Laithiangtho Dokna (Jeremiah 17-18)

1. Lungtang tung suangmanpha mukzum taw bang ki at ziam?
a. Mawna
b. Lungdamna
c. Hesuakna

2. TOPA in akua puavawk tu ziam?
a. Milim bia te
b. A kiphasakte
c. Mihing a muangpa

3. Ngua zuh ngawl hang a thinmuang tu pa sia akua ziam?
a. Ama amuangpa
b. Israelte
c. Thuman lam atawnte

4. Kua in, tuuidang a op vacim bang hi ziam?
a. Tualthatte
b. Leilot tetti pangte
c. a maan ngawl sum ngapa

5. Amate tuasiat atawk natu Jeremiah in TOPA ___ hi.
a. thuum tawntung
b. sawlngei ngawl
c. muang hi

6. Bangni in vanh pua ngawl tu ziam?
a. Tacil nei ni
b. Sabbath ni
c. Ngualzawni

7. TOPA in Jeremiah akua ii inn haw sak ziam?
a. Beal seakpa
b. Kumpipa
c. Thiampipa

8. Tungman apha bua le tua tungman sia ki ___ hi.
a. vawk
b. a phat dong kipua tu
c. nadang khat in kivawt kik

9. Siatna pan akikheal kik le ___ ka thuak sak bua tu ci hi.
a. siatna
b. natna
c. kialpi

10. TOPA in akuate siatna pia tu in ka kinging ci ziam?
a. Egypte
b. Assyriate
c. Jerusalem

11. ___mualsang te vuuk in tuam tawn tung hi.
a. Sinai
b. Lebanon
c. Olive

12. Jeremiah in TOPA tung ah a ngalte ___ in ci hi.
a. hesuak
b. sucip in
c. suataak siat

Jeremiah 17
Judah ii Mawna le Daan A kipiakna
1TOPA in, “Judah mite awng, na mawna uh sia thik laikung taw ki at hi; tuate sia na lungtang tungah suangmanpha mukzum taw ki at in, na biaktau kinghte tungah kikhen hi. 2Na mite in pathian nu Asherah atu in ngamsung thingkung hing theampo ii kung, mualno dawnte le mual liante tungah, 3a kiphut milimte le biaktaute bia uh hi. Na ngamsung theampo uh ah na vawt uh khialnate theampo hu in na neisa na lamh sa uh le na sum na paaite na ngalte in kong sut sak tu hi. 4Kong piak sa ngam zongh na taan tu uh a, na heak ngei ngawl uh ngam khat ah na ngalte ii na kong seam sak tu hi, banghangziam cile ka thin uukna sia meikuang bang hi a, a tawntung in kuang tu hi,” ci hi.

TOPA pauna A nanam
5TOPA in, “Kei kung panin tai a mihing a muang pa,
a thi thei mihing thahatna a suang pa sia
Keima in ka puavawk tu hi.
6Ama sia senneal ngamah a po
bangma dang a po ngawl kongaw ngam ci al ngamah a khang,
sawlpaang kung khat bang ahi hi.
Ama tungah thupha bangma piang ngei ngawl hi.
7“Ahihang kei hong muang pa ahile thupha ka pia tu hi.
8Ama sia luihui ah a po
a zung luitui sungah a tha thingkung khat bang ahi hi.
A teete hing tan ahikom
ama in nisat khuakhal hun hong thet ciang phamaw sa tuan ngawl hi;
ngua a zu bua hial zonghin
ama in thinngim tuan ngawlin; a nga nga tan hi; *
9“Akua in mihingte thinsung he thei ziam?
tabangza a ngual a theam thei a dang bangma om ngawl hi;
a natna nasia lei ahikom a dam thiang tu haksa tu hi.
10Keima, TOPA in, mihingte ngaisutna ka pheet a,
a thinsungte ka sitthiang hi.
Ama nuntakna zia le
a ngamtatzia taw kizui in ka pia kim hi,” ci hi. *
11Thu maan ngawl a sum nga pa sia ama ii tuui ahi ngawl
tuuidang a op vacim khat taw kibang hi.
A khan tungto laitak ma in ama in a haunate taan tu a,
a tawpna ah bangma kimanna nei ngawl a mamaw khat suak tu hi.
12Ih Biakinn sia a kipatciil pan ma in muallian khat tungah a ding
a minthang kumpi tokhum khat taw kibang hi.
13TOPA awng, nangma in Israel mite ii lam et pa na hi a,
nang hong taisan mihingte theampo a mai uh kizum sak tu hi.
Amate sia leivui sungah min ki at bangin bo vadi tu uh hi,
banghangziam cile amate in
nuntakna ciktui thiangtho ahi TOPA nangma, hong nusiat hang ahi hi.
Jeremiah in TOPA tungah Huna Ngen
14TOPA awng, hong dam sak lete ka dam thiang tu a; hong hon lete ka suakta tatak tu hi; kong pok pa sia nangma bek na hi hi!

