Laithiangtho Dokna (Matthew 13-14)

1. Thaici poaipa taw kisai akoisung pan mipite thuhil ziam?
a. Valbo tung
b. Mual tung
c. Ngunkuang

2. Akuate in, To Jesu kung ah "thusontena vo banghang zangh ni?" ci ziam?
a. Nungzuite
b. Phariseete
c. Mipite

3. Akua kamsang in "Hi mihingte in ngangai ahihang tel ngawl" ci ziam?
a. Zechariah
b. Jeremiah
c. Isaiah

4. Ngalte in lo nei pa amut lang a lo sung ah bang cii tuu ziam?
a. Mimphei
b. Ling
c. Lopa

5. Vacimte in bang kung ii bak kawm ah bu vawt ziam?
a. Nailung kung
b. Ankam
c. Paangpat kung

6. To Jesu in koi sung ah nalamdang lakna vawt lei ngawl ziam?
a. Bethlehem
b. Nazareth
c. Hebron

7. Akua in  To Jesu sia Tuiphumpa John hi tu umh ziam?
a. Suduccee
b. Mipite
c. Galilee Ngam Ukpa

8. Herod ii suapuipa min bang ziam?
a. Philip
b. Methoshebaw
c. Rokhani

9. John ii lutang tan tu ciang akua khuangai kici ziam?
a. To Jesu
b. John nungzuite
c. Herod

10. Muklum nga le ngasa ni sia To Jesu in la in ___a, lungdamko hi.
a. van ento
b. laamto
c. a khut taw lawng

11. Muk le anlum kingawm khum bangza val lai ziam? 
a. 7
b. 12
c. 24

12. To Jesu tuitung apai sia zingsang nai ___ kilaklaw hi.
a. nga le luk
b. thum le luk
c. nai khat le luk

Matthew 13
Thaicii Poaipa Thusonteena
(Mark 4:1-9; Luke 8:4-8)
1Tua ni ma in Jesu inn pan pusuak in, tuili hui ah to a, thuhilna nei hi.  2A kiim ah hong kikhawm mihonpite tam mama ahikom, hilna nei tu in ama ngunkuang sungah to a, mipite vaalbo ah ding uh hi. *  3Ama in thu tam mama son sawn natu in, thusontee nate zangh hi.
 “Khatvei lai in, pasal khat sia thaicii poai tu in kuan hi.  4Lo sungah thaiciite a poai ciangin, thaicii pawlkhat sia lamzin tungah taakin, vacimte pai a, ne siat uh hi.  5Thaicii pawlkhat lei daina suang tungah taak hi. Tawmvei sungin thaicii po hi, banghangziam cile lei thuk ngawl hi.  6Ahihang ni a sat ciangin ankung note kaanglum hi; taciangin zungthuk tha ngawl ahikom, ankungte ko ngawtaak cip hi.  7Thaicii pawlkhat lingphung sungah taak a, tua lingte khangin ankungte deapcip hi.  8Ahihang thaicii pawlkhat lei phana ah taakin, ankungte hui a; a kung pawlkhat ii tung pan a za za khat, pawlkhat a za sawm luk, pawlkhat a za sawm thum in nga hi.”
  9“Bil nei po in za tavun!” ci in Jesu in a thuson khup hi. 
Thusonteena ii Deina
(Mark 4:10-12; Luke 8:9-10)
10Taciangin nungzuite Jesu kungah pai a, “Mihingte tungah thu na son ciangin, banghangin thusonteena veu taw thuson ni ziam?” ci in dongh uh hi.
  11Jesu in, “Vantungngam thukuu sia note tungah hong kipia hi; ahihang amate tungah kipia ngawl hi.  12Banghangziam cile neisa khat po a nei kholte tungah kipia thua tu hi, tam seseam a nei natu in, kipia thua tu hi; ahihang bangma a nei ngawl khat tung panin a nei sun teng zongh, kilaak sak tu hi. *  13Amate tungah thusonteena taw thu ka son sia, banghangziam cile, amate in e en ahihang mu ngawl a, ngangai ahihang za ngawlin tel ngawl uh hi.  14Tua ahikom, Isaiah sonkholna sia amate tungah kibul thei hi;
 ‘Hi mihingte in ngangai ahihang tel ngawl tu hi.
 Amate in e en ahihang mu ngawl tu hi. *

