Laithiangtho Dokna (Samuel Khatna 25-26)

1. Samuel sia akoi sung ah teang ziam?
a. Ramah
b. Nihnaveh
c. Hebron

2. Abigail ii pasal sia akua ii suan ziam?
a. Caleb
b. Joseph
c. Levi

3. Abigail ii pasal Nabel in, David sia ___ hi.
a. lang zazan
b. phat vawt
c. lungdam ko

4. Nabel ii khiakna sia bang ziam?
a. Mamaw
b. Taangsaal
c. Thupha sang

5. Nabel sia bang natna taw thi ziam?
a. A thin tum
b. Thanguikon
c. Meima ngilo vei

6. Nabel ni bangza khawng dam ngawl in om ziam?
a. 7
b. 10
c.  14

7. David taw Saul ii ngiaphual ah apai sia  akua ziam?
a. Joab
b. Abishai
c. Abner

8. Saul in a tei sia koi sung ah phut ziam?
a. Aziatsang
b. A luthungh
c. A khawdop

9. Saul ii mut lan a teipi le ___ sia David in lak sak hi.
a. a naamsau
b. a puanmong
c. tuithawl

10. Saul in David sia bangba tel ziam?
a. A ngim
b. A meal
c. A aw taw

11. David in Saul akoi sung pan awhsan ziam?
a. Ngul langkhat
b. Mual 2 kawm
c. Mualdawn

12. David in Sual ii tei sia akua tungtawn piak kik sawm ziam?
a. Abner
b. A ma mama
c. A mihingte khat

Samuel Khatna 25
Samuel ii Thina
1Samuel thi a, Israel mibup hong pai in, ama hu in khuangai tek uh hi. Tua zawkciang ama tenna Ramah ah phum uh hi. 
David le Abigail
Tua zawkciang Paran dui sungah David pai hi. 2-3Tua munah Caleb ii suan Nabal a ci pasal khat om a, ama sia Maon khuapi pan hi. Carmel khuapi ii hui ah leitangh nei hi. Ama sia a hau mama pa khat hi a, tuu tulthum le keal tulkhat nei hi. A zi Abigail sia a meal hoi a ciim hi, ahihang a pasal sia ama tu bek a ngaisun a thin tom khat hi.
 Carmel khua ah Nabal in a tuute mulmeet in om a,  4taciang dui sungah a om David in ama thu za hi,  5tua ahikom ama in tangval sawm pai sak a, Carmel ah Nabal zong sak in, nuksetna kam thaak hi.  6Ama in Nabal tungah amate pau natu teng hil hi, “David in nuksetna kam hong thaak hi, ngualtam pa awng, nangma atu le na innkuan bup atu le na neisa theampo atu in, a pha bel deisakna hong za sak hi.  7Ama in nang sia tuumul meetin om ci hong za a, na tuucingte zongh ko taw omkhawmin, bangma kong suksiat sak ngawl uh sia na heak tu ka dei hi. Carmel ah a om sung tawntung amate ii neisa na khat zongh kinguk sak ngei ngawl hi.  8Amate dongh le te ahi bangin hong son tu hi. Poai ni khat a hong pai luilam khu hi, tua ahiciang pha takin zin hong do tan. Nong piak thei po ko na naseamte le na it na lawmpa David hong pia tan,” ci sak hi.
  9David ii mihingte in hi kammalte sia David ii min taw Nabal tungah puak uh hi. Tua zawkciang amate in tua munah ngak uh a,  10taciang Nabal in a khak bel ciang zo in, “David ziam? Akua David ziam? Za zongh za ngei bong! Ih ngam sung sia sila tai khawng taw tu laitak kidim hi!  11Ka an le ka tui la in, ka tuumul meette atu ngan ka ngawte taw a koisung pan hong pai ziam ci ka heak ngawl mite pia ngawl het tu khi hi,” ci hi.
  12David ii mihingte in heak kikin Nabal ii pau teng David tungah son kik uh hi.  13David in, “Na namsau uh kua vun,” ci in thupia a, amate in tabangma in vawt uh hi. David zongh ama namsau kua in taciang a mihingte zali tu khawng taw paikhia a, phual ah vanhte cing tu in zanii nusia hi.
