Laithiangtho Dokna (Psalm 105-106)

1. Ama thupiak nate in ___atu ahi hi.
a. eima
b. Israelte
c. leitung bup

2 Joseph Egypt apai lai angawng ah___  hi.
a. apa ii piak puan
b. khii aw ngawl
c. Thikkol

3. ___ zawk ciang Jacob sia Egypt ngamah pai ziam?
a. A tapateng taw kimu
b. Joseph Thunei
c. A zino tu amu

4. Egyptte in Israelte banghang ngaimaw ziam?
a. Pathian ii vawt
b. Kiphasak
c. Athinpui

5. Kumpi inn sung ngangawn bang nganhing taw kidim ziam?
a. Ulol
b. Khamh
c. Ngitlona

6 Israelte Egypt anusiat ciang bang vom ziam?
a. Neakthei tatuam
b. Ngun le khamh
c. puan sil

7. TOPA ___ in atawntung in kip hi.
a. thupha in
b. vaangletna
c. hong itna

8. ___ah amate in Vaanglianbelpa leedo uh hi.
a. Senneal ngam
b. Sinai
c. San Tuipi

9. ___ pia ahihang tuate taw kikop in natna puak hi.
a. Doai biakna
b. Amate nget teng
c. Zaataakna

10. ___ah amate duhopna taw kidim uh hi.
a. Senneal sung
b. Jordan ngun
c. Sinai mual

11. Dathan sia lei in valh aa, ___ sia lei in huh cip hi.
a. Abiramte innkuan
b. Jehokim
c. Uriah

12. Mawnei ngawl ___ thalupna in ngam nin sak hi.
a. numeite
b. patangno
c. Thiampite

Psalm Late 105
Pathian le Ama Mite
(1Khang tangthu 16:8-22)
1TOPA tungah lungdam kona pia vun a, ama letna thang sak vun;
ama sep sate huvau minam tatuamte tungah son vun.
2TOPA tungah pokna la sa vun a;
a lamdang a vawt sa nate thu son vun.
3Ama neisa ih hi hu in lungdam vun;
ama a bia theampo in thin nuam tahen.
4Hu ngen tu in TOPA zuan vun a;
a kizom suakin ama bia vun.

5-6A naseampa Abraham suante, a teal sa Jacob suante awng,
Pathian ii na lamdang lakna in a septe ciamtee vun a,
A thukhen nate phawk vun.
7TOPA in ih Pathian hi a;
ama thupiak nate in leitung bup atu ahi hi.
8Ama in a thuciam sia a tawntung kholet tu a,
ama kamciamte khang tul dongin kip sak tu hi.
9Abraham taw thukimna a vawt sia le
Isaac tungah kamciam a vawt sia ama in kip sak tu hi. *
10A tawntung in a kho tu
thuciamna khat TOPA in Jacob taw vawt hi. *
11“Canaan ngam nang kong pia tu hi,
nangma neisa hi tu hi,” ama in ci hi.
12Pathian mite sia ciitawm a,
Canaan ngamah zin tang uh hi.
13Amate sia ngam khat pan ngam khat ah,
kumpi ngam khat pan ngam khat ah vak uh hi.

14Ahihang amate kuama ii zawthawk tu sia
Pathian in a oai bua hi; amate a dal natu in
Pathian in kumpipate tungah ki dop natu in hi bangin thu pia a: *
15“Ka teal sa ka naseamte susia heak vun;
ka kamsangte thutha heak vun,” ci hi.
16TOPA in amate ngamah kialpi tung sak a,
a an uh a vekpi in laakkeak sak hi. *

17Ahihang ama in salin a kizuak
Joseph a kici mihing khat amate mai ah paikhol sak hi. *
18Ama peangte thikkhau kithaak a,
thikkol sia a ngawng ah ki aw sak hi,
19Ama sonkhol thu a tangtun mateng in tabangin om hi.
Pathian kammal in ama sia maan hi ci in lak hi. *
20Tasia ciangin Egypt ngam kumpipa in ama tha a;
ngam ukpipa in ama suakta sak hi. *

