Laithiangtho Dokna (Jeremiah 23-24)

1. Jeremiah in akua taw ka kibang ci ziam?
a. Zukhampa
b. Sumhaupa
c. Khutdawngenpa

2. Kamsangte le Thiampite in bang nei ngawl ci ziam?
a. Pathian
b. Cidamna
c. Siatna

3. Samaria kamsangte in akua min suang in thuhil ziam?
a. Baal
b. Pathian
c. Babylon kumpipa

4. Jerusalemte tungah akuate thuson ngai heak vun ci ziam?
a. Baal kamsangte
b. Babylon ngalkapte
c. Kamsangte

5. TOPA kammal sia ___a sutham mei le sek taw kibang hi.
a. inn khat
b. lungtang
c. suangtum a bebekin

6. Thiampi in ‘TOPA ii Vanhngit’ ci kammal a zangh le ___ tu hi.
a. thupha sang
b. mipil ahi
c. a innkuan in dan tawk

7. Biakinn mai ah a kikoi ___ kei hong lak hi.
a. theinga bawm nii
b. leang nii
c. thukham thingkuang

8. Bawm akoi sia sung om theinga sia limci ziam?
a. Bawm theampo
b. Aniina sia
c. Amasa sia

9. TOPA in Israelte sia bang taw tengat ziam?
a. Muvanlai
b. Theinga
c. Law

10. TOPA in bangbanghdan thin Israelte pia tu ziam?
a. TOPA heak nopna
b. Patbangh aneal
c. Suangbang asak

11. Akuate sia TOPA in theinga pha ngawlte bang hi sak ziam?
a. Jerusalemte
b. Babylonte
c. Judahte

12. Mihingte in athetna munah amate sia ___ tu hi.
a. it
b. nunau selno
c. phat vawt


Jeremiah 23
Maisang atu Muanmawkna
1Ama mite suksiat sak a, a thethaang sak ngam uk uliante tungah TOPA ii thukhenna in bangza in lauhuai tu ziam? 2Ama mihingte keamcing tu a, a kingaisun ngam ukte taw kisai in TOPA Israel ii Pathian in hi bangin ci hi: “Ka mihingte nong kepcing sak bua uh hi; na thethaang uh a na hawlkeak uh hi. A sia na vawt uh hu in tu in daan kong pia tu hi. 3Ka mihingte a taanglai teng ka thethaang na ngamte panin ka kaikhawm tu a, a ngam ah ka cia sak kik tu hi. Amate in ta tam mama nei in pung mama tu uh hi. 4Amate a khoi a keam tu in ngam ukte ka koi tu hi. Ka mihingte sia lau nawn ngawl patau nawn ngawl tu a, daan ka pia kik batu hi. Keima, TOPA in ka ci zo hi,” ci hi.

5TOPA in, “David suan sung pan thumaan khat kumpi tu in ka teal tu hun hong theng tu hi. Tua kumpipa in ciimna taw ngam uk tu a thumaan thutang taw in a ngam buppi uk tu hi. * 6Ama kumpi a sua ciang, Judah mite ngam muang tu a, Israel mite thin nuamin om tu uh hi. Ama sia ‘TOPA Eite Kingupna’ ( Jehovah Tsidkenu ) kici tu hi.

7TOPA in ci hi, “Egypt ngam pan Israel mihingte a pusua pui a nungta Pathian Keima min taw mihingte ii a kiciam nawn ngawl hun hong theng tu hi. 8Saksang ngam pan le amate ka thethaangna ngamdang theampo panin Israel mihingte a pusua pui a nungta Pathian Keima min taw amate in kiciam zaw tu uh hi. Taciang amate sia a ngamsung mama ah teang tu uh hi. ”

