Laithiangtho Dokna (Samuel Niina 7-8)

Laithiangtho Dokna (Samuel Niina 7-8)
1. Biakinn sak tu vai taw kisai akua tung ah David in thudongh ziam?
a. Zadok
b. Nathan
c. Samuel

2. David omna inn sia bang taw kisa ziam? 
a. Uksuang
b. Ceder Thing
c. Khamh le tau

3. TOPA in David ii a bang mong ngei ngawl tu ci ziam?
a. Lungdamna
b. Thupha
c. Khangngui

4. Biakinn sak tu vai Pathian paupuina azak zawk David koisung thungen ziam?
a. Biakinnpi
b. A inn sung
c. Zion mualvum ah

5. TOPA in bang taw kisai David kamciam pia ziam?
a. Ngualzawna
b. Biakinn sak natu
c. Suanlepalte thupha

6. TOPA in David ii suan le paalte sia ___ tu ci hi.
a. kumpite suaksak
b. thupha sangte
c. ka haamsiat

7. David ii Philestinete ii bang bo sak ziam?
a. Dagon pathian
b. Ukna
c. Khamh lukhu

8. David in akuate man in thum sung pan nii vo that ziam?
a. Syria
b. Moabte
c. Philistinete

9. David in akuate ii siphute peangbai in nusiat ziam?
a. Egypt
b. Philistine
c. Syria

10. Hadadezer le Toi sia ___ hi.
a. kingal
b. lawmta
c. lei ngam hau

11. David in ngalvan matte le tel angaate bang atu koi ziam?
a. Vankholna
b. Tel piakkik natu
c. Biakinn

12. David ngalkap maangpa min bang ziam?
a. Joab
b. Abner
c. Abishai

Samuel Niina 7
Nathan ii David A puak Thu
1Kumpipa David sia ama ii kumpi inn sungah om a, taciang TOPA in ama sia a ngalte theampo kung panin suatak in keam hi.  2Tua zawkciang kumpipa in kamsang pa Nathan
munah, “Kei hi sungah cedar thing taw a kisa inn sungah teang khi hi, ahihang Pathian ii Thukham Thingkuang sia puanbuk sungah kikoi hi!” ci hi.
  3Nathan in, “Na thin sung a om babangin vawt in, banghangziam cile TOPA sia nang taw omkhawm hi,” ci in zo hi.  4Ahihang tua ni zanin TOPA in Nathan munah,  5“Pai tan a,
ka naseam pa David munah hi bangin ci tan, ‘Kei ten natu biakinnpi a sa tu sia nang hi ngawl ni hi.  6Egypt ngam panin ka mihingte ka suatak sak hun pan kipan tu hun dong
biakinnpi sungah teang ngei ngawl khi hi; khualhaw in vakkot ka hi hang puanbuk sungah teang khi hi.  7Israel ka mite taw ka khualhawna theampo sungah a lampuite khat ii tung
zongh ah banghangin cedar taw a kisa biakinn hong sak sak ngawl nu ziam? ci ngei ngawl khi hi.’
  8“Tua ahikom ka naseampa David munah son in a, Kei, TOPA Vaanglianbelpa in ama munah, ‘Lo sungah tuu cingin na omna panin nang kong la khia a, Israel ka mite uk tu in
kong vawt hi.  9Na pai na po ah nang taw kong omkhawm a, taciang na mainawt ciang na ngalte theampo kong zaw sak siat hi. Leitung ah lampui lianbel te bangin kong minthang
sak tu hi.  10-11Ka mi Israelte ten natu mun khat ka teal zo a, tua munah amate kinengniam nawn ngawlin nungta tu uh hi. Ngam hisia sungah amate hong tum pan kipan amate
mihing ngoltolte in sim tawntung a, ahihang hi bang thute piang kik nawn ngawl tu hi. Na ngalte kung pan kong suatak natu le suan le paal na nei natu kamciam kong pia zo hi. 
12Nang thi in na pute taw na kiphum khop zawkciang zong na tapate sung pan khat kumpipa ka suak sak tu a, a kumpi ngam ka thahat sak tu hi.  *  13Ama sia biakinnpi kei atu in
a sa tu pa hi tu a, a kumpi ngam ka kikhomsuan sak tu hi.  *  14Keima in ama ii pa ka hi tu a, ama ka tapa hi tu hi. Sep khial vawt khial a nei ciangin pa ii tapa a teh bangin ka teh
tu hi.  15Ahihang nangma kumpipa na sua thei natu in Saul ka dawkhiat bangin tua na tapa sia ka khuangkho sakna ka dokkhia kik batu hi.  16Nangma in suan le paal na nei
tawntung tu a, na kumpi ngam sia a kikhomsuan in ka vawt tu hi. Na khangngui sia a mong ngei batu hi.’ ”  *
  17Pathian ii a pualaak teng a vekpi in Nathan in David munah son hi. 
David ii Lungdam kona Thungetna
(1Khang tangthu 17:16-27)
18Tua zawkciang David sia TOPA ii ompuina Puanbuk sung zuanin to a thungen hi: “Vaanglianpipa TOPA awng, kei tung ahizong ka innkuanpuite tung ahizong nong septe ka kiphu
ka kilawmna om ngawl hi.  19Hi napi tu in a nasia zaw lai in hong seam ni hi, Vaanglianpipa TOPA awng; maisang hong pai lai tu kumte ah ka suan ka paalte atu dongin kamciam
nong pia hi. Taciang hi sia mihingte atu thuthun ahi hi, Vaanglianpipa awng!  20Nang tungah bang kong ci lalai thei tu ziam? Kei na naseam pa hong he ni hi.  21Hi bang nong
vawtte nangma ii deina le tupna hi; nangma in hi na lianpite kei nong hil natu in na vawt ahi hi.  22Bangza in lian ni ziam, Vaanglianpipa TOPA awng, nang taw a kibang khat
zongh om ngawl hi; nang bekma Pathian na hi sia kong he tawntung uh hi.  23Nangma mihing a suak tu in na hutkhiat Israel bang peuma leitung ah minam om ngawl hi. Amate
atu in na vawt a lian le a lamdang nate in na minthanna leitung ah kizel sak hi. Egypt ngam pan nangma neisa tu in na suatak na mite a mainawt ciangin ngamdang mite le a
pathian uh te na hawlkeak hi,.  *  24Nangma in Israelte a tawntung na neisa tu in na vawt a, TOPA awng, taciang nangma sia amate ii Pathian na suak hi.
  25“Taciang tu in, TOPA Pathian awng, kei le ka suan ka paalte atu hun tatuam sungah kamciam na vawtte a tawntung atu in hong tangtung sak tan, ka seam tu na ci te hong
seam tan.  26Na minthanna sia lian tu a, taciang mite a tawntung in, ‘TOPA Vaanglianbelpa sia Israelte ii Pathian hi,’ ci tu uh hi. Taciang nangma in ka khangngui sia hun buppi ah
nong keamcing tu hi.  27TOPA Vaanglianpipa, Israel ii Pathian awng! Hi thungetna nang tungah hang takin kong ngen hi, banghangziam cile, nangma in kei na naseam pa ii tungah
hite nong lak zo a, taciang ka suan ka paalte sia kumpipa te na sua sak tu nong son zo hi.
  28“Taciang tu in, Vaanglianpipa TOPA, nangma in Pathian na hi hi; na kamciam na len tawntung a, hi a lamdang mama kamciamte kei tungah nong vawt zo hi.  29Nangma ii piak
hamphat nate taw a nop sak tawntung thei natu in, ka suan ka paalte thupha nong piak sak natu kong ngen hi. Nang, Vaanglianpipa TOPA, in hi kamciam nong vawt zo a, na
thupha sia ka suan ka paalte tungah a tawntungin kip tu hi.
Samuel Niina 8


