Laithiangtho Dokna (Psalm Late 119-120)

1. ___taw ama thu a nite in mihing lungdamte hi.
a. Antanna
b. A thin theampo
c. Upna

2. Ih thiantho natu bangbangh in kikeam tu ziam?
a. Hanciamna
b. Thungetna
c. Thupiak nitna

3. Laphuakpa in, hauna sang bang deizaw ziam?
a. Kilemna
b. Minphatna
c. Thukham nitna

4. Na thukham in lungdamna ii naak hi bua le ___ka thi tu hi.
a. thuakna taw
b. khuangai in
c. ziaetna

5. Laphuakpa in nikhat bangza vei lungdamko ziam?
a. Sali
b. Nga
c. Thum

6. Ngam amh ___ bangh in kavakthap hi.
a. Vakhu
b. Tuuno
c. Kealtal

7. Leeilot theite le ngual theam theite pan hong ___ tan.
a. lamsang
b. hun
c. pimu sak

8. Leilotte bang taw daan kipia tu ziam?
a. Leilot thu taw
b. Thaltang
c. Meikam sa

9. Akuate ii kawm ah ten sia Meshech ah ten bangh hi ziam?
a. Judah mite
b. Thuumhte
c. Leilotte

10. Kadar mite sia bangbangh hi ziam?
a. Leilot thei
b. Kiphasak
c. Thuman in citak

11. Laphuakpa sia a kuate taw ateenkhop zawk ngei zo ziam?
a. Kilemna dei ngawlte
b. Milim biate
c. Mihing paktatte

12. Bang ason ciangin amate in ngalvai hawm ziam?
a. Kido tu thu
b. Kilemna
c. Ngam khantona thu

Psalm Late 119
TOPA Thukham
1TOPA thukham bangin nungta a,
a nuntakna a sit baang ngawlte in mihing lungdamte ahi hi.
2Ama thupiakna a zuite,
a thin theampo taw ama thu a nite in mihing lungdamte ahi uh hi.
3Amate in a maan ngawlte ngamtat in a nei ngei bua uh a;
TOPA lampi a zui uh hi.
4TOPA awng, nangma in na thukhamte ko nong pia zo a,
thumaan takin ka nit natu nong sawl hi.
5Nong hilnate thumaan tak a,
ka kepcing natu sia bangza in lametna nei khi ziam!
6Na thupiakte theampo ka nadon le,
ka mai hong zum sak batu hi.
7Thutang taw na thu khennate ka heheak ciangin,
thinsung thiangtho taw nang kong pok tu hi.
8Na thukhamte ka ni tu hi,
Kei hong taisan ngei heak in!
TOPA Thukham Nitna
9Khangno khat in ama nuntakna
bangbangin a thiangtho in keam cing thei tu ziam?
Na thupiakte nitna taw keamcing thei tu hi.
10Ka thin theampo taw nang atu sep tu ka hanciam hi;
na thupiakte nit ngawlna panin hong keamcing tan.
11Nang tungah kong khial ngawl natu in
na thukhamte ka thin sungah ka keam hi.
12Nang kong pok hi, TOPA awng,
na lampite hong hil tan.
13Thukham nong piak sa theampo
nging takin ka lo kik tu hi.
14Hau mama tu sangin
na thukham zuina sungah lungpilna ka nei zaw hi.
15Na lam laknate ka kan a,
na hilnate ka en thiang hi.
16Na thukhamte sungah nop sakna ka nei hi;
nong thupiak nate ka mangil batu hi.
TOPA Thukham sungah Lungdamna
17Ka nuntak thei natu le
nong hilnate kong nit thei natu in,
kei na naseampa tungah hong dik tan.
18Na thukham sungah a lamdang
thumaante ka mu thei natu in ka mittang hong hon sak tan.
19Hi sung leitung ah keima in tawm vei bek ka om tu hi;
na thukhamte kei mun pan hong seal heak in.
20Na thu khennate a tawntung in ka he nuam a,
thangaina taw ka thinbot hi.
21A kiphasakte na tei hi;
na thupiakte a ni ngawlte haamsiatna thuak tahen.
22Na thukham ka kepcing hu in kei hong lang a,
hong zawngsakte taw hong kipeal sak tan.
