Laithiangtho Dokna (Jeremiah 3-4)

1. TOPA in Israel sia bang taw tengat ziam?
a. Tuuhon
b. Ngul
c. Pumpi kizuak

2. Akuate in ngam sung ah ngualsuam tu in pang ziam?
a. Moab
b. Palestine
c. Arab

3. Israel ii suapuinu sia akua ziam?
a. Leah
b. Judah
c. Zuriah

4. Israel in koisung ah ngamdang pathiante taw khial ziam?
a. Thingkung nuai
b. Senneal ngam sung
c. Khuapi laizang

5. TOPA in Israelte kaana aw koisung pan za ziam.
a. Vantung pan
b. Biakbuk sung pan
c. Mualdawn

6. Israelte atu huna in ___pan bekin hong pai hi.
a. Biakinn sung
b. Vantung
c. Pathian kung

7. TOPA in athuciam a keamcing bua uh le ka ___ tu ci hi.
a. mon siat
b. thin uuk
c. hesuak vave

8. Vui a sa mama khat senneal ngam panin ___ ah va tu hi.
a. Jerusalem
b. Sinai
c. Jericho

9. Dan khuapi le Ephraim pan kamtaite in ___za sak uh hi.
a. ngalkidona tu
b. thuman thu tak
c. thusiate

10. Siatna vawtthiam in phatna vawtthiam ngawl sia ___ hi.
a. Manashe suante
b. Moabte
c. PATHIAN ii mite

11. TOPA ii son sa hi a, ___ ngawl tu hi.
a. kilaih va zeang
b. a thin kheal kik
c. siatna piang

12. Jerusalem ii kaana aw sia akua ii kaana aw taw kibang ziam?
a. Nausuak tu khat
b. Khuangai in kaana
c. Tasen thi nu ii kaana

Jeremiah 3
A Thumaan ngawl Israel
1TOPA in, “Pasal khat in a zi khulin, a zi in a pasal nusia in pasal dang khat ii zi a suak a, ahile a pasal masa in ama tenpui kik thei ngawl tu hi. A tenpui kik ahile a ngam nin sak siat ahi hi. Ahihang, Israel awng, nang in lawm tam mama na nei zawkciang tu in ka kung nong zuan kik nuam hi! 2Mualdawnte ento in. Pumpi kizuak khat bang a na ngamtat ngawlna mun a om ziam? Arab mite in a suam tu mite ngam sungah a pan bangin nang in lam paam ah lawm na pang hi. Na pumpi kizuakna taw in ngam na nin sak zo hi. 3Tua hu in nguatui kangin, ngua nungte zongh zu ngawl hi. Numei paktat khat bangin maizum na nei bua hi.

4“Tu in kei tungah, ‘Nangma in ka pa na hi a, ka nolai pan kipan kei nong it zo hi. 5Kei tungah nong thin uuk tawntung batu a; kei tungah na thin nong ngam tawntung batu hi’ nong ci hi. Israel awng, tua in nangma ci hi a, ahihang a sia na vawt thei theampo na vawt hi” ci hi.

Israel le Judah Kisiik kik tu
-------------------------------
6Josiah kumpi in a maan lai in, TOPA in kei tungah, “A thumaan ngawl numei Israel ngamtatna na mu zo ziam? Ama in kei hong taisan zo a, mualsaang theampo tung le thingkung hing theampo nuai ah pumpi kizuak numei khat bangin ngamta zo hi. * 7Ama in hi teng theampo a vawt siat zawkciang, kei kung hong zuan kik nanak tu in ka ngaisun hi. Ahihang ama hong heak kik ngawl a, ama ii suapui thumaan ngawl nu Judah in tuate theampo mu siat hi. 8Israel sia keima kung pan tai zo a, pumpi kizuak khat suak zo ahikom keima in ama khulin ka nawkeakna thu sia Judah zongh in mu hi. Ahihang Israel ii a thumaan ngawl suapui nu Judah sia lau ngawl hi. Ama zongh pumpi kizuak khat suak a, 9a maizum mama ngawl hi. Ama in ngam nin sakin, suangtum le thingkungte biakna taw in a pasal palngul in khialna vawt hi. 10Hi bang teng zawkciang Israel ii thumaan ngawl a suapui nu Judah in ka kungah heak kik tu in hong kinei theam a; thin tatak taw hi ngawl hi. TOPA ahi, Keima in ka ci zo hi,” hong ci hi.

11Taciang TOPA in kei tungah, Israel sia ama kung pan tai zo ahitazong, a thumaan ngawl Judah sangin pha zaw tuak lai hi, ci in hong son hi. 12TOPA in kei tungah pai in Israelte tungah, “Thumaan ngawl Israel awng, ka kungah hong heak kik tan. Keima in hesuak thei pa ka hi a, ka thin uuk ngawl tu hi; nang tungah a tawntungin ka thin a uuk batu hi. 13Na khialna le TOPA na Pathian na langpan nate thiang takin pualaak in. Thingkung hing theampo ii nuai ah ngamdang pathiante taw na khial kakoai nate le ka thu na nit ngawlnate pualaak in. TOPA ahi Keima in ka ci zo hi.

