Lungdamko na thiam tavun (By: Thawng Tunngo)

 Tuma kum 27 lai Pennsylvania sung Allentown khua Burger King sai khat ii zunbuuk sungah, nausen suaktuung khat kimu hi. Tuahun lai tadensate sungah Burger King Baby ci in kisuaksak aa, lamdang kisa mama hi. Tuni ciang, tua nausenno sia pasal hong nei aa, ta 3 ii nu Katheryn Deprill kina hi. Abosa March 2, 2014 ni, Katheryn na facebook sungah lai at in datpung khat suaksak hi. A lai sia hibang hi.

“Ka pianna nu zong khi hi. Ama na 1986 September 15 ni hong nei aa, ka suak zawk tawm vei zawk ciang, Pennsylvania state Allentown khua Burger King sai khat ii zunbuuk sungah hong nusia hi. Ka datpung hisia a mu papo na, nong hesuakna ka nu ii hong mu thei natu, na share kikik vun, lungdam”

A datpung sia facebook sungah mihing 30,000 vaal na share aa, hai ngawl a nu in facebook pan mu takpi aa, A nuta kimu kik hi. A nu in a son kikna ah, kum 17 ka phak lai, ngamdang ka khualhawna khatah hong kibuan ahikom naungil ka nei aa, ka pa le nu ii heak tu lau kahikom, nau ka nei zawk ciang ka vawk ci hi. Pasal zong nei aa, ka pasal tung zong ka sonsiat zo, ka nupa ka tanu ka zawzong uh ci hi.

Media ii a thudokna ah, Katheryn na hibang son hi. “Ka khan tawntung ka ukbel thu khat sia ka pianna nu ii itna taw hong koaina awmlum thuak ngei nuam lalawm ing ci thu ahi aa, kum 27 zawk ciang ka pianna nu ii awmlung nga kik aa a he ngei suak kahiman ka lungdamna bangma taw kitee zo ngawl hi. A ngil sung hong paii lai, kham thei ngui thei zatui zahaa bangma zangh ngawl in zu zong ne ngawl aa, a cidam sitset tu ing hong paii ahikom, ka nu tungah ka lungdam lalawm hi.”

Phuaktawm taangthu hi ngawl aa, a piang tatak thu hi. Katheryn ii lungtang thinpuak ih et ciang a nuai thu 3 te a nei takpi ahihunlam kitel hi.
1. Mawmai sakna
2. Lungdam thei na
3. Ki-itna

TOPA Jesu na ama nungzui, ei thu ummi theampo hi thu 3 ih zui tu, hong dei hi. Anuai aa, Lai Thiangtho kammal pawl khatte taw thaa la tawng. Pathian thupha laisim theampo tungah om tahen….

Ngual ii note tung a hong mawnate na mai sak uh le, vantung a na Pa zongh in, note mawna hong mai sak tu hi. (Matt 6:14)

Banghangziam cile hi thin nopna sia note theampo pumkhat sungah na omkhop natu in Pathian hong sapna thubul ahi hi. Taciangin lungdamko na thiam tavun. (Colossaete 3:15)

Ka tate awng, ih ki itna sia kam le muk bek hi ngawlin sepna taw a kilangh ki itna tatak ahi kul hi. (1 John 3:15)

Note: Atung aa thu acing zaw in sim nuamte atu (http://www.nydailynews.com/news/national/burger-king-baby-reunited-biological-mom-facebook-post-article-1.1734736)
Youtube pan a en nuamte atu -

https://www.youtube.com/watch?v=Zo_1IOfxmWc





 
 
 

0 comments:

Post a Comment