Laithiangtho Dokna (Matthew 1-2)

1. To Jesu ii apu min sia bang ziam?
a. Manasseh
b. Elihu
c. Jacob

2. Abraham pan David dong khang ___ hi.
a. 7
b. 12
c. 14

3. David pan Babylon salin ki paipui dong khang___ hi.
a. 7
b. 14
c. 20

4. Babylon pan Messiah sua dong khang ___ hi.
a. 10
b. 14
c. 20

5. Vantung lalang in Joseph akoi sung paupui ziam?
a. Amangn
b. Ama nguak omna
c. A lupna

6. Joseph Mary taw akikhen natu akua taw kikumh ziam?
a. Mary
b. Kuama taw
c. A lawmte

7. Bethlehem sia abang ngam ziam?
a. Judah
b. Levi
c. Reuben

8. Leangnate Bethlehem lampi akuana hil ziam?
a. Herod
b. Ngalkapte
c. Aksi

9. Leangnate in Aksi sia abangbangh ciang in mu ziam?
a. Thu anget ciang
b. A pai kawm in
c. A pusuak ciang

10. Leangnate in bang amu ciang lungdam ziam?
a. Mary le nausen
b. Aksi
c. To Jesu

11. Herod banghang athin uk ziam?
a. Aksi hang
b. Nausen suak
c. Theam thuak

12. Nausen te kithalup natu thu ason khol kamsang sia ___ hi.
a. Habakok
b. Isaiah
c. Jeremiah


Matthew 1
Jesu Christ ii Pute pate (Luke 3:23-38)

1Abraham ii suan, David ii tu le ta ahi, Jesu Christ ii pute pate ii min sazian sia hi bang hi a,

Abraham pan David kumpipa dong, a pute pate ii min sia a nuai a bang ahi hi. 2Abraham ta Isaac, Isaac ta Jacob, Jacob ta Judah le a suapuite ahi hi. 3Judah in a zi Tamar taw Perez le Zerah hing a, Perez ta Hezron, Hezron ta Ram, 4Ram ta Amminadab, Amminadab ta Nahshon, Nahshon ta Salmon, 5Salmon ta Boaz hi. Boaz ii nu sia Rahab ahi hi. Boaz in a zi Ruth taw Obed hing a Obed ta Jesse hi.

6Jesse ta sia David Kumpipa ahi hi. David pan Babylon khua ah Israel mite salin a kimat hun dong, a nuai a bangin khang kiciamtee hi. David in Uriah zi taw Solomon hing a, 7Solomon ta Rehoboam, Rehoboam ta Abijah, Abijah ta Asa, 8Asa ta Jehoshaphat, Jehoshaphat ta Jehoram, Jehoram ta Uzziah 9Uzziah ta Jotham, Jotham ta Ahaz, Ahaz ta Hezekiah, 10Hezekiah ta Manasseh, Manasseh ta Amon, 11Amon ta Josiah, Josiah ta Jehoiachin le a suapuite ahi uh hi. * 12Babylon ah salin a kiciapui pan kipan Jesu khang dong a nuai a bangin khang kiciamtee hi. Jehoiachin ta Shealtiel, Shealtiel ta Zerrubabel, 13Zerrubabel ta Abiud, Abiud ta Eliakim, Eliakim ta Azor, 14Azor ta Zadok, Zadok ta Achim, Achim ta Eliud, 15Eliud ta Eleazar, Eleazar ta Matthan, Matthan ta Jacob, 16Jacob ta Joseph hi a, Christ kici Jesu Nu Mary pasal ahi hi.

17Tua ahikom Abraham khang panin David khang dong khang sawm le khang li hi a, David khang pan Babylon ah salin a ki paipui uh dong sia khang sawm le khang li, Babylon te mat hun pan Messiah sua dong khang sawm le khang li ahi hi.
Jesu Christ Suana
(Luke 2:1-7)

18Jesu Christ suana sia hi bang ahi hi. A nu Mary sia Joseph taw teang tu in a kidongh sa ahi hi. Ahihang a kiten uh ma in, ama sia Tha Thiangtho taw naungil om hi. * 19Joseph sia thumaan a ngamta tawntung pa khat hi a, ahizong ngual mai ah Mary maimawl sak nuam ngawl ahikom amate nii bek vaihawm in kikhen sawm hi. 20Tabangin a ngaisut laitak in, Vantung lalang khat a mang sungah hong kilak a “David ii suan Joseph awng, Mary sia na zi tu in tenpui kiita heak in. Banghangziam cile ama sia Tha Thiangtho in ngai sak hi. 21Ama in tapa khat hong hing tu a, ta ciangin a min sia Jesu ci in na phuak tu hi. Banghangziam cile ama in a mite mawna pan a hun tu hi,” ci hi. *

