Laithiangtho Dokna (Jeremiah 11-12)

1. TOPA in  thuciamna sia bang taw tengat ziam?
a. Thikseakna pummei
b. Kham le nguun
c. Tungman

2. TOPA in Jeremiah tung ah akoisung lampite ah pai tan ci ziam?
a. Jordan nisuana
b. Senneal ngam
c. Jerusalem

3. Jerusalem khua lampite tung ah bang tam mama om ziam?
a. Mihing pha ngawl
b. Miphaak
c. Baal milim

4. TOPA in Israelte sia bang thingkung taw teengat ziam?
a. Olive
b. Theikung
c. Sapitkung

5. Ngalte ii a pha ngawl sawmna te akua in he ngawl ziam?
a. Jeremiah
b. Israel kumpipa
c. Thiampipa

6. Akuate in Jeremiah kithatlum le oai ziam?
a. Israelte
b. Jerusalem khuamite
c. Anathoth mite

7. Akuate nuamsa in a tup uh tangtung ziam?
a. Mi ngilote
b. Ngalte
c. TOPA tealtuamte

8. TOPA in, Jeremiah awng ___ taw tai kidem thei tu ni? ci hi.
a. na ngalpa
b. sakhi
c. siphu

9. TOPA in, Jeremiah awng ___ ngun hui ding thei tu ni? ci hi.
a. Nile
b. Eupharate
c. Jordan

10. Dui sungah a om ___bang Israelte in TOPA hawksan uh hi.
a. tawpi khat
b. sahang
c. saai

11. Zungtaang ciing uh ahihang, ___ at uh hi.
a. lopa ham
b. vaimiim
c. zuungtangko

12. Minam khat pawpo in thu amang bua le, ___ tu hi.
a. ka kisiik kik sak
b. Ka thatlum siat
c. Botkeak thuak

Jeremiah 11
Jeremiah le Thuciamna
1TOPA in kei tungah, 2“Hi thuciamna thute ngai in. Judah mite le Jerusalem khua mite tungah 3hi thuciamna a ni ngawl misim ii tungah Israel ii TOPA Pathian Keima in, haamsiatna ka tun sak sia son in. 4Hi thuciamna sia thikseakna pummei taw a kibang Egypt ngam pan amate ka paipui lai a, a pu a pate taw ka vawt uh thuciamna ahi hi. Ka thu hong nit natu le ka thu piak theampo vawt tu in amate ka son hi. Ka thu hong ni uhle, amate sia ka mite hi tu uh a Keima in amate Pathian ka hi tu hi ci in amate ka son hi. 5Tabangin ahi uhle tu a amate ii neisa ngamhoi ngampha sia kong pia tu hi ci a, a pu a pate tungah ka vawt kamciam sia Keima in ka tangtung sak tu hi,” hong ci hi. Keima in, “Hi hi, TOPA awng,” ka ci hi.

6Taciang TOPA in keima tungah, “Judah ngam khuapite le Jerusalem khuasung lampite ah pai tan. Tua munah ka thu son keak tan a thuciamna thute ngai a, a zui natu in mihonpite tungah son tan. 7A pu a pate Egypt ngam pan ka paipui lai in, ka thu hong nit natu in amate nasia takin ka hil a, tuni dong ma in ka hihil lai hi. 8Ahihang amate in ka thu hong ngai ngawl uh a, hong ni ngawl uh hi. A vekpi in a ngei a ngei bangma in a thin uh pui in ngilo veve uh hi. Thuciamna a zui tu in thu ka pia zo hi, ahihang zui nuam ngawl uh hi. Tua ahikom thuciamna sungah a ki at daan a vekpi in amate tungah ka tung sak hi,” hong ci hi.