  14Nabal ii naseamte khat Nabal ii zi Abigail munah, “Na za zo ziam? David in kamtai pai sak a, ih topa munah, nuksetna kam puak sak kasap ih topa in lang zazan hi.  15Tabang hi na ve, amate ei tungah hong dik mama uh hi; ko hong nawngkai sak ngei ngawl hi, taciang lo sungah amate taw ka om sung tawntung, ka neisa uh bangma hong kinguk sak ngei ngawl hi.  16Tuu honte cingin ka om uh laitakin ama in sun taw zan taw ko hong hung hi.  17Hi thu sia pha tak ngaisun in a, bang vawt tu ci in khensat in. Hi sia in ih topa le a innkuanpuite atu lalna piang sak tu hi. Ama sia mamaw thinpui khat hi a, kuama ii ngaisutna piak saang thei ngawl hi,” ci hi.
  18Abigail in manlang takin anluum zanii, savun tuithawl nii dim zu, tuu pum em nga, antang kan kuang nii, sapitko bom zakhat, theiko muh luum zanii khawmtua in laa tungah suan hi.  19Tua zawkciang a naseamte munah, “No, mai ah pai vun, kei, nung pan kong zui tu hi,” ci hi. Ahihang a pasal munah bangma son ngawl hi.
  20Muallim vei khat ah a laa tung to in a pai le thakhat in David le a mihingte hong paito taw kikealsik uh hi.  21David in, “Banghangin hi sia pa ii neisa te dui sungah hun sasak ka na khi ziam? Ama ii neisa khat zongh kinguk sak ngei ngawl hi, tu in hisia sia ka huna sa teng hong thuh kikna hi!  22Zingsang khuavak maa in tua pasalte khat zongh kikhe ngawlin ka that siat bale Pathian in keima hong vaatlum tahen,” ci in khua ngaisun hi,
  23Abigail in David a mu ciang manlang takin a laa tung pan tuakin,  24David ii peang kung lei ah kisep sukin, ama tungah hi bangin ci hi, “Nong hesuakna in hong ngai tan! Keima a maw pu hi tong;  25bangma kimanna a nei ngawl Nabal sia awlmaw vet heak in! Ama sia a min ii khiakna ‘Mamaw’ sia ma hi linlian hi. Na naseamte hong thet lai in tua munah keima om ngawl luilam khi hi, topa awng.  26Phu lam in na ngalte na thalup ngawl natu hong keamcing sia TOPA hi. Taciang tu in a nungta TOPA taw ka kiciamna pan, na ngalte le nang hong susia nuamte theampo sia Nabal bangin daan thuak tu hi.  27Nong hesuakna, topa awng, hi letsongte hong saang tan, nangma atu kong paipui hi, na mite pia in.  28Ka khialna a om le nong hesuakna in hong mai sak tan. TOPA in nang le na suan na paalte zongh kumpipa tu in hong vawt tu hi, banghangziam cile ama ii ngal nangma in na sim sak hi; taciang na nuntak sung tawntung tatkhaakna na vawt ngei batu hi.  29Taciang mihing khat po in nang hong sim in that tu in hong hanciam le TOPA na Pathian in sumngum manphate a kicin bangin nang hong keamcing tu hi. Na ngalte ahile, mihing khat ii suangtang saili taw a kaa bangin kilawnthal tu hi.  30Taciangin TOPA in nang atu thupha hong kamciamte theampo hong tung sak a, Israelte ii kumpipa in hong vawt ciangin,  31a thu om ngawl bulin ngual na thalupna le nangma thu a, phu na lamna te hu in kisii na le thin nop ngawlna na nei batu hi. Taciang TOPA in thupha hong piak ciangin, topa, kei hong mangil heak in,” ci hi.
