Laithiangtho Dokna (Isaiah 59-60)

Laithiangtho Dokna (Isaiah 59-60)

1. Pathian taw hong khentan sia abang ziam?
a. Satan
b. Ih Khialnate
c. Thingngaa

2. A sia ngaisutna na nei sia bang taw kibang ziam?
a. Sila kaikhawmpa
b. Ngul ii tui
c. Satan lam hon sak

3. Eima in ___ khuazing sungah a om bang keakin, ih lutu hi.
a. mithite khua
b. Kuama om ngawlna
c. Judah ngam

4. Thumaanna in koi sung ah lutu ziam?
a. Jordan ngun ngal ah
b. Mihon kikhopna sung
c. Thina ngam

5. A sia a pial sia in banghang vawtsiatna thuak ziam?
a. Pathian in awi
b. Ngilote thahat
c. Thumaanna tawm

6. ___te a hu tu mihing a om ngawl ciang TOPA in lamdang sa hi.
a. Israelte
b. Zawthawk  thuakte
c. Meingong tangate

7. Ni bangh in ataang tu sia abang ziam?
a. Israelte
b. Jerusalem
c. Eima

8. Akua lungdam leihlamh in liing tu ziam?
a. Jerusalem
b. Judahte
c. Topa alangpante

9. Topa in abang sia minthang sak saseam tu ziam?
a. To Jesu
b.  A Biakinn
c.  A ma tealtuamte

10. Pathian ii mihingte in bang cia pui ziam?
a. Thupha theampo
b. Suangmanpha
c. Teambaw

11. Taakthing, Juniper le Cypresste sia bang ngam pan thing pha bel ziam?
a. Judah
b. Lebanon
c. Egypt

12. Topa in akhuavak sia bangsang in kho zaw tu ci ziam?
a. Vantung khuavak
b. Ni le Tha
c. Sun khuavak

Isaiah 59
Kamsangpa in Mite ii Khialna Mawsiat

1TOPA sia note hong ngum tu in thaneam mama in, huna na ngetna aw za tu in nangong mama tu in ngaisun heak vun.  2Na khialnate uh hangin ama in hong za ngawl ahi hi. Pathian bia tu na kisin uh ciang Pathian taw hong khentan sia na khialnate uh ahi hi.  3Note in leeilot thu sonna, thatang zawthawk suanna, le mihing thana taw na khial uh hi.

  4Thukhen zum ah na kaa uh hangin note sang pan thumaanna na nei bua uh hi. Thu na zaw natu in leeilot thu na suang uh hi. Ngualdang nat natu na tup uh bang na seam uh hi.  5-6A sia ngaisutna na nei uh sia ngu nei ngulpui khat ii tuite bang ahi hi. A tui khat sutham lete ngul khat pusuak hi! Ahihang na tup na sawmte in nang tungah phattuamna hong pia ngawl tu hi– tuate sia momkhau taw a kitak puante bangin a luithathong hi tu hi.  7A sia vawt tu na tum tawntung uh a, tasia vawt tu na ngakla thei mama uh hi. Khialna mawna nei ngawl mite thalup tu na haisaang ngei bua uh hi. Na paina papo uh a sia a lal in na nusia uh a,  *  8note omna po ah kuama thinmuang ngawl hi. Na sep theampo uh maan ngawl hi. Note in lamkoai khat na zui uh a, tua lampi a zuite kuama thin muang ngei ngawl tu hi. 

Mihingte in A mawna Pualaak

9Mihingte in, “Ei hong zawthawk vawtte khut sung panin Pathian in banghangin hong ngum ngawl ziam ci thu tu in ih he hi. Ih pai natu eite in khuavak ih lam en hi, ahihang khuazing bekma om a,  10mittawte bangin ih zawt kakoai hi. Eima in suntang takpi in, zan bang keak le, mithi khua khuazing sungah a om bang keakin, ih lutu hi.  11Eite lauthawng in ih thin ngim hi. Zawthawk vawtna pan le ahi ngawlin hong kivawtna pan hong ngum tu in Pathian ih thangai a, ahihang bangma piang ngawl hi.

