Laithiangtho Dokna (Thupulaakna 21-22)

1. Pathian kung pan abang hong tuaksuk ziam?
a. Jesu
b. Jerusalem khuapi
c. Vantung lalang

2. John in, Jerusalem khuapi sia akoi sung pan mu ziam?
a. Ngunngal pan
b. Vantung pan
c. Mualsang tung pan

3. Israel minam 12 te ii min sia koi sung ah ki-at ziam?
a. Talki tung
b. Kongkha te tung
c. Biakinn sung

4. Khuapi pangh khat sim ah kongkha bangza om ziam?
a. Thum
b. Sali
c. Sawm le nii

5. Khuapi ii adung le avai sia tai bangza sau ziam?
a. 1000
b. 1500
c. 2400

6. Khuapi sung ah biakinn ___ hi.
a. hoi mama khat om
b. thiangtho bel
c. om ngawl

7. Nuntakna ngun sia koisung pan luang suk ziam?
a. Vantung pan
b. Kumpi tokhum pan
c. Jerusalem khua sung pan

8. Ngun sia koi sung ah luang suk ziam?
a. Khuapi laizang
b. Tuipi thi dong
c. Nuntakna thingkung omna ciang

9. Thingkung sia kumh khat bangza vei ngaa ziam?
a. 3
b. 12
c. 7

10. Thingtee-te sia abang atu ziam?
a. Kisiik kik natu
b. Cidamna
c. Nuntakna atu

11. John in Vantung lalang abiak sawm le Vantung lalang in ___ hi.
a. thupha pia
b. nial
c. van ah leen pui

12. Eite tungah thu a thang sak tu akua kisawl ziam?
a. Vantung Lalang
b. Jesu
c. Nungzui 12 te

Thu Pualaakna 21
Vanthak le Leithak
1Taciangin vanthak le leithak khat ka mu hi. Van masa sia le lei masa sia bo mang zo a, tuipi zongh bo hi. *  2Mothak khat a pasal taw kimu tu in a kipua bangin vantung Pathian kung panin Khuapi Thiangtho ahi Jerusalem khua thak hong tuaksuk sia ka mu hi. *  3Kumpi tokhum panin awnging khat taw a pau khat ka za hi: “Tu in Pathian inn sia mihingte taw om khawm zo hi! Ama in amate taw teang khawm tu a, ama mihingte a hi tu hi. Pathian mama in amate taw omkhawm tu a, ama in amate Pathian ahi tu hi. *  4Amate mittang sung pan, thitui theampo nawl sak tu hi. Thina, heena, kaana le natnate a om nawn batu hi. A lui sa na theampo bo mang zo hi,” ci hi. *
  5Taciangin kumpi tokhum tungah a to sia in, “Tu in na theampo a thak in ka vawt hi!” a ci zawkciang kei tungah, “Hi kammalte sia maan a muan thamman ahikom, lai taw at in” hong ci si hi.  6Taciang ama in, “Ki man zo hi! Kei sia a kipatna le a tawpna ahi a masa bel le a khakbel ka hi hi. A dangko theampo tungah manh piak ngawlin nuntakna ciktui a dawn thei natu thu ka pia tu hi. *  7Zawna a nga papo kei tung pan a saan tu thu in, Kei sia ama Pathian ka hi tu a, ama sia Keima tapa ahi tu hi. *  8Ahihang a lauthau, ngual leeheakte, zummawk seamte le ngual thatte, a paktatte, bum le ai toaite, milim biate, le a leeilot thei theampote— a om natu sia nii vei thina ahi kaan meilipui sia ahi hi,” hong ci hi. 
Jerusalem Khuathak
