Laithiangtho Dokna (Jeremiah 15-16)

1. Judahte atu Moses le ___ ngangawn ii thuumna dei ngawl tu hi.
a. Samuel
b. Elijah
c. David

2. Akua ii ngamtatna hang in leitung mite liinglawng ziam?
a. Manasseh
b. TOPA
c. Satan

3. TOPA kampauna hang akua lungdam ngawl ziam?
a. Jeremiah
b. Israelte
c. Kumpipa

4. TOPA thinukna sia bang taw kibang ziam?
a. Huisuangval
b. Meikuang
c. Tuihual

5. Bang vawt in, midangte taw Jeremiah in ahunbo sak ngawl ziam?
a. Nawnsan thusonna
b. Ciamui vawt
c. Summeet vawt

6. TOPA in, Thupha thu tak nason le bang suak tu ci ziam?
a. Na maa pai tu
b. A kam sang
c. Na nuamsa tu

7. Bang a nei ngawl natu TOPA in Jeremiah tungah sawl ziam?
a. Siatna
b. Khamh le ngun
c. Zi le ta

8. Akuate ii inn sungah tum ngawl natu TOPA in Jeremiah sawm ziam?
a. Canaan te
b. Doai vei pa
c. TOPA ii mite

9. Jeremiah hunlai Israelte sia apu-apate sang in ___ zaw hi.
a. thumaan
b. hanciam ngawl
c. khialzaw

10. Daan atawk ciang, TOPA tungah akhial hun lam ___ hi.
a. kihe ngawl
b. kihe
c. pulaak uh

11. TOPA in, Israelte apu apate ngam ah  ___ tu ci hi.
a. thupha ka pia
b. ka cia sa kik
c. kong mangil bua

12. TOPA in a vaangletna le abang sia minamte in ka he sak tu ci ziam?
a. A minthanna
b. A thukhualna
c. Thahatna



Jeremiah 15
Judah Mite Thuak tu
1Taciang TOPA in kei tungah, “Moses le Samuel ngangawn hi munah dingin ka tungah hesuak hong ngen hial zongh in, hi mihingte tungah hesuakna ka nei tuan bua tu hi. Amate tai sak vun; ka muna ah om sak heak vun. * 2Koi sungah pai tu khu ziam ci in amate in nang hong dongh uh le, keima in hi bang ka ci sia amate son in:

Pawlkhat sia natna taw thi tu in kisee a–
tua mun sia amate pai natu mun ahi hi!
A dangte sia ngal sungah thi tu in kisee a–
tua mun sia amate pai natu mun ahi hi!
Pawlkhat sia pukthi in thi tu in kisee a–
tua mun sia amate pai natu mun ahi hi!
A dangte sia saltang a kipaipui tu in kisee a–
tua mun sia amate pai natu mun ahi hi! *
3Keima, TOPA in, a lau huai thu nam li amate tungah tung tu in ka khensat zo hi: Ngal sungah amate kithatlum tu hi; a luangte ui in

kaikeak in; vacimte in ne tu a, a om laiteng ngamsate in ne tu hi. 4Hezekiah ii tapa Manasseh in Judah ngamah kumpi a sep laitak in

Jerusalem khua ah a sia a vawt thute hangin leitung mite theampo ka liinglawng sak tu hi,” hong ci hi. *

