Laithiangtho Dokna (Thupulaakna 19-20)

1. Upa 24 le nganhing 4 teng in ___ bia uh hi.
a. Topa
b. Pathian
c. Satan

2. John in akua biak sawm in boksuk ziam?
a. Pathian
b. Vantung lalang
c. Ngamhingpui khat

3. A bang ii tung ah ato pa sia Thuman Thutang kici ziam?
a. Tealsa mihingte
b. Mihing tapa
c. Siphu kaang

4. Akua ii puantual sia chisan taw kidim ziam?
a. Siphu kaang tung to pa
b. Vantung lalang khat
c. To Jesu

5. Akua ii min sia Pathian kammal kici ziam?
a. Laithiangtho aatpa
b. Siphu kaang tung to pa
c. John

6. ___te in puankaang neal silh hi.
a. Tealsa mihingte
b. Mihingte in
c. Vantung ngalkap hon

7. Doaimangpa sia akua in man ziam?
a. Vantung lalang 1000
b. Vantung lalang khat
c. To Jesu

8. Mihingte bang ahi hang in Doaimangpa kiman ziam?
a. A ki hau sak hang
b. Atheam hang
c. A thalup hang

9. Jesu hang in akithatte in Christ taw ___ uh hi.
a. nungta khawm
b. thi khawm
c. kum tulkhat uk

10. Satan in akuate theam tu in pai tu ziam?
a. Gog le Magog
b. Mihingtheampo
c. Israelte

11. Satan le akaikhop te in abang kiim uum uh ziam?
a. Jerusalem khuapi
b. Pathian ii khuapi
c. Mihingte

12. Van pan meikuang in akuate laltham sak ziam?
a. Mihing theampo
b. Satan ii anungzuite
c. Khuapi kiim uum te



Thu Pualaakna 19
1Hisia zawkciangin, vantung a mihonte auna awnging bang khat ka za hi. “Hallelujah, Pathian pok vun! Ngupna, minthanna, vaangletna Pathian neisa ahi hi! 2Ama ii thukhennate sia maanin tang hi! Ama in a paktatna taw leitung a lal sak pumpi zuaknu sia nilkeak zo hi. Pathian in ama sia daan pia hi, banghangziam cile ama in Pathian naseamte thatlum hi,” ci uh hi. * 3Taciangin amate au kik a, “Hallelujah, Pathian pok vun! Khuapi a kaangtum sak meikuang pan meikhu in a tawntung pan a tawntung dong kaato hi!” ci hi. * 4Upa kul le lite le nganhing nungta lite teng sia boksuk in kumpi tokhum tungah a to Pathian bia uh hi. Amate in, “Amen! Pathian Pokvun!” ci uh hi.

Tuuno Mopoai
5Tua zawkciang kumpi tokhum panin aw khat hong nging a, “Pathian pok vun, a naseam theampo le ama a zakta mihing a lian a no theampote in pok vun!” ci hi. * 6Taciangin tuiteau nging bang le vanto nging bang mihonpi auna aw bang khat ka za hi. Tua awte in, “Topa pok vun! Banghangziam cile Topa, eite ii Vaanglianbel Pathian sia Kumpi ahi hi! * 7Eite lawpin lungdam tawng; ama letna pok tawng! Banghangziam cile Tuuno mopoai hun sia hong theng zo a, ama mo tu sia in ama le ama kipua sa in om zo hi. 8Ama sia a silh tu in a thiang, a tee vazia puante kipia zo hi,” ci uh hi. (A puankaang neal sia Pathian mihingte ii na pha a septe ahi hi.)

9Taciangin vantung lalang in kei tungah, “Hi thu at in: Tuuno mopoai sungah a kisamte sia mihing lungdamte ahi hi,” hong ci hi. Taciang vantung lalang in, “Hite sia Pathian son tatak kammalte ahi hi,” hong ci thua lai hi. *

10A peang ah ama bia tu in ka boksuk hi. Ahihang, ama in, “Hong bia heak in! Keima in, Jesu ii hong lak thumaante a kholet nangma le na suapuite theampo taw naseam khawm khat ka hi hi. Pathian bia in!” hong ci hi.

Banghangziam cile Jesu ii hong lak thumaan sia in kamsangte thinsung a hil sia ahi hi.

Siphu Kaang tungah A to pa
11Taciang vantung kihong in ka mu a, tua sungah siphu kaang khat om hi. A tung a to pa sia Thumaan Thutang kici hi. Ama in thutang takin thukhen a, a ngalte do hi. * 12Ama mittangte sia meikuang bang hi a, a lu tungah kumpi lukhu tam mama khu hi. Ama sim ngawl kuama dang ii a heak ngawl min khat ama tungah ki at hi. * 13Ama silh puantual sia in chisan taw kidim hi. Ama min sia “Pathian Kammal” ahi hi. 14Vantung ngalkap honte in puankaang neal silh a, siphu kaang tungah to in ama zui uh hi. * 15Ama kamsung panin a hiam namsau khat pusuak a tua taw ngam theampo a zothal tu hi. Amate tungah ama in thik ciangkhut taw uk tu a, vaanglianpipa Pathian thin uukna ahi sapitzu sukna sungah sapitzute siikcil tu hi. 16A puantual tung le a pheizang tungah, “Kumpite ii Kumpipa, Tote ii Topa,” ci in a min ki at hi.

