Laithiangtho Dokna (Samuel Niina 1-2)

1. Saul ii thi thu a son khangnopa akuate ziam?
a. Philestine
b. Amelekte
c. Saul ngalvan puapa

2. Saul thi thu ako pa in, Saul ii ___ le hak sia David puak hi.
a. naamsau
b. kumpi lukhu
c. teipi

3. Saul te pata le Israel athite hang David le amite ___ hi.
a. ni thum an ngawl
b. mualtung kaato in kap
c. ni khat an ne ngawl

4. Saul kathat akicipa sia akua hang in thi ziam?
a. Joab
b. David ngalkap khat
c. Ama hang in

5. Saul le Jonathan atu kaatap late sia akute tung ah kihilsawn ziam?
a. Judahte
b. Israelte
c. David nungzuite

6. Saulte pata thi hang in akuate lungdam tu David in uk ngawl ziam?
a. Palestine numeite
b. Judahte
c. Amalekte

7. Hebron sia akua ii sawlna taw David in la ziam?
a. Israel
b. TOPA
c. Judahte

8. David sia kumpi in akuate in sathau noai ziam?
a. Elijah
b. Judahte
c. Thiampi Zadok

9. Ishbosheth taw Jordan Ngun kantan in atai sia akua ziam?
a. Joab
b. Abishai
c. Abner

10. Ishbosheth kumpi in akoipa sia bangna seam ziam?
a. Thiampi
b. Ulian
c. Ngalkapmang

11. Judahte nguak David in kum bangza uk ziam?
a. Sali le lang
b. Thum
c. Sawmli

12. Sazuk bangh in atai ngang pa akua ziam?
a. Asahel
b. Abishai
c. Abner 


Samuel Niina 1
David in Saul ii Thina thu za
1Saul ii thi zawkciang, David sia Amalekte a zawna pan hong cia a, Ziklag ah ni nii taam hi.  2A khuavak ni ciangin khangno khat Saul ii ngiaphual panin hong theng hi. A khuangai a lak natu in ama in a puante eaukeak in a lu tungah leivui kipoai hi. Ama in David ii kungah pai in, zatak piakna in lei ah bok hi.  3David in,“Koisung pan hong pai ni ziam?” ci in dongh hi.
 Ama in, “Israelte ngiaphual pan hong suakta khi hi,” ci in zo hi.
  4“Bang thu teng piang ziam hong son tan,” David in ci hi.
 “Ih ngalkap honte ngalphual panin taikeak hi, taciang ih mite tam ma kithatlum hi. Saul le a tapa Jonathan zongh kithat hi,” ci hi.
  5“Bangbangin Saul le Jonathan thi hi ci in he ni ziam?” ci in David in dongh hi.
  6Ama in, “Kei sia Gilboa Mualvum tungah ka om luilam a, taciang Saul sia a tei neal in om hi, taciang ngalleang le siphu ngalkapte in ama neak va-ial zo uh hi.  *  7Tasia ciang ama hong kiheak a, kei hong mu in hong sam a, ka zo hi.  8Ama in kei sia kua ka hi hong dongh a, Amalek mi ka hi hi, ci in ka son hi.  9Tasia ciang ama in, ‘Hong pai tan a, hong that tan, kei sia nasia takin liam zo a, a thi tu hi zo khi hi,’ hong ci hi.  10Tua ahikom ama kung ka zuan a, ka that hi, banghangziam cile puksuk po le ama sia a thi tu hi veve hi ci in ka he hi. Tua zawkciang, ama lu tung pan a kumpi lukhu le a baan tung pan a hak ka la a, tuate nang hong puak khi hi, topa awng,” ci hi.
  11David khuangai in a puan eaukeak a, a mite zongh in tabangma in ngamta uh hi.  12Amate in khuangai in mau in, Saul le Jonathan le Israelte TOPA ii mite ngalphual ah tam ma kithat ahikom, nitak dong an tang uh hi.
  13A thu hong puak khangno pa sia, “Nang koisung pan ni ziam?” ci in David in dongh hi.
 Ama in “Kei Amalekte ka hi a, ahizong nangma ngam sungah ka teang hi,” ci in zo hi.
  14David in dongh thua a, “Banghangin TOPA ii teal sa kumpipa that ngam ni ziam?” ci hi.  15Taciang, David in a mite khat samin, “Hi sia pa that in!” ci in sawl hi. Tua pa in Amalek pa vaatin thatlum hi.  16David in Amalek pa tungah, “Hi thina sia nangma le nangma kisuan ni hi. TOPA ii kumpipa in a teal sa khat ka thatlum na ci hu in nangma le nangma nilkhiat thuak ni hi,” ci hi. 
David in Saul le Jonathan Kaatap
17David in Saul le a tapa Jonathan hi bangin kaatap a,  18tasia Judah mite tungah hil sawn tu in thu pia hi. ( Jashar Laibu  sungah kikhum hi.)  *
 
