Laithiangtho Dokna (Isaiah 65-66)

1. TOPA in amite ___ ahi hang amite in awlmawk ngawl hi.
a. ngaimaw zo
b. huu nuam
c. awkmawk ngawl

2. TOPA in a mite ii ___ lai sungah kiciamtee zo hi.
a. ngitlo nate
b. hamphat nate
c. thuak tute

3. TOPA in ___ thute kimangil tu ci ziam?
a. apiak tu
b. a letsong piak tu
c. a bosa thupiangte

4. Kum zakhat bangh anungtate ___ ki ngaisun tu hi.
a. khangham in
b. khangmoi in
c. hamsia

5. Thunget manma in thungetnate kong___tu ci hi.
a. awlmawk bua
b. ngaisut sak
c. zo

6. Ngiate le ___te an ne khawm tu hi.
a. Siphute
b. Awle
c. tuunote

7. ___ diksa ahikom tuasiatna te ka theng sak tu hi.
a. Chisan
b. Kiihuai biaknate
c. Paktatna

8. Abang sia nau suak ngei ngawl nupi khat taw ki tengat ziam?
a. Judah
b. Israel
c. Jerusalem

9. TOPA in abang ka heeneam tu ci ziam?
a. Israelte
b. Gentilete
c. Jerusalem

10. TOPA in daan pia tu in ___ tungah to tu hi.
a. vuipi ii tha te
b. meikhuamte
c. tuihual

11. Ama in mawna nei te theampo ___ taw daan pia tu hi.
a. teipi
b. meikuang
c. mei le namsau

12. Akuate sia thalkap thiam ziam?
a. Egypt
b. Syria
c. Lydiate


Isaiah 65
Ngalphuangte tungah Pathian ii Daan piakna

1TOPA in, “Keima in ka mihingte ii thu ngetnate zo tu in a kinging sa in om napi, amate in thu ngen ngawl uh hi. Amate ii hong mu thei tu in om napi, amate in hong zong beak bua uh hi. ‘Hi lai ah om khi hi; hong hu tu khi hi!’ ci in a zo pai tu in om kinken napi, minamte in ka tungah thu hong ngen ngawl uh hi. * 2Thin sah in a maan ngawl ngamta a amate uuk bang po a pai ka mite muak tu in a kinging sa in ka om tawntung hi. * 3Amate maizum maw in ka thin hong uuk sak tan lai hi. Biakna taw kisai a thiangtho huante ah amate in doai biakpiakna te vawtin doai biaktau tungah ngim namtui hal uh hi. 4Zanin mithite ii thaa te tungah thu dongh tu in leihawng sung le thaan ah amate pai uh hi. Amate in voksa ne in doai biakpiakna in a nei sate huanna satuite hawp uh hi. 5Taciang amate in midangte tungah, ‘Ko kung hong neak heak vun; ko sia no ii thuthaak tu in thiangtho leilam khu hi!’ ci uh hi. Tabang mihingte ka thuak zo bua hi– amate tungah ka thin uukna sia a mit ngei ngawl meikuang khat taw kibang hi.

6“Amate daan piak tu in ka khensat zo a, amate ii thuak tute lai sungah kiciamtee zo hi. Amate ii sep sate ka en thong batu a, 7amate ii khialna le a pu a pate ii khialnate hangin amate in thuak tu hi. Amate in doaibiakna mual tungah paaknamtui hal in keima hong sonsia uh hi. Tua ahiciang amate ii ngamtatna sate taw kizui in amate a kilawm bangin daan ka pia tu hi,” ci hi.

8TOPA in, “Sapit nga phate kuama in lalcip sak ngawl hi; amate in sapitzu in vawt zaw uh hi. Ka mihingte a vekpi in ka lalcip sak batu a– ka na a seamte ka ngum tu hi. 9Israelte sung panin Judah minamte thupha ka pia tu a, amate ii suan le paalte in ka mualtung ngam lua tu uh hi. Ka na a seam, ka tealsa mihingte tua ngamah teang tu uh hi. 10Amate in kei hong bia tu uh a, a tuute le a khuite sia a tatna tu mun ahi nitumna sangah a om Sharon Zaangtam le nisuana sangah a om Ngimna Kuam sungah paipui tu uh hi. *