17Tua zawkciang vantung lalang khat sia ni tungah a ding ka mu hi. Ama in hui sungah a leang vacimte munah awnging tatak taw, “Pathian poaipi sungah pai tu in hong kikhawmtua tavun! * 18Kumpipate, ngalkap mangte, ngalkapte le siphute le a tung a tote, mihing theampote, sila le sila ngawlte, a lian a no ii sate ne tu in, hong pai tavun!” ci hi.

19Tua zawkciang nganhing leitung kumpipate le a ngalkap honte in siphu tung a to pa le a ngalkap honte sim tu in hong kingawmtua uh hi. 20Nganhing le tua nganhing omna ah, nalamdang lakna a vawt leeilot kamsangpa kiman khawm hi. (Nganhing tepteena a neite le, nganhing milim a biate sia, nalamdang laknate taw ama in theam zo hi) Nganhing le leeilot kamsangpa sia, kaan taw a kuang meilipui sungah a hingtang in ki sepsuk khawm hi. * 21A ngalkap honpite sia siphu tung a to pa kamsung pan hong pusuak namsau taw kithatlum uh a, vacim theampo in a sa uh a du zaza in ne uh hi.

Thu Pualaakna 20
Kum tul Khat
1Tua zawkciang vantung panin vantung lalang khat hong tuaksuk ka mu a, a khut sungah dumhawngpui kikhana tawtang le thikkhau lian khat toai hi. 2Ama in taangh lai ngulpui— Doaimangpa kici Satan— sia man a, kum tul khat sung thikhau a khit hi. * 3Vantung lalang in ama sia dumhawngpui sungah lawnsuk a, taw kalh in, kum tul khat a cin mateng, minam tatuamte a theam thei ngawl natu in a kongkha ah tepteena tuum hi. Tua zawkciang ama sia tawmvei sung kitha kik tu hi.

4Tua zawkciang kumpi tokhumte ka mu a, a tungah a to te in thu a khen thei natu in vaangletna kipia hi. Pathian kammalte le Jesu thumaan thute a than sak uh hu a, a kithatte ii thaate zongh ka mu hi. Amate in nganhing le a milim a bia bua uh hi, tua bek dom ngawlin, a talki tungah ahibale a khutte tung zongh ah nganhing tepteena a nei bua uh hi. Amate in hong nungta kikin Christ taw kum tul khat kumpipate bangin a uk uh hi. * 5(Kum tul khat a cin mateng in, a thisa a taanglai te kuama a nungta kik a om bua uh hi.) Hi a thite thaw sak kikna sia a masa bel ahi hi. 6Hi a thite thaw sak kikna masa sungah a kihelte sia nasia takin thupha saangte hi uh a, a lungdamte ahi hi. Nii vei thina in amate tungah vaangletna bangma a nei nawn bua hi. Amate sia Pathian le Christ ii thiampite a hi tu uh a, ama taw kum tul khat maangkhawm tu hi.

Satan A kizawthalna
7Kum tul khat a bo zawkciang, Satan sia a thong pan ki tha kik tu a, 8leitung theampo a ki thethaang Gog le Magog minamte theam tu in pai tu hi. Satan in amate theampo sia ngalsim tu in hong kaikhawm tu a, tuipi vaal ah senvuite za in tam tu uh hi. * 9Amate in leitung bup ah kizel in, Pathian mihingte ii phual le a it khuapi a kiim uum uh hi. Ahihang vantung panin, meikuang hong taaksuk a, amate laltham sak hi. 10Tua zawkciang amate a theam Doaimangpa sia nganhing le leeilot kamsangpa kilotsukna kaan meilipui sungah kilawnsuk hi; taciangin amate sia sun taw zan taw a tawntung pan a tawntung dong ngim kipia tu hi.

A khakbel Thukhenna
11Taciangin kumpi tokhum kaangpui khat le a tungah a to pa ka mu hi. Van le lei sia ama omna panin tai uh a, a kimu mun a om nawn bua hi. * 12Taciangin a lian le a no zongh a kibangin mithite kumpi tokhum mai ah a ding ka mu hi. Laibute kihong a, tua zawkciang a nungtate tepteena laibu dang khat zongh kihong hi. A thite sia amate ngamtatna tua laibu sungah a kitepteena bangin thu kikhen hi. 13Tua zawkciang tuipi in a sungah a thite aap hi. Thina le thina ngamte in amate kep a thite aap uh hi. Taciangin amate theampo sia a ngamtatna uh bangin thu kikhen hi. 14Tua zawkciang thina le thina ngam sia zongh meilipui sungah kisep hi. (Hi meilipui in nii vei thina ahi hi.) 15A nungtate min khumna laibu sungah a min a om ngawl peuma meilipui sungah kilawn hi.

0 comments:

Post a Comment