Laithiangtho Dokna (Jeremiah 5-6)

1. Jerusalem mawmaina atu thumaan mi bangza kisamh ziam?
a. Khat
b. Nga
c. Sawm

2. Dui tawngtol pan abang in amate petlumh tu ziam?
a. Pawlbeam
b. Sahang
c. Tawpi

3. TOPA in ngalte khutsung ah amite avekpi ka ___ ci hi.
a. aap siat
b. teang sak tu
c. susia buatu

4. TOPA kamte sia meibang in kuang tu aa, mihingte sia ___ bangh hi tu hi.
a. pat
b. thing
c. puansia

5. TOPA in Keima mai ah bang hang ___ngawl nu ziam ci hi.
a. kuun
b. liing
c. zaataak pia

6. Mi ngilote ___sungah teang uh hi.
a. kumpi inn
b. ka biakinn
c. ka mite ii

7. ___mite awng, na suatak natu uh in tai vun!
a. ka it Israelte
b. vaakthap
c. Benjamin

8. Jerusalem simsawm te in banghun laitak simsawm ziam?
a. Zan hun
b. nitak khuzin kuan
c. zingsang tuung

9. TOPA in amite tungah koisung pan khuadak vun ci ziam?
a. Lamka
b. kumpi inn tung
c. khuapi luphung

10. Sheba ngam panin ngim namtui te TOPA in ka ___ ci hi.
a. lamen tawntung hi
b. awlmawk bua hi
c. neisa

11. Saksang pan ngalsimte ii siphu tung to in ahusan sia ___ bangh ahi hi.
a. ngam vakhu haam
b. huisuangval
c. tuipi tuihual

12. TOPA in Jeremiah awng kamite ii a thin uh sia ___ bangin sak ci hi.
a. taungo le thik
b. suang manpha
c. suangtum



Jeremiah 5
Jerusalem ii Mawna

1Jerusalem mite awng, lamdungte zui in tai vun! Na kiim na paam en vun! Khuadak vun!
Vanh zuakna munte zong vun!
A thumaan a ngamta le
Pathian tungah thumaanna a zong mihing khat na mu thei uh ziam?
Na mu thei uh ahile TOPA in Jerusalem ii mawna mai sak tu hi.

2TOPA ka bia tu uh hi na ci uh hangin, na thin tatak uh taw na ci uh hi ngawl hi.

3TOPA in thumaanna zong tatak hi. Ama in no hong saat hi, ahihang no in na awlmawk bua uh hi;
ama in no hong hualcip hi, ahihang thu hilna na ngai tuan bua uh hi.
Na thin uh pui in na khialna uh panin na kisiik kik bua uh hi.

4Tasia ciang Keima in, “Hite sia hesuak huai a bangma a he ngawlte bek hi.
Amate in a mawmawt huai in ngamta uh hi;
amate in a Pathian zia le he ngawl, TOPA deina zongh he ngawl uh hi.

5Mihingte kungah vaangletna taw ka pai tu a, amate taw thu ka son tu hi.
A tatakin ci leang amate in a Pathian a nget sia he a,
TOPA deina tel uh hi,” ci in ka ngaisun hi.
Ahihang amate theampo in TOPA ii thu neina nialin a thu ni nuam ngawl uh hi.

6Tua hu in dui tawngtol sung pan tawpite in amate petlum tu uh hi; senneal ngam pan ngia honte in amate semcip tu a,
pawlbeamte in a khua sung ngeam kakoai tu uh hi.
Tua mihingte a pusuak uh le ki maltham tu hi,
banghangziam cile a khialna uh tam mama a,
Pathian taisan mun lei hi.

7TOPA in, “Ka mite ii khialnate bang hangin mai sak tu khi ziam? Amate in kei hong taisan in pathian maan ngawlte bia zo uh hi.
ka mite sia a ngilva dong ka vaak a,
ahihang amate in nupa kipalngul nate vawtin
pumpi kizuakte taw a hun zangh uh hi.