9Ngimna kuang sali na a nei vantung lalang salite sung pan, khat in kei kungah hong pai in, “Hong pai tan, mo ahi Tuuno zi kong lak tu hi,” hong ci hi.  10Thaa in kei hong hu a, vantung lalang in, mualsaang mama khat ii dawn ah hong paipui hi. Ama in Vantung Pathian kung pan a hong paisuk Khuapi Thiangtho ahi Jerusalem khua hong lak a,  *  11tua khuapi sia Pathian minthanna taw tee ziikzeak a, jasper suangmanpha bangin taangin, crystal suang bangin thiang sitset hi.  12Tua khuapi kulh sia saa in saang mama a, kongpi sawm le nii om in vantung lalangte sawm le nii in cing hi. Kongpite tungah Israel minam sawm le niite min ki at hi. *  13A pangh khat sim in kongpi thum veu om hi: thum sia nisuana sangah, thum sia thang sangah, thum sia sak sangah, thum sia nitumna sangah om hi.  14Khuapi kulhte sia phungkawng tawdap sawm le nii tungah ki ciangto a, tuate ii tungah Tuuno sawltak sawm le niite min ki at hi.  15Kei hong paupui vantung lalang sia in, Khuapi kongpite le a kulhte a tee natu in kham piciang khat nei hi. *  16Khuapi sia kingh li nei a, a dung le a vai kikim hi. Vantung lalang in khuapi sia a teena piciang taw tee a, tai tul le tai za nga pha in, a dung a vai le a saanna kikim linlian hi.  17Vantung lalang in ama zak piciang taw a kulh zongh tee a, pi 216 saang hi.  18Khuapi kulhphung sia jasper suangmanpha taw kiciangin, a khuapi mama sia kham ciitak taw a kivawt hi a, limlangh bangin a thiang sitset hi. *  19Khuapi kul tawdapte sia suangmanpha namcin taw kivawt hi. A tawdap masa phit sia jasper hi a, a niina sia sapphire hi, a thumna sia agate a cite hi a, a lina sia emerald hi,  20a ngana sia onyx hi a, a lukna sia carnelian hi, a salina sia yellow quartz hi a, a liatna sia beryl hi, a kuana sia topaz hi a, a sawmna sia chalcedony hi, a sawm le khatna sia turquoise hi a, a sawm le niina sia amethyst ahi hi.  21A kongpi sawm le niite sia keptang sawm le nii hi a; kongpi khat sim in keptangpui khat taw kivawt hi. Khuapi lampite sia kham ciitak hi a, limlangh bangin kimu let thei hi.
  22Topa Vaanglianbelpa Pathian le a Tuuno in amate biakinn hi zo ahikom, khuapi sungah biakinn ka mu bua hi.  23Tuuno in ama mei-inn hi zo a, Pathian minthanna vaang sia, ama tungah taang zo ahikom, tua khuapi in nitaang le thataang a kisam bua hi. *  24Tua khuavak taang sungah leitung mihingte lampai tu uh a, leitung kumpite in khuapi sungah a nei a lamhte hong paipui tu uh hi. *  25Zan om ngawl tu ahikom, kongpite ki khakcip ngei ngawl tu a, ni bupin kihong suak tu hi. *  26Leitung hauna le letnate sia tua khuapi sungah hong ki paipui tu hi.  27Ahihang a thiangtho ngawl, a maizum huai a, a ngamtate le leeilot theite kuama tua khuapi sungah a tum thei batu uh hi. Tuuno nuntakna laibu sungah a min a kikhumte bek tua khuapi sungah tum thei tu uh hi

