Laithiangtho Dokna (Matthew 7-8)

1. Ngual tungah thu ih khen bua le Pathian in eite tungah ___ tu hi.
a.  thukhen ngawl
b. thinuk
c. phula kik

2. A thiangtho nate ui pia leang ___ tu hi.
a. pet
b. amei phe
c. lungdam thathong

3. Hong kivawt le na oai uh bangin, ___ vun.
a. vawt heak
b. ngual tungah na vawt
c. vawt

4. ___te sia a nasepna tung pan na tel thei tu uh hi.
a. Ka tealsa
b. Upna a nei
c. Leeilot kamsangte

5. Suangpi tungah inn sa pa sia ____ hi.
a. upna nei pa
b. mihing mamaw
c. mihing ciiim

6. TO JESU thu ason zawk ciang mihonpi in ___ hi.
a. lungdam uh
b. lamdangsa
c. damna ngen

7. Miphak pa Jesu mai ah ___in, damna ngen hi.
a.  khupdin
b. bawh
c. lamet na taw

8. Miphak pa adam zawk ciang TO JESU in bang sawl ziam?
a. Sangaw biakpiakna
b. Pharisee te kung pai sak
c. Dam thu son sawn sak

9. Rome ngalkapmangpa taw TO JESU ___ ah kimu hi.
a. Hebron
b.  Capernaum
c. Jerusalem

10. Peter ii akua dam ngawl ziam?
a. Pa
b. A tupa
c. Sunghnu

11. TO JESU in mihonpite amu ciang koisung paisawm ziam?
a. Olive mual
b. Jerusalem
c. Tuili

12. Thaan sung pan hong pusuak Doai vei bangza pha ziam?
a. 1
b. 2
c. 3



Matthew 7
Ngual tung Thukhenna
(Luke 6:37-38,41-42)
1“Pathian ii note tungah thu hong khen ngawl natu in, ngual tungah thu na khen heak vun, 2banghangziam cile ngual tungah thu na khen uh babangin note tungah Pathian in thu hong khen tu hi. Ngual tungah na zak uh na ngeina let uh teng ma no tungah hong kizangh tu hi. * 3Tua ahile banghangin na suapuipa mittang sung ninteak sia mu thei in, noma mittang sung a thingluang sia phawk thei ngawl nu ziam? 4Noma mittang sunga, thingluang khat om nginge sia, awlmawk ngawlin na suapuipa munah, ‘Na mittang sungah ninteak sia laak sak tong,’ banghangin ci ngam nu ziam? 5No a kihi sak minamte awng! Noma mittang sungah thingluang sia la keak phot vun, tua hile na suapuipa mittang sung ninteak sia na laak thei natu in, thiang takin na mu thei tu uh hi.

6“A thiangtho nate ui na pia heak vun— amate in noma hong pet kik zaw tu hi. Vokte mai ah na suang manphate na na lot heak vun— amate in a peang nuai a siikcip lel tu hi.

Ngen, Zong, Kingh
(Luke 11:9-13)
7“Ngen vun na nga tu uh hi; zong vun na mu tu uh hi; kingh vun, kongkha hong kihon tu hi. 8Banghangziam cile a ngen papo in nga a, a zong khat papo in mu a, a kingh sia kongkha kihon hi. 9Pa ahi note khat papo, na tate in anluum hong nget uh ciang, suangtum na pia tu uh ziam? 10Tua ahibale ngasa hong nget ciang, ngul na pia tu uh ziam? 11Na phat ngawl uh kawm panin na tate atu na pha piak tu sia na he uh hi. Tua ahile, vantung ah na Pa in a ngente tungah na phate bangza in hong pia zaw kan tu ziam?

12“Noma tungah hong kivawt le na oai uh bangin, ngual tungah na vawt tavun; tasia in Moses Thukham le kamsangte hilnate ii a khiakna ahi hi. *

Kongbiang Ciak Thu
(Luke 13:24)
13“Kongbiang ciak sungah na tum vun, banghangziam cile hell ngam kongbiang sia zai a, tua mun paina lampi sia tot ol hi, tua lampi a tawn mihing tam mama om hi. 14Ahihang nuntakna sung tum natu kongbiang sia ciak a, tua mun pai natu lampi sia tot hak hi, taciang tua lampi a mu mihing tawm hi.