Kamsangte taw kisai Jeremiah ii Thupuak
9Ka thin kitamtham in ka liing hi.
TOPA hang le ama ii kammal thiangthote hangin,
zu tam ne lei a zu kham pa khat taw ka kibang hi.
10Tua ngam sia TOPA tungah a thumaan ngawl mihingte taw kidim hi;
amate sia ngitlo nuntakna taw nungta in a thu neina uh zangh khial uh hi.
TOPA ii haamsiatna hangin
hi ngam sia khuangai in om a, ngamsung lonote kongaw hi.
11TOPA in, “Kamsangte le thiampite in Pathian nei ngawl uh a;
ka Biakinn sung ngangawn ah tatsiatna a vawt amate ka man hi.
12Amate ii tot lampite sia naalin khuazing tu hi;
amate ka lutu sak tu a, ka puk sak tu hi.
Amate ii tungah tuasiatna ka theng sak tu a;
amate ii daan thuak tu hun hong theng tu hi.
Keima, TOPA in ka ci zo hi.
13Samaria ii kamsangte ii mawna ka mu zo hi;
amate in Baal min suangin thu hil uh a ka mite lam pialpui uh hi.
14Ahihang Jerusalem khua a kamsangte in a sia zaw lai a vawt ka mu hi;
amate in nupa kipalngul in leeilot thu son uh hi;
mihingte a ngitlona uh pan a kikheal ngawl natu in
mihing pha ngawlte hanthawn zawlai uh hi.
keima muna ah amate sia
Sodom le Gomorrah mite bangma in sia siat uh hi. *
15“Tua ahikom, Jerusalem khua a kamsangte taw kisai in, Keima, Vaanglianbelpa TOPA in hi bangin ka ci hi;

A neak tu in a kung khate ka pia tu a
a dawn tu in nguza ka pia tu hi,
banghangziam cile amate in Pathian zia bang ahi ngawlna thu sia
ngam buppi ah zel sak uh hi,” ci hi.
16Vaanglianbelpa TOPA in Jerusalem mite tungah, “Kamsangte ii thusonte ngai heak vun, amate in a maan ngawl lam etnate hong dimh uh hi. Amate in Keima ii kammal hi ngawl, amate ii ngaisut tawmte note tungah hong son uh hi. 17Ka thu son hong ngai nuam ngawl mihingte tungah, amate in poimaw bo na theampo amate atu in pha tu zam ci veve lai uh hi. Amate in mihing thinpui khat sim tungah tua siatna in ama thutha ngei ngawl tu hi ci in son uh hi,” ci hi.

18Keima in, “Hi kamsangte kuama in TOPA ii ngaisutna thuku te he ngei ngawl uh hi. Amate kuama in TOPA ii thuson za ngei ngawl, tel ngei ngawl, ngai ngei ngawlin nadon ngei ngawl uh hi. 19Ama ii thin uukna sia vuipi nguapi bangin mi ngilote ii lu tungah puaktham tu a, 20ama ii tupna teng a vekpi a vawt siat mateng in a thin uukna thai ngawl tu hi. Mailam sangah a mite in hi thu telthiang tu uh hi,” ka ci hi.

21TOPA in, “Hi kamsangte ka puak bua hi, ahihang amate pai veve uh hi. A son tu thu ka piak ngawl ahihang ka min suangin thuson veve uh hi. 22Amate in ka ngaisutna thuku te he hi thong ka pole ka thusonte ka mite tungah thang sak zo tu uh a, a nuntakna pha ngawlte le a pha ngawl a ngamtatna te nusia sak siat zo tu hi.

23“Keima in munkhat bek ah a om hi ngawlin mun theampo ah a om Pathian ka hi hi. 24Ka mu thei ngawl tu in a buu thei tu kuama om ngawl hi. Vantung leitung mun theampo ah ka om hunlam he ngawl nu ziam? 25Amate mang sungah ka thu sonte Keima in amate pia zo hi ci a Keima min taw leeilot thu a son kamsangte ii thusonte ka he hi. 26Tua kamsangte in amate ii phuatawm leeilot thu taw ka mite bangtan vei lam khial sak tu uh ziam? 27A pu a pate in Kei hong mangil in Baal kung a zot bang keakin, ka mihingte tung a, a son a mangte in Kei hong mangil sak tu hi ci in amate in ngaisun uh hi. 28Mangman kamsang pa in hi thu sia mang bekma hi ci tahen a, ahihang ka thu hilna a za kamsang pa in ka thu thumaan takin thang sak tahen. Taangphaw le zungtaang tang kitee ngat thei tu ziam? 29Ka kammal sia suangtum a bebekin a sutham mei le sek taw kibang hi. 30Khat le khat ii kammalte la a, Keima ii kammal hi ci a, a thang sak kamsangte ka langpan hi. 31Keima kung pan hong pai hi ci a amate ii aituam kammal a son kamsangte zongh ka langpan si hi. 32Keima, TOPA ii ka son sia ngai vun! Leeilot thu nguaktang ahi amate ii mangte a son kamsangte ka langpan hi . Amate in hi mangte sonin a leeilotna uh le a kiphatsak na uh taw in ka mite lam khialpui uh hi. Amate ka pai sak bua a thu la ka pia bua hi, mihingte atu in amate kimanna nei vet ngawl hi. Keima TOPA in ka ci zo hi,” ci hi.