  12“TOPA awng, nang tungah kong khialna uh tam mama hi. Ka khialnate uh in kote hong mawsiat hi. Tuate a vekpi in ka he siat uh hi.  13Nang kong langpan uh a, hong nialin, kong zui bua uh hi. Midangte zawthawk vawtin nang kung pan lam ka pial uh hi. Ka ngaisutnate uh khial hi; ka thu son uhte leeilot thu vive ahi hi.  14Thutang kihawlkeak a, thumaanna in hong neak thei ngawl hi. Thumaanna in mihon kikhopna sungah lutu a, thumaan thutanna in tua munah om natu mun nga zo ngawl hi.  15Thumaanna tawm leilam ahikom a sia a pial sia in vawtsiatna thuak hi,” ci uh hi. 

TOPA in A mite Suatak tu Kithoai

TOPA in hi thu mu zo a, thutang om ngawl ahikom a lungkim ngawl hi. 16Zawthawk vawtna a thuak mite a hu tu in mihing khat beak zong om ngawl a mu ciang TOPA in lamdang sa hi.  * Tua ahikom amate suatak tu le ngalzawna nga natu in ama in a thahatna zangh tu hi.  17Ama in thumaanna sia thik laktong puasilh bangin silh tu a ngupna vaangletna sia thik lukhu bangin khu tu hi. Ngimna a thuak mite luangin phulaakna le daan piakna, a pha ngawlte a pha vawt nopna thinsung sia, puan bangin silh tu hi.  *  18Ama in a ngalte sia a khuala na ngamah a teangte ngangawn daan pia tu hi.  19Ni suana pan nitumna dongah a teang mite theampo in ama le a vaangletna lian kiita tu uh hi. Ama in nguntui pawm bang le, vuipi bangin hong pai tu hi.

  20TOPA in a mite tungah, “Keima in note hong dal tu le khialnate pan a kisiik kik note theampo ngum tu in, Jerusalem ah kong pai tu hi.  *  21Note taw thuciamna khat ka vawt hi: ka vaangletna le ka thu hilnate a tawntung atu in note kong pia zo a, tu pan kipan note in ka thu nong ni tu uh a, na tate le na suan na paalte in a tawntungin ka thu hong nit natu uh in na hil tu uh hi,” ci hi.

Isaiah 60
Jeruslaem ii Maisang Minthanna

1Tho in, Jerusalem awng, ni bangin taang in;  TOPA minthanna sia na tungah taang hi!
2Minam dangte sia khuazing in tuamcip tu a,  Ahihang TOPA khuavak sia na tungah taang tu hi;
Ama ompuina khuavak sia nang taw omkhawm tu hi.

3Minamte sia na khuavak kizuan sak tu a,  kumpite na zing nisuak thak kizuan sak tu hi. 
4Bang thu piang ziam na kiim na paam en in:  Inn ah hong cia tu in na mite kikhawm uh hi!
Na tapate uh mun khuala pan hong cia tu uh hi;
Na tanute sia patangnote bangin kitoai tu hi.

5Hi thu mu in na lungdam tu hi;  Na lungdam leilam in na liing liang tu hi.
Minamte ii haunate nang kungah hong kipuak tu a,
Tuipi ngal panin amate ii haunate hong pai tu hi.

6Midian le Ephah panin, kalauh honpite hong pai tu hi.  Amate sia Sheba panin hong pai tu a,
Kham le ngim namtui hong paipui tu hi.
Mihingte in TOPA sep sa thuphate son tu uh hi!

7Kedar le Nebaiothte ii tuute theampo  biakpiak na in nang kungah hong kipuak tu a,
TOPA lungkim natu in biaktau tungah kipia tu hi.
TOPA in a Biakinn sia minthang sak seseam tu hi.