15Mihonte in kei tungah, “TOPA ii ei hong tawnnate koi sungah om ziam? Tu in tuate hong tung sak tahen!” hong ci uh hi.

16Ahihang, TOPA awng, amate tungah tuasiatna na thet sak tu kong sawl ngei bua a; amate ii ngim a thuak tu zongh ka dei sak bua hi. TOPA awng, nangma in hi thu na he a; ka sonte na he hi. 17Kei hong lau sak heak in; ngimna hong thet ciang ka belpa na hi hi. 18Kei hong vawtsia mihingte a mai mawl sak in a, ahizong TOPA awng, kei hong tong sak tan. Amate lau sak in a, ahihang kei hong lau sak heak in. Amate tungah tuasiatna tung sak in a amate a bebek in susia in.

Sabbath Tanzia
19TOPA in kei tungah, “Jeremiah awng, pai tan a Judah ngam kumpite ii khuapi sung tumna le pusuana Mipite ii Kongpi ah ka thu son tan; taciang Jerusalem kongpi dangte theampo ah pai tan. 20Kumpite le Judah mite theampo le Jerusalem khua sungah a teang mihingte theampo le hi kongpite pan a tum mihingte theampote in ka thu a ngai natu in son in. 21A nuntakna uh a it le Sabbath ni in vanh pua heak hen ci in amate tungah son in; Jerusalem kongpite kantan in bangma tumpui heak hen, * 22ahibale Sabbath ni in a inn uh panin bangma puapial pui heak hen. Sabbath ni in amate in naseam ngawl tu uh hi; a pu a pate tungah thu ka piak bangma in Sabbath ni thiangtho sak tahen. * 23A pu a pate in ka thu hong ngai ngawl a, hong nadon ngawl hi. Amate a thin pui in; ka thu hong ni nuam ngawlin ka hilnate saang nuam ngawl pumsai uh hi.

24Ka thu piak theampo hong nit natu in hi mihonte tungah son in. Sabbath ni in hi khuapi kongpite kantan in amate in bangma tumpui ngawl tu hi. Amate in Sabbath ni sia ni thiangtho in tang tu uh a, na bangma seam ngawl het tu uh hi. 25Taciang a kumpite le a uliante in Jerusalem kongpite ah tum tu uh a David ii nei kumpi vaangletna nei tu uh hi. Judah mite le Jerusalem mite taw amate siphu leang tung le siphu tungah tokhawm tu uh a, Jerusalem khuapi sia mihing dim tawntung tu hi. 26Mihingte sia Judah khuapite le Jerusalem khua a kiim a paam khuate panin hong pai tu uh hi; amate in Benjamin ngam pan, mualpeang pan, mualliante pan le Judah ngam thangsang panin hong pai tu uh hi. Amate in ka Biakinn ah meihal biakpiakna le a dadang biakpiaknate, antang le paaknamtui taw biakpiaknate, lungdam ko biakpiaknate hong paipui tu uh hi. 27Ahihang amate in ka thu hong nit kul tu a Sabbath ni sia ni thiangtho in a tan uh kul tu hi. Tua ni in amate in Jerusalem kongpite kantan in vanh bangma pua ngawl tu uh hi. A pua uh ahile Jerusalem kongpite mei taw ka hal tu hi. Mei in Jerusalem khua kumpi innte kaangtum tu a kuama in phel zo ngawl tu uh hi,” hong ci hi.

Jeremiah 18
Beal seakpa ii Inn ah Jeremiah Haw
1TOPA in kei tungah, 2“Beal seakpa ii inn ah haw suk in a, tua munah thu kong son tu hi,” hong ci hi. 3Tua ahikom tua munah ka haw a, beal seakpa a leangmui ah naseam ka mu hi. 4Beal a seak ciang a tungman a pha bua ahile tua tungman sia nadang khat in vawt kik hi.

