Laithiangtho Dokna (Psalm 115-116)

1. Minam tatuam te in akua ii omna dongh ziam?
a. Laphuakpa
b. Kamsangpa
c. Pathian

2. Laphuakpa a Pathian koisungah om ci ziam?
a. Eite khat sim
b. Haksatna sung
c. Vantung

3. TOPA in, milian, mino ___ thupha pia hi.
a. a kibangin
b. akisim zawk ngawl
c. tealtuam in

4. ___sia, Pathian bek ii neisa hi.
a. Simlei
b. Vantung
c. Eite theampo

5. Mihingte atu Pathian in bang pia ziam?
a. Simlei
b. Vaangletna
c. Teal theina

6. Akuate in TOPA pok ngawl ziam?
a. Satan
b. A thisate
c. Doainote

7. ___ simin ama in hong ngai hi.
a. Ka lasak
b. Khuangai aa ka kaa
c. Ka biapui

8. Bang in laphuakpa neak ziam?
a. Mihing pha ngawlte
b. Hamphatna
c. Thaankuul

9. TOPA in akuate dal ziam?
a. Hun tu a nei ngawlte
b. Mihing theampo
c. Atealtuamte

10. TOPA ii huutna lungdamkona in ___ ka pia tu ci hi.
a. pokna
b. zu biakpiakna
c. meihal biakna

11. Amite khat a thi ciang TOPA in bangtat ziam?
a. Na sa hi.
b. Phamaw sa ngawl
c. Lungdam

12. Kua bang in TOPA atu kaseam tu ci ziam?
a. Thiampipa
b. A Nu
c. Abraham

Psalm Late 115
A maan Pathian khat
1Nang tung bek ah, TOPA awng,
kote tungah hi ngawlin na itna kip le na thumaanna kip hangin,
nang tung bek ah minthanna om tahen.
2Banghangin minam tatuamte in,
“Na Pathian uh koisung ah om ziam?” ci in hong dongh ziam?
3Kote Pathian in vantung ah om a;
ama in a uuk papo vawt hi.
4Amate pathiante sia ngun le kham taw kivawt a,
mihing khutte taw kipiang sak hi.
5Tua pathiante in kamte nei ahihang pau thei ngawl hi,
mittangte nei ahihang, khua mu thei ngawl hi. *
6Amate in bilte nei ahihang khua za thei ngawl hi,
naakte nei ahihang a ngim za thei ngawl hi.
7Amate in khutte nei ahihang bangma tham thei ngawl hi;
taciang peangte nei ahihang lampai thei ngawl hi;
amate in aw nging sak thei ngawl hi.
8Tabangte vawt a tuate ma a muangte in
amate vawt milimte bang suak siat tahen.
9TOPA muang vun, no, Israelte awng,
Ama in no hong hu a hong dal hi.
10TOPA muang vun, no, Pathian thiampite awng.
Ama in no hong hu a hong dal hi.
11TOPA muang vun, no ama a biate theampo awng,
Ama in no hong hu a hong dal hi.
12TOPA in eite hong phawk a thupha hong pia tu hi;
ama in Israelte le Pathian thiampite theampo thupha pia tu hi.
13Ama a zaktate theampo
milian, mino a kibangin ama in thupha pia tu hi. *
14TOPA in no le na suan na paalte, tungah
tu le ta hong pia tahen!
15Van le lei a vawt TOPA in
note thupha hong pia tahen.
16Vantung sia, Pathian bek ii neisa ahi hi,
ahihang simlei sia mihingte atu in pia hi.
17TOPA sia, a thisate le
a thimna ngam a zuansukte kuama in pok ngawl hi.
18Ahihang ei a nungtate in
tu le a tawntungin ama tungah lungdam ih ko tu hi.
TOPA pok vun!

Psalm Late 116
Thina pan A kingum khat ii Pathian Pokna
1TOPA ka it hi,
banghang ziam cile ama in ka aw hong za a;
ama in ka thu ngetnate hong ngai hi.
2Ka biapui simin ama in hong ngai hi.
3Thi tu lau huaina sia ka kiimkot ah om hi;
thaankuul kiitakna in kei hong neak hi;
kei sia thintoina le launa taw ka kidim hi.
4Tasia ciang TOPA sia hi bangin ka sam hi:
“Hong ngen vangeau khi hi, TOPA awng, kei hong hun tan!” ka ci hi.
5TOPA sia hesuak thei a, pha hi;
ih Pathian in khuangai huai hong sa thei hi.
6TOPA in hun tu a nei ngawlte dal hi;
a lau huaina sungah ka om ciangin ama in kei hong hun hi.
7Ka lungtang awng, kimuang in,
banghangziam cile TOPA in kei tungah hong dik hi.
8TOPA in thina panin kei hong suatak hi;
ama in ka thitui hong khaam sak hi,
taciangin hong lel sak ngawl hi.
9Tua ahikom TOPA omna ah ka vak a,
a nungtate tenna ah ka om hi.
10“Hong kisucip hi,”
ka ci ciang ngangawn zong ka um cinten lai hi.
11Ka lau a, “Kuama muan tu mama om bo”
ka ciciang ngangawn zong in ka um cinten lai hi. *
12Ama ii kei tungah hong phatnate hu in
TOPA abang ka pia thei tu ziam?
13Kei hong huutna lungdamkona in
ama tungah zu biakpiakna ka pia tu hi.
14A mite theampo kikhopna ah
ama tungah, ka kamciamte ka pia tu hi.
15A mite khat a thi ciangin
TOPA in bangza in na sa ziam!
16Kei sia na naseampa khi hi, TOPA awng;
ka nu ii nang atu hong sep sak bangma in
kei zongh in nang atu kong seam a,
thina panin nong hun hi.
17Lungdamko sangaw biakpiakna kong pia tu a,
nang tungah thungetna kong nei tu hi.
18-19Na mite theampo kikhopna mun,
Jerusalem na Biakinn a thiangthona ah,
kong kamciamte kong pia tu hi.
TOPA pok vun!


0 comments:

Post a Comment