15Banghangziam ci le amate thinsung sia bulthu zo a,  a bil uh kihu cip zo in, a mit uh si cip zo uh hi.
 Tua hi bale a mittang uh taw mu tu a,
 a bil uh taw za tu a, a thinsung uh taw tel tu uh hi.
 Taciang kei kungah hong zuan tu uh hi.
 Tasia ciangin amate ka dam sak tu hi,
 Pathian in ci hi.’
  16“Note na hi uhle bangza in hampha nu ziam! Na mittangte khua mu uh a, na bilte in khuaza uh hi. *  17A tatak ka ci ciang, kamsang tam mama le Pathian mi thiangtho tam mamate in, no mu teng mu nuam a, note zaak teng za nuam ahihang amate in mu ngawlin za ngawl uh hi. 
Jesu in Thaicii poaipa Thusonteena Sonthiang
(Mark 4:13-20; Luke 8:11-15)
18“Tua ahile ngai vun, thaicii poaipa thusonteena sia hi bang ahi hi.  19Kumpingam thu huvau thu kisonte za napi a tel ngawlte sia lampi tungah a taak thaiciite taw kibang hi. Ngilopa hong pai a amate ii sungah a kituu thute laak sak hi.  20Suang tungah a taak thaiciite sia a thu a zaak uh po ciang, lungdam takin a saangte ahi uh hi.  21Ahihang a thu in amate sungah a thuk in tum ngawl a, khua ngei khom ngawl uh hi. Tua ahikom haksatna le vawtsiatna hong pai ciangin amate puk uh hi.  22Lingphung sung a thaicii taakte sia a thu a zate ma hi a, ahihang nuntak natu thinngim in, hau tu a uukte hi a, tuate in khulup ahikom a nga a hui a nei bua uh hi.  23Taciangin lei phana ah a taak thaiciite ahile a thu za in a telte ahi uh hi: amate in a za zakhat, pawlkhat in a za sawm luk, pawlkhat in a za sawm thum in a nga uh hi.” 
Mimphei Thusonteena
24Jesu in thusonteena dang khat son hi. “Vantungngam thu hi bang hi. Pasal khat in a lo sungah thaicii pha poai hi.  25Zan khat ciang, ngual theampo ii mut laanin, a ngalte khat hong pai a, taangkungte ii kawmah mimphei cii tuu in nusia hi.  26A kungte po in a huite lua tu in a kipat ciangin, mimpheite kilangh hi.  27Lo neipa naseamte hong pai a, ‘Topa awng, lo sungah na poai thaiciite thaicii pha veu hi kana ngawl ziam?, koisung pan mimpheite hong piang ziam?’ ci uh hi.  28Ama in, ‘Ngalte pawlkhat ii ngamtatna hi,’ ci in zo hi. ‘Mimpheite, kuan in botkeak le ung nong oai ziam?’ ci in dongh uh hi.  29‘Oai ngawl khi hi; mimphei na baw uh ciangin taang zongh na botkeak tha tu uh hi.  30Anlaak hun dongin mimphei le taangte na po khawm sak lel vun. Tasia ciangin anlate munah, mimphei teng bot phot vun a, lomsawm in hal vun, tasia zawkciang taang teng la in ka saal sungah khum vun,’ ” ka ci tu hi, ci hi. 
Ankamtang Thusonteena
(Mark 4:30-32; Luke 13:18-19)
31Jesu in thusonteena dang khat ma son hi: “Vantungngam thu sia hi bang hi. Pasal khat in ankam cii la in lo sungah poai hi.  32Ama sia thaicii a minpiang a nobel ahi hi, ahihang hong let ciang, ankung lianbel suak hi. Ama sia ankung pui suak ahikom vacimte in a baakte kawm ah bu hong vawt uh hi.” 
Tol Thusonteena
(Luke 13:20-21)
33Jesu in thusonteena dang khat ma son lai hi: “Vantungngam thu hi bang hi. Numei khat in tol tawm la in anvui khum khat dim taw hel a, a vekpi in hong pawm hi.” 
Jesu ii Thusonteena A Zakna
(Mark 4:33-34)
34Jesu in mipite tungah hi thute a son ciangin thusonteena zangh hi; thusonteena ngawl peuma taw thu khat zongh son ngawl hi.  35Hi bangin ahi sia kamsangpa pauna a tangtut natu ahi hi,
