Laithiangtho Dokna (Jeremiah 13-14)

1. Ngoaipuan sia bangtaw ki vawt ziam?
a. Pat
b. Nailung
c. Tumul

2. Ngoaipuan sia koisung ngun ah phum tu ziam?
a. Nile
b. Jordan
c. Euphrates

3. Thambeal theampo bangtaw kidim tu ziam?
a. Zu
b. Tui
c. Sathau

4. Banghang in kap tu uh ziam?
a. Kivawtsiatna
b. Kivel zazan
c. Kiphatsak hang

5. Jerusalem ngalte uh sia koisung pan pai ziam?
a. Nisuana
b. Sak sang
c. Thangsang

6. Ama ii a___ na vawt uh ama in mu zo hi.
a. nusia mama
b. huasaak nate
c. lamdang

7. Judahte khuangai in ___ uh hi.
a. lei ah bok
b. vut ki noai
c. ni thum antang

8. Sazukpui in ano banghang nusia ziam?
a. It zo ngawl
b. Ama matthuak
c. Neaktu om ngawl

9. Leilot Kamsangte ii mukholna sia TOPA in ___ hi ci hi.
a. phuatawm thu
b. ka ngaimaw
c. ka mai sak tu

10. Jerusalem lampi tungah bang kimu tu ziam?
a. Mihing vaakthap
b. Thupha namkim
c. Mithiluangte

11. Jeremiah in "Sun zong zan zong ___ luang" ci hi.
a. nguntui
b. ka thitui
c. nguatui

12. Van in ama ii thu taw ___ thei ngawl hi.
a. meei kaai
b. ngua zu sak
c. keak tak

Jeremiah 13
Pat Puan Ngoaipuan Tom
1TOPA in pai in, pat puan ngoaipuan tom pawlkhat lei a, teangin hong sawl hi; ahizong tuikawt sak heak in hong ci hi. 2Tua ahikom tua ngoaipuan tomte lei in ka teang hi. 3Taciang TOPA in kei hong paupui leleau a, 4“Euphrates ngun ah pai in, suanghawng khat sungah tua ngoaipuan tomte phual in,” hong ci hi. 5Tua ahikom ka pai a Euphrates ngun hui ah tua ngoaipuan tomte ka phual hi.

6Khuangei dingdeng zawkciang in TOPA in Euphrates ngun ah pai kik tan a, ngoaipuan tomte la tan hong ci hi. 7Hong sawl bangin ka pai kik a, ka phualna mun ka thet ciang puante siacip zo a, a kizak thei nawn ngawl sia ka mu hi.

8Taciang TOPA in kei hong paupui leleau hi. Ama in, 9“Judah mite ii kiphatsak na le Jerusalem mite ii kiphat sakna lian mama sia hi bangin ka siacip sak tu hi. 10Hi mi ngilote in ka thu hong mang nuam bua uh hi. Amate sia a ngei bangma in a thin uh pui in ngilo uh a, pathian dangte bia in a na seam uh hi. Tua ahikom, amate sia a kizangh thei nawn ngawl, hi ngoaipuan tomte bang suak tu uh hi. 11Ngoaipuan tomte in kawng ah a bel cinten bangma in Israel le Judah mite theampo in keima hong bel cinten tu ka dei hi. Hi bang a ka vawtna in amate sia ka mi a sua thei natu, hong pok thei in ka min a patak thei natu ka deina ahi hi; ahihang amate in ka thu hong ni nuam ngawl uh hi,” ci hi.

Sapit Thambeal
12TOPA Pathian in keima tungah, “Jeremiah awng, sapit thambeal theampo zu kidimh tu hi, ci in Israel mite son in. Sapit thambeal theampo zu a kidip tu sia he khu hi ci in amate in hong zo kik tu uh hi. 13Taciang Keima TOPA in hi ngam sungah a om mihingte theampo: David ii suan le paal kumpite, thiampite, kamsangte le Jerusalem khua mite theampo zu a kham dong ka piak tu amate son in. 14Ta ciang a huai a khang a kibangin sapit thambeal khat le khat a kisukthap bangin amate ka sutham tu hi. Khuangai huai sakna, itna le hesuakna te in amate ka thatlum tu hong khaam thei ngawl tu hi,” hong ci hi.

