Laithiangtho Dokna (Samuel Niina 3-4)

1. Hebron ah a suak hi David in tapa bangza ziam?
a. 3
b. 6
c. 9

2. Abner in Ishbosheth tung ah banghang thinso ziam?
a. Nguta ci'n ngaw
b. A Pa Zino Taw Mawsuan
c. Daatham sa

3. David Abner tung ah akua taw hong pai tan ci ziam?
a. Michal
b. Ishbosheth
c. Thiampi puan

4. Akua bangmama alaw ngawl natu David kamciam ziam?
a. Thiampi zadok
b. Abner
c. Joab

5. Joab in ___ sam kik in athalup sawm thu David in heakpui ngawl hi.
a. Jonathan tapa
b. Ishbosheth
c. Abner

6. David in akua haamsiat ziam?
a. Abner
b. Joab
c. Ishbosheth

7. Ishbosheth in ulian bangza nei ziam?
a. Khat
b. Nii
c. Sali

8. Naukeamnu in taaksua aa, apeanglang azaw sia akua ziam?
a. Mephibosheth
b. Ishbosheth
c. Jonathan

9. Ishbosheth sia akuate ii thalup hang in thi ziam?
a. Philestinete
b. A uliante nii
c. Abner

10. Rechab le Baanahte in David bangpuak ziam?
a. Kham le nguun
b. Thiampi puan
c. Ishbosheth ii luting

11. Ishbosheth thi hang in David ___ hi.
a. in khansuang phut
b. lungdam ngawl
c. lungdam

12. Ishbosheth thi hang in, akuate khut le peang kitan sak ziam?
a. Moab tangvalpa
b. A upate nii
c. Philestinete

Samuel Niina 3
1Saul ii baangkua sang a pangte le David ii baangkua sang a pangte ii kidona khua hong ngei hi. David sia hat va-ial a, a ngalte thazawm va-ial hi. 
David ii Tapate
2Hebron ah a suak hi David ii tapa luk teng sia a pian kum zui in: Amnon, a nu sia Jezreel panin Ahinoam hi;  3Chileab, a nu sia Carmel panin Nabal ii meingong nu Abigail hi; Absalom, a nu sia Geshur a Kumpipa Talmai ii tanu Maacah hi;  4Adonijah, a nu sia Haggith; Shephatiah, a nu sia Abital;  5Ithream, a nu sia Eglah hi. Hi tapate theampo sia Hebron ah piang siat uh hi. 
Abner in David Pawm
6David ii ngalkapte le Saul ii baangkua tungah a thumaante a kido tato uh ciang Saul ii nungzuite sung pan Abner sia hong thahat va-ial hi.
  7Ni khat ni in Saul ii tapa Ishbosheth in Abner sia Saul ii zino Aiah ii tanu Rizpah taw lumkhawm hi ci in mawsuan hi.  8Hisia in Abner ii thin so sak hi. “Saul leeheak tu in hong um ni ziam? Judahte atu na a seseam hong sa takpi ni ziam?” ci in au ngawp hi. “A kipat ciil pan kipan na pa Saul tungah, a suapuite tungah, a ngualtamte tungah thumaan khi hi. David ii hong zaw natu pan zong hong hun khi hi; ahizong tuni in numei khat huvau in ka maw natu hong zong ni hi!  9-10TOPA in David munah kamciam pia a, ama in kumpi ukna sia Saul le a suan a paalte tung pan la in, David sia Israel le Judah ii kumpipa suak sak tu hi, a ngam mong langkhat pan a mong langkhat dong uk tu hi. Tu in hi thu sia a tangtun natu in ka seam bale Pathian in hong saatlum tahen!” ci hi.  *  11Ishbosheth in Abner kiita leilam ahikom kam khat zongh pau ngam ngawl hi.
  12Abner in hi hun a Hebron ah a om David kungah kamtai pai sak a, “Akua in hi ngam hi lei uk tu ziam? Keima taw thukimna khat hong vawt tan, taciang Israel bup nangma sangah na nga natu kong hu tu hi,” ci sak hi.
  13David in, “Pha hi! thukimna nang taw hong vawt tu khi hi, ahihang thu khat na khuangkhim sak ciang bek hi tu hi, kei taw kimu tu nong pai ciang Saul ii tanu Michal hong keng tu ni hi,” ci hi.  14David in Ishbosheth tung zongh ah kam thaak a, “Ka zi Michal hong pia kik tan, ama ka tenpui natu in Philistinete ii vunteap zakhat taw ka lei sa hi,” ci hi.  *  15Tua ahikom Ishboseth in Michal sia Laish ii tapa, a pasal Paltiel kung panin la kik hi.  16Paltiel in kap kawmin Bahurim khua dong zui hi. Ahihang Abner in, “Inn ah cia tan,” ci a, ama cia hi.
