Laithiangtho Dokna (Jeremiah 21-22)

1. Jeremiah kung apai Judah kumpi min bangziam?
a.  Zedekiah
b. Hezekiah
c. Nehamiah

2. Judah kumhpipa in thiampi akua taw Jeremiah kung pai ziam? 
a.  Zedekiah
b. Hezekiah
c. Zephaniah

3. TOPA in Babylon ngalkapte zawthawkthu taw ___ sak le ki uk hi. 
a. thalup 
b. heak kik
c. nguallel 

4. Babylon ngalkap anang nuamte ___ tu hi. 
a. lungdam 
b. ki thatlum siat
c. ngualzawna ngaa

5. Babylon te kung aki-aap pawpo ___ tu hi.
a. kap
b. thisiat
c.  ki that ngawl 

6. ___ sia ama a theam pa khut sung panin dal vun.
a. Ngual theam a thuak pa
b. Mipilpa
c. Israelte

7. Tanga, meingong le ___te vawtsia heak vun. 
a. kumpi naseam
b. mizawngte
c. ngamdangmite

8. TOPA in "Judah ii kumpi inn sia ___ bangin hoi ci hi.
a. Lo
b. Tuuno
c. Lebanon Mualliante

9. Judah te awng kumpi___ kaa heak vun kici hi. 
a. Hezekiah
b. Josiah
c. Joish

10. Jerusalem mihingte awng, ___ah au vun.
a. Jeruslem
b. Geboen
c. Lebanon ngam

11. Kumpi akua sia a nu taw saltang in pai ziam? 
a. Rehoboam
b. Jehoiachin
c. Jehoboam

12. Kumpi ___sia kuama dei ngawl thambeal tamh bangh hi tu ziam? 
a. Jehoiachin
b. Neman
c. Nebuchadnezzar


Jeremiah 21
Jerusalem ii Ngallel tu Kison khol
1Judah Kumpi Zedekiah in Malchiah ii tapa Pashhur le Maaseiah ii tapa thiampi Zephaniah te ka kungah hong puak a, hi bangin hesuak hong ngen hi, 2“Ko atu in TOPA hong paupui sak tan, banghangziam cile Babylon Kumpipa Nebuchadnezzar le a ngalkapte in khuapi uumci hi. TOPA in na lamdang khat ko atu in hong sep sak tahen a, Nebuchadnezzar heak kik natu zawthawk thu zangh tahen,” *

3Taciang TOPA in kei hong paupui a Zedekiah ii kei kungah hong sawl mihingte tungah, 4TOPA Israelte ii Pathian in hi bangin ci hi ci in Zedekiah tungah son tu in ka sawl hi, “Zedekiah awng, Babylon kumpipa le a ngalkapte a sim na ngalkapte ka zo tu hi. Na ngalkapte ii ngalhiamte khuapi laizang ah ka seng tu hi. 5Keima in ka tha om za, ka thin uukna, ka vei laakna le ka thin sona taw in nang kong sim tu hi. 6Hi khuapi sungah a teang mihingte theampo ka thatlum tu hi; mihing le nganhing a kibangin natna ngilo taw thi tu uh hi. 7Ahitazong, nangma le na khutnuai a uliante, ngalsung, kialpi pan le natna ngilo pan a, a suakta mihonpite sia– No hong that nuam Nebuchadnezzar Kumpipa le na ngalte in na vekpi in kong man sak tu a, Nebuchadnezzar in note hong thatlum tu hi. Ama in note hesuakna le dei sakna hong nei ngawl tu a khat zongh hong khoaikhe batu hi. Keima TOPA in ka ci zo hi,” ci hi.

8Taciang TOPA in mihingte tungah hi bangin son tu in kei hong sawl hi, “Ngai vun! Keima, TOPA in na teal tu uh in nuntakna lampi le thina lampi kong pia tu hi. 9Khuapi sungah a om a kuama po sia ngal kisimna ahibale ngilkial in ahibale natna ngilote taw kithatlum tu hi. Ahihang tu laitak a khuapi a sim Babylon mite kungah pai in a ki aap papo kithat ngawl tu hi; ama in a nuntakna suatak tu hi. 10Hi khuapi sia maap tuan ngawlin suksiat tu in ka thin ka khensat zo hi. Babylon kumpipa khut sungah kipia tu a, ama in mei taw haltum tu hi. Keima, TOPA in ka ci zo hi,” hong ci hi.