 “Amate tungah ka pau ciangin thusonteena ka zangh tu hi;
 Simlei a kibitphua pan kipan a kihe ngei ngawl thute amate tungah ka son tu hi.” * 
Jesu in Mimphei Thusonteena Sonthiang
36Jesu in mipite nusia in innpi sungah a tum ciangin, a nungzuite ama kungah hong pai a, “Lo sungah mimphei thu thusonteena sia ii khiakna hong son tan,” ci uh hi.
  37“Thaicii pha a tuu pasalpa sia Mihing Tapa ahi hi; lo sia hi leitung ahi hi.  38Thaicii pha sia Kumpingam mite ahi hi; mimphei sia a ngilopa neisa mihingte ahi uh hi.  39Taciangin mimphei leisung a tuu ngalpa sia Doaimangpa ahi hi. Anlaak hun sia hunbona ahi hi, anlate sia vantung lalangte ahi hi.  40Mimpheite kitawm in meikuang sungah a kihal bangma in, hun bo ciangin, tabangin kihi tu hi:  41Mihing Tapa in, midangte a khial sakte le a sia vawt theampo khawm tu in, a vantung lalangte sawl tu a,  42taciangin amate in tua mite meiphual sungah sep tu hi, tua munah amate kapin ha ngoai tu uh hi.  43Taciangin Pathian mihingte ahile Pa ii Ngam sungah ni bangin taang tu uh hi. Bil nei po in za tavun! 
Sum Kiphual Thusonteena
44“Vantungngam thu hi bang ahi hi. Pasal khat in lo khat sungah sum kiphual khat mu hi. Ama in lei huh kikin, lungdam mama ahikom a neisa theampo zuak a, tua zawkciang pai kikin, tua lo lei hi. 
Suangmanpha Thusonteena
45“Vantungngam thu in hibang hi si hi. Pasal khat in suangmanpha zong a,  46a hoi tangtuam mama khat a mu ciangin, a neisa theampo zuak in, tua suangmanpha lei hi. 
Ngeen Thusonteena
47Vantungngam thu in hi bang ahi hi. Ngasa man pawlkhat in a ngeen uh tuili sungah pai in ngasa namcin man uh hi.  48A ngeen uh a dim ciangin, vaalbo ah ngasate hawm tu in kaito a, ngasa phate phealsung ah kikoi in, ngasa manpha ngawlte kivawk hi.  49Hun bo ciangin hi bangin ki ngamta tu hi: vantung lalangte pai in mihing phate kawm pan in mihing ngilote khawmtua in,  50meiphual sungah amate vawk tu a, tua munah amate ha ngoai in kap tu uh hi. 
Thumaan Thakte le A lui
51Jesu in, “Hi thute na tel uh ziam?” ci in dongh hi. “Tel khu hi,” ci uh hi.
  52“Tua ahikom, Thukham hil syate khat papo sia Vantungngam sung ah nungzui a sua ciangin bang taw kibang ziam cile vanh kholna inn doi sung pan, vanh thak le vanh lui a la inn neipa taw kibang hi,” ci hi. 
Nazareth ah Jesu Kinial
(Mark 6:1-6; Luke 4:16-30)
53Jesu in hi thusonteena thute a son zawkciang tua mun nusia a,  54ama ii khua ah cia hi. Ama in Synagogue ah hilna nei a, a zate in lamdang sa uh hi. “Koisung pan in ciimna hi bangte nga ziam? A na lamdang vawtte bangbangziam?  55Ama sia lettama pa tapa ma hi kana ngawl ziam? A nu sia Mary ma hi a, a suapuite sia James, Joseph, Simon le Judaste hi kana ngawl ziam?  56A suapui numeite zongh hi lai ma ah teang hon kana ngawl ziam? Koisung panin hite theampo ka nga ci ziam?” ci uh hi.  57Tua hi a amate in a saang thei bua uh hi.
 Jesu in amate munah, “Kamsangpa khat sia ama khua le ama innkuan sung ngawl buang mundang theampo ah kizatak vawt hi,” ci hi. *  58Amate in upna nei ngawl ahikom, tua munah na lamdang lakna tam mama a vawt bua hi.