Thu Pualaakna 22

1Vantung lalang in, Pathian le Tuuno kumpi tokhum kung pan hong luang suk, crystal suang bangin a tee vakil nuntakna nguntui sia hong lak a, *  2khuapi sung lampi zanglai ah luangsuk hi. Ngun ii a lang le lang ah nuntakna thingkungte khat veve po a, tua thingkung sia, thasim in khat vei veu kum khat in sawm le nii vei nga hi. Taciangin a thingtee te sia minamte ciidam sak natu ahi hi. *  3Pathian haamsiatna nuai ah a om peuma, khuapi sungah kuama a kimu batu hi.
 Pathian le Tuuno ii kumpi tokhum sia khuapi sungah om tu a, a naseamte in ama bia tu uh hi. *  4Amate in a maitang sia mu tu a, amate talki tungah a min ki at tu hi.  5Zan a om nawn batu a, amate in mei-inn le nitaang kisamh nawn ngawl tu hi, banghang ziam cile Topa Pathian sia amate khuavak hi tu a, amate in tawntung pan tawntung dong ukna nei kumpite bangin a maang tu uh hi. * 
Jesu Hong paina
6Tua zawkciang vantung lalangin, kei tungah, “Hi kammalte sia maan a, muan thamman hi. Kamsangte tungah a Thaa a pia Topa Pathian in hai ngawlin hong piang tu thute, a naseamte tungah lak tu in vantung lalang hong sawl hi.”
  7“Ngai vun! Kei sia hong pai pal tu khi hi. Hi laibu sungah son kholnate a zuite in mihing hamphate ahi uh hi,” Jesu in ci hi.
  8Keima John in hite theampo ka za zo a, ka mu zo hi. Taciang ka zaak zawkciang le ka mu zawkciangin, vantung lalang peangah ka bok a, hi nate hong lak vantung lalang sia bia tu in ka kipan hi.  9Ahihang ama in kei tungah, “Kei hong bia heak in! Keima in nangma le na suapuite ahi kamsangte le hi laibu sungah a om thute a zuite theampo taw naseam khawm khat ka hi hi, Pathian bia in!” hong ci hi.  10Taciangin vantung lalangin kei kungah, “Hi laibu sungah a ki at thute hong tun tu hong nai zo ahikom, imcip heak in” hong ci hi.  11A ngilo sia in a ngitlo bangin paisuak tahen a, a kiihuai sia in a kiihuai bangin zomsuak tahen; a kuama po mihing phate in phatna vawtsuak tahen a, a thiangthote in a thiangtho in om suak tahen,” hong ci hi. *
  12Jesu in, “Ngai in! Kong pai pal tu hi. Mihing sim tungah ama ii ngamtatna bangin, ka piak tute thaman te kong keng tu hi. *  13Kei sia a masa le a khak, a kipatna le a tawpna ahi Alpha le Omega ka hi hi,” ci hi. *
  14Nuntakna thingnga neak thei natu le khuapi sungah kongkha kantan in pai thei tu a puantual a sil thiangte in mihing hamphate ahi uh hi. *  15Ahihang khuapi pua sangah lampialte, bum le ai toaite, a paktatte, mihing thatte, milim biate, leeilot thu taw ngual a theamte om tu uh hi.  16“Keima Jesu in, hi thute pawlpi sung note tungah a thang sak tu in ka vantung lalang kong pai sak zo hi. Kei sia David ii zung le a suan ahi Nikonghong aksi taang sia ka hi hi,” ci hi.  *
  17Thaa le a mo thak in, “Hong pai tan!” hong ci hi.
 A zate theampo zongh in, “Hong pai tan!” ci si hen.
 A dangko theampo hong pai tavun; nuntakna tui a dawn nuam peuma in, nuntakna tui letsong in saang tavun. * 
Thukhupna
18Keima John in, hi kamsaanna laibu sungah a kikhumte a sim peuma tungah kidop natu thu ka pia hi: Khat po in a belap le, Pathian in hi laibu sungah a kison daante le natnate belap tu hi. *  19Taciangin khat po in hi laibu sung pan kamsaanna kammalte a dok le, Pathian in ama sia nuntakna thingkung nga taan sak tu a, hi laibu sungah a kison Khuapi Thiangtho sia zongh taan sak tu hi.
  20Hi thute theampo tetti a pang pa in, “Hi hi, maan hi! Kong pai pal tu hi!” ci hi.
 Na ci bangma hi tahen. Topa Jesu awng, hong pai tan!   21Topa Jesu thuthiamna sia a kuama po tungah hong om tahen.

0 comments:

Post a Comment