22“Tu in hite theampo a pianna sia Topa kamsangpa sonkhol teng a khuangkhim natu ahi hi. 23Ngaknu thiangtho khat naungil om tu a, tapa khat hing tu hi, ta ciangin a min sia Immanuel kiphuak tu hi.” (Tua in eite taw Pathian om khawm hi,’ a ci nopna hi.) *

24Joseph khanglo in vantung lalang sawl bangma in Mary tenpui hi. 25Ahihang taciil nau a sua dong a zi ompui ngawl hi. Taciang Joseph in nau min sia Jesu ci in phuak hi. *

Matthew 2
Nisuana sang pan Leangnate
1Jesu sia Herod Kumpipa maan lai in, Judea ngam Bethlehem khua ah suak hi. Tua zawk hai ngawlin aksi huvau a kante in nisuana sang pan Jerusalem ah hong pai uh a, 2“Jewte Kumpipa tu in a piang nausen sia koisung a suak ziam,” ci in dongh hi. “Nisuana sang panin ama ii aksi hong suak ka mu uh a, ama bia tu in kong pai uh hi,” ci uh hi.

3Herod Kumpipa in hi thu a zaak ciang, Jerusalem a om midangte bangma in linglawng hi. 4Ama in thiampi lian theampo le Thukham hil sya theampo kaikhawm in, “Messiah koi sungah suak tu ziam?” ci in dongh hi.

5“Judea ngam Bethlehem khua ah suak tu hi, banghangziam cile kamsang khat in hi bangin zo hi:

6‘Judah ngam Bethlehem khua awng
    Judah ngam khuapi thupite sungah,
        nang sia a nobel na hi bua hi,
    banghangziam cile nang sung panin,
        ka Israel mite lamlak tu lampuipa khat, hong piang tu hi.’ ” *

7Tua ahikom Herod in nisuana sang pan hong pai leangnate sam ku a, aksi a kilang bang hun tatak ziam, ci in dongh hi. 8Taciang, hi bang sawlna taw Bethlehem ah pai sak hi. “Pai tavun na patangno sia pha tak hong zong tavun. Na mu zawk uh ciang hong za sak kik tavun, kei zongh pai in ka bia tu hi,” ci hi.

9-10Taciang amate ding kik a, nisuana sang pan a mu uh aksi sia ma a pai kawmin mu uh hi. Amate in tua aksi a mu ciangin, a thin nopna le a lungdamna kison zo ngawl hi! Aksi sia amate mai ah pai a patangno omna tung san a thet ciang tawlnga hi. 11Amate inn sungah tum a patangno le a nu Mary a mu uh ciang khupdin in bia uh hi. Amate in a ken uh a vante kham, thingnamtui le paaknamtuite sua in pia uh hi.

12Pathian in amate sia Herod kungah, a heak kik ngawl natu in, a mang sungah hil ahikom lampi dang khat tawn in, a ngamah cia kik uh hi.
Egypt ah Taipui

13Amate a pai zawkciang, Topa vantung lalang khat Joseph mang sungah kilang a, “Herod in patangno sia that tu in zong tu hi. Tua ahikom patangno le a nu la in Egypt ngamah taipui tan, nusia a kong sawl dong, tua munah om tavun,” ci hi.

14Joseph tho a patangno le a nu sia Egypt ngamah zan lai in, taipui hi. 15Tua munah Herod thi dong taam uh hi. “Egypt ngam pan ka Tapa ka sam hi,” ci thu kamsangpa ii sonkholnate a tangtun na ahi hi. *
Patangnote A Kithalupna

16Nisuana sang pan hong pai mihing pilte in theam ahi hunlam Herod in a phaw ciangin a thin uuk mama hi. Bethlehem khua sung le a kiim a paam a om, kum nii le anuai sia patangno theampo thalup tu in thupia hi. Mipilte ii aksi a mu hun taw tua in tabangin ngamta hi.

17Kamsangpa Jeremiah ii a sonkholna teng hi bangin tangtung a:

18“Ramah ngamah nasia tak kaana awnging khat kiza hi. Rachel sia a tate a thi siat hu in ki hee neam zo ngawlin kap hi.” *
Egypt ngam pan Heak kikna

19Herod thi zawkciang Egypt ngam a om Joseph mang sungah Topa vantung lalang khat kilangh a, 20“Tho in nausen le a nu la in a, Israel ngam ah ciapui kik tan. Banghangziam cile patang a that nuam sia thi zo hi,” ci hi. 21Tua ahikom Joseph tho a, patangno le a nu la in, Israel ngam ah cia kik uh hi.

22Ahihang Judea ngamah Herod za a lai sia Archelaus hi, ci in Joseph in a zaak ciang tua ngam a pai tu lau hi. A mang sungah a ngamtat natu kihil thua ahikom Galilee ngamah pai in Nazareth khua ah teang hi. 23Kamsangte sonkhol bangin, “Ama sia Nazareth mi kici tu hi,” a cina thu tangtung hi. *

0 comments:

Post a Comment