Laithiangtho Dokna (Jeremiah 1-2)

1. Jeremiah ii pa sia bang ngam pan thiampi ziam?
a. Judah
b. Reuben
c. Benjamin

2. Josiah kumpi asuak zawk ___ ciang TOPA in Jeremiah paupui hi.
a. kumh 13
b. kumh 10
c. kumh 7

3. TOPA in Jeremiah ii a bang thamsak ziam?
a. Alungtang
b. Alutang
c. A muk

4. Koi sung pan siatna sia tuiso bangin hong theng tu ziam?
a. Sak sang
b. Thangsang
c. Nitumna

5. TOPA in abang ngak nginge ziam?
a. Ih Khensat tu
b. Athusonte tangtuttu
c. Ih Up tu

6. Na lau le, amate taw na omkhop ciang ___tu hi.
a. na hang saseam
b. kong kiita sak va-ial
c. kong om pui

7. Ka ngam, sia sakin amate ka piaksa ngam ___uh hi.
a. nuam sa ngawl
b. awlmawk ngawl
c. nin sak

8. ___ in, TOPA kan ngawl uh hi.
a. Thiampite
b. Israel
c. Ka it ka tate

9. Kamsangte in ___min suangin thuson uh hi.
a. Keima
b. Amate
c. Baal

10. Ngamdangte in a pathian sia ___ ngawl hi.
a. pathian dang taw theak
b. phunsan
c. aniamna koi

11. Israel sia amuatcip, kimanna nei ngawl ___taw kibang hi.
a. puansia
b. sapit ngui
c. sa ui

12. TOPA in Israel sia bang zon zia thiam peuma ci ziam?
a. Ngal zon zia
b. Lawm zon zia
c. Sa zon zia


Jeremiah 1
1Hi laibu sia Benjamin ngam sunga om Anathoth khua a thiampite khat ahi, Hilkiah ii tapa Jeremiah ii thu sonte a kiteptee na ahi hi. 2Amon ii tapa Josiah sia Judah kumpi a sua zawk kum sawm le kum thum kum in TOPA in Jeremiah paupui hi. * 3Josiah ii tapa Jehoiakim kumpi a sua ciang TOPA in Jeremiah paupui leleau hi. Tasia zawkciang, Josiah ii tapa Zedekiah kumpi a sua zawk kum sawm le kum khat dong TOPA in ama tam vei mama paupui hi. Tua kum a tha nga tha ciang Jerusalem mite ngamdang ah sal tang uh hi. *

Jeremiah A kisapna
4TOPA in kei tungah, 5“Nuntakna kong piak ma in kong teal zo a, na nu sung pan na sua ma in minamte tungah kamsang khat tu in kong teal hi,” hong ci hi.

6“Vaanglianpipa TOPA awng, kei thuson thiam bong; moi lei lai ing,” ci in ka zo kik hi.

7Ahihang TOPA in kei tungah, “Kei ka moi lei hi ci heak in, kong sawl bangin mite kungah pai in, son tu a kong thupiak theampo amate tungah son siat in. 8Amate kiita heak in, banghangziam cile Keima in nangma hong dal tu in kong ompui tu hi, TOPA ahi, Keima in kong ci zo hi!” hong ci hi.

9Taciang TOPA in a khut hong thaakin, ka mukte hong tham a, taciang kei tungah, “Ngai in, na pau tu kammalte na kam sungah ka koi zo hi. 10Ngam theampo le kumpi theampote a longhkeak tu le a kaikeak tu, a susia tu le a lawnthal tu, a sa tu le a suan tu in thu neina tuni in nang kong pia hi” hong ci hi.

Mu kholna Nam nii
11TOPA in, “Jeremiah awng, bang na mu ziam?” ci in kei hong dongh hi. Keima in, “Almond thingbaak khat ka mu hi,” ci in ka zo kik hi.

12TOPA in, “Maan ni hi, Kei zongh ka thusonte a tangtung tu ngak nginge khi hi,” ci hi.

13Tua zawkciang TOPA in, “A dang bang na mu ziam?” ci in kei hong dongh leleau hi.

Keima in, “Sak sangah tuibeal a so, hi sangah hong puk dektak khat ka mu hi,” ci in ka zo kik hi.

