Laithiangtho Dokna (Samuel Masa 23-24)


1. Philistinete in Keilah khua pan bang ngu ziam?
a. Ngan khawite
b. Anthak laakte
c. Khamh le nguun

2. Abiathar suataak ciang bang keng ziam?
a. Thukham thingkuang
b. Naamsau
c. Ephod

3. David le Jonathan sia koisung ah kiciamna vawt ziam?
a.  Zion mualvum
b.  Horesh
c. Keturah

4. Akuate in Saul kung ah David kong matsak tu ci ziam?
a. Ziph-te
b. Moab
c. Hebron

5. David kibupna sia Judah ngam ___ san hi.
a. nisuana
b. thangsang
c. saksang

6. Saul in David amat dadekna mual sia bang kici ziam?
a. Jacob tuikhuk
b. Ngualzawna
c. Kidoina


7. Engedi dui sung om David man tu in Saul in ngalkap ___ taw kuan hi.
a. 1000
b. 3000
c. 7000

8. David kibuhna lianghawng sung ah Saul bang hi ziam?
a. Awnghaw
b. Anneak
c. Mut

9. Saul sia bang ahi hang aa, David in thatlum nuam ngawl ziam?
a. Alawmpa ii pa
b. Pathian tealsa
c. Kumpi

10. Saul ii tungah, David in amale-ama bangbangh in kison ziam?
a. Khaumaw
b. Puansia
c. Uino

11. David in Saul thu ason zawk ciang, Saul ___ dadek liang hi
a. butthi
b. kap
c. thinuk

12. Saul in David tung pan akuate taw kisai kamciam ngen ziam?
a. Ama ii suanlepal
b. Israelte
c. Anuntaakna


Samuel Khatna 23
David in Keilah Khua Suatak
1Philistinete in Keilah khua sim a, a anthak laak uh te nguk sak hi, ci in David in za hi. 2Tua ahikom ama in TOPA dongh a, “Philistinete sim tu in ka kuan tu ziam?” ci hi.

“Hi hi, sim in a, Keilah suatak in,” ci in TOPA in zo hi.

3Ahihang David ii mihingte in ama munah, “Hi lai Judah sung zongh ah kiitak tu a khom om hi; Keilah ah pai in Philistinete sim leang pha ngawl seseam tu hi,” ci uh hi. 4Tua ahikom David in TOPA dongh kik a, taciang TOPA in, “Pai in a, Keilah sim tan, banghangziam cile Philistinete ii tungah zawna kong pia tu hi,” ci hi. 5Tua ahikom David le a mite Keilah khua ah kuanin, Philistinete sim uh hi; amate in tam ma that uh a, a ngannote laak sak uh hi. Tabangin David in tua khuapi suatak hi.

6Ahimelech ii tapa Abiathar suakta in Keilah khua ah David a pop ciang ephod keng hi.

7David sia Keilah zuan hi ci in Saul tungah a kison ciang, “Pathian in David sia keima khut sungah hong pia zo hi. David in ama le ama sia luphung taw ki uum, kongpite taw ngal nanna te ii sung sangah thaang kisia hi,” ci hi. 8Tua ahikom Saul in a ngalkapte samin, Keilah ah David le a mite uumci sawm hi.

9Saul in amate sim tu in ngeal hi ci in David in a zaak ciang, thiampi Abiathar munah, “Ephod sia hi munah hong paipui tavun,” ci hi. 10Tua zawkciang David in, “TOPA Israelte ii Pathian awng, kei na naseam pa ii hu in, Saul sia Keilah ah hong pai in suksiat sawm hi ci in za khi hi. 11Keilah khua mite in Saul khut sungah keima hong aap tu ziam? Ka zaak bang in Saul hong pai takpi tu ziam? TOPA Israelte ii Pathian awng, hong zo tan, kong ngen hi,” ci hi.

TOPA in zo a, “Saul hong pai tu hi,” ci hi.

12“Taciang Keilah khua mite in kei le ka mite Saul khut sungah hong aap tu ziam?” ci in David in dongh kik hi.

“Hong aap tu hi,” ci in TOPA in zo hi.