David ii Ngalzawnate
(1Khang tangthu 18:1-17)
1Hun tawmvei zawkciang Kumpipa David in Philistinete sim kik a, amate zo in, amate ii ngam tungah Philistinete ii ukna a nei teng bo sak hi.
  2Tua zawkciang Moabte zo hi. A ngal matte lei ah lum sakin thum sung pan nii veu thatlum hi. Tua ahikom Moabte sia ama ii khutnuai mi hong suak uh a, ama tungah shia pia
uh hi.
  3Taciang, Syria ngam ii ngamno khen Zobah a uk kumpipa Rehob ii tapa Hadadezer sia Euphrates ngun naak sangah ngam ukna la kik tu in a pai na lampi ah ama in zo hi. 
4David in siphu ngalkap tul le zasali le, lei ngalkap tulkul mat sak hi. Ama in ngalleang zakhat atu a kicing khom siphu la a, tua vaal teng a peangbai in koi siat hi.
  5Damascus a om Syriate in Kumpipa Hadadezer hu tu in ngalkap hon khat a pai sak le David in tuate simin tulkul le tulnii that hi.  6Tua zawkciang ama in amate ngam sungah
ngal ngiaphualte saatin amate sia ama ii khut nuai mite hong suak uh a, shia pia uh hi. TOPA in mun theampo ah David sia zawna pia hi.  7Hadadezer ii a uliante ii a toai, kham
lumte David in la a, Jerusalem ah cia pui hi.  8Ama in Hadadezer ii uk khuapite ahi Betah le Berothai pan taungo zongh tam ma la hi.
  9David in Kumpipa Hadadezer ii ngalkap honpite zothal hi ci in Hamath ah Kumpipa Toi in za hi.  10Tua ahikom ama in a tapa Joram sia David tungah Hadadezer a zaw hu in
lungdampuina ko tu in muak sak hi, tua Hadadezer le Toi sia tam vei ma kido ngei uh hi. Joram in David a piak tu kham, ngun le taungo taw a kivawt letsongte puak hi. 
11Kumpipa David in tuate sia a zaw sa ngamte pan a laak ngun le kham te taw kopin biakpiakna ah a zak tu in koi tuam hi—- tua a zaw sa ngamte sia  12Edom, Moab, Ammon,
Philistia, le Amalek te hi— Hadadezerte kung pan a phuul vanh pawlkhatte taw zong kikop sak hi.
  13Ci Kuam sungah Edom mite tulsawm le tulliat a thalupna pan a cia kik ciang David minthang va-ial hi.  *  14Ama in Edom ngam sung theampo ah ngalkap phual saat a, taciang
tua mun ah mihingte ama ii khut nuai mi suak uh hi. TOPA in David mun theampo ah zawna pia hi.
  15David in Israel buppi tungah ukna nei a, a mite thumaan tak le thutang takin a ki uk natu in vawt hi.  16A nu Zeruiah ahi Joab sia ngalkap hon bup ukpipa ahi hi; Ahilud ii tapa
Jehoshaphat sia thu tepteena huvau teng tavuan pia hi;  17Ahitub ii tapa Zadok le Abiathar ii tapa Ahimelech te sia thiampi ahi uh hi; Seraiah sia kumpipa inn sung thuzeakpi ahi
hi;  18Jehoiada ii tapa Benaiah sia David a cingte ukpi hi a, David ii tapate sia thiampite ahi uh hi.

0 comments:

Post a Comment