19“Israel mual tungah ih lampuite thi zo!  Ih ngalkap sung pan a hang bel teng kia zo!

20Gath ah taangko heak vun, ahibale  Ashkelon lampi liante ah taangko heak vun.
 Philistia numeite lungdam sak ba tawng;
 Pathian nei ngawlte tanute lungdam sak ba tawng!

21“Gilboa mualte tungah nguatui le daaitui kia heak vun;  a lote ko ngawtaak tawntung tahen!
 Tua munah a hangsan te ii lum sia mindaina taw liik a;
 Saul ii lum sia sathau taw kitee sak nawn ngawl hi.

22Jonathan ii thal sia thi theina hi a,  Saul ii namsau in hesuakna sel hi,
 a thahat te vaat vawk a, ngalte thatlum hi.

23“Saul le Jonathan, taza in lamdang in it huai,  a nunna ah nungta khawm, a thina ah thi khawm;
 muvanlaite sangin zuan ngang zaw, tawpi te sangin hat zaw.

24“Israel a numeite awng, Saul kaatap vun!  ama in puan san hoi hong silh sak a,
 suang manphate le kham taw hong zeam hi.

25“Ngalkap hangte puk zo a,  amate ngalphual ah kithatlum uh hi.
 Jonathan sia mual tungah thi in lum hi.

26“Nang atu in khuangai khi hi, ka suapui Jonathan awng;  bangza in kei atu in it huai ni ziam!
 Nang nong itna kei atu, bangza in lamdang ziam,
 Numeite ii itna ngangawn in dem zo ngawl hi.

27“Ngalkap hangte liik siat zo a,  a ngalhiam uh te manna sel in kinusia hi.”