5TOPA in,
“Jerusalem mite awng, akua in no hong hesuak tu ziam,
akua in no hong khuangai pui tu ziam?
Na om zia uh hong dongh tu in
akua in hong ngak zo tu ziam?
6Noma in kei nong nial zo uh a; nong nungngat zo uh hi,
ka thin uukna iip zo ngawl ka hikom
ka khut zalh in kong susia hi.
7Ngamsung khuasim ah taangphaw bangin vui sungah note kong lawn hi.
Ka mite awng, note kong susia hi,
Na ngitlo ngamtatnate uh
na kheal ngawl uh hang komin na tate uh ka thatlum hi.
8Tuipi hui ah sennealte sangin
note ngam sungah meingong tam zaw hi.
Na tangvalte uh a khansan laitakin ka that a,
a nute in ka thuak sak hi.
Thakhat thu in amate tungah
thin ngimna le launa ka theng sak hi.
9A tapa salite ii a thi sat nupi nu sia
satham vei in butthi in a hu samh hi,
ama ii sun khuavak sia khuazing suak a,
ama sia maimawl in a thin na hi.
No sung pan a nungta laiteng
na ngalte in kong thatlum sak tu hi.
Keima, TOPA in ka ci zo hi,” ci hi.
Jeremiah in TOPA Mawsiat
10A lungdam ngawl pa sia keima ka hi hi! Banghangin ka nu in leitung ah kei hong hing ziam? Ngam sungah mihing theampo taw kihau in thu kinial tu ka hi thong hi. Sum ka pukthaak bua a sum ka pu bua hi; tua hi napi ngual theampo in kei hong haamsiat veve hi. 11TOPA awng, nangma ii na pha takin ka seam bua a, ka ngalte in ngim nga a haksatna thuakin, a omlai takin amate taangin nangma tungah hesuakna ka nget sak bua ahile amate ii hong haamsiatnate theampo tangtung tahen. ( 12 Kuama in thik thiaktan zo ngawl hi, Saksang pan hong pai taungo taw kihel thik sia kuama in thiaktan zo ngawl hi.)

13TOPA in keima tungah, “Ngamsung theampo ah khialna a vawt hu in amate daan pia tu in ka mite ii nei le lamh sum le paaite laak sak tu in ngalte ka puak tu hi. 14A thu a la a heak ngei ngawlna ngamah a ngalte ii na ka seam sak tu hi, banghangziam cile ka thin uukna sia meikuang taw ki bangin a tawntungin kuang tu hi, ” hong ci hi.

15Tasia ciang keima in, “TOPA awng, he ni hi. Hong phawkin hong hu tan. Kei hong vawtsiate tungah phu hong la sak tan. Amate tungah na thin a uai le, amate ii kei hong thalup nop sia tangtung tu hi. Nangma hangin kei hong kiselno sia phawk in. 16Nangma in nong paupui

a na kammal theampo kong ngai hi. TOPA, Vaanglianbelpa, Pathian awng, keima in nangma aa ka hi a tua ahikom na kammalte in ka thin

hong nuam sak a hong lungdam sak hi. 17Keima in midangte taw ciammui in nuamsa in ka hun ka zangh bua hi. Nong thupiak ka nitna in keima bek in ka om a thin uukna taw ka kidim hi. 18Banghang ngim thathuak lai khi ziam? Banghangin ka liammate kibawl thei ngawl

ziam? Banghangin dam ngawl tu ziam? Khuakhal sung luitui kang bangin thin kiam sak tu hong sawm ni ziam?” ka ci hi.

19Hi thu taw kisai in TOPA in, “Nong heak kik ahile kong la kik tu a, ka naseampa na suak kik tu hi. Thu mannung ngawl po na son sangin thupha thu tak nei na son le, ka kamsang na suak kik tu hi, Nangin mipite kungah pai kul ngawlin, amate in nang kung hong zuan zaw tu uh hi. 20Hi mite tungah taungo ciitak taw a kivawt khua uumna dal taw kong kibang sak tu hi. Amate in nang hong sim uh hangin hong zo

batu hi. Nang hong dal tu le hong keamcing tu in nang taw kong om khawm tu hi. 21Mi ngilote le mi molngolte ii khut sung panin nang

kong suatak tu hi. Keima, TOPA in ka ci zo hi,” ci in zo kik hi.

Jeremiah 16
Jeremiah ii Nuntak zia TOPA Dei sakna
1TOPA in hi bangin kei hong paupui leleau hi. 2“Hi bang munah zi nei heak in a ta la nei heak in. 3Hi munah a piang tate tung le a nu a pate ii tungah bang thupiang tu cisia na tungah kong son tu hi. 4Amate a lauhuai natna taw in thi tu uh hi, kuama in amate kaa ngawl tu a, phum ngawl tu hi. Amate ii luangte lei ah eaklei bangin kithu tu hi. Amate sia ngal sungah kithat tu a, ahibale ngilkial pukthi in thi tu hi, a luangte sia vacimte le ngamsate ii an hi tu hi.

