Laithiangtho Dokna (Matthew 23-24)

1. Akuate in, Moses Thukham phen thei natu thu nei ziam?
a. Phariseete
b. Akua mapo
c. Levite

2. Akua ii sawl bangh zui in asep bangh zui ngawl tu ziam?
a. Suduceete
b. Phariseete
c. Kumpi thuneite

3. Vantungngam kongkha akuate in khak ziam?
a. Peter
b. TO Jesu
c. Phariseete

4. Thukham hil syate in anungzuite te amate sang ___ in sia sak hi.
a. aza nii
b. aza sali
c. asa sawm

5. Akuate sia mittaw lamlakte ziam?
a. Kumpi thuneite
b. Jewte
c. Thukhamhil syate

6. ___ taw a kiciam le Pathian tokhum le a tung a topa taw kiciam hi.
a. Leitung
b. Vantung
c. Meikaai

7. Nungzuite in koisung huangsung innte TO Jesu lak ziam?
a. Biakinn
b. Jerusalem
c. Olive mual

8. TO Jesu koisung ato laitak biakinn kiphelthap tu thu nungzuite in songh ziam?
a. Biakinn sung
b. Olive Mual
c. Jerusalem

9. Akiitaakhuai mama thu asonkhol kamsang sia akua ziam?
a. Jeremiah
b. Isaiah
c. Daniel

10. Na ngaltai uh hun sia Sabbath ni le ___hun ahi ngawltu thungen vun.
a. Phabi
b. Khuakhal
c. Tuukhun

11. Akuate atu in Pathian na ngimhna ni khiam ziam?
a. Israelte atu
b. Nungzuite atu
c. Tealtuamte atu

12. Mihing Tapa meikaai taw hong tuak ciang akuate kap tu ziam?
a. Pathian he ngawlte
b. Leitung mihingte
c. Jewte


Matthew 23
Jesu in Thukham hil Syate le Phariseete pan Kidop natu Hil
(Mark 12:38-39; Luke 11:43,46; 20:45-46)
1Taciang Jesu in mipite tung le nungzuite tungah thu son hi. 2“Thukham hil syate le Phariseete sia Moses Thukham a phen thei tu, thu neite ahi hi. 3Tua ahikom amate in vawt a hong sawl peuma ni in zui vun; ahihang amate ngamtatnate zui heak vun, banghangziam cile amate in a hil uh bangin ngamta ngawl uh hi. 4Mihingte ii nungzaang ah vanhngit a puak hakte sia amate ma ii sot to ahi hi, ahihang amate in tua vanhngitte puakpui tu in, a khutme dawn zongh a tung nuambua uh hi. 5Mihingte mu tu in amate in na theampo seam uh hi. Amate talki tung le a baante tungah Laithiangtho kammal a ki at savun pheakte bangza in beak ziam, en vun! A laktong puasilh mong a teapkaite zongh bangza in sau sak ziam! * 6Poai sungah amate tona a nuambelte ahizong, synagogue sungah a kikhaam sa tonate ahizong amate in to tha nuam sap a; 7amate in sumzuakna munah ngual ii paupui tu thangai a, ‘Syapa’ ci in a biapui tu uuk uh hi. 8No sia ‘Syapa’ kici ngawl tu nu hi, banghangziam cile no sia unau khat tetek hi a, Sya khat bek na nei uh hi. 9Taciangin hi leitung ah kuama ‘Pa awng’ ci heak vun, banghangziam cile vantung a Pa khat bekma na nei uh hi. 10‘Lampuipa awng,’ zongh na kici sak heak vun, banghangziam cile Messiah khat bek ma na lampui uh ahi hi. 11No sungah a lianbel sia in note naseam hi tu hi. * 12A kuapo ama le ama a kilian sak sia kiniam sak tu a, a kuama po a kiniamkhiak sia, thupi in kikoi tu hi. *

Jesu in Amate Kihi sak nate Mawsiat
(Mark 12:40; Luke 11:39-42, 44, 52; 20:47)
13“Note atu in bangza in lauhuai ziam? Thukham hil syate le Phariseete awng! No a kihisak minamte awng! Ngual mai panin, Vantungngam kongkha sia khasan nu hi, taciang noma mama in tua sungah na tum nuam bua uh hi, tum nuam in a hanciamte zongh, a tum tu na oai bua uh hi! 14Thukham hil syate le Phariseete awng! No atu in bangza lauhuai ziam? A kihisakte awng! Meingongte na zo thaw uh a, a inn uh na phuul uh hi. Tua zawkciang thu sau mama kingen sakin, na kivawt tawm uh a! hi sia hu in daan na thuak tu sia nasia mama tu hi!