23Ngam ukte in kisitua in kei hong sawm uh hi,
ahihang nangma hilnate ka kan tu hi.
24Na lam laknate in nop sakna kei hong pia hi;
tuate in keima ngaisutna hong piate ahi hi.
TOPA Thukham Nit natu Tupna lian
25Leivui sungah lelna taw ka lum hi;
nong kamciam sa bangma in hong hing sak kik tan.
26Ka vawt sa theampo
nang tungah kong pualaak a, nangma in nong zo hi;
na lampite hong hil tan.
27Na thukhamte ka tel thei natu in hong hu tan,
tua ciangin a lamdang nong hilnate ka ngaisun tu hi.
28Heena in keima hong khucip hi;
nong kamciam sa bangin hong hat sak tan.
29A maan ngawl lampi ka zui ngawl natu in hong keam tan a,
taciang na phatna taw kizui in na thukham hong hil tan.
30Thu nit tu ka teal zo hi;
na thu khennate ka nadon zo hi.
31Na lam lakna ka zui zo hi, TOPA awng;
maizum hong nga sak heak in.
32Na thukhamte thalawp takin ka ni tu hi,
banghangziam cile nangma in tel theina tam zaw nong pia tu hi.
Tel thei natu Thungetna khat
33TOPA awng, na thukhamte ii khiakna hong hil tan,
tua hile a tawntungin tuate ka ni tu hi.
34Na thukham kei tungah hong thiang son tan,
tua hile ka ni tu a; ka thin theampo taw ka keamcing tu hi.
35Na thupiakte hong ni sak tan,
banghangziam cile tuate sungah lungdamna ka nga hi.
36Hau natu deina sangin
na thukham nit nopna thin hong pia zaw tan.
37A manh nei ngawl nate nadon na panin hong keamcing tan a,
nong ciam sa bangma kei tungah hong dik tan.
38Na thu hong nite tungah na vawt kamciam sia
na naseampa kei tungah hong tung sak tan.
39Lan zazan thuak tu ka launa panin hong suakta sak tan;
na thu khennate in lamdang mama hi!
40Na thupiakte ka ni nuam hi;
nuntakna thak hong pia tan,
banghangziam cile nangma in thumaan thutang na hi hi.
TOPA Thukham Muanna
41TOPA awng, kei bangza hong it ni ziam hong lak tan a,
na kamciam sa taw kizui in, kei hong ngum tan.
42Tasia ciang kei hong langte ka zo thei tu hi
banghangziam cile na kammal ka muang hi.
43A tawntung in thumaan hong pau thei sak tan
banghangziam cile ka lametna sia
nangma thukhen nate sungah om hi.
44Na thukhamte a tawntung pan
a tawntung dongin ka ni tu hi.
45A cialcing suatakna sungah ka nungta tu hi,
banghangziam cile na hilnate nit tu ka hanciam hi.
46Kumpipate mun ah na thupiaknate ka son tu a,
maizum in ka nei batu hi.
47Na thupiakte nitna sungah nop sakna ka nga hi,
banghangziam cile tuate ka it hi.
48Na thukhamte thasia in ka it hi;
na lamlakna a thukin ka ngai sasun tu hi.
TOPA Thukham tungah Lungmuanna
49Na naseam pa kei tung a, nong kamciam sia ciamtee in,
tasia in lametna hong pia hi.
50Ka ngimna sung ngangawn ah keima hong kiheneam hi,
banghangziam cile na kamciamna in nuntakna hong pia hi.
51A kiphasakte in a tawntung in kei hong zawnsak vawt hi,
ahihang na thukham panin ka pial ngei bua hi.
52Taanghlai a na thukhennate ka ciamtee a,
tuate in heenepna hong pia hi, TOPA awng,.
53Mihing ngilote ii na thukham a paltan ka mu ciangin
thin uukna taw ka kidim hi.
54Leitung ka nuntak hun tom no sungah
na thupiakte huvau la in ka phuak hi.