  32David in ama Munah, “Tuni a kei taw kisi tu a hong puak Israelte Pathian TOPA pok tawng!  33Na khua ngaisut thiamna le tuni tual thalupna ka vawt tu le keima thu a phu ka lam natu pan nong kep natu in, na sep na vawt teng hu in Pathian kong pok hi.  34TOPA in nang kong suksiat thaak ngawl natu in kei hong keam hi. Ahihang a nungta Israelte Pathian taw kiciam in kong sonna pan, a manlang in hong pai in hong kisik pui ba le te zingsang khuavak sia in, Nabal ii mihingte theampo thi siat tu hi,” ci hi.  35Tua zawkciang David in ama kungah hong puak letsongte ama tung pan saang a, “Va cia kik tan a, thinngim heak in. Na dei bangin vawt tu khi hi,” ci hi.
  36Abigail in Nabal kungah cia kik a, ama sia kumpipa atu a kilawm liang poai khat khaam hi. Zu khamin maimua nuamin om a, tua ahikom a zingsang ciang mateng ama ii munah bangma son ngawl hi.  37A zukham hong thai ciang ama in thu theampo son hi. Thakhat in ama sia thanguikon natna hong nga a, a tung thei nawn bua hi.
  38Ni sawm khawng zawkciang TOPA in Nabal sia vaatin thi hi.
  39Nabal ii thina David in a zaak ciang, “TOPA pok vun! Nabal tungah ama in kei hong nunau hu in phu hong lam sak a, kei a naseam pa ii ka khial ngawl natu hong keamcing hi. TOPA in Nabal sia a khansiat hu in daan tat hi,” ci hi.
 Tua zawkciang David in kiten natu mo dokna Abigail tungah thaak hi.  40A naseamte Carmel ah pai in, “David in a zi tu, nang hong pui tu in ko hong sawl hi,” ci uh hi.
  41Abigail lei ah kun sukin, hi bangin ci hi, “Keima a naseam nu hi a, a naseamte ii peang a sil sak tu naseam ka hi hi.”  42Ama manlang tak tho in a laa tungah to hi. A lalang numei nga teng taw David ii naseamte taw ton in, a zi suak hi.
  43David in Jezreel mi Ahinoam tenpui zo a, tu in Abigail zongh a zi hong suak hi.  44Tua laanin Saul in David ii zi ahi a tanu Michal sia Gallim khua Laish ii tapa Palti a piak sak hi.  *
Samuel Khatna 26
David in Saul ii Nuntakna Khoaikhe kik
1Ziph panin pasal pawlkhat Gibeah, Saul kungah hong pai in Saul munah David sia Hachilah Mualvum Judah duisung ii mongah buu hi ci in son uh hi.  *  2Thakhat thu in Saul in Israel ngam sung a ngalkap phabel tulthum tonpui in Ziph dui sungah David zong tu in pai a,  3taciang Hachilah Mualvum paina lampi hui ah ngiaphual saat uh hi. David sia dui sungah om lai a, taciang Saul in ama zong tu in hong pai ci in a zaak ciang,  4ngalvilte a pai sak le, Saul sia tua munah na om takpi hi.  5Ama thakhat in pai a, Saul le Ner ii tapa Abner, Saul ii ngalkap hon ukpipa koisung lum ziam ci in vil hi. Saul sia ngiaphual sung sangah lum a, a mite sia ama ii kiim ah ngiaphual saat uh hi.
  6Taciang David in, Hit mi Ahimelech le Joab ii suapuipa Abishai (A nu uh sia Zeruiah hi), te munah, “No nii sung pan akua zaw in Saul ii ngiaphual ah kei taw hong pai tu nu ziam?” a ci ciang,  Abishai in, “Keima in hong zui tong,” ci hi.
  7Tua zanin, David le Abishai te Saul ii ngiaphual sung sangah tum in, Saul sia ngiaphual zanglai san ah muu in a om mu a, a tei a lu ngakna hui ah phut hi. Abner le ngalkapte a kiim ah muu uh hi.  8Abishai in David ii munah, “Pathian in na ngalpa na khut sungah tu zanin hong pia hi. Tu in ama ii tei taw ma in ama kong sun tu a, lei ah ih kilh cip tu hi— khat vei sut taw kiman tu hi, nii vei ka sut kul ngawl tu hi!” ci hi.