Judah Kumpi Innkuan tungah Thukhenna
11-12TOPA in David ii suan le paal, Judah kumpi innkuan tungah hi thu son tu in kei hong sawl hi; “Keima, TOPA ii ka son sia ngai vun. Nisim in maan takin thukhen vun. Ngual theam a thuak pa sia ama a theam pa khut sung panin dal vun. Tabangin na vawt bua uhle, thusia na vawt sia in a kimit thei ngawl meikuang khat bangin ka thin uukna kuang sak tu hi. 13Jerusalem awng, nang in kuam tung, a saangna ah na to a, zaangtam tungah suangtum dokto khat bang na hi hi. Ahihang nang kong sim tu hi. Kuama in nang hong sim zo ngawl tu a na kidalna te hong sutham zo ngawl tu hi ci ni hi. 14Ahihang na sepnate taw kizui in nang daan kong pia tu hi. Na kumpi inn mei taw ka hal tu a, a kiim a paam a om na theampote tua mei in kaangtum tu hi. Keima, TOPA in ka ci zo hi,” hong ci hi.


Jeremiah 22
Judah Kumpi Inn ah Jeramiah ii Thupuak
1-2TOPA in David suan le paal, Judah kumpipa inn ah pai tan a, tua munah a kumpipa, a khutnuai a uliante le Jerusalem mite kungah TOPA thusonte ngai tu in son tan, ci in kei hong sawl hi. 3TOPA in, “Keima, TOPA in thumaan le thutang na vawt vun ci in no thu kong pia hi. Theamna a thuak pa sia a theam pa ii khutsung panin dal vun. Ngamdang mi ahizong, tangate le meingongte ahizong vawtsia heak vun; hi a thiangtho munah mawna nei ngawl mihingte that heak vun. 4Kong thupiak bangin na seam takpi uh le, David ii suan le paalte sia kumpi suak tawntung tu uh hi. Taciang amate sia, a khut nuai a uliante le a mite taw in, siphuleang le siphu tungah to in hi kumpi inn kongpite panin tumin pusuak tu uh hi. 5Ahihang kong thu piakte nong ni bua uh le, hi kumpi inn sia siacip tu hi ci in ka kiciam hi. Keima, TOPA in ka ci zo hi. *

6“Kei atu in, Judah ii kumpi inn sia Gilead ngam le Lebanon Mualliante bangin hoi hi; ahihang kuama ii ten ngawlna a ngamkhing mun khat ka suak sak tu hi. 7Tua kumpi inn a susia tu in mihingte ka puak tu hi. Amate in a hei uh tek hong keng tu uh a, cedar khuam phate phukin meikuang sung denna in nei tu uh hi.

8“Tua zawkciang ngamdang mite tam mama in kantan tu uh a, taciang Keima, TOPA in banghangin hi khuapi lian tungah hi bangin vawt ziam ci in khat le khat kidongh tu uh hi. 9Tasia ciang na Pathian, Keima taw na kiciamna uh nusia in pathian dang bia in a na na sep sak uh hang hi, ci in amate in zo kik tu uh hi,” ci hi.

Joahaz taw kisai Jeremiah ii Thupuak
10Judah mite awng, Josiah kumpipa kaa heak vun;
ama thi hangin thasia heak vun.
Ahihang a tapa Joahaz atu in nasia takin kap vun;
ama sia hong heak kik nawn ngawl tu le
a pianna ngam mu kik ngei nawn ngawl tu in amate in paipui uh hi.
11Judah kumpipa ahi a pa ii za a lai Josiah ii tapa Joahaz taw kisai in TOPA in hi bangin ci hi, “Ama in hi mun panin pai zo a, hong heak kik nawn ngawl tu hi. * 12Ama sia a paipuina ngamah thi tu a, hi ngam mu kik ngei nawn ngawl tu hi.”