Thingkung le A nga
(Luke 6:43-44)
15“Leeilot kamsangte na up ngawl natu kidawm vun; amate sia a puatham ah tuu bangin hong pai tu a, a sungsang uh sia ngia hangsan bang hi tu hi. 16A ngamtatna uh panin amate na tel tu uh hi. Lingsawl te in, sapit nga ngei ngawl a, lingkungte in theipum nga ngei ngawl hi. 17Thingkung ciidamte in thingnga pha nga a, thingkung ngina ngawlte sia thingnga pha ngawl nga uh hi. 18Thingkung ciidamte in, thingnga pha ngawl nga thei ngawl a, thingkung ngina ngawlte in thingnga pha nga ngei ngawl hi. 19Thingkung khat papo a nga a pha bale kiphuk in meisung ah kisep hi. * 20Tua ahiciang leeilot kamsangte amate nasepna tung pan na tel thei tu uh hi. *

No Hong He ngei Bong
(Luke 13:25-27)
21“ ‘Topa, Topa’ hong ci theampo Vantungngam sungah a tum siat batu hi, vantung ah ka Pa deina bang a ngamtate bek tum thei tu hi. 22Thukhenna Ni hong thet ciang, mihing tam mama te in, ‘Topa, Topa! Na min taw Pathian thuhil in, na min taw doaite tam mama notkeak in, na lamdang tam mama vawt hi ngawl khu ziam?’ ci tu uh hi. 23Tasia ciang, ‘Note hong he ngei bong, Ka kung pan taikeak vun, no misiate awng!’ ka ci tu hi. *

Innsa Niite
(Luke 6:47-49)
24“Tua ahikom, kei kammal hite za a, a zaak uh bang a seamte sia, suangpi tungah inn sa mihing ciimpa taw kibang hi. 25Nguazu in khuanawl hong suak a, taciang tua inn sia vuipi in a nawmngawp hi, ahihang tua inn sia a puk bua hi, banghangziam cile tua inn sia suangpi tungah a kisak hang ahi hi.

26“Ahihang kei kammal hite za napi in, a zui ngawlte sia senneal tungah inn sa mihing mawmaw pa taw kibang hi. 27Ngua zu in, khuanawl suak a, vui in hong nawmngawp ciang, tua inn cimtham hi. Tua in a lauhuai puuna ahi hi!”

Jesu Thuneina
28Jesu in hi thusonteena a nei zawkciang, mi honpi in ama hilzia lamdang sa uh hi. * 29Ama sia Thukham hil syate taw a kibang bua hi; ama in thuneina taw hil hi.

Matthew 8
Jesu in Pasal khat Dam sak
(Mark 1:40-45 Luke 5:12-16)
1Jesu mualtung pan hong tuaksuk ciang mihonpite in zui uh hi. 2Tasia ciangin miphak khat hong pai a, Jesu mai ah khupdin in “Topa hong dam sak nuam po lete hong dam sak thei tu ni hi,” ci hi.

3Jesu in a khut zam a ama thamin, “Hong dam sak nuam khi hi, dam tan,” ci hi. Thakhat thu in, pasalpa sia a natna pan dam hi. 4Tua zawkciang Jesu in, “En in, kuama munah son heak in a, thiampipa kungah pai vingveng in, na pumpi veal sak tan; na damthiangna thu ngual theampo hong heak natu in, Moses thupiak bangin sangaw biakpiakna vawt tan,” ci hi. *

Jesu in Rome Ngalkapmangpa ii Naseampa Dam sak
(Luke 7:1-10)
5Jesu Capernaum khua sungah a tum lai takin, Rome ngalkapmang khat taw kisi a, tua pa in Jesu munah hu ngen hi. 6“Topa, ka naseampa sia inn ah ciina in lum a, tung thei ngawl in ngim mama hi,” ci hi.

7“Na inn ah hong pai in, dam sak tu khi hi,” Jesu in ci hi.

8Ahihang ngalkapmangpa in, “Topa awng, ka inn sungah nang nong pai tu sia kiphu ngawl khi hi. A dam natu thu hong piak sak ka po in, tua hile ka naseampa dam tu hi,” ci hi. 9“Keima mama zongh uliante khutnuai ah om a, keima khutnuai a ngalkapte om hi. Khat tungah, ‘Pai in’ ci leng pai a, ‘hong pai tan’ ci leng hong pai hi. Ka salpa munah hi sia seam in ci leng seam hi,” ci hi.