  9Ahihang David in, “Ama susia ngawl tu ni hi! TOPA in ama ii teal sa kumpipa a susia sia daan pia tu hi,” ci hi.  10David in a pau zomto lai in, “ thi ngei a thi tu ahizong ngalphual ah thi tu ahizong, TOPA ii hun ciang, TOPA ama mama in Saul sia thatlum tu ci in he khi hi.  11TOPA ama ii kumpipa in a koi sa sia ka suksiat tu TOPA in khaam hi. A tei le a tuithawl la in, paikhia tawng,” ci hi.  *  12Tabangin David in Saul ii tei le a tuithawl Saul ii lu sialna mawk pan la in ama Abishai in nusia uh hi. Kuama a mu om ngawl, bang thu piang ci in a he zongh om ngawlin, zongh a khanglo beak bua uh hi, amate mut thip dipdeap uh hi, banghangziam cile TOPA in mutciik takin muu sak hi.
  13David in kuam ii langkhat kantan in mualdawn, a khuala khopna mun khat panin au a,  14Saul ii ngalkapte le Abner oksan hi. “Abner awng! Nong za thei ziam?” ci hi.
 “Kumpipa phawng tu in a au sia akua ziam?” ci in Abner in dongh hi.  15David in zo a, “Abner, nang sia Israel ngamah a lianbel hi ka na ngawl ni ziam? Banghangin na topa kumpipa hung zo ngawl ni ziam? Tu ma hiat in na topa thatlum tu in akua ziam maw khat na ngiaphual sungah hong tum hi.  16Na tavuan lel ni hi, Abner awng! A nungta TOPA ii min taw kiciamin ka cina pan, no theampo a thi tu kilawm nu hi, banghangziam cile TOPA ii kumpipa in a koi na topa uh hung ngawl nu hi. En in! Kumpipa ii tei koi sungah om ziam? A lutang hui a tuithawl sia koi sung om ziam?” ci hi.
17Saul in David ii aw tel a, “David ka tapa awng, nangma ni ziam?” ci in dongh hi.
 “Hi khi hi, Kumpipa awng,” ci in David in zo hi.  18Belap a, “Topa awng, kei na naseam pa banghangin hong delkot lai ni ziam? Bang seam khial thong na khi ziam? Bang mawna vawt khi ziam?  19Kumpipa awng, kong son tu sia na ngai in. Kei nong langpan natu hong vawt sia TOPA ahile ama ii tunga piakkhiatna khat vawt leang ama in a thin kheal thei tu hi; tua ahi bua a mihingte ii vawt ahile TOPA ii haamsiatna amate tungah tung tahen. Banghangziam cile TOPA ii ngam le lei panin ngamdang te pathian bek ka biak thei natu munah kei hong kihawlkhia hi.  20TOPA ii kung pan a kikhuala ngamdang leitangh tungah thalup hong thuak sak heak in. Banghangin Israelte ii kumpipa in uili bang lel kei po that tu in hong pai ziam? Ngam sungah vacimte vai bang liangin banghang hong vai ziam?” ci hi.
  21Saul in zo a, “Keima khial zo khi hi. Hong heak kik tan, David ka tapa awng. Bangma hong law nawn ngawl tu khi hi, banghangziam cile tu zanin ka nuntakna hong khoaikheet sak ni hi. Kei sia mamaw khi hi. A lipkhap huai mama nasep seam thong khi hi,” ci hi.
  22David in, “Kumpipa awng, hi sungah na tei om hi. Na mihingte khat hong pai in hong la sak tan.  23TOPA in a thumaante le a thutang te noptuam pia hi. Tu ni in ama in nang, keima ii khut sungah hong pia hi, ahihang TOPA ii kumpipa in hong koi sa nang sia kong susia bua hi.  24Na nuntakna tuni in kong khoaikheet sak bangma in, TOPA in kei, ngim ngana theampo pan hong hunkhia tahen,” ci hi.
  25Saul in David munah, “Pathian in thupha hong pia tahen, ka tapa awng. Na vawt papo zawna nga tu ni hi,” ci hi.
 Tabangin David ama ii pai natu ah pai a, Saul sia a inn ah cia kik hi.

0 comments:

Post a Comment