nganhing zui uh hi. 4Ngulpui in tua nganhing tungah ama thuneinate pia ahikom, mihing theampo in ngulpui a bia uh hi. Amate in nganhing zongh bia uh a, “Akua in hi nganhing bang hi a, akua in ama do zo tu ziam?” ci uh hi.

5Nganhing sia Pathian selnona kamte taw a ki phatsak natu le tha sawm li le tha nii sung teng thunei thei tu in thu kipia hi. * 6Ama in Pathian min, a tenna le vantung ah a teangte theampo haamsiat tu in kipan hi. 7Ama sia Pathian mihingte do tu le a zo tu in kivawt a, be le phung, ngam, pau namcin le minamte tungah thuneina kipia hi. * 8A kithatlum Tuuno neisa a nungtate ii min khumna sungah leitung kibitphua maa pan kipan a kikhum teng simngawl leitung a teang mihing theampo in bia tu hi. *

9“Tua ahiciang bil na nei uh le ngai vun! 10Ngal mat tu in a ki tavaw peuma kiman takpi tu a, namsau taw thalup tu in a ki tavaw peuma namsau tawma ki thatlum tu hi. Hite hu in Pathian mihingte tungah thuak zawkna le upna kisamh hi,” ci hi. *

11Taciang leisung panin hong pai to nganhing dang khat ma ka mu hi. Ama in tuuno kii bangin kii nii nei a, ama in ngulpui pau bangin pau hi. 12Ama in nganhing masa sia ii thuneina tengma ama mai ah nei hi. Ama in leitung le a tungah a om theampo in a liam ma a dam sa nganhing masa sia bia sak hi. 13Hi nganhing niina sia in, na lamdang lakna tam mama vawt hi; ngual theampo mutang in van panin lei ah meikuang taak sak hi. 14Nganhing masa sia ii omna ah hi a nii na sia in, na lamdang lakna nasia takin, a vawt thei natu a, thu a ngana taw leitung a mihing theampo theam vawk hi. Nganhing sia namsau taw kiliam sak napi nungta a, a nungta nganhing sia upat natu in milim khat a vawt natu in sawl hi. 15Nganhing niina sia in nganhing masa sia ii lim sia a pau thei natu le ama a bia ngawl theampo a thalup thei natu in a sungah nuntakna hu khum hi. 16Nganhing in a no a lian, a hau a zawng, sila le sila hi ngawlte mihing theampo te ii ziatsang khutte tungah le a talki te tungah tepteena a vawt natu in zawthawk thu taw sawl hi. 17Tua nganhing min ahibale, a min luang a kizangh nambat tepteena a nei ngawl peuma sum lei sum zuak thei ngawl tu hi.

18Hi thu sungah ciimna zak thei tu kisamh hi. Khua ngaisut theina a nei peuma in nganhing nambat sia ii khiakna sia tuat thei tu hi, banghangziam cile, tua nambat sia mihing khat ii min ahi hi. Tua nambat sia 666 ahi hi.


Thu Pualaakna 14
Tuuno le A mihingte


1Taciang ka et le Tuuno sia Zion Mual tungah a ding ka mu hi; ama taw mihing 144,000 dingkhawm uh a, ama min le a Pa min a talki tungah ki at hi. * 2Tuiteautuak nging bang le vanto nging bang ahi, vantung panin awnging khat ka za hi. Tumthei thiamte ii tengtong tum aw bang zongh ahi hi. 3Mihing 144,000 teng sia kumpi tokhum mai ah, nganhing li teng le upa kul le li teng taw ding uh hi; amate in lathak khat sa uh a, tua la sia amate bek ii heak thei ahi hi. Mihing nam theampo sung pan amate bek a kitan ahi uh hi. 4Amate in numei taw kizopna a nei ngei ngawl tangval thiangthote ahi uh hi. Amate in Tuuno paina theampo zui uh hi. Amate sia mihing namte sung panin a kitan sate hi a, Pathian le Tuuno tungah a kipia masa phitte ahi uh hi. 5Amate sia leeilot thuson hi ci in kihe ngei ngawl hi; amate paubanna nei ngawl hi. *
Vantung Lalang Thum

