Laithiangtho Dokna (Samuel Khatna 29-30)

1. Philestine ngalkap theampo koisung ah kikaikhawm ziam?
a. Sinai
b. Jericho
c. Aphek

2. Israelte koi sung ah ngiaphual saat ziam?
a. Sinai
b. Samaria
c. Jezreel

3. David le apawlte sia Philestine le Israel akisim tu ciang koisung om ziam?
a. Hebron
b. Philestinete nung
c. Ziklag

4. Philistine ngalkapmangte in Achish tung ah akua taw kisai thinuk ziam?
a. David
b. Saul
c. Joab

5.  Philistine kumpi bangza in David sang thei ngawl ziam?
a. 3
b. 4
c. 7

6. Achish in David sia akua taw tengat ziam?
a. Vantungmi
b. Tuuno
c. A bete khat taw

7. David le apawlte ___ pan Ziklag dong ni nii hai hi.
a. Samaria
b. Gath
c. Aphek

8. David le apawlte Philestinete kung akuanlaan akuate na Ziklag sim ziam?
a. Philestinete
b. Egypte
c. Amalekte

9. A innkuanpuite sila in akikaih ciang David tung alawmte in ___ hi.
a. Ngalsim tuh in kunh
b. Denlup sawm
c. langzazan

10. David in bangbangh kithoai in Pathian thudongh ziam?
a. Ephod silh
b. Puantual kang
c. Khauip puansilh

11. Amalek te ii nusiat sila patangno sia akuate ziam?
a. Benjaminte
b. Egypte
c. Philestinete

12. David in angalvan matte akuate kimhawm sak ziam?
a. Judah lampuite
b. Minam lampuite
c. Ngalkap lampuite

Samuel Khatna 29
Philistinete in David Nial

1Philistinete in a ngalkapte theampo Aphek ah hong paipui uh a, tua laitakin Israelte sia Jezreel Kuam sung cik ah ngiaphual saat uh hi.  2Philistine kumpipa ngate amate ngalkap tek a za pawl, a tul pawl taw kuan uh hi; David le a mite a nungsang pan kumpipa Achish taw kuan uh hi.  3Philistine ngalkap maangte in amate mu uh a, “Hi Hebrewte hi sungah bang hong hi ziam?” ci uh hi.
 Achish in, “Hi sia David hi, Israelte Kumpipa Saul ii ulian khat hi. Tu in ama sia kei taw khua ngeipi ka omkhawm zo uh hi. Ama kei kung hong zot pan kipan a sep a vawt ka maw sak natu bangma mu ngawl khi hi,” ci in zo hi.

  4Ahihang Philistine ngalkap maangte in Achish tungah thin uuk uh a, ama ii munah, “Na mihing pa na piak sa khuapino ah heak sak kik in. Ngal kidona phual ah ei taw hong omkhawm sak heak in; ama ei hong leedo kik na meal kihe ngawl hi. A topa ii maipha a nga kik natu ih mihingte ii thina sangin a pha zaw dang bang om ziam?  5A khakbel in, ama sia David hi a, numeite in laamin la sa a, ‘Saul in a tul a tul in that a, David in a tulsawm, a tulsawm in that hi,’ a ci pa, hi ngawl ziam?” ci uh hi.  *

  6Achish in David samin, ama munah, “Israelte ii a nungta Pathian taw kiciam hi tong, nang sia kei tungah hong thumaan ni hi; hi kodona sungah kei taw kikop in ngal hong sim pui lete uuk khi hi. Kei kung nong zot hun pan kipan nang tungah mawna kong sot tu bangma om ngawl hi. Ahihang kumpi dangte in nang hong saang thei ngawl hi.  7Tua ahikom inn ah thin nuam takin cia kik tan a, amate ii dik sak ngawl tu bangma vawt heak in,” ci hi.
  8David in zo a, “Bang ka sep khial om ziam, topa awng. Na ci bangin nang kung kong zot a kipan na na ka sepna sungah sep khial vawt khial nei ngawl ka hile, nang taw kithua in pai in, nang ka topa le ka kumpipa atu na ngalte hong do sak ngawl tu khi ziam?” a ci ciang,
  9Achish in, “Na ci teng thukim khi hi, nang sia Pathian vantung mi khat bangin thumaan takin hong panpui ci in kong ngaisun hi. Ahihang kumpipa dangte in nang sia ko taw kuan khawm thei ngawl tu hong ci hi.  10Tua ahikom David awng, Saul nusia a, kei kungah hong pai note theampo sia zing thopal in khua hong vak po ciang nong nusiat uh kul tu hi,” ci hi.
11Tabangin David le a mite, a khuavak ni zing tuungin Philistia ah heak kikin, Philistinete sia Jezreel ah pai uh hi.