14“Thumaan ngawl mite awng, hong heak kik tavun; keima neisa na hi uh hi. Khuapi sim panin khat tek le be le phung sim panin nii tek kong la tu a, Zion mual ah kong puak kik tu hi. 15Ka thu hong ni ngam ukte kong pia tu a, amate in pilna le thiamna taw note hong uk tu uh hi. 16Taciang tua ngam sungah pungin mihing na tam zawk uh ciang, mihingte in ka Thuciamna Thingkuang ii thu son nawn ngawl tu uh hi. Amate in tua thu ngaisun nawn ngawl tu a, zongh phawk nawn ngawl tu uh hi; amate in kul zongh sa ngawl tu uh a, a dang khat zongh vawt tuan ngawl tu uh hi. 17Tua hun hong thet ciang, Jerusalem sia ‘TOPA ii Kumpi Tokhum,’ kici tu a, ngam mi theampo tua munah keima bia tu in kikhawm tu uh hi. Amate in a thin puina le a thin siatnate ii sawlna bangin seam nawn ngawl tu uh hi. 18Israel mite sia Judah mite taw kipawl tu uh a, amate in a saltanna ngamsung saksang pan paikhawm tekin, na pu na pate ii a tawntung a lua tu ka piak sa ngam ah cia kik tek tu uh hi,” hi bang ci in, ci a hong sawl hi.

Pathian Mite ii Milim Biakna
19TOPA in, “Israel awng, nang sia ka tapa bangin kong saang nuam a,
leitung theampo sung pan a phabel ngamnuam khat kong pia nuam hi.
Kei sia pa nong nak tu le ka kung pan na tai kik nawn ngawl tu ka dei hi.
20Ahihang a pasal a palngul a thu maan ngawl zi khat bangin kei tungah nong thumaan bua hi.
TOPA ahi, Keima in ka ci zo hi,” ci hi.
21Mualdawnte ah awnging khat kiza hi;
tua in Israel mite kaana le tauna aw ahi hi;
banghangziam cile amate nuntakna in khialna taw kidim ahi uh hang le
TOPA a Pathian uh a makngil hang ahi hi.
22TOPA kung pan a tai note theampo awng,
heak kik tavun; ama in note hong dam sak tu a, thumaan hong suak sak tu hi.
Note in, “Hi hi; Ama in kote Pathian uh ahi manin kote TOPA kungah pai khu hi. 23Mualdawn ah ka milim biakna uh in kote hong hu vet ngawl hi. Israelte atu huna in TOPA ih Pathian kung pan bekin hong pai hi. 24Ahihang a maizum huai milim pathian ahi Baal biakna in, ih tuu honte le khui honte, ih tapate le ih tanute– taanghlai pan kipan ih pu ih pate ii a thalaw sa theampote hong sumsi sak siat zo hi. 25Eite in maizum in lum in ih maimawlna in eite seal sak ka tawng. Eima le ih pu ih pate in TOPA ih Pathian tungah ih khial tawntung zo hi; ama ii thupiakte ih ni ngei bua hi,” ci nu hi.

Jeremiah 4
Kisi kik natu Sapna
1TOPA in, “Irsael mite awng, heak kik na sawm uh le, ka kungah hong heak kik tavun. Ka ngaimawk milimte na vawk uh a, ka tungah nong thumaan uh le, 2ka min suang a na kiciam tu uh sia no atu in thumaan thutang hi tu hi. Tasia ciang minam theampo in amate ii tungah thupha ka piak natu hong ngen tu uh a, amate in kei hong pok tu uh hi,” ci hi.

3TOPA in Judah mite le Jerusalem khua mite tungah, “Na thaw ngawl lai uh lote tho vun; ling kawm sungah na anciite tu heak vun. * 4No Judah mite le Jerusalem khua mite awng, na TOPA ahi keima taw na vawt uh thuciamna sia keamcing vun a, ka tungah hong ki aap tavun. Tabangin na hi bua uh le, a siate na vawtna uh hu in ka thin uukna sia mei bangin kuang tu a, tua meikuang a mit tu kuama om ngawl tu hi,” ci hi.

Judah sia Ngal taw sim tu Kithawmvau
5Ngamsung theampo ah lemle tum vun!
A nging le a kitel thiangin au vun!
Judah mite le Jerusalem khua mite tungah
a muanhuai khuapite ah a tai natu son vun.
6Zion paina lampi hil vun!
Na suatak natu in tai vun! Haisaang heak vun!
TOPA in sak sang panin
tuasiatna le sukcipna lian hong puak hi.
7Tawpi khat in a buhna mun pan hong pai bangin,
ngamte a sia sak tu sia hong kuan zo hi.
Judah susia tu in ama hong pai hi.
Judah ngam khuapite a siacip in kinusia tu a, kuama teang ngawl tu hi.
8Tua ahiciang khau-ip puan silh in, kapin tau vun
banghangziam cile
TOPA thin uukna sia Judah panin puapial ngawl lai hi.
9TOPA in, “Tua ni ciang Kumpite le kumpi uliante a thin kiam tu uh hi; thiampite ingh dimdum tu uh a, kamsangte a dipkua tu uh hi,” ci hi.