6Taciangin leitung a teang minam sim be le phung sim, paunam sim le ngamsimte tungah a tawntung Lungdamna Thupha son tu a nei vantung lalang dang khat a saangna vui sungah a leang ka mu hi. 7Ama in awnging tak taw, “Pathian upat vun a, ama vaangletna pok vun! Banghangziam cile mi namcinte tungah a thukhen tu hun hong theng zo hi. Van le lei, tuipi le ciktuite a vawtpa bia vun!” ci hi.

8Vantung lalang a niina sia in a masa sia zui a, hi bangin ci hi. “Numeinu lal zo hi. A lian mama Babylon lal zo hi. Ama in a paktatna zu sia mihing theampo in dawn sak zo hi,” ci hi. *
9Vantung lalang a thumna in a masa te nii hong zom in, awnging tak taw, “A kuama po nganhing lim bia a, ama tepteena sia a talki tung ahibale a khutte tungah a saangte in, 10Pathian thangsiatna zu dawn tu uh hi. A thin uukna hai sungah a thahatna a dim in a sunsuk zu sia dawn tu uh hi. Hi bang a ahite theampo in, vantung lalang thiangthote le Tuuno mai a meikuang le kaan sa sungah vawtsiat zazanna a thuak tu uh hi. * 11Amate ngim a pia meikuang khu sia, a tawntung pan a tawntung dong zaam to hi. Nganhing le milim bia in, a min tepteena a nei theampo sia sun zong zan zong nop tuamna a nga bua uh hi,” ci in au uh hi. *

12Pathian thu ni a Jesu tungah a thuman Pathian mihingte atu in thuak zawkna kisamh hi.

13Tua zawkciang, vantung panin awnging khat ka za a, “Hi sia at in. Tu pan kipan Topa nasepna sungah a thite sia mihing thupha ngate ahi uh hi,” ci hi.

“Hi tatak hi! Amate in nasep haksatnate panin, tawlngakna nga tu hi, banghangziam cile amate nasep phatna in amate zui hi,” ci in Thaa in zo hi.


Leitung Anlaakna
14Taciang khua ka et ciang, meeikaang khat ka mu a, tua meei tungah mihing bang khat to hi; a lu tungah kham kumpi lukhu khat khu a, a khut sungah phiau khat toai hi. * 15Taciang vantung lalang a dang khat in, biakinn sung pan hong pusuak a, meei tungah a to pa ii munah, hi bang ausan hi. “Na phiau zangh in, ante at in, banghangziam cile a hun hong theng zo hi; leitung sia anlaak bang laak tu in min zo hi!” ci hi. * 16Taciang meei tung a to sia in, a phiau lei ah hong vik a, leitung an hong at hi.

17Tua zawkciang vantung lalang dangkhat sia biakinn sung pan hong pusuak a, phiau hiam khat ma nei hi.

18Tua zawkciang biakna tau panin, meikuang a ukpa ahi vantung lalang dangkhat hong pai hi. Ama in phiau hiam a nei vantung lalang tungah awnging tak taw au hi. “Na phiau zangh in a, leitung sapit huante panin sapit ngate at in, banghangziam cile, sapitte min zo hi!” ci hi. 19Tua ahikom vantung lalang in, a phiau sia leitung ah hong vik a, sapit huan panin sapit ngate a at zawkciang, Pathian thin uukna ahi sapitzu sukna set sungah, tua sapit ngate hong vawksuk hi. 20Sapit ngate sia khuapi pua a om, sapitzu sukna set sungah ki suktham in, taciang tua sapitzu sukna set pan chi hong luang a, tua chi sia laam khat bang thukin, tai za nii dong bang tuipawm bangin hong luang hi.

0 comments:

Post a Comment