Laithiangtho Dokna (Matthew 3-4)

1. John sia koi sung pan pai ziam?
a. Samaria
b. Somalia
c. Judea

2. John taw kisai ason khol kamsangpa sia akua ziam?
a. Ezekel
b. Isaiah
c. Jeremiah

3. John puan silh sia bang taw kitak ziam? 
a. Kalauh mul
b. Tumul
c. Sahunpuan

4. Bang ngunhui ah teangte John kung ah tui kiphum ziam?
a. Siloam
b. Galilee
c. Jordan

5. John in Pharisee le sudducee te bang na ziam?
a. Mipil
b. Ngul ngilo
c. Syate

6. To Jesu sia koi sung pan John ii tuiphumna hong pai ziam?
a. Galilee
b. Israel ngambup
c. Samaria

7. To Jesu ngam sung apai pui sia akua ziam?
a. Thaa
b. Doaimangpa
c. Ama le ama

8. John thong atak ciang To Jesu ___ah pai hi.
a. Jerusalem
b. Galilee
c. Nazareth

9. Jesu ii nungzui ngasa man bangza om ziam?
a. 1
b. 2
c. 4

10. James ii suapuipa sia akua ziam?
a. John
b. Peter
c. Andrew

11. To Jesu thu koisung ngambup kizel ziam?
a. Moab
b. Syria
c. Israel

12. Galilee ngam khua in To Jesu nung zui ziam?
a. 3
b. 7
c. 10


Matthew 3
Tuiphumpa John Thuhilna
(Mark 1:1-8; Luke 3:1-18; John 1:19-28)
1Tua hun lai takin Tuiphumpa John sia Judea senneal ngamah hong pai a, thuhil kipan hi. 2“Na mawna uh pan kisiik kik vun, banghangziam cile Vantungngam hong nai zo hi!” ci hi. * 3Kamsangpa Isaiah kammal sia John huvau a sonkholna hi a,

“Senneal ngam sungah mihing khat hong au a,
‘Topa atu in lampi pua khol vun;
Ama khualhaw natu in lamzin tang
khat vawt sak vun!’ ” ci hi. *
4John puan silh sia kalauh mul taw kitak a, ama in savun kawngkhau thua in, ama an sia khaumaw le ngam khuaitui ahi hi. * 5Mihingte in Jerusalem pan, Judea ngamkhen bup le Jordan ngunhui ngam theampo panin hong pai uh hi. 6Amate in a mawna uh pualaak a, taciangin Jordan ngun sungah ama in tui phum hi.

7Pharisee te le Sudducee te tam ma ama kungah tui kiphum tu in, hong pai a mu ciangin, amate tungah, “No ngul ngilote awng— Pathian ii daan hong piak natu panin suakta tu nu hi ci in akua in hong son ziam? * 8Mawna pan kisiina lim kilangh sak vun. 9Abraham suan le paalte na hi uh hu in, daan thuak natu pan suakta tu in, kimuangmaw heak vun. No tungah hong ci khi hi, Pathian in hi suangte zongh la in Abraham suan le paalte suak sak thei hi! * 10Thingkungte phuk tu in a bul ah, heimai kingat zo hi, ngapha a nga ngawl thingkung theampo kiphuk tu a, meimang sungah kisep tu hi. * 11Na kisiina uh a kitel natu in tui taw kong baptize hi, ahihang kei nung pan hong pai lai tu pa in no sia Tha Thiangtho le meikuang taw hong baptize tu hi. Kei sangin ama lian zaw pek a, a peangdap toai tu zonghin ka kilawm bua hi. 12Ama in ankheap natu tangkheaplaw sia a khut sungah toai zo hi. Zungtaangte hong kheap tu a taangtang teng sia taangsal sungah khawmtua in, taangsi taangvai teng sia a mit ngei ngawl meikuang sungah hal tu hi,” ci hi.

Jesu a ki Baptize na
(Mark 1:9-11, Luke 3:21-22)
13Tua hun laitakin Galilee pan Jesu hong theng a, John ii baptize tu in, Jordan ngun John kungah hong pai hi. 14Ahihang John in ama tho tu in kithoai a, “Kei sia nangma ii nong baptize tu hi zaw napi, kei kungah nang hong pai zaw ni ziam?” ci hi.

15Ahihang Jesu in zo kik a “Pathian deina theampo a kicin natu in, tu in hong seam tan,” ci hi. Taciang John zongh thukim hi.