13Tua ahikom David le a mite zaluk khawng in Keilah thakhat thu in nusia a, paisuak uh hi. Saul in David suakta hi ci in a zaak ciang a ngealna kheal hi.

David Mualtung Ngamah Om
14Ziph ngam duisung mualtung ngamah David sia buu in om hi. Saul in zong tawntung a, ahihang Pathian in David sia ama ii khut sungah a aap bua hi. 15David in Saul sia ama thatlum nuamin kuankhia ci in mu hi.

David sia Ziph khua paam duisung Horesh ah om hi. 16Jonathan ama ii kungah pai in Pathian ii sungsiatna ama ii tungah om tu hi ci in hanthotna pia a, 17ama munah, “Lau heak in, ka pa Saul in nang bangma hong law zo ngawl tu hi. Ama in nang sia Israelte ii kumpipa tu hi a, nang zom a kei sia a zalian kik bel ih hi tu sia ama in tel mama hi,” ci hi. 18Amate nii in kilawmtakna biakna taw kisai a thiangtho kamciam vawt ku a, David sia Horesh ah taamin, Jonathan inn ah cia hi. *

19Ziph panin mihing pawlkhat Gibeah ah Saul ii kungah hong pai uh a, “David sia Judah duisung ii thangsang koma ii Horesh ngamkhen, Hachilah Mualvum ah buu hi. * 20Kumpipa awng, ama bangza in man nuam na hi sia hong he khu hi; tua ahikom koma ii ngamkhen sungah hong pai tan, na mat thei natu koma in vawt hamtang tu khu hi,” ci uh hi.

21Saul in zo a, “Kei tungah nong dik uh hu in, TOPA in thupha hong pia tahen! 22Pai tavun a, khat vei ma a kipealkhial ngawl natu in hong seam tavun; ama koisung tatak ah om ziam hong kan tavun a, akua taw veu kimu ziam a maanin hong tel tavun. Ama sia kukal mama hi ci in za khi hi. 23A buhna mun tatak hong zong tavun a, kei kungah tangtan in thu hong puak nanak sak tavun. Tasia ciang noma taw kong pai khawm tu a, ama ngamkhen sungah a om lai le Judah ngam buppi zon a kul zong ka vai tu hi,” ci hi.

24Tua ahikom amate in pai a, Saul ii mai Ziph ah heak kik uh hi. David le a mite sia Judah ngam thangsang duisung a ngamkhing kuam, Maon dui sungah om uh hi. 25Saul le a mihingte in David zong tu in hong pai khia uh a, ahizong ama in a thu za in, Maon ngamsung mual tungah taam hi. Saul in hi thu a zaak ciang David zuizen hi. 26Saul le a mite sia mualpangh lang ah om uh a, a lang pangh a om David le a mite taw mual in da hi. Saul ii mite in amate man tu in neakin, man dektak uh a, amate sia Saul ii kung panin manlang takin paikhia uh hi. 27Tua laitak lianin kamtai khat hong pai a, Saul munah, “Philistinete in ih ngam hong sim hi, thakhat thu in hong heak kik tan,” kici uh hi. 28Tua ahikom Saul in David a zuizet sia tawp in, Philistinete do tu in kuan hi. Tua hu in tua mun sia Kidoina Mual kici hi. 29David in tua mun nusia a pai in Engedi ngamkhen sungah buu in om hi.

Samuel Khatna 24
David in Saul ii Nuntakna Khoaikhe
1Philistinete a simna pan Saul hong cia kik ciang, Saul munah David sia Engedi dui sungah om hi ci in kison hi. 2Saul in Israel ngamsung ngalkap pha bel tulthum la in David le a mite zong tu in Ngam Keal Suangpi a kicina ii nisuana sangah hong pai uh hi. 3Ama in tuukhawk taw a kinai lampi hui lianghawng khat ah awnghaw tu in hong tum hi. Tua lianghawng sia David le a mihingte ii a tawngah a buhna lianghawng a na hi luilam hi. * 4Amate in ama munah, “Hisia nangma ii hunpha hi! TOPA in na ngalte nangma ii khut sungah kong koi tu hi hong ci hi, ama tungah na law nop po law thei tu ni hi,” ci uh hi. David bokvak in pai a, Saul ii heak ngawl lan in a puantual mong bek khat attan sak hi. 5Ahihang tasia hun lai takin David ii thin hong nuam ngawl a, 6ama in a mite tungah, “TOPA in ama ii kumpipa tu in a teal ka topa tungah siatna ka vawt ngawl natu hong keamcing tahen! Ama sia tawm zongh ka suksiat thaak ngawl tu kul hi, banghangziam cile ama sia TOPA ii teal sa kumpipa ahi hi!” ci hi. * 7Tua ahikom David in a mite tungah Saul a sim ngawl natu thin zo takin son hi.