9Taciang TOPA in kei tungah, “Judah mite le Jerusalem khua mite in Kei hong thasawm uh hi. 10Amate in ka thu hong nial, a pu a pate ii khialnate sang zuan kik uh hi; Amate in pathian dangte bia uh hi. Israel le Judah mite in a pu le a pate uh taw ka vawt khop uh thuciamna paltan zo uh hi. 11Tua ahikom tu in, Keima, TOPA in amate tungah lalcipna ka tun sak tu le kuama a suatak ngawl natu a kidop natu in thu ka pia hi. Amate in huna ngenin kei kungah a kap liang uh zong ka ngai batu hi. 12Tasia ciang Judah mite le Jerusalem khua mite sia biakpiakna a piak uh a pathiante kungah pai tu uh a, huna ngenin kap tu uh hi. Ahihang tua pathiante in hi lalcipna hun a thet ciang amate ngum thei ngawl tu hi. 13Judah mite in khuapi a nei zaza ma milim pathian nei uh a, Jerusalem khua ah a teang mite in khuapi sungah om lampite za ma in a kiihuai Baal pathian biaktau tam mama vawt uh hi. 14Jeremiah awng, hi mihingte taangin kei tungah thu hong ngen heak in a, hong pakaai heak in. Amate sia ngim nga in a hu tu in kei hong sap ciang amate ka ngai batu hi,” hong ci hi.

15TOPA in, “Ka it mihingte in a sia vawt uh hi. Ka Biakinn sungah bang thu nei thei nawn tu ziam? Amate in kamciam vawtna le sangaw biakpiakna taw in lalcipna khaam thei tu in ki um uh ziam? Tasia ciang a lungdam tu uh ziam? 16Khatvei lai in amate sia a nga hoi nga thiam a, tee a hau olive kung khat taw ka sontee hi; ahihang tu in, a teete mei taw halin a baakte ka thiaktan tu a vanto bangin nging tu hi.

17“Keima, Vaanglianbelpa TOPA in Israel le Judah ka phut hi; ahihang tu in kong sia sak tu hi ci in ka tawng hi. Hi siatna sia amate tungah amate ma in tung sak uh hi. Banghangziam cile amate in khialna vawt uh hi; Baal tungah biakpiakna a piak hu in amate in kei hong thin uuk sak hi,” ci hi.

Jeremiah A Kithasawmna
18Ka ngalte ii kei hong thasawmna thu TOPA in kei hong son hi. 19Thalup tu a a kipaipui mawna nei ngawl tuuno khat bang ka hi hi. Amate ii a pha ngawl a sawmnate keima hong siat sakna ahi hunlam ka he bua hi. “Thingkung a nga thiam laitakin phuk tan tawng; ama sia kuama ii a phaw nawn ngawl natu in thatlum tawng,” amate in ci uh hi.

20Taciang keima in thungen in, “Vaanglianbelpa TOPA awng, nangma in thutang a khen thukhen maang khat na hi hi; mihingte ii ngaisutna le thin sung na sittel hi. Na khut sungah ka thu kong aap zo hi; tua ahikom hi mihingte tungah phu na laakna hong mu sak tan,” ka ci hi.

21Anathoth mite in kei sia hong kithatlum le hong oai hi. Taciang amate in TOPA ii thu na sason lai le kong thatlum tu uh hi hong ci uh hi. 22Tasia ciang Vaanglianbelpa, TOPA in, “Amate daan ka pia tu hi! A tangvalte ngal sungah kithatlum tu a; a patangte sia ngilkial in pukthi tu uh hi. 23Anathoth mite tungah tuasiatna ka tun sak tu hun ka khensat zo hi. Tasia hun a thet ciang, kuama suakta ngawl tu uh hi,” ci hi.