5“Mithi kaana inn sungah tum heak in. Kuama khuangai pui heak in. Ka mite sia thin nopna thupha ka pia nawn batu a, itna le hesuakna

ka nei nawn batu hi. 6Hi ngamah a hau le a zawngte thi tu uh a, kuama in amate phum ngawlin, kaa ngawl tu hi. A khuangaina a lak natu

in kuama in ama le ama nam taw ki at ngawl tu a, a sam uh meet ngawl tu hi. 7A it khat a thi ciang heenepna in, kuama in ama tui le an

neak pui ngawl tu hi. A pa le a nu a thite ngangawn kuama in khuangai pui ngawl tu hi.

8“Anneak poai vawtna inn sungah tum heak in. Anne tuidawn tu in amate taw tokhawm heak in. 9Vaanglianbelpa TOPA Israelte ii Pathian

Keima ii ka son tu thute ngai in. Ngual nopna awte, kipaakna le mopoai lungdamna awte ka thim sak tu hi. Hi lai ah om mihingte sia hi

thupiang mu tu in nungta tu uh hi. *

10“Hi thu teng amate tungah na son ciang, amate in, banghangin Keima in hi ngimna lian amate tungah theng sak khi ziam? A khialna bang ahi ziam? TOPA ih Pathian tungah bang khialna vawt ziam ci sia amate kidongh tu uh hi. 11Tasia ciang TOPA in hi bangin ci hi ci in amate tungah son in hong ci hi, ‘Na pu na pate in kei hong taisan in ngamdang pathiante ii na seamin bia uh hi. Amate in kei hong nusia in

ka thuhil nate ni ngawl uh hi. 12Ahihang no sia na pu na pate uh sangin sia zaw lai nu hi. Na vekpi in thinpui le mi ngilote na hi uh a, ka thu nong ni bua uh hi. 13Tua ahikom hi ngam panin note le na pu na pate ii heak ngei ngawlna ngamah kong notkeak tu hi. Tasia ciang tua munah a sun a zan in milim pathian dangte ii na na seam tu uh a, Keima in no kong hesuak batu hi.’ ”

Saltanna pan Heak kikna
14TOPA in, “Egypt ngam pan Israel mite a paipui a nungta Pathian ci in keima min taw mihingte a kiciam nawn ngawl hun hong theng tu hi. 15Amate in, saksang ngam pan le amate ka thethaangna ngamdang theampo panin Israel mite hong paipui a nungta Pathian ci in Keima min taw kiciam zaw tu uh hi. A pu a pate tungah ka piak sa amate ngamah ka cia sak kik tu hi. Keima TOPA in ka ci zo hi,” ci hi.

Hong tung tu Daan piakna
16TOPA in, “Ngasa mante tam mama hong pai tu in ka vaitha tu a, hi mite ka man sak tu hi. Tua zawkciang savaite tam mama ka vaitha  tu a, amate in muallian mualno tung theampo le suangte kilaklaw suanghawng sungah amate vai tu uh hi. 17Amate vawt theampo ka mu hi. Ka mai ah a kiseal bangma om ngawl hi; amate ii khialnate ka mu ngawl bangma om ngawl hi. 18Amate ii khialna le ngitlo nate hu in a zaa nii ka liau sak tu hi, banghangziam cile mithi luangte bang a nuntakna a nei ngawl milimte taw amate in ka ngam nin sak uh a, amate ii milim pathiante taw ka ngamsung dimh uh hi,” ci hi.

Jeremiah ii TOPA Muangin A Thungetna 19TOPA awng, nangma in kei hong dal a thahatna hong pia pa na hi hi; ka ngim nga laitakin nong hu hi. Leimong panin minam dangte nang kungah hong pai tu uh a, “Ka pu ka pate in pathian maan ngawl simngawl bangma dang nei ngawl hi, a nei uhte sia bangma kimang ngawl milimte bek ahi hi. 20Mihing khat in ama atu pathian vawt thei tu ziam? Vawt thei ngawl tu hi, a vawt thei a ahile, tuate in pathian tatak hi ngawl tu hi,” hong ci tu uh hi.

21TOPA in, “Tua ahile tu le a tawntung atu in ka vaangletna le ka thahatna sia minamte in ka he sak tu a; amate in TOPA ka hi sia he tu uh hi, ” ci hi.

0 comments:

Post a Comment