55Zanin nang kong phawk hi, TOPA awng,
taciang na thukhamte ka ngaisun hi.
56Na thupiakte zui sia ka lungdam na ahi hi.
TOPA Thukham tungah Kipumpiakna
57Ka dei theampo sia nangma na hi hi, TOPA awng;
na thukhamte nit tu in kamciam ka vawt hi.
58Nong kamciam sa bangma in kei tungah
hesuakna nong nei natu in ka thin theampo taw kong ngen hi!
59Ka ngamtat nate ka ngaisun zo a,
nong lam laknate zui natu kamciam kong pia hi.
60Na thupiakte nit natu
haisaang ngawlin ka manlang hi.
61Mihing ngilote in thaang taw kei hong sia zo hi,
ahihang na thukham ka mangil bua hi.
62Zan kimlai in thutang taw na thu khennate
hangin nangma pok tu in ka khanglo hi.
63Keima in nang atu hong sep sakte theampo le,
na thukhamte a nite theampo ii lawm ka hi hi.
64TOPA awng, leitung in tatsat ngawl na itna taw kidim hi;
na thupiakte hong hil tan.
TOPA Thukham ii Manphatna
65TOPA awng, nangma in na ka ciamna kholet zo a,
na naseam pa kei tungah nong dik hi.
66Ciimna le heakna hong pia tan,
banghangziam cile na thupiaknate ka muang hi.
67Daan nong piak maa in ka pai khial bul hi,
ahihang tu in na kammal kong ni hi.
68Nangma in na pha a, na thuthiam hi!
Na thupiakte hong hil tan.
69Mihing kiphasak te in kei huvau leeilot thu son zo uh hi,
ahihang na lam lakna ka thinsung theampo taw ka zui hi.
70Hi mihingte in tel theina bangma nei ngawl hi,
ahihang kei in na thukham sungah nuam ka sa hi.
71Ka daan thuakna in kei atu in pha hi,
banghangziam cile na thupiakte hong he sak hi.
72Leitung ah sum le pai theampo sangin
kei tungah nong piak na thukham in kei atu in khiakna nei zaw hi.
TOPA Thukham sungah Thukhenna A maan
73Nangma in kei nong bitphua a, a bit in nong keam hi;
telthiam theina hong pia tan, tua hile na thukhamte ka he tu hi.
74Nang hong zaktate in
kei hong mu uh ciangin a lung a dam tu uh hi,
banghangziam cile na kamciam ka muang hi.
75TOPA awng, na thukhenna sia tang hi ci in ka he hi,
taciang daan nong piak zongh nangma in thumaan na hi hang ahi hi.
76Na naseampa kei tungah nong kamciam sa bangma in
tatsat ngawl na itna in kei hong heeneam tahen.
77Kei hong hesuak tan, tua hile ka nungta tu hi,
banghangziam cile na thukham sungah nop sakna ka nei hi.
78A kiphasak te in a maan ngawl pipi in
kei maw hong suan ahikom maizumna nga tahen;
kei ka hile nangma lam lakna a thuk takin ka ngaisun tu hi.
79Nang hong zaktate
na thupiakte a hete theampo kei kungah hong pai tahen.
80Lelna maizumna taw ka kipeal natu in
na thupiakte a cing takin hong zui thei sak tan.
Suaktak natu Thungetna
81TOPA awng, nong ngup tu kong ngaa na in,
kei ka tha tul zo a; na kammal sungah muanna ka nei hi.
82“Bang hun ciang hong hu tu ni ziam?” ci in kong dawdok kawmin
nong kamciamte hong tung ka tawm maw
ci in ka e-etna in ka mit taak ngiingeei zo hi.
83A kivawk sa savun tuithawl bangin
kei sia kimanna ka nei nawn bua hi;
ahihang na thupiakte ka mangil bua hi.
84Bangtan vei hong ngak lai tu khi ziam?
Kei hong siatvawtte bang hun ciangin daan pia tu ni ziam?
85Nang thukham hong ni ngawl mihing kiphasak te in