5Taciang TOPA in kei tungah, 6“Beal seakpa in tungman taw a dei babang a vawt bangma Israel mihing note tungah ka dei babang kong vawt thei natu thu nei ngawl khi ziam? Beal seakpa khut sungah a om tungman bangin note in ka khut sungah na om uh hi. 7Hun khat papo ciang minam khat ahibale kumpi ukna ngam khat sia a zung pan longh tu khi hi, thiaktan tu khi hi, ahibale susia tu khi hi ci ka hi ta zong, 8tua minam in a siatna panin a kikheal kik a ahile siatna ka thuak sak tu hi ka ci sa sia ka thuak sak batu hi. 9Ahitazong, minam khat ahibale ngam khat ka phut tu, ka sa tu hi ka ci zawkciang, 10tua minam in ka thu hong ni bua a, a sia a vawt veve le tua minam tungah phatna ka vawt tu ka ci sate ka vawt nawn batu hi. 11Tua ahikom tu in, Judah mite le Jerusalem mite kungah amate ii siatna tu tupna nei a amate daan pia tu in a kinging sa in ka om sia son in. Khialna vawtin a nuntaknate a kikheal natu, a omzia le a nasepnate uh a lai natu in amate tungah son in. 12Amate in, ‘Hi ngawl hi, banghang kikheal tu khu ziam? Koma uuk bangin mihing thinpui le mihing ngilo hi tu khu hi,’ ci in zo tu uh hi,” hong ci hi.

Mihonpi in TOPA Nial
13TOPA in,
“Nidang in tabang thu
piang ngei zo ziam minam theampo tungah dongh vun.
Israel mite in a kiitakhuai na khat vawt zo uh hi!
14Lebanon mual saangte vuuk in tuam ngawlin om ngei ziam?
Mualtung pan hong luang a vot luite kang ngei ziam?
15Ahihang ka mite in kei hong mangil zo uh a;
milimte kungah ngim namtui hal uh hi.
A tot natu lampi ah lutu ahi uh manin,
a tot ngei lamlui zui nawn ngawlin a kisial ngawl lamzinte tawn uh hi.
16Amate in hi ngam sia a tawntung
a ki nomu tu in a kiitak huai ngam suak sak uh hi.
Tua lampi a tawn mihingte theampo in tua ngam a mu uh ciang
mulkim huai sa tu uh a, lamdang sa in a lu pei tu uh hi.
17Keima in ka mite a ngalte mai ah,
nisuana sang vui ii leivui a seamkeak bangin ka thethaang tu hi.
Amate ka nungngat tu a;
haksatna hong thet ciang ka hu batu hi,” ci hi.
Jeremiah Kithasawm
18Taciang mihonpi in, “Jeremiah taw kisai in na pawlkhat seam sin tawng! Hong hil tu in thiampite, ngaisutna hong pia tu in miciimte le Pathian ii thu hong son tu in kamsangte om tawntung tu hi. Ama tungah thu ih vawt tu a, ama thuson peuma ih ngai batu hi,” ci uh hi.

19Taciang hi bangin thu ka ngen hi, “TOPA awng, ka thusonte hong ngai tan a kei thu taw kisai in ka ngalte ii sonnate ngai in. 20A pha sia a sia taw lo kik tu ma ahi ziam? Tua hi napi amate in ka taaksuk natu in leidum khat to zo uh hi. Na kungah kong pai a, na thin uukna taw amate na vawtsiat ngawl natu in amate luangin kong son sia phawk in. 21Ahihang tu in TOPA awng, a tate uh ngilkial in pukthi sak in; amate ngal sungah thi sak in. Numeite a pasalte le a tate in thi san sak in; pasalte sia natna taw thi sak in, tangvalte ngal kisimna ah thi sak in. 22Hil khol ngawlin mi ngilo hon khat amate innte phuul tu in pai sak in; amate lau in au sak in. Amate in ka taak natu in dum khat to uh a, hong mat natu in thaang hong sia uh hi. 23Ahihang TOPA awng, amate ii kei hong thasawmnate theampo na he hi. Amate ii ngitlo nate mai sak heak in a, a mawna mai sak heak in. Nangma mai ah amate ngual lel sak in a; na thin uuk lai tak ma in amate sucip in” ka ci hi.

0 comments:

Post a Comment