Matthew 14


Tuiphumpa John Thina
(Mark 6:14-29; Luke 9:7-9)
1Tua hun laitakin Galilee ngam ukpa Herod in Jesu thu za hi.  2A uliante munah, “Ama sia Tuiphumpa John hong nungta kik hi vangiat tu hi, ci hi. Tua hu in, na lamdang lakna vawt theina vaang nei hi tu hi,” ci hi.
  3Banghangziam cile Herod in John a kimat natu thupia zo a, thong sungah khum hi. Hi bangin a vawt na sia Herod in a suapuipa Philip zi Herodias a tenpui hang ahi hi. *  4Tuiphumpa John in Herod munah, “Herodias na tenpui sia suak ngawl hi,” ci ngei zo hi. *  5Herod in ama sia thatlum nuam ahihang, Jew mite kiita hi, banghangziam cile Jew mite in John sia kamsang khat hi ci in ngaisun uh hi.
  6Herod suani in a kikhawmte mai ah Herodias tanu lam hi. Herod lungkim mama a;  7“Nong nget papo kong pia tu hi,” ci in kiciam in, kamciam pia hi.
  8A nu sawl bangin, “Hi sungah tu ma in, kuangdal khat sungah John ii lutang hong pia tan!” ci hi.
  9Kumpipa sia khuangai hi, ahihang leangnate mai ah, kamciam a piak sa ahikom a nget bangin, a kivawt natu thupia hi.  10Tua ahikom thong inn sungah John ii lutang tan sak hi.  11Tua lutang sia kuangdal tungah koi in, ngaknu nu kipia a, ama in a nu piasawn hi.  12John nungzuite hong pai a, a luang pua in phum uh hi; tua zawkciang amate pai in Jesu munah son hi. 
Jesu in Mihing Tul nga Vaak
(Mark 6:30-44; Luke 9:10-17; John 6:1-14)
13Jesu in John thute a zaak ciangin, ngunkuang khat sungah to in, a ngamkhingna mun khat ah ama nguakin pai hi. Mipite in tua thu za ahikom a khuapi uh nusia in leilam pan in ama zui uh hi.  14Jesu in a ngunkuang tung pan tuak a, mihonpite a mu ciangin, tua mite hesuak huai sa in ciinate dam sak hi.
  15Tua nitak in a nungzuite in ama kungah hong pai uh a, “Tu in ni zongh niam mama zo hi. Hi mun sia ngamkhing mun ahi hi. Mihonpite pai sak in a, khuano sungah amate le amate neak tu an lei sak lete pha hi,” ci uh hi.
  16“Amate pai sak kul bo, amate neak tu an note in pia vun,” ci hi.
  17“Hi sungah ih nei theampo kingawm in anluum nga le ngasa nii hi,” ci in zo uh hi.
  18“Tua hile tuate keima kungah hong paipui tavun,” Jesu in ci hi.  19Ama in mipite sia lopa tung a to siat natu in thupia hi; tua zawkciangin anluum nga le ngasa niite la in, van ento a, Pathian munah lungdam ko hi. Ama in anluumte baltham in nungzuite pia a, nungzuite in mipite piasawn uh hi.  20Misim in ne in kham tek uh hi. Tua zawkciangin nungzuite in, a neak vaal uh khum sawm le khum nii dim in seng uh hi.  21Numei le patang simngawl, pasal an ne sia tul nga bang pha uh hi. 
Jesu Tui tungah Lampai
(Mark 6:45-52; John 6:15-21)
22Mipite a inn tek ah cia in a sawl zawkciang, tuili ngal ah paikhol tu in, a nungzuite ngunkuang sungah to sak hi.  23Mipite a cia sak siat zawkciang, ama nguakin mual tungah thungen tu in kaato hi. Nitak khuaniam hun dongin Jesu in tua munah ama nguakin om hi;  24tua hun laitakin ngunkuang sia tuili sungah khuala ma thengzo a, vui va ahikom ngunkuang sia tuihual in lok zazan hi.
  25Zingsang nai thum le nai luk kilaklaw in, Jesu in tuitung nungzuite sangah hong pai hi.  26Tuitung ah a pai a mu ciangin, amate patau mama uh hi. “Thitha hi tu hi!” ci in lau in ciik au uh hi.
  27Jesu in amate tungah thakhat in paupui a, “Na thin uh kilian sak vun! Lau heak vun! Keima khi hi,” ci hi.
  28Tasia ciangin Peter in, “Topa na hi takpi le nangma kungah tui tungah kong pai thei natu in thu hong pia tan,” ci hi.
  29“Hong pai tan!” Jesu in ci hi. Tua ahikom Peter sia ngunkuang sung pan pusuak a, tuitung Jesu kungah lampai tu in kipan hi.  30Ahihang vui va ngawp sia a mu ciangin lau in tuitaw ah taaksuk tu in kithoai hi. “Topa hong hun tan!” ci in au hi.
  31Thakhat in Jesu in ama zamh in, “Upna no pa awng, banghang in muang la ni ziam?” ci hi.
  32Amate nii sia ngunkuang sungah thengin vui zongh thim hi.  33Tasia ciangin ngunkuang sung a om nungzuite in Jesu bia uh hi. “Pathian Tapa takpi ma na hi hi!” ci in au uh hi. 
Gennesaret ah Jesu in Ciina Dam sak
(Mark 6:53-56)
34Amate sia tuili kantan in Gennesaret vaalbo ah kaa uh hi,  35Tua munah mihonte in Jesu sia a meal tel uh hi. Tua ahikom kiimkot ngamte ah ciinate vaitha in, Jesu kungah paipui hi.  36A puanmong bek ahizong ciinate a tham sak natu in, ama tungah ngen uh hi. Taciang a puanmong a tham theampo dam sak hi.

0 comments:

Post a Comment