kei hong sia natu in vuum a to zo uh hi.
86Na thupiakte a bupin muan thamman hi;
mihingte in leeilot thu taw kei ngim hong pia hi, hong hu tan.
87Amate in kei hong thatlum dektak zo hi,
ahihang na thupiakte ka ngaingon ngei bua hi.
88Tatsat ngawl na itna hu in kei tungah hong dik tan,
tua hile na thukhamte ka ni thei tu hi.
TOPA Thukham Upna
89TOPA awng, na kammal in a tawntungin kip tu a;
vantung ah a tawntung in om hi.
90Na thumaanna sia khang theampo dong kikhomsuan hi;
nangma in simlei sia a omna mun ah na nga a
tabangma in om top hi.
91Na theampo tuni dong amate om babang tekin om hi,
banghangziam cile nangma thupiak hang le
amate theampo in na naseamte a hi siat uh hang ahi hi.
92Na thukham in ka lungdamna ii naak hi ngawl hi thong le
ka thuakna taw ka thi zo tu hi.
93Na lam laknate ka ngaingon ngei batu hi,
banghangziam cile tuate taw keima a nungta in nong keam hi.
94Kei sia nangma aa, ka hi hi- hong hun tan!
Na thupiakte nit tu ka hanciam zo hi.
95Mihing ngilote in kei hong thatlum tu in hong ngak hi,
ahihang na thukhamte a thukin ka ngai susun hi.
96Na theampo sia a kiciangtan in om hi ci in ka he hi;
ahihang na thupiakte kicing hi.
TOPA Thukham Itna
97Na thukham dik mama ka sa hi!
Nitangtum in ka ngaisun hi.
98Na thupiak sia kei taw a tawntung in omkhawm a,
kei sia ka ngalte sangin hong ciim zaw sak hi.
99Ka syate theampo sangin ka tel zaw hi,
banghang ziam cile keima in nong lam laknate thuk takin ka ngai susun hi.
100Pasal haamte sangin ciimna lian zaw ka nei hi,
banghangziam cile na thupiakte ka ni hi.
101Ngamtat phat ngawlna theampo ka pial hi,
banghang ziam cile na kammal ka ni nuam hi.
102Na lam laknate ka ngaingon bua hi,
banghangziam cile nangma in ka syapa na hi hi.
103Na lam laknate thum mama a,
khuaitui sang ngangawn in thum zaw hi!
104Na thukhamte panin ciimna ka nga hi,
tua ahikom a sia ngamtatna theampo ka ensan hi.
TOPA Thukham pan Khuavak
105Na kammal in kei lam hong lak tu
mei-inn hi a ka lampi atu khuavak ahi hi.
106Na lam lakna maante nit natu in ciliap tak a,
ka vawt kamciam sia ka len tu hi.
107TOPA awng, ka thuaknate sia nasia mama takpi hi;
nong kamciam sa bangma in hong nungta sak tan.
108TOPA awng, lungdam ko ka thungetna hong saang tan a,
na thupiakte hong hil tan.
109Ka nuntakna piak tu in ka kinging tawntung hi;
na thukham ka mangil bua hi.
110Mihing ngilote in thaang taw kei hong sia hi;
ahihang na thupiakte ni ngawl in ka om bua hi.
111Na thupiakte sia a tawntung in keima neisa ahi hi;
tuate in ka thin nopna ahi hi.
112Ka thi ni matengin
na thukhamte nit tu in ka khensat zo hi.
TOPA Thukham sungah Ngam muanna
113Nang tungah a kicingin hong thumaan ngawlte ka ensan hi,
ahihang na thukham dik kisa hi.
114Nangma in kei hong hungpa le hong dalpa na hi a;
na kamciam sungah lametna ka nei hi.
115Kei kung panin tai vun, no, mawnei mite awng.
Ka Pathian thupiakte ka ni tu hi.
116Nong ciam sa bangma in thahatna hong pia tan,
tua hile ka nungta tu hi;
ka lametna sungah hong thinkiam sak heak in!
117Ka suatak natu in hong len tan,
