Laithiangtho Dokna (Psalm 103-104)

1. TOPA pok in a, ama diknate ___heak in.
a. ngaisun
b. mangil 
c. phawk

2. Akuate panpuina taw TOPA in thukhen ziam?
a. Israelte
b. A kizothawte 
c. A it atate

3. Ama a tawntung in ___ ngawl hi.
a. nui
b. a thin uuk 
c. kiphasak

4. Ama in eite taw a kiphu bangin ___hong pia ngawl hi.
a. daan 
b. vaangletna
c. thupha

5. Eite ih hile ih nuntakna sia ___bang ahi hi. 
a. tuikhalh
b. lopa 
c. sumkuang

6. Ama ___ in khangsim khangsim kikhom hi.
a. thupha
b. kamciam
c. phatna

7. ___te sia siphuleang in na zangh hi.
a. Aksi
b. Meeikaai
c. Egypt siphuleangte

8. Hui sia ___ in na zangh hi. 
a. na veisang khut
b. kamtai
c. ngilote thalupna

9. Tuite in ___ ciang  kinawm ngawp hi?
a. hui vak nasiat
b. TOPA thupiak a zaak 
c. zinh aliing

10. Lebanon mual ___ ah vacimte in a bu vawt hi.
a. Cedar thingkungte
b. Olive thingkungte
c. Suangpi kawm

11. Simlei sia na ___ taw kidim hi.
a. alamdang nate
b. nganhingte
c. aw nging

12. Ama  in mualpite tham a, ___ hi.
a. sangto sak
b. thupha pia
c. meikhu pusuak


Psalm Late 103
Pathian Itna
1Ka tha awng, TOPA pok in! Ka nuntakna theampo awng, ama min thiangtho pok in!
2Ka tha awng, TOPA pok in a, ama diknate mangil heak in.
3Ka mawna theampo ama in hong mai sak a, ka natna theampo hong dam sak hi.
4Ama in thaankuul thet natu panin hong keam a, itna le hesuakna taw thupha hong pia hi.
5Muvanlai bangin hatin ka moisua kik natu in ka nuntakna sia na phate taw ama in hong dimh hi. 
6A kizothawte panpuina taw TOPA in thukhen a, amate nga tu a kilawmte pia hi.
7Ama ii ngealnate Moses tungah ama in lak a, ama nasepna liante Israel mite mu sak hi. 
8TOPA in hong hesuak a hong it hi, thin uuk hak a tatsat ngawl ki itna taw kidim hi. *
9Ama in hong tei thapai ngawl a; a tawntung in a thin uuk ngawl hi.
10Ama in eite taw a kiphu bangin daan hong pia ngawl a, ih mawna le ih tat khialnate bangin hong thuh ngawl hi.
11Van sia lei panin a saan bangza in ama a zaktate a itna sia lian mama hi.
12Nisuana sia nitumna pan a kikhualat bangin ih mawnate sia eite sung pan tabangza a kikhuala in hong khin sak hi.
13Pa khat in a tate tungah cingh ahi bangma TOPA sia ama a zaktate tungah cingh hi.
14Eite bang taw kivawt ci sia ama in he hi; ama in eite leivui ih hi sia ciamtee hi.
15Eite ih hile ih nuntakna sia lopa bang ahi hi. Ngamsung paak khat bangin ih khang a ih palh hi;
16Tua zawkciang a tungah vui hong va a, tua paak bo in- kuama in mu kik ngawl hi.
17Ahihang TOPA a zaktate atu in ama itna in a tawntung in kikhomsuan a,
ama phatna in khangsim khangsim kikhom hi, 18Ama thuciamna sungah a citakte le
ama thupiakte pha takin a zuite atu in ama phatna in khangsim khangsim kikhomsuan hi.
19TOPA in a kumpi tokhum sia vantung ah koi a; ama in a kuama theampo ii kumpipa ahi hi.
20Ama thupiakte ni a, ama cite a ngai no, a thahat vantung lalangte awng TOPA pok vun.
21Ama deina bangin a ngamta, no ama naseam, vantung lalangte theampo awng TOPA pok vun!
22TOPA pok vun, ama ukna sung mun theampo ah a pian sak sate awng.
TOPA pok in, ka tha awng!