Jeremiah 12
Jeremiah in TOPA Thu dongh
1TOPA awng, nang taw thu ih kinial ciang,
nang na maan zaw nak hi.
Ahihang nang tungah thu maanna thu kong dongh tu hi,
banghangin mi ngilote nuamsa ziam?
Banghangin thu maan ngawl mite a tup uh tangtung ziam?
2Nangma in amate na suan a, amate in zung tha uh hi,
amate khangto in a nga nga uh hi.
Amate in a kam in nang hong pok tawntung uh hi,
ahihang a thinsung tatak uh taw nang hong thusim ngawl uh hi.
3Ahihang, TOPA awng,
kei nong he a; ka nasepna le
bang zata nang kong it zia na mu hi.
Tuute ngaw tu a, a kikaikeak bangin hi mi ngilote kaikeak in;
amate a kithalup tu hun dong keamcing in.
4Ih ngam sia bang tan vei kongaw tu a,
lo theampo sungah lopate bang tan vei vul tu ziam?
Nganhingte le vacimte thi dektak hi,
banghangziam cile ih mite ii ngitlo hu ahi hi,
ih mite in ‘Pathian in ih sep ih vawtte hong mu ngawl hi’ a ci uh hang ahi hi.” ci hi.
5TOPA in, “Jeremiah awng, mihingte taw tai kidem a, toi na hi thong le,
bangbangin siphu taw tai kidem thei thong tu ni ziam?
leikolna munah na dingto thei bua zen le,
Jordan ngun hui dui sungah bangbangin dingto thei thong tu ni ziam?
6Na suapuite le na innkuan puite ngangawn in
nang hong leeheak zo hi;
amate sia nang hong dote taw kipawl hi.
Amate in kamthum taw hong paupui uh zong um heak in,” ci hi.
A Mite hangin TOPA ii Khuangaina
7TOPA in,
“Israel ka nusia zo hi;
ka teal sa minam ka nial zo hi.
Ka it mihingte a ngalte khut sungah ka pia zo hi.
8Ka tealsa mite in kei hong langpan uh hi;
dui sungah a om tawpi khat bangin amate in kei hong hawksan uh hi;
tua ahikom amate ka ensan hi.
9Ka tealsa mite sia
muthite ii a kiimkot pan a tuk siasua vacim khat taw kibang hi.
Poai siim tu in ngamsate sam vun!
10Hong uk ngamdang mi tam mama in ka sapit huan sia sak uh hi,
amate in ka lote tuancil sak uh a;
a dei huai ka leitangh senneal ngam suak sak uh hi.
11Amate in ka ngam sia pawl suak sak uh a;
ka mu tangin ngamkhing hi.
Ngam buppi sia senneal ngam suak sak a,
ahihang kuama in awlmawk ngawl hi.
12Senneal ngam mun saang na theampo kantan in
hong sut tu in mihingte hong pai zo hi.
Ngam buppi susia tu in ngal ka piang sak zo hi;
kuama thin nuam thin muangin om thei ngawl hi.
13Ka mite in zungtaang ciing uh a,
ahihang lopa hamh at uh hi;
amate nasep hanciam mama ahi uh hang bangma nga ngawl uh hi.
Ka thin a uk mama hu in a ante kisia hi,” ci hi.
Israel ii Innpaamte tungah TOPA ii Kamciam
14TOPA in, “Israel ka mite tungah ka piak sa ngam a sia sak Israel ii ngam paamte thu taw kisai keima in son tu thu pawlkhat ka nei hi. Keima in tua mi ngilote sia thingkung khat a zung pan a kibot keak bangin amate ii ngam panin ka la keak tu a, amate kung pan Judah mite ka suatak tu hi. 15Ahihang amate ka laakkeak zawk ciang amate ka hesuak tu hi; a minam simin, amate ii leitangh tung le a ngam tek ah ka paipui kik tu hi. 16Amate in khatvei lai in ka mite Baal min taw kiciam tu in a hil bangma in, amate in a thin theampo uh taw ka mite ii biakna saang thei in, ‘TOPA a nuntak bangma in’ ci in a kiciam uh le– amate zongh keima mi suak tu a, a maa uh vang tu uh hi. 17Ahihang minam khat papo in thu a mang bua ahile, tua minam sia ka botkeak tu a ka susiacip tu hi. Keima TOPA in ka ci hi,” ci hi.


0 comments:

Post a Comment