taciang na thupiakte a tawntung in ka thudon tu hi.
118Na thukhamte a ni ngawl peuma na nial hi;
amate thimthel ngiimnate sia a mannung bua hi.
119A ngilo theampo sia ninbu lomtangh bangin na ngaisun hi,
tua ahikom na lam laknate dik ka sa hi.
120Nangma hangin ka lau a,
na thukhenna hu in launa taw ka kidim hi.
TOPA Thukham Nitna
121A phate le a maante ka seam zo hi;
ka ngalte khut sungah hong nusia heak in!
122Na naseampa na hu tu sia kamciam pia in;
a kiphasak te in hong zothaw sak heak in.
123Nong hut natu kong etna,
nong kamciam sa ngupna ka etna in ka mit taak ngiingeei zo hi.
124A tatsat ngawl na itna taw kizui in
kei tungah hong ngamta tan a, na thupiakte hong hil tan.
125Keima in na naseam pa ka hi hi;
na hilnate ka tel thei tu in, tel theina hong pia tan.
126TOPA awng, thu na khen tu hun zo hi,
banghangziam cile, mihingte in na thukham hong ni ngawl hi.
127Kham le, kham pha belte sangin
na thupiakte ka dei zaw hi.
128Tua ahiciang na lam laknate theampo ka zui a,
a maan ngawl lam theampo ka ngaimaw hi.
TOPA Thukham Nit nopna
129Na hilnate lamdang a;
ka thin theampo taw ka zui hi.
130Na hilnate na thiang sonna in khuavak pia a,
a ciim ngawlte ciimna pia hi.
131Na thupiakte ka deina hangin
kamkaa in ka haihaw liang hi.
132Kei sang hong nga tan a,
nang hong itte theampo tungah na ngamtat bangma in kei hong hesuak tan.
133Nong kamciam sa bangin liik natu pan hong keam tan a;
siatna in hong zo sak heak in.
134Na thupiakte ka nit thei natu in
kei hong vawtsiate kung panin hong hun tan.
135Nong ompuina taw thupha hong pia tan a,
na thukhamte hong hil tan.
136Mihingte in na thukham hong nit ngawl hu in
ka thitui ngun bangin luang hi.
TOPA Thukham Maanna
137TOPA awng, nangma in
thumaan thutang na hi a, na thukhamte maan hi;
138zui tu ngeina na piakte sia tang sinsen in maan hi.
139Ka ngalte in, na thupiakte
thusim ngawl ahikom ka thin uukna sia, ka sungah mei bangin kuang hi.
140Na kamciam sia taknei mama hi!
Dik ka sa mama hi!
141Kei sia a thupi ngawl ka hi a, zawnsak ka thuak hi,
ahihang na hilnate ka ngaingon bua hi.
142Na thutanna sia a tawntung in kikhomsuan tu a,
na thukham sia a tawntung in maan hi.
143Ngimna le thintoina taw ka kidim hi,
ahihang na thupiakte in lungdamna hong puak hi.
144Na lam laknate a tawntungin tang hi;
tel theina hong pia tan, tua hile ka nungta tu hi.
Suatak natu Thungetna khat
145Ka thin theampo taw nang kong sam hi;
TOPA awng, hong zo tan, taciang na thupiakte ka ni tu hi.
146Nang kong sam hi; hong hun tan,
tua hile na thukhamte ka tang tu hi.
147Nisua ma in hu ngenin nang kong sam hi;
na kamciam sungah lametna ka koi hi.
148Na lam laknate ka thuk ngaisutna in zan khuateak in
khangciim in ka lum hi,
149Nong itna in tatsat ngawl ahikom hong za tan,
TOPA awng; nong hesuakna hong lak tan a,
ka nuntakna hong kepcing sak tan.
150Mihing tatkhate in kei hong neak va-ial hi,
amate sia nang thukham a tang ngei ngawlte ahi hi.
151Ahihang TOPA awng, nangma in keima nai ah nong om a,
na thupiakte theampo kho top hi.