8Amate sia a innpaamte ii zite lamnai siphu tal ngilva phitphet in a kivaak a lante bang ahi hi.
9Hi thute hangin amate daan pia ngawlin, hi bang minamte tungah phu la ngawl tu khi ziam?

10Ka mite ii sapit huante saattan tu in ngalte ka pai sak tu hi, ahihang a vekpi in ka susia sak batu hi.
A baakte heu in ka sawl tu hi,
banghangziam cile a baakte sia kei aa hi ngawl hi.

11Israel mite le Judah mite in kei hong leeheak cip uh hi. TOPA ahi, Keima in ka ci zo hi,” ci in dongh hi.

TOPA in Israel Nial

12TOPA ii mite in ama nial in, “Ama in bangma vawt takpi ngawl tu hi. Ih tungah haksatna hong theng ngawl tu hi; ngal ahizong kialpi ahizong ih thuak batu hi,” ci uh hi. 13-14Kamsangte sia vui-ip bang hi lel uh a, TOPA kung pan hong pai thu son tu bangma nei ngawl uh hi amate in ci uh hi. Vaanglianbelpa TOPA Pathian in kei tungah, “Jeremiah awng, hi mihingte in tabang thute son ahikom ka kammalte sia na kam sungah mei bangin ka kuang sak tu hi. Mihingte in thing bang hi tu a, tua mei in amate kaangtum tu hi, ” hong ci hi.

15Israel mihingte awng, ngam khuala pan no hong sim tu in TOPA in minam khat hong paipui hi. Tua minam sia a thahat le minam lui khat hi a, a kam na heak ngawl uh minam khat ahi hi. 16A thal toai mihingte sia kuama hesuak ngawlin mihing a that a thahat ngalkapte ahi uh hi. 17Amate in na lo an uhte le na inn an uhte ne tu uh a; na tapate le na tanute thatlum tu uh hi. Amate in na tuu honte le na khuite ngolum tu uh a, na sapit nguite le na thei kungte susia tu uh hi. Na muan mama uh kulh taw a ki uum khuapite a ngalkapte in susia tu uh hi.

18TOPA in, “Ahihang tasia hun ciang ngangawn zongin ka mite ka susia cip batu hi. 19Hite theampo kei in bang hang vawt khi ziam ci in amate in hong dok ciang Jeremiah awng, amate in kei hong taisan a, a ngam sungah ngamdang pathiante ii na a sep bangma in, amate ii ngam ahi ngawl ngamsung khat ah ngamdang mite ii na seam tu uh hi, ci in amate son tan,” ci hi.

Pathian in A mite Kidop natu Thupia

20TOPA in, “Jacob ii suan le paalte le Judah mite tungah son in: 21Ngaisutna nei ngawl no mi mamawte, mit nei napi a mu thei ngawlte, bil nei napi a za thei ngawlte awng, ngai vun. * 22Keima in TOPA ka hi hi; banghang hong kiita ngawl nu ziam? Banghang ka mai ah liing ngawl nu ziam? Tuipi mongah tuipi dalna ngamngi tu in sen ka koi a, tui ii kantan thei ngawl a tawntung tui dalna ngamngi ahi hi. Tuipi a kilok to hial zong kantan zo ngawl tu a; tuihualte a hawk ngawp zong phultan zo ngawl tu hi. * 23Ahihang no mihingte awng! Na thin uh pui in nong langpan uh hi; Kei nong pial uh a nong taisan uh hi. 24Keima in a hun ciangin tuk ngua le khal ngua hong zu sakin kumsim in anlaak hun hong pia hi napi ing kei zatak tu na ngaisun ngei bua uh hi. 25Tua hu in, na khialnate uh in hi na pha na nga tu uhte hong khaktan hi.