10Jesu in hithu a zaak ciangin, lamdang sa in, a nungzuite munah, “A tatak in ka ci ciang Israel ngam sungah hi bang upna mu ngei ngawl khi hi,” ci hi. 11“A maan tatak ka ci ciang, nisuana le nitumna panin, mihing tam mama hong pai tu a, Vantungngam sungah Abraham, Isaac le Jacob taw anneak poai sungah hong tokhawm tu hi. * 12Ahihang tua Kumpingam sungah om tu a kilawmte sia, khuazing sungah kivawk tu a, tua munah kapin ha ngoai in om tu hi.” * 13Tua zawkciang, Jesu in ngalkapmangpa munah, “Va cia tan, na upna bangin hong kivawt sak tu hi,” ci hi.

Taciang ngalkapmangpa naseampa sia tua hun laitak ma in dam hi.

Jesu in Mihing Tam mama Dam sak
(Mark 1:29-34; Luke 4:38-41)
14Jesu in Peter inn ah pai a, tua munah Peter sunghnu sia a ci suukin lupna tungah om mu hi. 15Jesu in Peter sunghnu khut tham sak hi; a suuk natna dam a, tho in Jesu zin do hi.

16Nitak ciang mihingte in Jesu kungah doaivei tam mama hong paipui uh hi. Jesu in thaa ngilote kam khat taw notkeak a, taciang ciina theampo dam sak hi. 17“Ama mama in ih ngimna khamna hong laak keak sak a, ih cinat lu natna hong puak sak hi,” ci in Isaiah kamsangpa ci teng a tangtun natu in seam ahi hi. *

Jesu Nungzui Tute
(Luke 9:57-62)
18Jesu in a kiim a mihonpite a mu ciang, a nungzuite munah tuili ngalkhat ah a pai natu in sawl hi. 19Thukhamhil Sya khat in, “Sya awng, na paina po ah paikhawm tu in, ka kinging hi,” ci hi.

20Jesu in, “Ngiate in kua nei a, vacimte in bu nei uh hi. Ahihang Mihing Tapa in lup natu le, tawlngak natu a nei bua hi,” ci in zo kik hi.

21A nungzui ngei dang khat in, “Topa na cia ka tong ii ka pa na vui phot tong,” ci hi.

22Jesu in, “Hong zui tan, mithi le mithi kivui tahen,” ci hi.

Jesu in Vuipi suangval Thim sak
(Mark 4:35-41, Luke 8:22-25)
23Jesu ngunkuang tung to a, a nungzuite zongh in ama zui uh hi. 24Thakhat thu in a kiitak huai suangval khat tuili tungah hong va a, ngunkuang sia tui ii a khup tu lauhuai hi. Ahihang Jesu mutthip hi. 25Nungzuite a kungah pai in, phong uh hi. “Hong hun tan, Topa, thi dektak khu hi,” ci uh hi.

26Jesu in, “Banghangin taza liangin lau nu ziam? Na upna uh bangza in no ziam?” ci hi. Tua zawkciang ama dingto a, huipi le tuihualte a thim natu in thupia a, tasia ciangin thim dide hi.

27Mihing simin lamdang sa uh hi “Hisia pa sia bangbang mihing hi thong ziam? Hui le tuihualte ngangawn in a thu ni hi,” ci uh hi.

Jesu in Doaivei Pasal Nii Dam sak
(Mark 5:1-20; Luke 8:26-39)
28Tuili ngalkhat Gadara ngamah Jesu a thet ciangin, thaan hawng sung pan hong pusuak pasal nii taw kisi uh hi. Hi mihingte doaivei a, kiitak huai mama ahikom tua lampi tawnin, kuama khualhaw ngam ngawl uh hi. 29Thakhat in amate cik au uh a, “Nang Pathian Tapa awng, ko bang hong law nuam ni ziam? A hun hong thet ma in, daan pia tu hong pai ni ziam?” ci uh hi.

30A khuala ngawlna ah vok hon khat taa uh hi. 31Tua ahikom doaite in Jesu munah, “Nong notkeak tu ahile zia lai a vok honte sungah hong tum sak tan,” ci in ngen uh hi.

32Jesu in, “Pai tavun,” ci hi. Tua ahiciang amate in a omna uh nusia in paisan a, vokte sungah tum uh hi. Vok hon bup sia liangpangh ah kinuntaw sukin, tuili sungah tuitaa in thisiat uh hi.

33Vok cingte tai in khua sungah tum a, tua munah doaiveite tung a thupiang theampote son siat uh hi.

34Tua ahikom khuapi sung pan mihingte sia Jesu taw kisi tu in hong pai tek uh hi; ama a mu uh ciangin a ngam uh panin a tai natu ngen uh hi.

0 comments:

Post a Comment