Samuel Khatna 30
Amalekte taw Kidona
1Ni nii zawkciang David le a mite Ziklag theng kik uh hi. Amalekte in Judah ngam thang sangah ngalnguk taw sim a, Ziklag sim uh hi. Amate in a khuapi haltham a,  2numei teng manin, kuama that ngawl ahihang a nusiat uh ciang a kuama theampo paipui uh hi.  3David le a mite hong thet uh ciang, a khuapi kihal tham sa in na om a, a zite, a tapate, a tanute kiciapui siat sa in mu uh hi.  4David le a mite kakap in, a tha uh a bo sitset dong tawp ngawl uh hi.  5David ii zite ahi Ahinoam le Abigail ngangawn ciapui sak uh hi.  *

  6David sia tu in a thin ngim mama hi, banghangziam cile a mite a vekpi in a zite a tate a taan hu in a thin uh na na mama hi, taciangin amate in David suangtum taw den lup tu in tawng hi; ahihang TOPA Pathian in ama thinletna pia hi.  7David in Ahimelech ii tapa thiampi Abiathar munah, “Ephod sia hong la tavun,” ci a, Abiathar in paipui hi.  *  8David in TOPA tungah, “Tua ngalnguk seamte ka del tu ziam? Del leng ka pha tu ziam?” ci in dongh hi.
 Ama in zo a, “Del in; amate pha tu ni hi, amate zongh suatak tu ni hi,” ci hi.
  9Tua ahikom David le mihing zaluk teng kipan in, Besor Lui a thet uh ciangin amate pawlkhat tua munah taam hi.  10David in mihing zali taw paisuk a; a dang zanii teng lui kan tu in toi lei ahikom nungah taam uh hi.  11David taw a kithua mite in Egyptte patangno khat ngam sungah mu uh a, David kungah paipui uh hi. Amate in an le tui pawlkhat pia uh a,  12thei nga ngawm pawl khat le sapit bom nii pia uh hi. An a neak zawkciang a tha hong hat kik hi; ama in an ahizong tui ahizong a neak ngawl zawk ni thum hi zo hi.  13David in, “Na topa akua hi a, koisung pan hong pai ni ziam?” ci in dongh hi.
 Ama in, “Kei Egyptte ka hi a, Amalekte khat ii sila ka hi hi. Ka topa in tunung ni thum lai in ka ciina ahikom hong nusia hi.  14Chereth te ngamkhen Judah ngam thangsang le Caleb ii suante ngamkhen tengah ngalnguk ka sim uh a, Ziklag ka hal tum uh hi,” ci in zo hi.
  15David in,“Tua ngalnguk seamte kungah nong paipui tu ziam?” ci in dongh hi.

 Ama in, “Nong thalup ngawl natu le ka topa kungah nong aap kik ngawl natu Pathian taw kamciam hong pia po leute, hong paipui tu khi hi,” ci hi.  16Taciang ama in David sia amate sangah paipui hi.

 Amate sia Philistia le Judah ngam pan a phul uh vanh le mihing tam mama te hu in poai khaam uh a, an ne, zu dawn in, mun theampo ah kithethaang uh hi.  17A khuavak ni zing tuungin David in sim a, nitak dong kido uh hi. Kalauh tungah to in a tai khangno zali sim ngawl kuama a suakta om ngawl hi.  18David in Amalek te ii laak sa na theampo le ama zite nii dongin hunkhia a;  19bangma a sumsi om ngawl hi. David in a mite ii tapate, tanute le Amalekte ii laak theampo nga kik hi.  20Ama in tuu hon le khui honte zongh nga kik a; a mite in amate mai ah hawl uh hi, taciang, “Hite sia David ii neisa hi,” ci uh hi.
  21Tua zawkciang David in Besor Lui ah tha zawmcip in a taam zanii te kungah heak kik hi. Amate in David le a mihingte nasia takin vaidawn tu in hong pai a, taciang David zongh in pai a nasia takin amate nukset hi.  22Ahihang mihing mannung ngawl thutuat sel pawlkhat in, “Amate ei taw hong kuan khawm ngawl ahiciang, ih vanh ngate hawm ngawl tu hi, amate in a zite le a tate la in cia thei tu hi,” ci uh hi.

  23Ahihang David in, “Ka suapuite awng, TOPA ii hong piak vanhte tungtaang ah tabangin ngamta thei ngawl tu nu hi. Ama in suatakna taw hong keam a, ngalnguk seamte tungah zawna hong pia hi.  24No ii ci bang sia kuama in hong thukim pui ngawl hi! Ih vekpi in a om babang hawm tu hi; phualcing a omte zongh, ngalphual ah a kuante nga za ma nga tu hi,” ci in zo hi.  25David in hi sia thuthun in nei a, Israel ngam ah tua hun pan kipan kizangh tan hi.
  26David in Ziklag ah hong heak kik ciangin, ama in ngalte vanh a laakte pawlkhat sia a lawmte ahi Judahte lampuite munah hi kammal teng taw thaak hi. “Hi sungah TOPA ii ngalte vanh ka laak uh te letsong in hong thaak khu hi.”  27Ama in tua letsongte sia Bethel a mite tungah, Judah thangsang ngam a om Ramah mite tungah, khuapino Jattir,  28Aroer, Siphmoth, Eshtemoa,  29le Racal; Jarahmeel be le phungte tung, Ken mite tung,  30khuapino Hormah, Borashan le Athach,  31le Hebron khuapite ah a teang mite tungah thaak hi. Ama in ama le a mite vakotna mun theampo ah thaak siat hi.

0 comments:

Post a Comment