TOPA ii Vanh ngit
33TOPA in keima tungah, “Jeremiah awng, ka mite khat papo ahibale, kamsang khat ahibale thiampi khat in ‘TOPA ii thupuak sia bang ziam?’ ci in nang hong dok ciang, nangma in ama tungah ‘Nangma in TOPA atu in vanhngit khat na hi a, ama in nang hong puavawk tu hi,’ na ci tu hi. 34Ka mite khat papo in ahibale kamsang khat ahibale thiampi khat in, ‘TOPA ii Vanhngit’ ci kammal a zangh zezen ahile ama le a inn kuanpuite daan ka pia tu hi. 35Tasia luangin, khat po in a lawmte le a mealheakte tungah ‘TOPA in bangbangin zo kik ziam? TOPA in bang ci ziam’ ci in dongh zaw tahen. 36Tua ahikom amate in ‘TOPA ii Vanhngit’ ci kammalte zangh nawn ngawl tu uh hi, banghangziam cile khat papo in a zangh ahile, ka thuson sia ama atu in vanhngit takpi khat ka suak sak tu hi. Mihingte in amate ii Pathian, a nungta Pathian, Vaanglianbelpa TOPA ii kammalte lumlet uh hi. 37Jeremiah awng, kamsangte tungah ‘TOPA in zo kikna bang hong nei ziam? TOPA in bang son ziam?’ ci in dongh in. 38Amate in ka thupiak sia a ni bua uh a, ‘TOPA ii Vanhngit’ ci kammalte a zangh uh le taciang; 39Keima in amate le a pu a pate tungah ka piak sa khuapi sia ka la takpi tu a, ka omna panin a khuala na ah amate taw ka vawkkhop tu sia amate tungah son in. 40Bangma hunin a kimangil ngei ngawl tu a tawntung maizumna le min paanna amate tungah ka tung sak tu hi,” hong ci hi.

Jeremiah 24
Theinga Bawm nii
1TOPA in Biakinn mai ah a kikoi theinga bawm nii kei hong lak hi. (Hi thu sia Babylon Kumpipa Nebuchadnezzar in Jerusalem khua panin Jehoiakim ii tapa Judah Kumpipa Jehoiachin sia Judah kumpi lampui uliante, khut thiamte le naseam thiamte theampo taw Babylon khua ah saltang tu in a paipui zawkciang thupiang ahi hi). * 2Bawm a masa sia sungah a om theingate sia a min pal theinga phate hi a, a dang bawm sia ii sungah a om theingate sia limci ngawl in neak thei tu bang zongh a hi ngawl theinga pha ngawlte ahi hi. 3Taciang TOPA in keima tungah, “Jeremiah awng, bang na mu ziam?” hong ci hi, “Theinga ka mu hi. A limcite sia limci mama a, a limci ngawlte sia limci ngawl leilam ahikom neak thei tu hi ngawl hi,” ci in ka zo kik hi.

4Taciang TOPA in keima tungah, 5“Keima, TOPA Israel mite ii Pathian in Babylon ah a kipaipui mihingte sia hi theinga limcite bangin a pha in ka ngaisun a, ka phat vawt tu hi. 6Amate ka cing tu a, hi ngamah ka ciapui kik tu hi. Amate ka khangto sak tu a, ka susia batu hi, amate ka botkeak batu a ka suan tu hi. 7Keima TOPA ka hi hunlam heak nopna thinsung amate ka pia tu hi. Tasia ciang amate sia ka mihingte hi tu uh a, Keima in amate ii Pathian ka hi tu hi, banghangziam cile amate in a thin theampo uh taw ka kung hong zuan kik tu uh hi.

8Ahizong Judah Kumpipa Zedekiah, a khutnuai ngam uk uliante le hi ngam sungah a om suak Jerusalem khua mi a taanglai sunte ahibale Egypt ngamah a taite sia neak tu a, a pha ngawl leilam hi theingate bangin Keima TOPA in amate theampo ka vawt tu hi. 9Amate tungah tabang tuasiatna ka theng sak tu a, leitung minamte theampo lau tu uh hi. Mihingte in amate nuizaakna lelin nei in, ciammui, nunau selno in, amate ka thethaangna mun theampo ah amate ii min sia haamsiatna in zangh tu uh hi. 10Amate le a pu a pate tungah ka piak sa ngam sungah amate khat zongh a taan nawn ngawl dongin amate tungah ngal kidona, kialpi tunna le natna ngilo ka tung sak tu hi,” hong ci hi.

0 comments:

Post a Comment