Jeremiah in Kiphatsak ngawl natu Thupia
15Israel mite awng, TOPA in son zo hi!
Na thin uh neam sakin a thu ngai vun.
16TOPA ii khua a zin sak ma
mual liante tungah na lutu uh ma in;
na lam et uh khuavak sia khuazing bikbek a sua sak ma in,
TOPA na Pathian uh upat vun.
17Ka thu nong ngai bua uh le
na kiphatsak na uh hangin ka kap ku tu a;
thitui taakin nasia takin ka kap tu hi.
banghangziam cile TOPA ii mite sia saltang tu in kipaipui zo hi.
18TOPA in kei tungah, “Kumpipa le a nu sia a kumpi tokhumte tung panin a tuaksuk natu in son in, banghangziam cile amate ii a pha mama a kumpi lukhute a lu tung uh panin a taaksuk hang ahi hi. 19Judah ngam thangsang khuapite sia ngalte in uumci zo a, a sungah kuama tum thei ngawl hi. Judah mite theampo a saltanna munah kipai pui siat zo hi,” hong ci hi.

20Jerusalem awng, en vun! Na ngalte uh sia saksang pan hong paisuk uh hi! Nangma ii kep tu a hong kipia mihingte, na kiphatsak pui ahi na mite koi sungah om ziam? 21Na lawm na ngual in na ngaisut mihingte kekeak in nangma hong zo in hong uk ciang bang na ci tu ziam? Nausuak numei khat na a sak bangin na sa in na om tu hi. 22Banghangin, hi thute theampo na tungah hong piang ziam– banghangin na puante hong kileamkeak sakin, hong kibuan in hong kikhialpui ziam– ci in na dongh le na mawna a nasiat lei lalawm hang ahi hi. 23Mihing civom pa khat in a civom sia theak thei tu ziam, pawlbeam khat in a pawlna vawk thei tu ziam? A theak thei uh ahile siatna sim ngawl vawt dang a nei ngawl no zongh in a pha vawt tu sin thei tu nu hi. 24Senneal ngam pan a hong va vui in taangphaw a muutkeak bangin TOPA in note hong thethaang tu hi. 25Hisia sia noma taw kisai in ama ii a vawt tu a, a khensat sa hi, Ama in ci hi. Banghangziam cile noma in ama na mangil zo uh a pathian maan ngawlte na muang zo uh hi. 26TOPA ama mama in note puante hong hawkeak sak tu a, na mai uh a zum tu in hong pholaak tu hi. 27Ama ii a huasaak nate na vawt uh ama in mu zo hi. Pa khat in a innpaampa ii zi a ompui nop bang, ahibale siphu tal lan khat ii siphu nu khat a zuzui bangin mualtung hi kale lo sung hi kale ah pathian dangte na zot uh sia ama in hong mu zo hi. Jerusalem mite awng, a lal hi zo nu hi! Bang hun ciangin thiangtho kik ngei thong tu nu ziam?

Jeremiah 14
Nasia tak Nguatui Hang
1Nguatui hanna taw kisai in TOPA in kei tungah,
2“Judah kap in om a; a khuapite bo mang dedek hi,
a mite khuangai in lei ah bok uh a,
Jerusalem khua mite in huna ngenin au uh hi.
3Sumhau mihingte in a naseamte uh tui toai tu in pai sak uh a;
amate tuikhuk ah a pai uh le,
tui om ngawlin a bealhawm nguak taw heak kik uh hi.
Thin kiam lungmangin, amate in a mai uh seal hi.
4Ngua zu ngawl ahikom leiko ngawp a,
lothote thin kiamin, a mai uh seal hi.
5A neak tu lopa om ngawl ahikom
ngam sungah sazukpui in a no suaktuung nusia hi.
6Ngam laate in mualno te dawn ah dingin
ngam uite ii hudiik bangin hu diik vahut uh hi;
a neak tu lopa om ngawl ahikom
a mitte in khua mu thei ngawl uh hi.
7Ka mite in kei hong oksan in,
‘Ka khialnate uh in ko hong maw sak ahitazong,
TOPA awng, nong kamciam sa bangma in kote hong hu tan.
Kote in nang kung pan tamvei ma ka tai zo uh a;
nang tungah kong khial zo uh hi.
8Nangma bekma Israel ii lametna na hi a,
nangma bekma in kote kisiatna pan hong ngum pa na hi hi.
Banghangin ka ngam sung uh ah
khualmi khat bangin om a;
zan khat bek a taam khualhaw pa bangin om ni ziam?
9Banghangin muanmawk khol ngawl patauna nei mihing khat bangin,
kuama a hu zo ngawl ngalkap khat bangin om ni ziam?
TOPA awng, a tatak in, nang in ko taw nong om khawm hi!
Kote in na mite ka hi uh hi;
hong nusia heak in’ hong ci uh hi,” hong ci hi.
10Hi mihingte taw kisai in TOPA in, “Amate in kei kung pan tai nuam uh a, taciang amate le amate ki uk zo ngawl tu hi. Tua ahikom amate tungah ka lungkim ngawl hi. A pha ngawl a vawt nate ka ciamtee tu a, a khialnate uh hu in amate daan ka pia tu hi,” ci hi.