  17Abner sia Israelte lampuite munah pai in hi bang ci hi, “Khua ngeipi ma David sia na kumpipa tu in na dei uh khua ngei zo hi.  18Tu in hi sia no atu hun pha hi. TOPA in hi bang a ci sia ciamtee vun, ‘Ka naseam pa David ka zangh tu a, ama in Israelte sia Philistinete le a ngaldangte theampo kung panin hunkhia tu khi hi,’ ” ci hi.  19Abner in Benjamin namte kung zongh ah pai a, tua zawkciang Hebron ah Benjamin namte le Israelte ii thukimna teng David munah son hi.
  20Abner in Hebron, David kungah mihing kul taw hong pai ciangin David in amate atu poai vawt sak hi.  21Abner in David munah, “Tu in ka na pai tu a, Israel buppi nang sangah pang tu in ka vawt tu hi, Kumpipa awng. Amate in nang sia kumpipa in hong saang tu hi, taciangin nangma in na dei teng na nga siat tu a, ngam buppi na uk tu hi” ci hi. David in Abner sia kuama ii bangma a law ngawl natu kiciamna kho pia in pai sak hi. 
Abner Kithatlum
22A zawkciang, Joab le David ii ulian dangte ngalnguk vawtna pan hong cia uh a, a suutol uh vanh tam mama hong ciapui hi. Abner sia tua mun Hebron ah David taw a om nawn bua hi, banghangziam cile David in ama sia suatakna kiciamna kho taw tha hi.  23Joab le a mite hong thet uh ciangin Abner sia David ii kungah a paina thu le suatakna kiciamna kho taw a kipai sak thu ama tungah kison hi.  24Tua ahikom Joab sia kumpipa kungah pai in ama mun ah, “Bang vawt thong ni ziam? Abner nang kungah hong pai ci leang, banghangin tabangin paikhia sak ni ziam?  25 Ama hi sungah hong pai sia nang hong theam tu, na sep na vawt theampo le na paina theampo hong kan tu in hong pai hi. Tasia he buang hi ngawl ni ziam?” ci hi.
  26David a nusiat zawkciang Joab in Abner sam kik tu in, kamtai pai sak a, taciang amate in Sirah tuikhuk panin ama hong ciapui kik hi; ahihang David in bangma heak pui ngawl hi.  27Hebron ah Abner hong thet ciangin, Joab in kongpi ah a tuam in paipui a, ama nguak taw thu son tu bangin thoai in, tua munah a ngil pan naam taw tuum hi. Tabangin Abner sia kisuamlum hi, banghangziam cile ama in Joab ii suapui Asahel thalup sak hi.  28David in tua thu a zaak ciang, “TOPA in kei le ka uk sung mite Abner kisuam lupna tungtaang ah bekcik zongh maw ngawl hi ci in hong he hi.  29Tua hu in daan piakna Joab le a baangkua in thuak tahen! Khangsim in a baangkua sungah nu le pa omkhopna pan a piang natna a vei khat veu om tahen a, a phaak khat, ahibale numei nasep teng a seam thei bek khat veu om tahen, tua ahibale zong ngal sungah thi in ahibale an neak tu nei ngawl veu om vaciat tahen!” ci hi.  30Tabangin Joab le a suapuipa Abishai in amate ii suapuipa Asahel Gibeon kidona a thi sia ii phu lam uh hi. 
Abner Kiphum
31Taciang David in, Joab le a mite a puan uh eaukeak a, khau-ip puan silhin, Abner hangin a tau tu in thu pia hi. Taciang thi vuina ah Kumpipa David ama mama mithi kuang nung pan zui in pai hi.  32Abner sia Hebron ah kiphum in, kumpipa sia a ngingin a thaan ah kap a, tabangin midangte theampo zongh kap uh hi.  33David in hi kaala Abner sak hi:
 “Banghangin Abner sia a mamaw pa bangin thi ziam?