26“Mi ngilote ka mite ii sungah teang uh hi; Amate in vacimte man tu in thaang a sia mite bangin mihingte man tu in thaangsia in pang uh hi. 27Savaipa khat in a bawm sungah a dimteak vacim a khum bangin amate in a sutol vanhte taw a inn dim uh hi. Tua ahikom amate sia thahat in hau a, 28ankham in thau uh hi. Amate in ngitlona lam ah a pha bek ci bang he ngawl uh hi. Amate in tangate sia amate nga tu a kilawm bangin pia ngawl uh hi. A kinengcip te tungah thumaanna nei ngawl uh hi.

29“Tua ahikom, Keima TOPA in, hi thute hangin amate daan ka pia tu hi; hi minam tungah phu ka la tu hi. 30A lauhuai le thin patauna thu khat ngam sungah piang zo hi: 31kamsangte in leeilot thu bek son uh hi; thiampite in kamsangte thupiakna bangin uk uh a, ka mite in phamaw sa ngawl uh hi. Ahihang a tawpna hun a thet ciang amate in bang law tu uh ziam,” ci hi.


Jeremiah 6




Ngalte in Jerusalem Kiim Uum

1Benjamin mite awng, na suatak natu uh in tai vun! Jerusalem khua panin ngel ku vun! Tekoa khua ah lemle tum vun a, Beth Haccherem khua ah heak sakna meikhu khu sak vun. Tuasiatna le lalcipna sia saksang pan pai tu hong kipan hi. 2Zion khuapi et hoi hi, ahihang kisusia tu hi; 3kumpite in a ngalkapte uh taw tua munah ngiaphual saat tu uh hi. Amate in khuapi kiimkot ah a bukte uh sa in, a uuk na tek po ah ngiak tu uh hi. 4Amate in, “Jerusalem sim tu in kithoai vun! Kithoai vun! Sun laitakin ih sim tu hi!” ci tu uh hi. Ahihang amate ma in, “Hai lei zo hing, nitum dektak zo a, ih limte sau zo hi. 5Zan ciangin ih sim tu a; khuapi dal kulhte ih susia tu hi,” ci tu uh hi.

6Vaanglianbelpa TOPA in Jerusalem uumci natu in thing kungte phukin leivum a vawt natu in hi kumpite thupia hi. Ama in, “Keima in hi khuapi daan ka pia tu hi, banghangziam cile hi khuapi in ngual zothaw lei hi,” ci hi. 7Tuikhuk in a tui a thian sak bangin, Jerusalem khua in a siatna thaksua hi. Khua sungah ngoltolna le suksiatna thu ka za a; ci natna le liamnate vive ka mu hi. 8Jerusalem mite awng, hi ngimnate sia na kidop natu uh hi tahen, tua ahibale no kong nusia tu hi; na khuapi sia kuama ii ten ngawlna mun senneal ngam ka suak sak tu hi,” ci hi.

Ngaltho nuam Israel

9Vaanglianbelpa TOPA in keima tungah, “Israel sia sapit nga a kilo thiang sapit huan kol khat bangin kikol thiang sak tu hi. Tua ahikom hun omlai in mihing na suatak thei theampo suatak in,” hong ci hi.

10Keima in, “Amate ii tungah son in kidop natu thu ka pia hial zong akua in kei thuson hong ngai nuam thong tu ziam? Amate a thin uh pui a, na thu ngai nuam ngawl hi; son tu a, kei nong sawlte amate in nuisan bek hi. 11Amate ii tungah na thin uukna sia keima sung zongh ah meisa bangin sa a, TOPA awng, ka thuak zo nawn bua hi, ci in ka zo kik hi. Taciang TOPA in, keima tungah, “Ka thin uuk nate lampi ah om patangte tung le tangvalte kikhopna munah buak in. Pasalte le zite kila tu a, a huai mama ngangawn zongh kikhe ngawl tu hi. 12A innte sia midangte kipia tu a, a lote le a zite uh sia tabang ma in midangte kipia tu hi. Hi ngam mite daan ka pia tu hi. 13A kuama po, a lian a no in thumaan ngawlin sum zong uh hi; kamsangte le thiampite ngangawn zongh in mite theam uh hi. 14Ka mite ii liamna maate sia a huntham kok hi bek zam ci in amate in ngaisun uh hi. Pha siat ngawl napi, ‘Pha siat hi.’ amate in ci uh hi. * 15Hi a kiihuai nate a sep uh komin amate a mai uh zum ziam? Hi ngawl hi. A mai uh zum dek ngawl hi; maizumna zia tu zongh he ngawl uh hi. Tua ahi ciang midangte a puk bangma in amate puk tu uh hi; amate daan ka piak ciang, amate bona hi tu hi. Keima TOPA in ka ci zo hi,” hong ci hi.