11“Ahihang kei hong nusia in, ka mual thiangtho Zion a awlmawk ngawl, kaamthu bek a suang milim pathiante ahi Gad le Meni a bia note atu in thu tuam hi tu hi. 12Note kong sap ciang nong zo bua uh a, kong paupui ciang nong ngai ngawl uh hu in, thi ngamh in na thi tu uh hi. Ka thu nit ngawl tu le a sia vawt tu na teal uh hi. 13Tua ahikom keima hong bia in ka thu hong nite in neak tu dawn tu hau tu uh a, ahihang note in ngilkial dangtaak in na om tu uh hi, ci in kong son hi. Amate lungdam tu a, ahihang note na mai uh mawl tu hi. 14Amate lungdamin la sa tu uh a, no na hi uh le thin tamtham in na kap tu uh hi. 15Ka teal sa mihingte in na min sia haamsiatna in zangh tu uh hi. Vaanglianpipa TOPA Keima in nang kong thatlum tu hi. Ahitazong ka thu hong nite min thak khat ka phua tu hi. 16Leitung ah thupha piak tu a ngen papo in a thumaan Pathian ii thupha piak tu ngen tu uh hi. Kiciamna vawt papo in a thumaan Pathian min taw kiciam tu uh hi. A bo sa hunsung a ngimnate bo mang tu a kimangil tu hi,” ci hi.
Leithak le Vanthak

17TOPA in, “Keima in leithak le vanthak te ka vawt hi. Nungsang hun a thupiangte kimangil siat tu hi. * 18Ka bitphua sa sungah lungdam thinnuam in om tawntung vun. Ka vawt sa Jerusalem khuathak sia thin nopna taw kidim tu a, a mite lungdam tu uh hi. 19Jerusalem le a mite hu in keima mama thin nopna taw ka kidim tu hi. Tua munah kaana, hu ki ngetna om ngawl tu hi. * 20Nausente a sen in thi nawn ngawlin, mihing theampo in amate nuntak hun ciam vaal khanghaam in nungta tu uh hi. Kum zakhat bang a nungtate khangmoi in ki ngaisun tu hi. Tasia hun ma in a thite sia keima in amate daan ka piak limlakna khat hi tu hi. 21-22Mihingte in inn sa tu uh a, tua sungah teang tu uh hi– tua innte sia kuama dang in zangh ngawl tu hi. Amate in sapit huan vawtin a sapitzu ne tu uh hi– midang in neak sak ngawl tu hi. Thingkungte bangin, ka mihingte khansau in nungta tu uh hi. Amate ii sep sa nate amate ma in lungdam takin ne tu uh hi. 23A nasepna maa pai tu a, a tate in tua siatna thuak ngawl tu uh hi. Keima in amate le a suan a paalte a tawntung in thupha ka pia tu hi. 24Ka tungah thu hong ngetna a man ma ngangawn in a thungetnate ka zo tu hi. 25Ngiate le tuunote an ne khawm tu hi; tawpite in khui anneak bangin, taangphaw ne tu a, ngulte sia kiitak huai nawn ngawl tu hi. Ka mual thiangtho, Zion tungah liamna baaina le siatna bangma om ngawl tu hi,” ci hi.

Isaiah 66
TOPA in Minamte ii Thukhen

1TOPA in, “Vantung sia ka tokhum hi a, leitung sia ka peang ngakna ahi hi. Tua ahiciang a koibang inn le a koibang mun sia ka ten natu in sa thei tu nu ziam? * 2Keima mama in leitung vantung buppi ka bitphua hi! Kiniamkhiak in a kisiik kikte, kei hong kiita in ka thu hong nite dik ka sa hi. *

3Mihingte sia a uuk bangpo in ngamta uh hi. Amate in biakpiakna in khuital khat ngo, ahibale mihing khat biakpiakna in pia; tuuno khat taw bia, ahibale ui khat ii ngawng thiaktan, antang biakpiakna pia, ahibale vokte ii chi pia; ngim namtui pia ahibale milim tungah thu nget sia amate atu in kibang siat hi. Amate in a kiihuai biaknate diksa uh hi. 4Tua ahikom amate tungah– amate ii kiitak tuasiatna te ka theng sak tu hi– banghangziam cile ka sap ciangin kuama in hong zo ngawl a, ka pau ciangin kuama in hong ngai ngawl uh hi. Amate in ka thu nit ngawl tu le a sia vawt tu ma teal zaw uh hi,” ci hi.

