Laithiangtho Dokna (Jeremiah 19-20)

1. TOPA in ___ lei tu in hong sawl hi.
a. sathau
b. naamsau khat
c. leibeal khat

2. TOPA in bang kuam ah pai tu in Jeremiah sawl ziam?
a. Gaza
b. Rephariam
c. Hinnom Kuam

3. "Hi mun sia mawnei ngawlte ii ___ taw kidim hi"
a. mawnei ngawlte chisan
b. kaana le ha ngoaina
c. huu ngetna

4. Siatna tun hang in, khua kantante ___ tu uh hi.
a. in awlmawk ngawl
b. in ingh liang
c. in huuna pia

5. Khuapi sia atamtham bangtaw kitengat ziam?
a. Leibeal
b. Suang manpha
c. Lungtang

6. Israelte thin pui in ___ ahikom daan tawk hi.
a. theam thuak
b. TOPA sonte ngai ngawl
c. ngal sim tawntung

7. Jeremiah le Thiampi Pashhur ___ hi.
a. Ki-it mama uh
b. Thungen khawm
c. Kilem ngawl

8. Jeremiah sia Biakinn ukpa in banglaw ziam?
a. Saat zazan
b. Zaataak pia
c. Thikkol bul

9. Jeremiah kihenna thikkol akua in sua ziam?
a. Pashhur
b. Pathian
c. Meingongnu

10. Pashhur sia koisung ah kiphum tu ziam?
a. Hebron
b. Babylon
c. Mithite khua

11. Jeremiah na Kua ii theam ka thuak ci ziam?
a. TOPA
b. Pathian he ngawlte
c. Kumpipa

12. TOPA in Jeremiah thatlumh hi le koisung sia athan hi tu ci ziam?
a. Vantung
b. A nu ngil
c. Jerusalem

Jeremiah 19
A kitam Thambeal
1TOPA in leibeal khat lei tu in hong sawl hi. Ama in ulian pawlkhat le thiampi sung pan a uhaam zawhiat pawlkhat paipui in, 2taciang Potsherd Gate Kongpi kantan in Hinnom Kuam ah pai tan; hong ci si hi. Tua munah hong son tu thute a son tu ka hi hi. * 3TOPA in hi bangin son tu in kei hong sawl hi, “Judah kumpite le Jerusalem khua mite awng, Keima, Vaangliangbelpa TOPA Israel mite ii Pathian, ii kong son tu thu ngai vun, hi munah tuasiatna khat ka theng sak tu a tua thu a za theampo ingh keikoi tu uh hi. 4Hi bangin ka vawt tu hi, banghangziam cile mihingte in kei hong nusia zo uh a, hi mun sia pathian dangte biakpiakna taw in nin sak zo uh hi– tua pathiante sia amate, a pu a pate Judah kumpite ii a thu a heak ngei ngawl pathiante ahi uh hi. Amate in hi mun sia mawna nei ngawl mihingte ii chi taw kidim sak uh hi. 5Taciang amate in biakpiakna in a tate uh mei sungah halin Baal biak natu in biaktau vawt zo uh hi; hi bang a vawt tu thu ka pia ngei bua hi; ka thin sung zongh ah ka ngaisun tha ngei bua hi. * 6Tua ahikom hi mun sia Topheth ahibale Hinnom Kuam a kici nawn ngawl natu hun hong theng tu hi. Tua mun sia Kithalupna Kuam kici zaw tu hi. 7Hi munah Judah le Jerusalem mite ii tupnate theampo ka khak tu hi. A ngalte in ka zo sak tu a ngal kidona ah a ngalte in ka thatlum sak tu hi. A mithi luangte sia vacimte le ngamsate ii an tu in ka pia tu hi. 8Hi khuapi tungah a lauhuai mama siatna ka tung sak tu a tua khua a kantante papo in ingh liangin lamdang sa mama tu hi. 9Ngalte in khuapi kiim uum tu a, a mite thalup tu hanciam tu uh hi. Ngalte in uumci in lauhuai mama ahikom khuapi sung sangah a om mihingte sia khat le khat a sa uh kine tu uh a, a tate ii sa ngangawn ne tu uh hi,” hong ci hi.

10Taciang keima taw a paikhawm mihingte mai sanh ah beal saattham tu in TOPA in keima hong sawl hi. 11Taciang Vaanglianbelpa TOPA in hi bangin ci hi ci in amate tungah son tu in keima hong sawl hi, “Hi mihingte le hi khuapi ka sutham tu a, a kipua kik thei nawn ngawl a tamtham hi leibeal taw kibang tu hi. Mithi phum natu mun dang om nawn ngawl ahikom mihingte in a mithite sia Topheth ngangawn ah phum tu uh hi. 12Keima in hi khuapi le khuapi sungah a teang mihingte Topheth bangin ka vawt tu hi ci in kong kamciam hi. 13Jerusalem khua a innte, Judah kumpite ii innte le a tatakin ci leang inn theampo ii khuvumte tung pan aksite tungah ngim namtui hal biakna a kipiakna innte le pathian dangte tungah biakpiakna zu a kibuakna munte theampo a vekpi in Topheth mun bangin a nin suak siat tu uh hi,” ci hi.