152Khua ngeilai in na lam laknate ka za a;
tuate sia a kikhom top tu in na vawt hi.
Hu nget Maangkaana
153Ka thuakna hong en tan a, hong ngum tan,
banghangziam cile na thukham ka ngaingon bua hi.
154Ka thu hong nan pui tan a, hong suakta sak tan;
nong kamciam sa bangin hong hun tan.
155A ngilote kingum ngawl tu hi,
banghang ziam cile amate in na thukhamte a ni bua uh hi.
156Ahihang, TOPA awng, na mulkim theina in lian hi;
na hesuak theina hong lak tan a hong hun tan!
157Keima in ngal tam mama le hong zothaw thei tam mama ka nei hi,
ahihang na thukhamte ka ni khial ngei bua hi.
158Tua ngual leeheak theite ka et ciangin kiihuai ka sa hi,
banghangziam cile amate in na thupiakte a len bua uh hi.
159TOPA awng, na lam laknate
bangza in diksa khi ziam cisia, hong ngaisun tan.
Na itna in kikheal ngei ngawl hi, tua ahiciang hong hun tan!
160Na thukham laingil in thumaanna hi a,
a tang na thukhen nate theampo sia a tawntungin kip hi.
TOPA Thukham tungah Kipiakna
161Mihing vaangliante in a kilawm ngawlin kei hong do hi,
ahihang na thukham ka thasia hi.
162Na kamciamte hu in ka lungdam mama hi.
Sum kholna mun a mu khat bangin ka lungdam hi.
163Leeilot thu theampo ngaimaw in ka huatsa hi,
ahihang na thukham ka it hi.
164Thutang a, na thukhennate hu in
nisim in sali vei nang tungah lungdam kong ko hi.
165Na thukham a itte in a bit lungmuanna nei a,
amate a liik sak thei bangma a om bua hi.
166TOPA awng, nong huut tu ngakin ka om a,
nong sawl po ka vawt hi.
167Na hilnate ka ni a;
ka thinsung theampo taw tuate dik ka sa hi.
168Na thupiakte le nong hilnate kong ni hi;
ka sep ka vawt theampo na mu hi.
Hu nget Thungetna
169Hu ngen a kong auna nang kung hong theng tahen,
TOPA awng!
Nong kamciam sa bangin tel theina hong pia tan!
170Kong thu ngetna hong ngai tan a,
na kamciam sa om bangin hong hun tan!
171A tawntung in nang kong pok tu hi,
banghangziam cile nangma in na thukhamte nong hil hi.
172Na thukham tungtaang ah la ka sa tu hi,
banghangziam cile na thupiaknate tang hi.
173Kei hong hu tu in a tawntung in hong kinging tan,
banghangziam cile na thupiakte ka zui hi.
174TOPA awng, hong ngum thei nong huna sia ka thangai mama a,
na thukham sungah lungdamna ka mu hi.
175Nang kong pok thei natu in nuntakna hong pia tan;
na lam laknate in kei hong hu tahen.
176Ngam am tuuno bangin ka vakthap hi.
Tua ahikom hong pai in na na seampa keima hong zong tan,
banghangziam cile na thukhamte ka ngaingon bua hi.


Psalm Late 120
Hu nget Thu ngetna
1Ngim ka nga ciangin TOPA ka sam a,
ama in hong zo hi.
2Hong hun tan, TOPA awng,
leeilot theite le ngual theam theite pan hong hun tan.
3No a leeilot theite awng, Pathian in bang hong law tu ziam?
Bangbangin daan hong pia tu ziam?
4Ngalkapte thaltang hiam le
meikam sa taw daan hong pia tu hi.
5Note kawm ah ten sia Meshech ah ten bang ahizong,
Kadar mite kawm sungah ten bang ahizong in sia hi.
6Kilemna a dei ngawlte taw ka ten khop zawk ngei lalawm zo hi!
7Kilemna ka son ciangin
amate in ngalvai hawm uh hi.

0 comments:

Post a Comment