21Ama in Joseph sia a ngam ukna teng lampui tu le,
a ngambup ukpa tu in koi hi. *
22Kumpipa ii uliante tung sia ah vaangneina,
kumpipa ngaisutna a piate ii tungsia ah thuneina pia hi.
23Tua zawkciang Jacob sia Egypt ngamah pai a,
tua ngam ah teang hi. *
24TOPA in a mite tungah ta tam mama pia a,
a ngalte sangin hat sak zaw hi. *
25Ama in Egyptte ii a mite a ngaimawk natu in vawt a,
a naseamte tungah theamna zangh sak hi.
26Tua zawkciang ama in a naseampa
Moses le ama tealsa Aaron paisak hi. *
27Amate in Pathian ii a vaanglian nasepte seam a
Egypt ngamah na lamdang laknate vawt hi.
28Tua ngam sungah Pathian in khuazing puak hi,
ahihang Egyptte in ama thupiakna a ni bua uh hi. *
29Ama in amate ngunte chisan suaksak a
amate ngasate theampo thatlum sak hi. *
30A ngambup sia ulolte taw kidim hi,
kumpipa inn ngangawn ulol taw kidim hi. *
'
31Pathian in thupia a, tho le thataa sia
ngambup sung hataak in a om hi. *
32Nguatui tang in ngialtang le khualeng
ama in amate ngam sungah a puak hi; *
33amate ii sapitnguite le theikungte lal sak a,
thingkungte theampo kuaitan hi. *

34Ama in thupia a khaumawte hong pai in,
a kisim zo ngawl mak tam mama pha uh hi:
35tuate in ngam sungah thingno lopa theampo khawngtum uh a,
lo ante theampo neak sak uh hi.
36Egypt ngamah innkuante theampo sungpan
tapa upa bel tek ama in thatlum hi. *
37Tua zawkciang ama in Israelte pusua pui a;
amate in ngun le kham a vom uh hi,
taciang amate a vekpi in ciidam in thahat uh hi. *
38Egyptte in amate kiita ahikom
amate ii a nusiat uh ciangin a lungdam uh hi.
39Pathian in a mite tungah meeikaai khat koi a,
zan in khuavak pia tu in meikuang khat pia hi. *

40Amate in ngen a, ama in vamim puak hi;
amate ngilva natu in vantung panin ama in an pia hi. *
41Ama in suangpi khat hongkeak a tui hong phul hi,
tua tui in senneal ngam sungah ngun bangin luang hi. *
42A naseampa Abraham tungah
a thiangtho kamciam a piak teng ama in ciamtee hi.
43Tua ahikom ama in a tealsa a mite pusuapui a,
amate in lungdamna taw la sa in au uh hi.
44Ama in midangte leitangh sia
amate tungah pia a, a lote tang sak hi. *
45A mihingte in ama thukhamte a nit natu le
a thupiakte a zui natu in tabangza in vawt ahi hi.
TOPA pok vun!

Psalm Late 106
TOPA ii A mite tungah A phatna
1TOPA pok vun!
TOPA tungah lungdamko vun,
banghangziam cile ama in pha a;
ama itna in tawntung in kip hi. *
2A vawt sa na liante theampo akua in son zo tu ziam?
Akua in a kicingin pok zo tu ziam?
3Ama thukhamte ni a, a tawntung in a maan a,
a ngamtate sia mihing lungdamte ahi hi.

4Na mite na hu ciangin kei hong phawk tan TOPA awng;
amate na suatak ciang kei zongh hong hel tan.
5Na mihingte khanto hong mu sak tan a,
na ngam ii lungdamnate
na mihingte ii lungdam angtan nate hong siim sak tan.
6Ka pute ii maw bangma in ko zongh ka maw zo uh hi;
kote in ngilo in ka khansia uh hi.
7Egypt ngamah ka pute in Pathian ii, na lamdang a sepnate tel ngawl a;
tam vei tak a itna a lakte amate in mangil hi,
taciangin San Tuipi ah amate in Vaanglianbelpa leedo uh hi. *

8Ahihang ama in a kamciam sa bangin
amate a vaanglet thahatna a lak natu in suatak pia hi.
9Ama in San Tuipi tungah thupia a,
tua tuipi kang hi;
ama in a mite leiko tung tawnin tuipi a kantan pui hi. *
10A ensante khut sung panin amate hun a;
a ngalte khutsung panin amate suatak hi.
11Ahihang a ngalte ahile tuitaa siat a
khat zongh a kikhe bua uh hi.
12Tasia ciang a mite in
ama kamciam um in ama tungah pokna la sa uh hi. *

13Ahihang amate in ama sep sa teng mangil pai uh a,
ama ii ngaisut piakna ngak ngawlin ngamta uh hi.
14Senneal sungah amate duhopna taw kidim uh a,
Pathian ze-et uh hi;
15tua ahikom amate nget teng ama in pia hi,
ahihang tuate taw kikop in
a kiitak huai mama natna khat amate sungah puak hi. *
16Tua senneal ngam sungah
Moses le TOPA ii a thiangtho naseampa Aaron a eang uh hi. *

17Tasia ciang lei kihong in, Dathan sia lei in valh a,
Abiram le a innkuanpuite lei in huhcip hi;
18a nungzuite tungah meikuang paisuk a,
tua mihing ngilote haltum hi.
19Amate in Sinai ah kham khuitalno khat vawtin
tua milim bia uh hi;
20amate in Pathian minthanna sia
lopa a ne nganhing khat ii lim taw theak uh hi.