11TOPA in kei tungah, “Hi mihingte hu tu in kei tungah huna hong ngen heak in, 12Antang in huna hong ngen hial zonghin hong ngetnate ka ngai batu hi; meihal biakpiakna le antang taw biakpiakna te hong piak uh hangin, amate ii tungah ka lungkim ngawl tu hi. Amate sia ngal sungah ahizong kialpi tunna taw ahizong, natna taw ahizong ka thatlum zaw sap tu hi,” hong ci hi.

13Taciang keima in, “Vaanglianpipa TOPA awng, hi ngamah ngal kidona le kialpi tunna om ngawl tu hi, banghangziam cile nangma in ih ngam sungah kilemna bek om tu hi ci in hong kamciam zo ci in kamsangte in mipite tungah a son sia na he hi,” ka ci hi.

14Tua ahitazong TOPA in zo kik hi, “Tua kamsangte in keima min suangin leeilot thu son uh hi. Amate ka sawl bua a, amate tungah thupiak ka nei bua a, amate kam khat beak zongh ka paupui bua hi. Amate ii a son mu kholna sia kei kung pan hi ngawl hi; mailam thu piang tu a son khol thute sia amate ngaisut phuatawm ki manna a nei ngawl thu ahi hi. 15Keima, TOPA in ka sawl ngawl bulin ka minsuang in hi ngamah ngal kidona le kial tung ngawl tu hi ci a, a son kamsangte tungah bang law tu khi ziam ci thu no tungah kong son hi– ngal kidona le kialpi taw amate ka thatlum tu hi. 16Amate ii hi thute a sonna mihingte, hi bangma in kithatlum tu hi. A luangte sia Jerusalem khua lampi tungah kilawn thal tu a, a phum tu kuama om ngawl tu hi. Hi thu sia amate le a zite, a tapate le a tanute theampo tungah tung tu hi. Amate ii ngitlo na thaman amate in ka thuak sak tu hi.” 17TOPA in ka khuangaina thute mipite tungah hi bangin son tu in kei hong sawl hi:

“Sun zong zan zong ka thitui luang tahen,
tawp hun nei ngawlin kap ka tong,
banghangziam cile ka mite nasia tatakin kiliam sak a, na sa uh hi.
18Lolai ah ka pai ciangin,
ngal kisimna a, a kithat mithi luangte ka mu hi;
khua sungah ka pai ciangin a pukthi mite ka mu hi.
Kamsangte le thiampite in amate ii nasep tek seam ahi uh hang,
amate in bang seam ci zongh he meal ngawl uh hi.”
Mipite in TOPA tungah Maangkaa
19TOPA awng, Judahte nialcip zo ni ziam?
Zion mite ngaimaw ni ziam?
Banghangin a dam zo nawn ngawl tuza dongin
liamma hong thuak sak ni ziam?
Thin nopna ka zong uh hi, ahihang phatna bangma hong tung bua hi,
ciidam tu ka lamen uh hi, ahihang launa bek hong tung zaw hi.
20TOPA awng, nang tungah kong khial zo uh hi;
koma ii khialnate le ka pu ka pate ii khialnate kong pualaak uh hi.
21Nong kamciamnate phawk in a, kote hong ngaimaw heak in;
na minthanna tokhum omna mun Jerusalem mindai sak heak in.
Ko taw na vawt thuciamna sia paltan heak in.
22Minamte ii vawt milimte in ngua zu sak thei ngawl hi;
van in ama ii thu taw ngua zu sak thei ngawl hi.
TOPA kote Pathian awng, hite theampo
a vawt pa nangma na hikom nang sungah lametna kong nei uh hi.

0 comments:

Post a Comment