8Vakhute ngil a zuan bangin  Meeikaai bangin hong pai hiithuut
teambawte sia bang teambawte ahi ziam?

9Tua teambawte sia ngam khuala na pan hong pai hi a,  Pathian ii mite inn ah hong ciapui ahi hi.
Israelte ii a thiangtho Pathian
minam theampo in a mite a zakta sak
TOPA min upat natu in,
Amate in ngun le kham hong paipui uh hi.

10TOPA in Jerusalem tungah,  “Ngamdang mite in na luphungte ciang kik tu a,
A kumpite in nangma na seam tu uh hi.
Ka thin uukin nang daan kong pia a,
Ahihang tu in ka maipha le kong hesuakna nang kong lak tu hi.

11Minamte ii kumpite in amate ii haunate  nang kungah hong paipui natu in,
na kongpite sun le zan in kihong tu hi.  *

12Ahihang nangma na a seam ngawl  minamte sia ki lalcip sak tu hi.

13“Ka Biakinn mealhoi sak natu,  ka khuapi minthan sak natu,
Lebanon taamthing sung panin a phabel thing ahi,
taakthing, juniper le cypress te sia
Nangma, Jerusalem khua sak kik natu in hong kipuak tu hi.

14Nang hong zawthawk vawt mite ii tapate hong pai tu a,  Nangma hong zatakna lak tu in kun tu hi.
Khatvei lai in nang hong zawngsak mite theampo sia na peang ah bokin hong bia tu uh hi.
Amate in nang sia, ‘TOPA ii khuapi,’
‘Zion, Israel ii A thiangtho Pathian ii khuapi,’ hong ci tu uh hi.  *

15“Nang sia hong kinusia nawn ngawl, hong ki ensan nawn ngawl tu a,  A kinusia khuapi le a ngamkhing khuapi na hi nawn batu hi.
Keima in nang sia a lian le a meal hoi in kong vawt tu a,
A tawntung, a tawntung in lungdamna munin kong vawt tu hi.

16A nu in a tasen a kepcing bangma in  minamte le kumpite in nang hong keam cing tu hi.
TOPA ahi Keima in nang kong ngum zo a,
Israel ii a vaanglian Pathian in
nang hong suatak sakna thute na he tu hi.

17“Keima in, taungo luangin kham, thik le  thing luangin Ngun le taungo,
suang luangin thik kong puak tu hi.
Nang hong ukte in nang hong zawthawk vawt nawn ngawl tu hi;
Thumaanna le kilemna taw amate in kong uk sak tu hi.

18Thazaw suangin kizawthawkna awte kiza nawn ngawl tu hi;  Suksiatna in na ngam hong sia sak kik nawn ngawl tu hi.
Luphung khat bangin nang kong dal, kong cing, kong pau tu hi;
Nang hong ngum zo ka hikom nong pok tu hi.

19Sun hunin ni in na khuavak hi nawn ngawl tu a,  Zan hunin tha zongh na khuavak hi nawn ngawl tu hi;
Keima TOPA sia a tawntung na khuavak ka hi tu hi;
Ka minthanna khuavak sia nang tungah taang tu hi.  *

20Na he na khuangaina nite bo tu hi.  Keima TOPA sia a tawntung na khuavak ka hi tu a,
ni le tha sangin kho zaw tu hi.

21Na mite theampo in a maan seam tu a  A tawntung in tua ngam lua tu hi.
Mihing theampo tungah ka letna lak tu in amate ka phut a, ka vawt hi.

22Na minam sung pan a no bel le a ki niamkhiak bel  Innkuan ngangawn zongh a thahat minam khat bangin lian tu hi.
A hun cin ciang keima in hi thu thakhat thu in ka piang sak tu hi.
Keima in TOPA ka hi hi!” ci hi .

0 comments:

Post a Comment