Samuel Niina 2
David Judah Kumpipa in Kikoi
1Hisia zawkciang David in TOPA dongh a, “Judahte ii khuapinote khat a uk tu in la in ka pai tu ziam?” ci hi.
 “Pai in,” ci in TOPA in zo hi.  “Koisung a sia ziam?” ci in, David in dongh hi.
 TOPA in, “Hebron” ci hi.  2Tua ahikom David in Hebron ah a zite nii ahi Jezreel pan a zi Ahinoam le Carmel pan Nabal ii meingongnu Abigail te kengin pai hi.  *  3Ama in a mihingte le tuate ii innkuanpuite zongh paipui in, Hebron kiim a khuapinote ah teang uh hi.  4Tua zawkciang Judah a mite hong pai in David sia Judahte ii kumpipa tu in sathau noai uh hi.  *
 Gilead ngam Jabesh mite in Saul phum hi ci in David in a zaak ciangin,  5ama in mihing pawlkhat pai sak a, kam puak sak hi. “Na kumpipa tungah thumaanna na lak uh a, na phum uh hu in TOPA in thupha hong pia tahen.  6Tu in TOPA sia no tungah hong dikin hong thumaan tahen. Na nasepna te uh hu in kei zongh no pha takin hong vawt tu khi hi.  7Hat vun a, hang vun! Saul, na kumpipa uh sia thi zo a, Judah mite in kei sia a kumpipa tu in sathau hong noai zo hi,” ci hi. 
Ishbosheth sia Israel Kumpipa in Kikoi
8Saul ii ngalkap hon ukpipa Ner ii tapa Abner sia, Saul ii tapa Ishbosheth taw Jordan Ngun kantan in Mahanaim ah tai uh hi.  9Tua sungah Abner in Ishbosheth sia Gilead, Asher, Jezreel, Ephraim, Benjamin ngamkhen hi teng ii kumpipa in koi a, a tatak in Israel ngam buppi uk ahi hi.  10Israelte ii kumpipa tu in a kikoi hun in, ama sia kum sawmli pha a, taciang ama in kum nii sung uk hi.
 Ahihang Judah minamte in David tungah thumaan uh a,  11taciang ama in Hebron panin Judahte kum sali le kum lang sung uk hi. 
Israelte le Judahte Kilaklaw Ngal om
12Abner le Ishbosheth ii uliante Mahanaim pan Gibeon khuapi ah pai uh hi.  13Zeruiah ii tapa Joab le David ii ulian dangte in amate taw ningh khat ii kungah kisii uh hi, amate in tua munah pawlkhatte ningh ii lang khat ah to in, pawlkhat te ningh ii a ngal langkhat ah to hi.  14Abner in Joab munah, “Eima sang tek panin khangnote pawlkhat veve sawlin kido kidem sak tawng,” ci hi.
 Joab in, “Hi ma hen,” ci hi.
  15Tua ahikom Ishbosheth le Benjamin namte taangin mihing sawm le niite, le David mihing sawm le niite kido uh hi.  16Misim in a ngal tek sia a lu uh pan kizamh in, namsau taw kihol a, mihing kul le li sia pukin thi siat uh hi. Tua ahikom Gibeon ah tua mun sia, “Namsau Lo” kici hi.
  17Tua zawkciang kidona nasia mama khat hong nei uh a, David ii mite in Abner le Israelte zothal uh hi.  18Zeruiah ii tapate thum tua sungah kihel hi: Joab, Abishai, le Asahel ahi uh hi. Asahel sia a kii mama sazuk bangin a tai ngang a,  19Abner a tangtan in del hi.  20Abner in nung lee et kik a, “Hong del sia nangma Asahel ni ziam?” ci hi.
 Ama in “Hi khi hi,” ci in zo hi.
  21Abner in, “Kei hong del heak in. Ngalkapte that in a, a nei po laak sak in,” ci hi. Ahihang Asahel in ama del tan lai hi.  22Khat vei ma Abner in, “Hong del heak in. Banghang nang hong thatlum sak hamtang tu ni ziam? Tabang hi leng bangbangin na suapui pa Joab maitang en ngam tu khi ziam?” ci hi.  23Ahihang Asahel in a tawlnga nuam bua hi; tua ahikom Abner in a tei taw a nungsang a khaw le Asahel ii ngil panin kha a, a nungah pailet hi. Asahel pukin thi hi, taciang tuak a lupna mun ah hong pai peuma in tawlnga in en uh hi.
  24Ahihang Joab le Abishai in Abner ii nung hong zuizen uh a, ni tum ciangin Giah ngam ii nisuana sang, Gibeon dui paina lampi tung Ammah mual hong theng hi.  25Benjamin mite in Abner ii kiim ah hong kikhawmtua uh a, mual khat ii tungah ngal nanna mun la uh hi.  26Aner in Joab oksan a, “Tawp hun nei ngawlin kido tan tu hi ziam? A khakbel ciang thin lalna sim ngawl bangma dang taang nawn ngawl tu ci in mu thei ngawl nu ziam? Ko sia na ngam mipuite khu hi. Na mite munah ko hong del a tawp natu thu na piak tu bangtan vei hai tu ziam?” ci hi.
  27Joab in zo a, “Pau ngawl hi thong lete ka mite in zingsang khuavak dong hong del tu hi, ci in a nungta Pathian taw kiciam ngam khi hi,” ci hi.  28Tua zawkciang Joab in, Israelte a del teng a tawp natu in lemle tum hi, tabangin kidona tawp uh hi.
  29Abner le a mihingte sia Jordan Kuam dungah zankhua in pai uh hi; amate Jordan Ngun hong kantan uh a, a zingsang kik dong pai suakin, Mahanaim hong theng kik uh hi.
  30Joab in ngal del a tawp zawkciang a mite a khoptua le Asahel kihel ngawl a kingawmin mihing sawm le kua kisamh hi.  31David ii mihingte in Benjamin nam Abner ii mihingte 360 that uh hi.  32Joab le a mite in Asahel luang la in, Bethlehem khua a innkuan ii thaan ah phum uh hi. Taciang zankhua in pai a, zing khuavak bek in Hebron hong theng kik uh hi.

0 comments:

Post a Comment