Laithiangtho Dokna (Isaiah 61-62)

1. Koi sung ah omte khuangai ziam?
a. Babylon
b. Zion
c. Samaria

2. Thingkungte sia akua ii suan ziam?
a. Israelte
b. TOPA
c. Silate

3. Pathian sia ama ii ___ hu in kipok tu hi.
a. sepnate
b. vaangletna
c. hotkhiatna

4. A minamte ii tuute sia akuate in cing tu ziam?
a. Sila mat te
b. Mithiangthote
c. Ngamdangmite

5. A mite in minamte ii haunate ___ pui tu hi.
a. kiphatsak
b. nop sak
c. hawm pui

6. TOPA in, Thutang ka dei hi ci a, ___ huatsa hi.
a. mamawtna
b. kizawthawkna
c. mawna

7. Jerusalem in ngal zawna angaa mateng TOPA ___ hi.
a. thim om ngawl tu
b. ki hawmthaw
c. om khipkhep

8. Jerusalem atu minthak sia ___ in phua tu hi.
a. A kiim le paamte
b. Israelte
c. TOPA

9. Jerusalem sia TOPA atu ___ taw kibang tu hi.
a. puantual neal
b. a hoi lukhu
c. naam sau

10. Jerusalem luphungte tungah ___ kikoi hi.
a. biaktau
b. ngalvan
c. lupna

11. Sapit kung ciingte koisung ah zu dawn tu ziam?
a. Biakinn sung
b. Mithite omna
c. Khuapi pua sang

12. Amite cia kik natu Jerusalem in bangvawt tu ziam?
a. Laithak
b. Mihing kaaikhawm
c. Lampi ziik


Isaiah 61
Tatkhiatna Lungdamna Thu

1Vaanglianpipa TOPA in a tha taw kei hong dim zo hi.
    Mizawngte tungah lungdamna thupha puak tu,
    Thin kitamthamte a dam sak tu,
    A kimante suatak tu le
    Thong sungah a kikhumte suatak natu thupuak tu in
    Ama in kei hong teal zo a hong puak zo hi. *

2TOPA in a mite a ngupna tu hun le
    A ngalte a zaw tu hun hong theng zo hi ci sia
    Thang sak tu in kei hong sawl zo hi.
    A he a khuangaite theampo heeneam tu in ama in kei hong sawl zo a, *

3Zion ah a om a khuangai mite tungah
    Thin ngimna luangin thinnopna, le lungdamna,
    Heena luangin pokna la khat puak tu in kei hong pai sak hi.
    Amate sia TOPA mama ii suan sa
    Thingkungte taw kibang tu uh hi.
    Amate theampo in a maan seam tu uh a,
    Pathian sia ama ii sepnate hu in kipok tu hi. *

4Amate in khuangeipi ma a lal in a om khuapite sa kik tu uh hi.

5Ka mite awng, ngamdang mite in, na na seam tu uh hi.
    Amate in na tuu honte cingin,
    Na lo uh tho in na sapit huante cing tu uh hi.

6Note sia TOPA ii thiampite,
    Ih Pathian ii naseamte hong kici tu hi.
    Note in minamte haunate na nop sak pui tu uh a,
    Note in amate ii hauna sia noma hauna ahikom in
    Na kisak thei pui tu uh hi.

7Na maizumna uh le na min daina uh te bo tu hi.
    Note in noma ngamah na teang tu uh a,
    Na haunate uh a see ni in khangto in
    Na nop sakna uh le na lungdamna uh kip tawntung tu hi.

8TOPA in,
    “Thutang ka dei a, kizawthawkna le khialna ka huatsa hi.
    Ka mite thaman thumaan takin ka pia tu a,
    Tawntung thuciamna khat amate taw ka vawt tu hi.

9Amate in minamte sungah minthang tu uh hi;
    Amate a mu theampo in
    keima ii thupha ka piak sa minam khat ahi hunlam he tu uh hi,” ci hi.

10TOPA sepna hangin Jerusalem lungdam hi.
    Jerusalem sia mothak khat pasal a nei ni in a kizeam bang ahi hi.
    Pathian in ama sia ngupna le ngalzawna taw tuam zo hi. *

11Anciite po in a meento bang keak ma in Vaanglianpipa TOPA in a mite ngum tu a,
    Minamte theampo in ama pok tu uh hi.


Isaiah 62

1Jerusalem hanthawn tu in thu ka son tu hi;
    Ama a kingup mateng le,
    Ama ii ngal zawna in zan a meisip khat det bang a taan mateng ka thim om batu hi.

2Jerusalem awng, minamte theampo in na ngalzawna hong mu tu uh hi!
    A kumpite theampo in na minthanna mu tu uh hi .
    Nang sia TOPA ama vateak ii hong phua min thak khat taw hong kisam tu hi.

3Nangma in TOPA atu a hoi kumpi lukhu khat taw na kibang tu hi.

4Nang sia, “A kinusia” hong kinaa nawn ngawl tu a,
    Na ngam sia, “A kinusia Zi” kici nawn ngawl tu hi.
    Na min thak sia, “Pathian sia Ama taw Lungdam hi,” kici tu hi.
    Na ngam sia, “Lungdam takin Kitenpui” kici tu hi,
    Banghangziam cile TOPA sia nangma taw lungkim in
    TOPA sia na ngam atu in a pasal bang hi tu hi.

5Tangval khat in ngaknu thiangtho khat zi in a tenpui bangma
    Nang hong vawt Ama in nang hong tenpui tu hi.
    Zi neipa in a zi a dik sak bangma in,
    Na Pathian in nangma dik hong sa tu hi.

6Jerusalem awng na luphungte tungah ngalvilte ka koi zo hi.
    Amate sia sun zong zan zong thimdide ngei ngawl tu hi.
    Amate in TOPA thuciamna sia TOPA phawk sak tu a,
    mangil sak ngei ngawl tu hi.

7TOPA in Jerusalem khua a puaphat kik mateng le,
    Leitung theampo ii pok khuapi a sua sak kik mateng, amate in TOPA sia tawlngak hun pia ngawl tu hi.

8TOPA in a ciliap huai kiciamna khat vawt zo a,
    Ama vaangletna taw tua kiciamna tangtung sak tu hi:
    “Na antangte sia na ngalte an hi nawn ngawl tu a,
    Ngamdang mite in na zu ne nawn ngawl tu uh hi.

9Ahihang no an a ciingte le antang a late in
    An ne in, TOPA na pok tu uh hi.
    No sapit kung ciingin a kaikhawmte in
    Ka Biakinn sungah zu na ne tu uh hi,” ci hi.

10Jerusalem mite awng, khuapi panin pusuak vun a
    Hong heak kik na mite atu in lam khat ziik vun!
    Lampi lian khat ziik vun; suangte heam vun!
    Mihingte heak thei tu in tepteena lim khat khai vun.

11TOPA in leitung theampo ah thu a than sakna panin:
    “TOPA sia no hong ngum tu in hong pai a,
    Ama ii suatak sa mite hong tonpui hi, ci thu Jerusalem mite tungah son vun,” ci hi. *

12No sia, “Pathian ii A thiangtho Mite”
    “TOPA Ngup sa Mite” hong kici tu hi.
    Jerusalem sia, “Pathian ii It Khuapi,”
    “Pathian ii Nusiat Ngawl Khuapi” kici tu hi.

0 comments:

Post a Comment