34A khut te zongh kiletheen ngawl hi,  a peangte zongh kisawm ngawl hi;
 Ama sia kumpi thukham paltante bangin kithat hi!”
Taciang mipite in ama kaa kik uh hi.
  35Nitangtum in mipite hanciam in David in bang khat po ne sak nuam ahihang ama in ciliap huai kamciam vawt hi, “Ni tum maa in neak khat po ka nei le Pathian in hong vaatlum tahen!” ci hi.  36Amate in hi thu sia ciamtee in a lung uh kim mama uh hi. A tatakin, David ii vawt theampo in mipite lungdam sak hi.  37David ii a mite le Israel mihingte in Abner kisuamlupna vai ah kumpipa sia kihel ngawl hi, ci in he uh hi.  38Kumpipa in a uliante munah, “Tuni in Israel ngam sungah lampui lian khat thi hi ci in phawk ngawl nu ziam?  39Pathian in kei sia kumpipa tu in hong teal sa ka hi saap hang, tuni sia ka tha zawm mama hi. Hi Zeruiah ii tapate sia kei atu in ngoltol lei hi. Thukham paltante sia a kilawm bangin TOPA in daan pia tahen,” ci hi.

Samuel Niina 4
Ishbosheth Kisuamlum
1Abner sia Hebron ah kisuamlum hi ci in Saul ii tapa Ishbosheth in a zaak ciang ama lau mama in, Israel a mite theampo zongh patau uh hi.  2Ishbosheth in ulian nii nei a, amate sia ngal lampuite veu ahi hi, amate Benjamin nam, Beeroth khua pan Rimmon ii tapate hi a, Baanah le Rechab ahi uh hi. (Beeroth sia Benjamin ngamin kiciamtee hi.  3A teang ciil te sia Gittaim ah tai in, tua munah teang uh hi.)
  4Saul ii suan le paal dang khat sia Jonathan ii tapa Mephibosheth hi a, ama kum nga a phak laitakin Saul le Jonathan ngal sungah kithat hi. Jezreel khua panin amate ii thina a kizaak ciang, a nau omh nu in, Mephibosheth sia tawmin tai hi; ahihang ama manlang nuam mama ahikom a nau taksua tha a, a peangzaw khat suak hi. *
  5Rechab le Baanahte Ishbosheth kungah pai tu in hong pai uh a, ama sun a tawlngak laitakin hong theng uh hi.  6Numei kongkha cing sia zungtaang kheapin a omna ah lusu in muu hi, tua ahikom Rechab le Baanah te tum ku uh hi.  7Inn sung hong thet uh ciang Ishbosheth ii lupna khaan sungah tum a, tua munah ama mutthip a, taciang amate in that uh hi. Tua zawkciang a lu tan sak a, paipui in, Jordan Kuam zui in zankhua in pai uh hi.  8Amate in a lutang sia Hebron ah David pia a, “Na ngal pa nang hong that tu a hanciam Saul ii tapa Ishbosheth ii lutang hi sungah om hi. Tuni in TOPA in Kumpipa nang sia Saul le a suan a paal te tungah phu laak tu hong oai hi,” ci uh hi.
  9David in amate zo kik a, “Launa theampo pan hong hun a nungta TOPA taw ka kiciam hi!  10Saul ii thina sia lungdam huai thuthang a saa Ziklag a thu hong puak sia zongh manin that sak khi hi. Ama ii hong puak lungdam huai thu hu a, tel ka piak sia tabang hi!  *  11Maw nei ngawl ama ii inn sungah a muu mihing khat a thatlum mi ngilote atu in bangza in sia zaw lai tu ziam! Ama na suamlup uh hu in a phu lam tu khi hi, taciang no sia lei maitang panin hong zutmaai tu khi hi!” ci hi.  12David in thu pia a, a ngalkapte in Rechab le Baanah te thatlum in, a khutte a peangte a tan sak zawk uh ciang, Hebron ningh hui ah khai uh hi. Amate in Ishbosheth ii lutang la in Hebron ah Abner ii thaankuul ah phum uh hi. 

0 comments:

Post a Comment