Laithiangtho Dokna (Samuel Niina 5-6)

1. Israel lampuite David taw koisung ah kimu ziam?
a. Hebron
b. Jerusalem
c. Samaria
2. David kumpi kum bangza aphak in kumpi suak ziam?
a. 30
b. 35
c. 40
3. David in Jerusalem khuapi sia kuate kung pan sut ziam?
a. Palestine
b. Moab
c. Jebus
4. Jerusalem ah akikhin zawk David in ta bangzav nei ziam?
a. 7
b. 9
c. 11
5. David kumpi asuak thu Philestinete in azak ciang David ___ hi.
a. letsong thak
b. sim tu in kipan
c. a lungdam
6. Philistine te ii bang hi na aw nging a zak ciang sim thei pheang tu ziam?
a. Poai khaamna aw nging
b. Kalsuan nging
c. Lasakna aw
7. David ii Israel ngalkap bangza ziam?
a. Tul 30
b. Tul 45
c. Tul 70
8. Thingkuang pua leang mai ah David le Israelte ____taw lam in lasa uh hi.
a. ngualzawna
b. lungdamna
c. a tha nei za uh
9. Thukham Thingkuang zamh tha in athi sia akua ziam?
a. Uzziah
b. Ahaziah
c. Uzzah
10. Obed Edom inn ah thukham thingkuang tha bangza taam ziam?
a. Tha khat
b. Tha nii
c. Tha thum
11. Thukham Thingkuang sia koi sung pan Jerusalem ah ki pua ziam?
a. Hebron
b. Gath
c. Samaria
12. Michal in David sia a uliante le akuate mai ah maizumna vawt ci ziam?
a. Mipi mai
b. A naseam numeite
c. Ngalkapte
Samuel Niina 5


David sia Israelte le Judahte ii Kumpipa Suak
(1Khang tangthu 11:1-9; 14:1-7)
1Tua zawkciang Israel namte theampo Hebron David ii kungah hong pai uh a, ama munah hi bangin ci uh hi, “Ko sia nangma ii ci le sa puite khu hi.  2A bo sa hun sung Saul sia ih kumpipa ahi lai ngangawn in, ama in Israelte ngal kidona sungah na lampui a, taciang TOPA in na mite na lampui natu le a ukpa na sua natu kamciam hong pia hi.”  3Tabangin Israelte lampui theampo Hebron ah Kumpipa David ii kungah hong pai uh hi. Ama in amate taw kipanpui natu a thiangtho biakna taw kisai kiciamna vawt a, amate in ama sathau noai in, ama Israelte ii Kumpipa suak hi.  4David sia kumpipa a sua hunin kum sawmthum pha a, kum sawmli sung uk hi.  5ama in Hebron panin Judahte kum sali le lang sung uk a, Jerusalem panin Israel le Judahte theampo kum sawmthum le kum thum sung uk hi.  *
  6Kumpipa David le a mite ii Jerusalem sim tu in a kuan tu hun hong theng hi. Tua munah a teang Jebus te in tua khua sia David in zo ngei tu in um ngawl ahikom hi bangin ci uh hi. “Hi lai khua ah nang hong tum thei ngawl tu ni hi; mittawte le a koncipte ngangawn in hong nolh keak tu hi.”  *  7(Ahihang David in Zionte ii kulhpi suanthal in tua hun pan kipan “David Khuapi” kici hi.)
  8Tua ni in David in, a mite tungah, “Jebus mite kei ii ngaimawk za in a ngaimaw na om uh ziam? Thalup nop dongin a ensan na om uh ziam? Tua ahile tui laakna lei tawlet sia zui in pai tavun a, tua munah a mittawte le a koncip te sim tavun,” ci hi. (Tua hu in, “Mittawte le a koncipte sia TOPA inn sungah tum thei ngawl tu ci thu hong piang hi.”)
  9Kulhpi a suan zawkciang a sungah David hong teang a, “David ii khuapi” a kici hi Khuapi sia tua kulhpi ii kiimkot ah ama in hong sa a, nisuana mualpangh ah lei a dimin a kivuhna pan hong pan hi.  10Ama sia hong thahat va-ial tawntung hi, banghangziam cile TOPA Pathian Vaanglianbelpa ama taw omkhawm hi.
  11Tyre khua a om Kumpipa Hiram in David ii kungah sum zuak sum lei tu vaihawm tu taangmi pai sak hi; ama in tua kumpipa atu in kumpi tenna inn sak natu cedar thingluangte, inn sa thiamte, suang ciang thiamte pai sak hi.  12Tabangin David in phawk hi, TOPA in ama sia Israelte ii kumpipa tu in kip sak a, ama ii mite ii hu in ama ii kumpi ngam khangto sak hi.
  13Hebron pan Jerusalem ah a kikhiin zawk uh ciang David in zino le zipi lathua in tapa tanute tam zaw lai nei hi.  14Jerusalem ah a tate hi bang teng hi: Shammua, Shobab, Nathan, Solomon,  15Ibhar, Elishua, Nepheg, Japhia,  16Elishama, Eliada, le Eliphelet te ahi uh hi. 
Philistinete tung Zawna
(1Khang tangthu 14:8-17)
17Philistinete munah David sia Israelte ii kumpipa in kisuak sak zo hi ci in kison ahikom amate ii ngalkap honpite, ama man tu in hong kuan uh hi. Hi thu David in a zaak ciangin ama ngal nanna kulh khat sungah tuaksuk hi.  18Philistinete Rephaim Kuam sung hong theng a tua mun lua uh hi.  19David in TOPA dongh a, “Philistinete ka sim tu ziam? Zawna kei nong pia tu ziam?” ci hi.
 TOPA in, “Hi hi, sim tan! Zawna kong pia tu hi,” ci in zo hi.
  20Tua ahikom David sia Baal Perazim ah kuan a Philstinete zo hi. Ama in, “TOPA in ka ngalte khuanawl bangin nawk keak hi,” ci hi. Tua ahikom tua mun sia Baal Perazim kici hi.  21Philistinete a taikeak uh ciang a biak uh milimte nusia uh a, David le a mite in tuate pua uh hi.
  22Tua zawkciang Philistinete in Rephaim Kuam ah heak kikin tua mun lua kik uh hi.  23Khat vei ma David in TOPA thu dongh a, ama ii a zo kikna pan, “Hi sung panin sim heak in, amate ii lang ah kot pai in, balsam thingkung omna sang panin sim vun ci hi.
  24Ngalkap honte kalsuan nging thing dawn ah na zaak uh ciang na sim tu uh hi, banghangziam cile Philistine ngalkap honte a zo tu in keima no mai ah kuan tu khi hi,” ci hi.  25David in TOPA ii thupiak bangin seam a, taciang ama in Philistinete Geba pan kipan Gezer dong not keak hi.
Samuel Niina 6