14Taciang TOPA in a thu thang sak tu a, hong sawlna Topheth panin ka cia hi. Biakinn sungah pai in, dingin mi theampo tungah, 15Vaanglianbelpa, TOPA Israel mite Pathian in hi bang ci hi, “Ka tung sak tu hi ka ci sa daan theampote hi khuapi le a naina a om khua note theampo tungah ka tung sak tu hi; banghangziam cile na thin uh pui in kong son thu na ngai nuam bua uh hi,” ci in ka son hi.

Jeremiah 20
Jeremiah le Thiampi Pashhur Kilem ngawlna
1Hi thute ka than sak sia Biakinn ukpa Immer ii tapa thiampi Pashhur in a zaak ciang ama in, 2kei hong saat a thikkol hong bulin Biakinn sung Benjamin Kongpi tungnung hui ah hong koi hi. 3A zingsang ciang, Pashhur in kol hong suut zawkciang, keima in ama tungah, “TOPA in nang sia Pashhur ci in hong sam ngawl hi, ‘Mun theampo ah Launa’ ci in nang hong sam zo hi. 4TOPA ama mama in ‘Nang sia nangma le nangma kipatau sak tu le na lawmte patau sak tu in kong vawt tu a, a ngalte in a namsau uh taw na lawmte a thalup siat na mu tu hi. Keima in Judah mihingte theampo Babylon kumpipa khutsung ka then siat tu hi; pawl khat a ngamah sal in ciapui tu a, pawl khat thatlum tu hi. 5Hi khuapi ii hauna theampo, a neisa a lamh sa le a vanhte theampo, Judah kumpite ii sum le paaite dongin a ngalte in ka sutkol sak tu a, a khawng a kheak in Babylonia ah ka paipui sak tu hi. 6Pashhur awng, nang na hile, nangma le na innkuanpuite theampo zongh hong kiman tu a, Babylonia ah hong kipaipui tu hi. Tua munah na thi tu a na theam zazan bul na lawmte taw hong kiphum khawm tu hi,’ ci hi,” ka ci hi.

Jeremiah in TOPA Mawsiat
7TOPA awng, nangma in kei nong theam a, keima in theam ka thuak hi.
Nangma in kei sangin na hat zaw a, kei nong zo thaw hi.
Mihing theampo in kei hong nunau uh a;
sunkhua teakin amate in kei hong nuisan uh hi.
8Thu ka son simin, ka au keak kul a,
“Ngoltolna! Kisiatna!” ci in ka au hi.
TOPA awng, nangma thu ka than sak hu in
a tawntungin simmawkna le zawnsakna ka thuak hi.
9Ahihang, “TOPA ka mangil tu a
ama min taw in thu ka son nawn batu hi,” ka ci ciangin,
na thu sia meisa bangin ka sungah kuang hi.
Iimcip tu ka hanciam hangin, ka iim thei mama bua hi.
10Mihing theampo kihuau a, “Mun theampo ah launa om hi!
Tua ahikom thu neite tungah ama khia tawng,!” a ci ka za hi.
Ka it bel ka lawmte ngangawn zongh in
ka puk tu bek ngak uh hi.
“Kitheam zo tha tu hi,
tasia ciang ih man thei tu a, phu ih lam tu hi,” amate in ci uh hi.
11Ahihang TOPA awng,
nangma in keima sangah nong pang a na thahat in na vaanglian hi,
Kei hong vawtsiate sia ngal lel tu uh hi.
Amate a min kipaan sak tawntung tu uh hi,
banghangziam cile amate tangtung thei ngawl hi.
Amate ii minpaanna sia kimangil ngei ngawl tu hi.
12Ahihang, Vaanglianbelpa, TOPA awng,
mihingte sia thumaan takin na sittel a; amate ii thinsung le a ngaisutna na he hi.
Tua ahikom ka ngalte tungah phu na laakna hong mu sak tan,
banghangziam cile na khut sungah ka vaite kong aap zo hi.
13TOPA tungah la sa vun! TOPA pok vun!
Ama in mi ngilote khutsung panin a kivawtsia te suatak hi.
14Ka sua ni haamsiat in!
Ka nu sung pan ka sua ni mangil in! *
15“Hi sia pano hi! Tapa khat nei ni hi!” ci a ka pa tungah kamtai a,
ka pa a lungdam sak pa haamsiat in.
16Ama sia TOPA in hesuak ngawlin,
a suksiat khuapite bang hi tahen.
Ama in zingsang in bot sa a
kaana aw le sun in ngal patauna aw za tahen,
17banghangziam cile ama in ka pian ma in hong thatlum ngawl hi.
Hong thatlum hi thong le ka nu ngilsung sia ka thaan hi zo tu hi.
18Banghangin ka nu ngilsung panin suak khi ziam?
Ngimna le heena khuangaina bek thuakin
maizumna taw ka nuntakna bo sak tu khi ziam?

0 comments:

Post a Comment