Psalm Late 104
Bitphuapa Pokna
1Ka tha awng, TOPA pok in, TOPA ka Pathian awng, nang na lian mama hi! Nangma in kumpi za le minthanna
2puan bangin na sil hi; nangma le nangma khuataang taw na kituam hi.
Vantungte tuipuan buk khat bangin na phal hi.
3Taciangin na inn sia tuite tungah na sa hi.
Meeikaai sia siphuleang in na zangh a, vui ii tha tungah na to hi.
4Hui sia kamtai in na zangh a, khualeng sia na naseamte in na zangh hi. *
5Simlei sia a tawdap ii tungah kho takin na phut a, a kikhiin ngei batu hi.
6Ama tungah tuipi sia puantual bangin na koi a, a tui in mualte a khum hi.
7Tuite na tei ciangin amate tai hi; na thupiakna aw hong zaak ciangin amate kinawm ngawp uh hi.
8Tua tuite sia mualte tung le luamkuamte sungah luang uh a, na see siat sa mun a zuan uh hi.
9Leitung a khup kik ngawl natu in a kan zawk ngei ngawl tu ngamngi na koi hi.
10Ciktuite luamkuam sungah na luang sak a, ngunte mualkawm ah na luang sak hi.
11Tuate in ngamsate atu tui pia a; tua munah ngam laate a dang cim uh hi.
12A hui ah a om thingkungte tungah vacimte in bu vawtin la sa uh hi.
13Mualte tungah van panin nguatui na puaksuk a, leitung in na thupha taw kidim hi.
14Khuite atu in lopa na po sak a mihingte zak tu in thingnote na po sak hi, tua taw ama in lo ante ciing thei a
15A lungdam natu in zu piang sak in, a thinnop natu in olive thau, a thahat natu in anluumte piang sak hi.
16Lebanon mual tungah TOPA ii a suan a neisa Cedar thingkungte in nguatui tam mama a nga uh hi.
17Tua munah vacimte in a bu vawtin, hilniangte in mang taakthing tungah a bu vawt uh hi.
18Sathakte in mualdawn saangte tungah teang a, ngalhvangte in liangte ah buu uh hi.
19Thate teptee natu in tha na bitphua hi; ni in a tum hun tu he hi.
20Nangma in zan na vawt a, khuazing sungah ngamsa theampo pusuak hi.
21Tawpi moite in sa a vai kawmin hawk uh a, Pathian piaksa an zong uh hi.
22Ni a sua ciangin amate a kua zuanin lum uh hi.
23Tasia ciangin mihingte in naseam tu in kuan a nitak mateng in na seam suak uh hi.
24TOPA awng, nangma in na tam mama na vawt zo hi!
Nangma in ciimna taw tuate theampo na vawt hi! Simlei sia na nganhingte taw kidim hi.
25A kisim zo ngawl nganhingte a lian, a no a ten khopna tuipi sia lianin zai hi.
26A tungah teambawte khualhaw a, a sungah na vawtsa tuipi nganhingpui Leviathan kimai hi. *
27Tuate theampo in an a kitaangsap uh ciang a pia tu in nang hong suang hi.
28Nangma in amate an na pia a, a ne uh hi; an na piak ciang amate a ngilva uh hi.
29Na nungngat ciangin amate lau uh a; a husanna na laak sak ciangin amate a thi uh hi, taciangin amate pianna leivui zuan uh hi.
30Ahihang amate hu na mop ciang a kibitphua uh hi; Nangma in leitung ah nuntakna thak na pia hi.
31TOPA minthanna a tawntungin kip tahen! Ama vawt sate tungtaang ah TOPA lungdam tahen!
32Ama in simlei en a, leitung a liing hi; ama in mualpite tham a, meikhu pusuak hi.
33Ka nuntak lai tawntung TOPA tungah la ka sa tu hi; ka nuntak laiteng ka Pathian tungah pokna la ka sa tu hi.
34Ka la sia ama in diksa tahen, banghangziam cile ka lungdamna sia ama kung pan hong pai hi.
35Mawneite leitung panin kilalcip sak tahen; mihing ngilote om nawn heak hen.

Ka tha awng, TOPA pok in!
TOPA pok in!

0 comments:

Post a Comment