10Tasia ciang keima in, “Vaanglianpipa TOPA awng, Jerusalem mite theam vawk zo ni hi! Kilemna om tu hi ci zo ni hi, ahihang amate ii longtawl ah namsau khat na tuuk nginge hi,” ka ci hi.

11Vui a sa mama khat senneal ngam panin Jerusalem mite sangah hong va tu hi cina thu sia Jerusalem mite tungah a kison tu hun hong theng zo hi. Tua vui sia anvaaite a mut keak vui bang bek hi ngawl tu a– 12TOPA ii sawlna taw a va vui sia tasia sangin thahat zaw tu hi! A mite tungah thukhenna a pia sia TOPA ama mama ahi hi.

Ngalte in Judah ngam Kiim uum
13En vun, meeite bangin ngalte hong pai hi. Amate ii ngal siphuleangte sia suumpei taw kibang a, a siphute sia muvanlaite sangin manlang zaw uh hi. Ei a bo hi zo hing! Ei a lal hi zo hing!

14Jerusalem awng, na thin sung panin ngitlona silh thiangin, tua hile nang hong kingum tu hi. Na thin sungah ngitlona thin bang tan vei ngaisun tu ni ziam?

15Dan khuapi le Ephraim mualnote tung pan hong pai kamtaite in thusiate za sak uh hi. 16A khuala ngam khat panin ngalte hong paina thu Jerusalem tungah son tu le minamte hilkhol tu in amate hong pai uh hi. Hi ngalte in Judah ngamsung khuapite ausan tu uh a, 17mihingte lo hung bangin Jerusalem kiim uum tu uh hi, banghangziam cile a mite in TOPA a langpan hang ahi hi, TOPA in ci zo hi.

18Judah awng, na nuntakna zia le na nasepna sate in hi thu na tung hong then hi. Na mawna in hi thuakna piang sak a; tua in na lungtang hollet hi.

A mite atu Jeremiah ii A khuangaina
19Na nang ei! A natzia ka thuak zo bua hi!
Ka lungtang! Ka lungtuk ngam vasat hi!
Thim khipkhep in ka om thei bua hi;
lemle aw le ngal simna aw ka za hi.
20Siatna khat zawkciang khat hong theng a;
ngam sung theampo kisia siat hi.
Thakhat thu in ih bukte ki sia sak hi;
a puankhaite kileam keak hi.
21Bangtan vei ngal kisim ka mu lai tu ziam?
Bangtan vei lemle aw ka za lai tu ziam?
22TOPA in, “Ka mite mamaw uh hi;
amate in kei hong he ngawl uh hi.
Amate sia patang mamawte bang hi uh a;
heak theina bangma nei ngawl uh hi.
Amate sia siatna vawt thiam bek a,
phatna vawt thei ngawl uh hi,” ci hi.
Hong theng tu Siatna Jeremiah ii Mu kholna
23Leitung ka en a– tulin maai thong hi;
vantung ka en a– khuavak om ngawl hi.
24Mualliante ka en a– amate liing hi,
mualnote a nung le a mai ah kivei hi.
25Khua ka et le mihing kuama om ngawl a;
vacimte ngangawn leang siat uh hi.
26Lo ngam leipha teng senneal ngam suak zo a;
TOPA ii thin uuk mama na hu in a khuapite kisia cip hi.
27(TOPA in leitung buppi dui suak tu hi ci hi,
a hihang siacip diipdeap sak ngawl tu hi.)
28Leitung sia naangin mau tu a; Vantung sia khuazing tu hi.
TOPA ii son sa hi a, a thin kheal kik ngawl tu hi.
Ama in a khensat sa hi a, kheal kik ngawl tu hi.
29Siphu ngalkapte le thal toai ngalkapte ii aw a zaak uh ciang
mihing theampo tai keak tu uh hi.
Pawlkhat sia ngam tawngtol sungah tai tu a;
a dangte ahi uhle suangtum kawm ah kaato tu uh hi.
Khuapi theampo a hawm nguakin kinusia tu a,
tua khuate sungah kuama teang kik ngawl tu hi.
30Jerusalem awng, nang a lal sa na hi zo hi!
Banghangin puansan silh ni ziam?
Banghangin ngun le kham kizepnate awh in na maitang zeam ni ziam?
Nangma le nangma a hoi a na kizep nate lui thathong hi!
Na lawmngaite in nang hong nial zo a nang hong that nuam hi.
31Numei khat nausuak tu a, a kap bang aw khat ka za hi,
taciil a suak numei khat ii ciik-au taw kibang hi.
Tua in Jerusalem ii hu sam liang a a kaana hi a, a khut zan in,
“Kei a lal sa hi zo ing! Keima that tu in amate hong pai hi!” ci hi.

0 comments:

Post a Comment