Israel in Pathian ii Lampi Nial

16TOPA in a mite tungah, “Lamkaa bom ah dingin khuadak vun. Tang lampite le a pha bel lam sia koisung ziam ci in dongh vun. Tasia tawn vun, tua hile thinnuam in na om tu uh hi,” ci hi. Ahihang amate in, “Hi ngawl hi, tawn ngawl tu khu hi!” ci hi. * 17Taciang kidop natu lemle tumna aw ngai tu in TOPA in ngalvilte koi hi. Ahihang amate in, “Ngai ngawl tu khu hi!” ci uh hi.

18Tua ahikom TOPA in, “Minam dangte awng, ngai vun, ka mite tungah bang thu piang tu ci sia he vun. 19Leitung awng, ngai vun! Amate in ka thuhil nate nial a, ka kammalte mang ngawl ahikom, amate ii sawm nate theampo taw kizui in daan piakna in hi mite tungah siatna ka tung sak hi. 20Sheba ngam panin ngim namtui hong puak sia le a khuala ngam pan hel namtui hong puakte bangma ka awlmawk bua hi. Amate ii hong piakte ka saang batu a; amate ii biakpiak nate in kei hong lungkim sak ngawl tu hi. 21Tua ahikom hi mite lutu in ka puk sak tu hi. Pate le tapate thi tu uh a, tasia bangma in innpaamte le lawm le ngualte thi tu uh hi,” ci hi.

Saksang pan Ngal in Sim

22TOPA in, “Saksang ngam khat panin mite hong pai uh a; a khuala na pan a thahat ngam lian khat in ngal sim tu in ki thathoai hi. 23Amate in a thal le a namsaute toai uh a; ngilo in ngual hesuakna thin nei ngawl uh hi. Amate in a siphu tungah a to uh ciang, a husan uh sia tuipi tuihual bangin nging hi. Amate in Jerusalem sim tu in a kithoai sa in om uh hi.” ci hi.

24Jerusalem mite in, “Tua thute ih za zo hi, taciang ih khutte zaw hi; thin ngimna in hong lencip in nau tun numei khat bangin na ih sa hi. 25Ngam sungah ih pai ngam bua a lampi tung zongh ah ih vak ngam bua hi, banghangziam cile ih ngalte in hiam toai a, ih kiim ih paam theampo lauhuai siat hi, ” ci uh hi.

26TOPA in a mite tungah, “Khau-ip puan silh in vut sungah liik vun. Tapa khat a nei sun sia in a thi san bangin thitui taak vangul in kap vun, banghangziam cile no hong susia tu pa in thakhat thu in hong sim tu hi. 27Jeremiah awng, thik na sit tu bangin, ka mihingte sit in a, amate bang taw kibang ziam cisia telthiang in. 28Amate a vekpi in a thinpui ngaltho nuamte hi a, a thin uh sia taungo le thik bangin sak uh hi. Amate sia a sia in ngamta siat uh a, vak kakoai in heltuana thu poai kakoai uh hi. 29Pummei sia nasia takin kuang ahihang thik eakseau sia tui ngawlin luang ngawl hi. Ka mite a thiantho natu sep suak lai tu sia lui thathong hi, banghangziam cile a ngilo mite taanglai veve hi. 30Amate sia a mannung ngawl ngun eak kici tu hi, banghangziam cile Keima TOPA in amate ka nial zo hi,” ci hi.

0 comments:

Post a Comment