5Ama kiita in a thu a ni note in, TOPA ci bang ngai vun; “Kei tungah nong thumaan hu in, na mihingte sung pan mama in pawlkhat in note hong ensan in bangma in hong heang ngawl tu hi. Amate in no hong selno in, ‘Lungdam takin na nuntak uh kong mu thei natu uh in, TOPA in a letna hong lak hen a, hong ngum tahen’ hong ci uh hi. Ahihang amate mama maimawl tu uh hi! 6Ngai vun! Khuapi sungah ngamlumna, Biakinn sungah aw nginna sia TOPA ii a ngalte daan a piakna awnging ahi hi!

7“Ka khuapi thiangtho sia naungil tut natna a thuak ngei ngawl nau a suak pai nupi khat taw kibang hi. * 8Tabang thute akua in mu ngei a za ngei ziam? Ni khat thu in ngam khat piang ngei ziam? Ngam khat a pian ma in Zion in khua ngei thuak ngawl tu hi. 9Ka minamte nausua hun ciang keima in paipui a, taciang suak sak ngawl tu in hong ngaisun heak vun,” ci hi. TOPA in son zo hi.

10Jerusalem taw lungdam khawm vun; ama atu in lungdam vun,
        hi khuapi a it note theampo awng!
    Tu in ama taw lungdam khawm vun,
        ama atu in a hee a kap note theampo awng!
11Nausen in a nu noai tawpin nop a sak bangin
        note in Jerusalem ii nop saknate nuam na sa tu uh hi.

12TOPA in, “Tawntung nop sakna kong pia tu hi; a kang ngeingawl nguntui bangin minamte ii haunate note tungah hong luang tu hi . Note sia a nu in omh in, a kaang tungah toai a itna taw a ou nausen khat taw na kibang tu uh hi. 13A nu in a tasen a heenep bangin, keima in Jerusalem khua sungah note kong heeneam tu hi. 14Hi thu a pian na mu uh ciang, na lung uh dam tu hi; note hong thahat sakin hong ciidam sak tu hi . Tasia ciang TOPA Keima in, ka thu hong nite hu in, ka ngalte tungah ka thin uukna ka lakna thu na he tu uh hi,” ci hi.

15TOPA sia meikuang taw hong pai tu hi. Ama in a thin uuk nate tungah daan pia tu in vuipi ii tha te tungah to tu hi. 16Ama in mawna nei hi ci in a mu leitung mihingte theampo mei le namsau taw daan pia tu a– tam mama kithatlum tu hi.

17TOPA in, “Biakna taw kisai a thiangtho huan sungah kingual ngitngut in a paite, voksa, zunam sa le a dang a kiihuai ante ne in, doai biak natu in amate le amate a kithiansua mite ii a bo mang tu hun nai zo hi. 18Amate ii ngaisutna le a nasepnate ka he hi. Ngam theampo ii mite khawmtua tu in kong pai hi. Amate hong pai hon ciang, ka vaangletna in bang vawt thei cisia mu tu uh a, 19 amate daan pia pa ka hi sia he tu uh hi.

“Ahihang amate sung pan pawlkhat ka khe tu a ka minthanna, a za ngawl, ahibale ka letna le ka thahatna a mu ngawl lai minamte le ngam khualate ahi, Spain, Libya le thalkap thiam Lydiate, Tubal le Greecete kungah ka puak tu hi. Amate in hi minamte sungah ka letna pualaak tu uh hi. 20Amate in na ngam mipuite theampo sia hi ngamte pan keima atu letsong in hong paipui kik tu uh hi. Israel mite in biakpiakna antangte biakna taw kisai bung thiangtho sungah Biakinn ah hong paipui bangma in amate in na ngam mipuite sia siphu tung, laa tung, kalauh tung le siphu ngalleangte le khui leangte tungah pua in ka mual thiangtho Jerusalem ah hong paipui tu uh hi. 21Keima in amate pawlkhat sia thiampite le Levite ka suak sak tu hi.

22Leitung thak le vantung thakte in keima vaangletna taw kho tu ahi bangma in, na suan na paalte le na min kip in kho tu hi. * 23“Thadet Poai sim le Sabbath Ni simin minam theampo in kei hong bia tu in hi mun Jerusalem ah hong pai tu uh hi,” TOPA in ci hi. 24“A cia uh ciang amate in kei hong langpan mihingte ii luanghawmte mu tu uh hi. Amate a ne thanhte thi ngei ngawl tu a, amate kihalna meite kimit ngei ngawl tu hi. Amate sia minam theampo ii muna ah kiihuai tu uh hi,” ci hi.

0 comments:

Post a Comment