21Amate in Egypt ngam sungah
na lian mama a vawtna taw amate a hun Pathian mangil uh hi.
22 Tua munah ama in bangza ta in a lamdang nate vawt ziam!
San Tuipi ah ama in a lungman huai liang nate vawt ziam! *
23Pathian in a mite a lal sak natu a pau ciangin
ama teal sa a naseampa Moses in Pathian mai ah dingin
a thin uukna taw amate a lalcip sak natu panin khaam hi.

24Tua zawkciang amate in tua ngamnuam nolh uh hi,
banghangziam cile amate in Pathian kamciam a um bua uh hi. *
25Amate in a tuipuan buk sungah om in phun uh a,
TOPA aw a ngai nuam bua uh hi.
26Tua ahikom ama in amate sia
senneal ngam sungah a thi sak natu ahizong
27 a suan a paalte Pathian he ngawlte kawm ah a kithethaang sak natu ahizong,
ngamdang ah a thi sak natu ahizong a ciliap huai hilkholna khat pia hi. *
28Taciang Peor ah Pathian mihingte in Baal biakna pawm uh a,
nuntakna a nei ngawl pathian tungah a kipia sangaw biak piaknate ne uh hi. *

29Amate in a ngamtatna uh taw TOPA thin uukna toklo sak uh a,
a kiitak huai natna khat amate sungah hong piang hi.
30Ahihang Phinehas dingto in a mawte daan pia hi,
tasia ciang pul natna hong thai hi.
31Hi thu sia ama minphat natu in tua hun pan kipan kiciamtee a
hong pai lai tu hun theampo sung zongh ah kiciamtee tu hi.
32Meribah ciktui ah tua mite in TOPA thin uuk sak uh a,
amate hu in Moses in ngim nga hi. *

33Amate in ama a thin siat natu in vawt ahikom
ngaisun phot ngawlin ama pau tan hi.
34TOPA thupiak bangin
amate in Pathian he ngawlte a mon bua uh hi, *
35tabang ci thada amate taw nupa in kiteang uh a, amate Pathian nei ngawlte biaknate zui uh hi.
36Pathian mite in milim bia uh a, hi thu in amate lalna a piang sak sia ahi hi.

37Amate in a tapate a tanute sia
Canaan milimte tungah sangaw biakpiakna in nei uh hi. *
38Tua mawnei ngawl patangno numeinote amate in thatlum uh a,
tua tual kithana in ngam nin sak hi. *

39A ngamtatna uh taw amate le amate kinin sak a
Pathian tungah a thumaan bua uh hi.
40Tua ahikom TOPA sia
ama mite tungah thin uukin, ama mite tungah ka thasiat sua hi. *
41Pathian he ngawlte ii khut sungah ama in amate nusia a,
a ngalte in amate uk uh hi.

42Amate sia a ngalte in zothaw a,
a uk bang po a vawt tu in amate khutnuai ah om uh hi.
43Tamvei ma TOPA in a mite suatak hi,
ahihang amate in ama leedo tu teal zaw ahikom
amate in mawna sungah a thuk zaw va-ial in taaksuk uh hi.
44Ahizong amate ii a biapui ciangin TOPA in za a,
amate dongtaw nate mu sak hi.

45Amate atu in a thuciamna phawk a,
ama itna lianpi hu in amate mai sak hi.
46Amate a vawtsia theampote,
ama in amate tungah hesuakna thin nei sak hi.

47Hong hun tan, TOPA ko te Pathian awng,
minam tatuamte sung panin,
nang tungah lungdam kong ko thei natu le
na min thiangtho kong pok thei natu in, hong kaikhawm kik tan. *
48Israel Pathian, TOPA pok vun;
tu le a tawntungin ama pok vun!
A kuama theampo in “Amen!” ci tahen.
TOPA pok vun!

0 comments:

Post a Comment