Saul dingto a, lianghawng nusia in ama pai natu ah pai tu in kipan hi. 8Tua zawkciang David pusuakin a nung panin zui a, “Kumpipa awng!” ci in ama biakpui hi, Saul hong kiheak a, taciang David lei ah bok suk in zatak a piak zawkciang, 9ama in, “Banghangin nang vawtsiat tu hanciam hi ci a, thu hong son mihingte ngai ni ziam? 10Nangma tatak ma ii na mu tu a, tu ma hiat tatak in TOPA in nang sia keima ii kong vawt nop po a kong vawt thei tu in hong pia hi. Ka mite pawl khat in thatlum in hong sawl hi, ahihang khuangai huai kong sa a, tawm zongh bangma law ngawl tu khi hi ka ci hi, banghangziam cile nang sia TOPA ii kumpipa tu in hong tealkhia sa na hi hi. 11Ka pa awng, na pualtual mong bek ka khut sungah ka toai sia en in! Hong thatlum thei tu khi hi, tabang hi ngawlin hi sia at keak zaw khi hi. Hisia in nang lang khat pan ngal kong thaw nop ngawlna le nang bangma kong law nop ngawlna nasia takin hong lak tu hi. Nang tungah bangma hong khial ngawl ka hihang that nuam in hong vaizui ni hi. 12TOPA in ei nii akua maw hi ziam thu hong khen tahen! Kei ii tungah nong ngamtatna te hu in TOPA in nang daan hong pia tahen, banghangziam cile nang sia bangma hong law ngawl tu khi hi. 13Paunak khat, ‘Siatna sia misiate bek in vawt hi’ a ci sia he ni hi. Tua ahikom nang sia bangma hong law ngawl tu khi hi. 14Israel kumpipa ii a thatlum nop sia en vun! A del thapai sia bang ziam en vun! Ui thi sa khat, uili no khat hi lel hi! * 15Ei ngeal akua maw hi ziam? TOPA in thu hong khen tu hi. Hi thu TOPA in hong en cian tahen, kei hong hung tahen, nang khut sung pan suatak hong pia tahen,” ci hi.

16David ii pau tu teng a pau zawkciang, Saul in, “Nangma tatak ma ni ziam, ka ta David awng?” ci hi. Taciang ama kap tu in hong kipan hi. 17Tua zawkciang David munah, “Nangma maan a kei khial khi hi. kei ii nang tungah khialna ta za kong nei kawm panin, nang sia kei tungah hong dik mama ni hi, 18Tu ni in nang sia kei tungah bangza in hong dik ni ziam ci in hong lak zo ni hi, banghangziam cile TOPA in na khut sungah kei hong aap hi kale nong thatlum bua hi. 19Mihing khat in a ngalpa man zo kasap a thasua kik hun bangtan vei om ngei ziam? Tu ni in kei tungah nong vawt teng hu in TOPA in nang thupha hong pia tahen! 20Tu in ka up tatak thu sia bang ziam cile nang sia Israelte kumpipa suak tu a, na ukna na kumpi ngam sia nangma ii ukna nuai ah kizom suak tu hi. 21Ahihang ka min le ka baangkua ii min a kimangil bit ngawl natu in, ka suan ka paalte nong khoaikheet sak natu TOPA min taw kamciam hong pia tan,” ci hi. 22David in tabang ka hi tu hi ci in kamciam pia hi.

Taciang Saul a inn ah cia kikin, David le a mite sia a buhna mun zuan kik uh hi.

0 comments:

Post a Comment