Jehoiakim taw kisai Jeremiah ii Thupuak
13Thumaan ngawlna taw a inn a sa pa le ngual theamna taw a inn a keak pa,
a ngam mite a thathong in a na a seam sak pa le
a thaman a pia ngawl pa in siatna thuak tahen.
14“Inndawl tungnung ah
khan a zai hemhom innkhat ka sa tu hi,” a ci pa in siatna thuak tahen.
Taciang ama in a inn sungah khelkite thua in,
cedar thingpheak taw thuap thua in za san taw zut hi.
15Midangte inn sangin a pha zaw
cedar thing taw na inn na sak na sia in kumpi phazaw khat hong suak sak ziam?
Na pa sia a nuntak nuamsa hi.
Ama sia a tawntung a thumaan a thutang hi a,
a sepna theampo ah a maa pai hi.
16Ama in mizawngte tungah thutang taw thukhen a,
tua hu in ama atu in na theampo a pha suak hi.
Tabang ahi theina in TOPA a heak hang ahi hi.
17Ahihang nangma in nangma kaangsung tu bek na mu thei a;
mawna nei ngawlte thatin
na mite nasia takin na zawthawk vawt hi. TOPA in ci zo hi.
18Tua ahikom, TOPA in Judah Kumpipa Josiah ii tapa Jehoiakim thu taw kisai in hi bangin ci hi,

“A thi hu in kuama kap ngawl tu hi;
‘Bangza he huai ziam, ka lawm awng! Bangza he huai ziam!’ ci in kuama kap ngawl tu hi.
‘Ka TOPA awng! ka kumpipa awng!’ ci in kuama kap ngawl tu hi. *
19Laa a thi ciang a kiphum bangin
a luang kikaikeak in Jerusalem ii kongpite pua sangah kivawk tu hi.”
Jerusalem taw kisai Jeremiah ii Thupuak
20Jerusalem mihingte awng, Lebanon ngamah pai vun a au vun,
Bashan ngamah pai vun a kap vun;
Moab mualtung panin au vun
banghangziam cile na pawlpuite theampo kizo siat zo hi.
21Na nop sak uh laitakin TOPA in no hong paupui hi.
Ahihang na ngai bua uh hi.
Na nuntak uh sung theampo in tabang vive hi nu hi;
TOPA thu na ni ngei bua uh hi.
22Na lampuite uh sia vui in seamkeak tu a, na pawlpuite uh sia ngalte in sal a manin, na khuapi sia a min kidai sak in ki maizum sak tu hi.
Banghangziam cile a pha ngawl na vawt uh hang ahi hi.
23Lebanon pan a na laak uh
cedar thing sungah thin muangin om nu hi;
ahihang numei khat a nau a tut ciangin na a sak bangin
ngimna na thuak uhciang bangzata in hesuak huai tu nu ziam?
Jehoiachin tungah Pathian ii Thukhenna
24TOPA in Judah Kumpi Jehoiakim ii tapa Jehoiachin Kumpipa tungah, “A nungta Pathian ka hi bangma in, ka ziatsang khut tungah min tupna khutzungbu na hi hial zongh in, nang kong suut tu a, * 25na kiitak mihingte le nang hong thatlum nuam mihingte tungah kong aap tu hi. Babylon Kumpipa Nebuchadnezzar le a ngalkapte tungah kong aap tu hi. 26Saltang tu in nangma le na nu kong not tu hi. Na pianna uh ahi ngawlna ngamah na pai tu uh a, tua munah na thi khawm tu uh hi. 27Hi ngam sia na mu kik nuam tu uh hi, ahihang na heak kik ngei nawn batu uh hi, ” ci hi.

28Keima in, “Jehoiachin Kumpipa sia kuama ii dei ngawl a a kivawk mang thambeal tamh khat bang suak zo ziam? Tua hu in ama le a tate sia amate heak ngei ngawlna ngamah saltang tu in ki paipui ahi ziam?” ka ci hi. 29Leitung, leitung, leitung awng! TOPA kammal ngai vun: 30

“Hisia pa sia maa a tun ngei ngawl tu le,
a tate a khuaisua tu in a ki ningkhiin sa hi.
Ama in David ii kumpi tokhum lua in,
Judah ngam a uk tu in suan le paal nei ngawl tu hi.
Keima TOPA in ka ci zo hi,” ci hi

0 comments:

Post a Comment