Thukham Thingkuang sia Jerusalem ah Kipaipui
(1Khang tangthu 13:1-14; 15:25-16:6; 43)
1Khatvei ma David in Israel mi ngalkap pha bel teng hong khawmtua a, a vekpi in tul sawmthum pha uh hi,  2taciang ama in amate Judah ngam Baalah ah paipui a, a kumpi tokhum sia cherubim te ii tungah a om, Vaanglianpipa TOPA ii min a pu, Pathian ii Thukham Thingkuang sia tua mun panin laak tu ahi hi.  *  3Amate in mualtung Abinadab inn pan la in, leangthak khat ii tungah suan uh hi. Aminadab ii tapate Uzzah le Ahio in khuileang lampui in,  *  4leang mai ah Ahio pai hi.  5David le Israel buppi sia a tha nei za uh taw TOPA upat piakna in la sa in laam uh hi. Tengtong, liamlo, khuang, nguasemh le daalkopsai te tum uh hi.
  6amate Nacon ii ancilna mun hong thet uh ciangin a khuitalte hong lutu in Uzzah in Thukham Thingkuang hong zamh hi.  7Thakhat in TOPA Pathian, Uzzah tungah thin uuk a, ama thatlum hi, banghangziam cile a zatak vawt ngawl hang ahi hi. Uzzah sia Thukham Thingkuang hui ah thi hi,  8taciang tua hun pan kipan tua mun sia Perez Uzzah kici hi. David sia a thin hong so hi, banghangziam cile TOPA in Uzzah sia thin uukna taw daan a piak hang ahi hi.
  9Tua zawkciang David in TOPA kiita a, “Bangbangin Thukham Thingkuang sia tu in kei taw tonkhawm ngam nawn tu khi ziam?” ci hi.  10Tua ahikom ama in Jerusalem khua ah ciapui ngam ngawlin; tasia taangin Gath khua mi Obed Edom inn ah lampial in tun hi.  11Thukham Thingkuang sia tua munah tha thum kitaam sak a, taciang TOPA in Obed Edom le a baangkua thupha pia hi.  *
  12Kumpipa David in Thukham Thingkuang hu in Obed Edom le a baangkua sia TOPA in a neisa dang theampo taw cipin thupha pia hi ci in za a, tua ahikom ama in Thukham Thingkuang sia Obed ii inn panin la in, poaipi khaamna lianpi taw Jerusalem ah ciapui hi.  13Thukham Thingkuang a pua mihingte kal luk hong suan zawkciang David in amate tawlnga sak a, khuital khat le khuino thau khat sangaw biakpiakna in pia hi.  14David sia a kawngah dial khat teang bekin, TOPA a upat piakna in a tha neiza taw laam hi.  15Tabangin ama le Israel mite theampo in Thukham Thingkuang Jerusalem ah lungdamna in au na le lemle aw te taw paipui uh hi.
  16Thingkuang khuapi sung hong kithet pui ciangin Saul ii tanu Michal in khelki panin khua a et le David kumpipa sia laamin, tawn in, biakpiak lapna taw laam a mu ciangin hoi maw sa hi.  17Amate in Thingkuang sia David ii ama atu a sak puanbuk sungah koi uh hi. Tua zawkciang ama in TOPA tungah sangaw biakpiakna le kipawlkhop biakpiakna pia hi.  18Sangaw biakpiakna a man zawkciang David in Vaanglianbelpa TOPA min taw mipite thupha pia in,  19amate an hawm sak hi. Ama in Israel pasal le numei khat simin anluum khat tek, sa em bak khat tek le sapitko tawm tek pia hi. Tua zawkciang a kuama po inn ah cia uh hi.  *
  20Tua zawkciang David in a innkuanpuite taw kinukset tu in hong cia ciang, Michal sia ama muak tu in hong pusuak hi. “Tuni in Israelte ii kumpipa in ama atu min let mama natu khat vawt hi! Ama ii uliante ii naseam numeite mu na ah a mamaw bangin kipholaak hi!” ci hi.
  21David in zo a, “Na pa le ama baangkua taangin Israelte ii lampui tu kei hong tealkhia ka TOPA ka upat piakna in laam peu khi hi,  22taciang tu a sang zongin a nasia zaw lai in keima le keima kisimmawk vawt zaw lai tu khi hi. Nang na hile kei, bangma in hong heang ngawl tha tu ni hi, ahihang tua numeite in kei, hong thupi sim mama tu hi,” ci hi.
  23Saul ii tanu Michal sia ta nei ngei ngawl hi.
 

0 comments:

Post a Comment