16Jesu a ki baptize zawk po ciang tui sung pan hong pusuak to hi. Taciang ama atu van kihong a, Pathian ii Thaa ngam vakhu bangin hong tuaksuk in, ama tungah hong tu suk a mu hi. 17Taciang van panin aw khat in, “Hi sia ka it ka Tapa hi a, ama tungah ka lungkim hi,” ci hi. *

Matthew 4
Jesu ii Ze-et Thuakna
(Mark 1:12-13; Luke 4:1-13)
1Tua zawkciang Thaa in Jesu sia Doaimangpa ii ze-et tu in ngam sungah paipui hi. * 2Sun sawm li le zan sawm li an ne ngawlin a om zawkciang Jesu ngilkial hi. 3Tasia ciang Doaimangpa hong pai a, “Pathian Tapa na hi le suang hite anluum suak sak in,” ci hi.

4Ahihang Jesu in zo a, “Laithiangtho in, ‘Mihingte sia anluum bek taw nungta thei hi ngawl a, Pathian kam sung pan a pusuak kammal khat sim nuntak pui hi,’ ” ci hi. *

5Tua zawkciang Doaimangpa in Jesu sia khuapi thiangtho Jerusalem ah paipui a, Biakinn khuvum a saangbel na ah suanto hi.

6“Pathian Tapa na hi le nangma kilawnsuk in, banghangziam cile Laithiangtho in ci hi,

‘Pathian in a vantung lalangte
nang huvau in sawl tu a,
na peang beak zongh
suang taw a ki sutha ngawl natu in,
a khut taw hong dom to tu hi.’ ” *
7Jesu in zo kik a, “Ahihang Laithiangtho in, ‘Na Topa Pathian na ze-et heak vun,’ zongh ci si hi,” ci hi. *

8Taciang Doaimangpa in mualsaang mama khat ii tungah paipui a, leitung ngam tatuamte ii letna theampo lak hi. 9“Khupdin in kei hong bia lete, hi teng theampo nang kong pia tu hi,” ci hi.

10Tasia ciang Jesu in, “Satan awng, tai in! Laithiangtho in, ‘Na Topa Pathian bek bia vun a, Ama tu bek sep sak vun!’ ci hi,” ci hi. *

11Tasia ciang, Doaimangpa in Jesu nusia a, vantung mite hong pai in Jesu ou uh hi.

Jesu Galilee ah Nasep Kipan
(Mark 1:14-15; Luke 4:14-15)
12Jesu in John sia thong sungah kikhum hi, ci in a zaak ciang, ama Galilee ah pai hi. * 13Ama Nazareth khua ah taam ngawlin, Zebulun le Naphtali ngamsung Galilee tuili hui khuapi Capernaum ah teang tu in pai hi. * 14 Hi bang a ngamtat sia, kamsangpa Isaiah pauna teng a tangtun natu ahi hi.

15“Zebulun ngam le Naphtali ngam,
Tuipi sung zotna lampi tung,
Jordan ngun lang khat,
Galilee, Gentilete ngam! *
16Khuazing sung a teang mihingte in,
Khuataang lian mama khat mu tu hi.
Thina khuazing ngamsung
a teangte tungah khuavak a taang tu hi.”
17Tua hun pan kipan Jesu in, “Na mawna uh pan kisiik kik vun, banghangziam cile Vantungngam hong nai zo hi,” ci in ama thuhilnate hil tu in kipan hi. *

Jesu in Ngasa mante Li Sam
(Mark 1:16-20; Luke 5:1-11)
18Galilee tuili hui ah a va laitakin, Jesu in ngasa mante ahi unau nii Simon (Peter kici) le a suapuipa Andrew, tuili sungah ngeen khat taw ngasa manin a om mu hi. 19Jesu in amate tungah, “Hong zui tavun, mihing mante kong suak sak tu hi,” ci hi. 20Thakhat in a ngeente nusia in ama zui uh hi.

21Tua mun pan a paisuak uh ciang Zebedee tapate unau James le John mu hi. Amate in a pa uh taw ngunkuang sungah a ngeen uh pua in om hi. Jesu in amate sam hi. 22Taciang, thakhat in a ngunkuang le a pa uh nusia in zui uh hi.

Jesu in Hilna, Thuhilna le Dam sakna seam
(Luke 6:17-19)
23Jesu sia Galilee ngambup ah vakin, synagogues te ah hilna nei a, Kumpingam Lungdamna Thu thuhilna nei in, natna satna namcin a neite dam sak hi. * 24Ama thu Syria ngambup ah kizel a, tua ahikom mihingte in, ciina theampo, natna satna le mealhem theampo: doai veite, butthi theite, pumpi zawte, ama kungah paipui in— Jesu in dam sak siat hi. 25Galilee ngam khuapi sawmte le Jerusalem, Judea le Jordan ngunngal panin, mihonte in zui uh hi.

0 comments:

Post a Comment