14TOPA in kei tungah, “Hi ngam sungah a teang mihingte theampo tungah saksang panin tuiso bangin siatna hong theng tu hi, 15banghangziam cile sak sangah a teang minamte theampo hong pai tu in ka sam hi. Amate ii kumpite in a kumpi tokhumte uh sia Jerusalem kongpite ah ahizong, luphung kiimkot ah ahizong, Judah khuapi dangte ii kiimkot ah ahizong phut tu uh hi. 16Keima in ka mihingte daan ka pia tu hi. Banghangziam cile amate in khialna vawt zo uh hi; amate in kei hong nusia zo uh a, pathian dangte tungah biakpiakna pia in, milim vawtin bia uh hi. 17Kithoai in, Jeremiah awng; pai tan a son tu a kong sawl theampo amate son tan. Tu in amate kiita heak in, na kiita ahile amate taw na omkhop ciang kong kiita sak va-ial tu hi. 18-19Ngai in, Jeremiah awng! Hi ngam sungah om mihing theampo– Judah kumpite, uliante, thiampite le mipite in nang hong langpan tu uh hi. Ahihang tuni in amate na nalh zawk natu in thahatna kong pia tu hi; nangma in kulh taw a ki uum khuapi khat bang, thik khuam khat bang le taungo luphung khat bang na hi tu hi. Amate in nang hong zo ngawl tu uh hi, banghangziam cile nang hong dal tu in kong ompui tu hi, TOPA Keima in ka ci zo hi,” hong ci hi.


Jeremiah 2
Pathian ii Israel A khoina
1TOPA in Jerusalem khua sungah a om mihingte theampo tungah hi thu thang sak tu in kei hong sawl hi.

2“Na khangno lai in na thumaanna
ih kiten sawng lai a kei nong itnate ka phawk hi;
senneal ngam ah nong zui a, a kitho ngawl lai dui sungah kei nong zui hi.
3Israel awng, nang in keima aa bek na hi a;
nangma in a thiangtho ka neisa na hi hi.
Nang hong na sak mihingte theampo tungah
tuasiatna le ngimna ka tung sak hi.
Keima TOPA in ka ci zo hi,” hong ci hi.
Israel ii Pute Pate ii Mawna
4No Jacob ii suan le paalte, Israel minamte awng, TOPA ii hong thuhilna ngai vun. 5TOPA in,

“Na pu na pate in kei tungah bang hong mawsiat ziam?
Banghangin kei hong nusia ziam?
Amate in a manh nei ngawl milimte bia in
amate mama a manh nei ngawl suak uh hi.
6Keima in amate Egypt ngam pan suatak in:
dui sung senneal ngam le dumkhuk sung,
leiko sung le, kuama ten ngawl a lau huaina mun le
kuama pai ngei ngawlna munah amate lampui hi napi ing
amate in kei bangma in hong heang ngawl hi.
7Keima in amate thaw an le a dang a phate a neak natu in
leiphana mun ka thetpui hi.
Tua hi napi amate in
ka ngam sia sakin amate ka piaksa ngam nin sak uh hi.
8Thiampite in, ‘TOPA koisung om ziam?’ ci in dongh ngawl uh hi.
Keima ii thiampite mama in kei hong he ngawl uh hi.
Ngam ukte in kei hong langpan uh a;
kamsangte in Baal min suangin thuson uh a,
taciang bangma kimanna a nei ngawl milimte bia uh hi.
TOPA in A Mite Mawsiat
9“Tua ahikom Keima, TOPA in ka mite ka maw sak tu hi.
A suan le a paalte dongin thu ka vawt tu hi.
10Nitumna sang Cyprus tuikulh ah pai in,
taciang pawlkhat nisuana sang Kedar ngamah pai sak in.
Ni dangin hi bang thu piang ngei ngawl cisia na mu tu hi.
11Ngamdangte kuama in a pathian uh sia pathian tatak ahi ngawl hang
a dang pathian taw theak ngei ngawl uh hi.
Ahihang ka mite in amate min a thang sak Pathian Keima sia,
amate atu bangma a vawt sak thei ngawl pathian taw hong theak zo uh hi.
12Tua ahikom Keima in vantung sia lau in, a liin natu le
lamdang a sak mama natu in thu ka pia hi,
13banghangziam cile ka mite in khialna nam nii vawt zo uh hi;
amate in a thiangtho ciktui ahi, Keima hong nusia zo uh hi,
taciang amate in tui a cing thei vet ngawl a kektham tuikhukte to uh hi.
Israel ii Thumaan ngawlna hu a A piang
14“Israel sia sal hi ngawl hi; sal nam in piang ngawl hi.
Tua ahile bang hangin a ngalte in vai uh ziam?
15Amate in tawpi bangin ama hawk san uh hi;
amate in ama ngam senneal ngam suak sak zo a,
a khuapite lalcip sak zo a, kinusia cip sak zo hi.
16Hi hi, Memphis le Tahpanhes mite in ama lu ngu sutham zo uh hi.
17Israel awng, hi teng na tungah na theng sak hi!
Nang lam kong pui laitakin
nangma in TOPA na Pathian ahi Keima nong nusia hi.
18Nile nguntui ne tu in Egypt ngamah
na paina taw bang phatuamna nga tu na ki um ziam?
Euphrates nguntui ne tu in
Assyria ngamah na paina taw bang phattuamna nga tu na ki um ziam?
19Nangma siatna in nangma daan hong pia tu a,
kei nong nung ngatna in nang hong puavawk tu hi.
TOPA na Pathian ahi Keima hong nusia a,
kei tungah thumaan in na om nawn ngawl tu sia
bangza ta in khaa in maan ngawl cisia na tel tu hi.
Keima, Vaanglianpipa TOPA Vaanglianbelpa in ka ci zo hi,” ci hi.
Israel in TOPA Biak tu Nial
20Vaanglianpipa TOPA in,
“Israel awng, nidang lai pekin ka thu nong nial a; nong bia bua hi.
Numei paktatte bangin mualno saang theampo tung le
thingkung hing theampo nuai ah ta nei theina pathiante na bia hi.
21A phabel thaicii sung pan
deiteal sapit ngui bangin nang kong suan zo hi.
Ahihang bang suak zo ni ziam en in!
A muatcip, kimanna nei ngawl sapit ngui taw na kibang hi.
22Satpia phabel taw na sil zongin
na mawna baang lai sia ka mu veve tu hi.
23Bangbangin nangma le nangma na kinin sak bua a,
Baal ka bia ngei bua na ci thei tu ziam?
Ngamkuam sungah khialna na vawt hi;
na vawt sate en in.
Nang sia a leetai kakoai senneal ngamsung a zuan
a huuk lai a kizual ngam ngawl kalauh khat taw na kibang hi.
24Kalauh a huuk laitakin, akua in uk thei tu ziam?
A talte a ngeam nuam papo in ngim kul ngawlin;
a huuk hunin ama nga tawntung hi.
25Israel awng, pathian dang ii nung na delna taw in
na peang toi sak nuam heak in a, na dangko sak nuam heak in.
Ahihang nangma in, ‘Hi ngawl hi! hong heak kik ngawl tu khi hi.
Keima in ngamdang pathiante ka it a amate nung ka zui tu hi,’ na ci hi,” ci hi.
Israel sia Daan piak tu Kilawm
26TOPA in, “Nguta khat a kimat ciang a mai a kizum sak bangma in, no Israel mite theampo na kumpite, na uliante, na thiampite le kamsangte na mai uh hong kizum sak tu hi. 27Thingkung khat sia ka pa hi, suangtum khat sia ka nu hi a cite theampo na mai uh hong kizum sak tu hi. Keima kung hong zuan ngawl a hong taisan na hi uhkom hi thu piang tu hi. Ahihang ngimna na thuak uh ciang hong ngum tu in hong pai tan nong ci uh hi.

28“Noma atu na vawt sa uh pathiante koi sungah om ziam? Ngimna na thuak uh ciang amate in hun sak ve vun– amate in hong hu thei ahile! Judah awng, khuapi na neiza ma in pathian tam mama na nei hi. 29Na phunna uh sia a bang hi ka bel ziam? Banghangin kei hong langpan nu ziam? 30Keima in no daan kong pia hi, ahihang bangma phatuam ngawl hi; keima in no hong hil sak nawn heak vun. Tawpi hangsan khat bangin, no in na kamsangte uh na thatlum zo uh hi. 31Israel mite awng, ka kampau hong ngai tavun. Kei in note atu in senneal ngam khat bang ka hi ngei ziam, khuazing le a lauhuai ngam khat bang ka hi ngei ziam? Tua ahile, banghangin, ka uk bang po in ka ngamta tu uh a, nang kung kong zuan ngei nawn batu uh hi na ci thei uh ziam? 32Ngaknu khat in a kizepnate, ahibale, mothak khat in a kitenna a, a silh mopuante mangil thei ziam? Ahihang ka mite in a kisim zo ngawl ni tam mama sung hong mangil zo uh hi. 33Lawm zonna zia na thiam mama uh hi. Numei a sia bel zongh in no kung panin hong sin thei hi. 34Na puante uh sia innphuulte ii chisan baang ngawlin, mizawngte le mawna nei ngawlte ii chisan baang hi.

“Ahihang, hi bang teng hi napi, 35nang in, ‘Kei in mawna ka nei bua hi; ka tungah TOPA thin uuk nawn ngawl takpi hi’ na ci hi. Ahihang Keima, TOPA in, mawna ka nei bua hi na ci hu in, daan kong pia tu hi. 36Ngamdang mite ii pathian kung na zot hu in nangma le nangma na manh na kisulh sak zo hi. Assyriate in na thin hong kiam sak bang keak ma in, Egyptte in na thin hong kiam sak tu hi. 37Nang in Egypt ngam panin maizumna taw na lu tungah khut nga sa in na heak kik tu hi. TOPA ahi, Keima in, na muan mite ka nial zo hi; amate tung panin phattuamna bangma na nga batu hi,” ci hi.

0 comments:

Post a Comment