15“Thukham hil syate le Phariseete awng! No a kihisak minamte awng! No atu in bangza in lauhuai ziam? Noma upna sungah mihing khat na nga thei natu in, tuipi kal in pai a, ngamte kantan in pai nu hi; taciang tabangin nungzui khat na nga zawk uhciang, noma sangin a see nii in hell ngamsung theng tu a kilawm zaw tu in vawt nu hi.

16“Mittaw ngual lamlakte awng! No atu in bangza in lauhuai ziam? ‘Biakinn taw a kiciamte a kamciam a peal hangin phamaw ngawl hi; ahihang Biakinn sungah khamte taw a kiciamte sia a kamciam bangin a vawt uh kul hi,’ na ci uh hi. 17Mittaw mawmawte awng! koi sia thupi zaw ziam, kham hi zaw ziam, a kham sia a thiangtho sak Biakinn hi zaw ziam? 18Na kihil thua lai na uh pan, ‘Biaktau taw a kiciamte sia a ciampeal hangin phamaw ngawl hi; ahihang biakna tau tung a om nate taw kiciamte sia a kamciam bangin a vawt kul hi,’ ci nu hi. 19Na mit uh bangza in taw ziam! Biakpiak natu in a kikoi nate thupi zaw ziam maw, tua nate a thiangtho sak biaktau sia thupi zaw ziam? 20Tua ahikom mihing khat in biakna tau taw a kiciam le, tua biaktau le a tung a om na theampo taw ama kiciam ahi hi; 21taciang Biakinn taw kiciam ciangin tua Biakinn le a sung a teang Pathian taw zongh kiciam hi si a, 22taciang khatpo in vantung taw a kiciam le Pathian tokhum le a tung a topa taw kiciam ahi hi. *

23“Thukham hil syate le Phariseete awng! A kihisak minamte awng! No a tu in bangza lauhuai ziam? An me sungah helthei lonamsia, masala le thing namtuite dongin, see sawm sua see khat sia Pathian na pia uh hi, ahihang Thukham sungah a kihil a thupi tatak ahi, thutang khenna, hesuakna le thumaannate na awlmaw bua uh hi. Hite zongh na zak tu uh hi a, a dangte zongh na awlmawk ngawl tu hi saap ngawl hi. * 24Mittaw ngual lamlakte awng! Na dawn tu uh tui sung pan tho khat po sia nasia takin na thit uh hi; ahihang kalauh bup khat na lopvalh uh hi!

25“Thukham hil syate Phariseete awng! A kihi sak minamte awng! No atu in bangza lauhuai ziam? Hai le kuang sia a puasang teng na sil uh hi, ahizong a sungah na neak na dawn uhte sia zawthawk thu le duhopna taw na nga uhte taw kidim hi. 26Pharisee mittawte awng! Hai sia a sungsang sil phot leu te a puasang zongh thiang tu hi.

27“Thukham hil syate le Phariseete awng! A kihi sak minamte awng! No atu in bangza lauhuai ziam? No sia suangkangtui taw akizut thaanbuk taw kibang nu hi, tuate sia a puasang hoi ahihang a sungsang ah mithi ngu le mithi muat taw kidim hi. * 28Tasia bangma in no sia a pua sang panin ngual muna ah a hoi bang na hi uh hi, ahihang na sunguh sia kihisakna le mawna taw kidim nu hi.

Jesu in A Daan Thuak tu uh Sonkhol
(Luke 11:47-51)
29“Thukham hil syate le Phariseete! A kihisak minamte awng! No atu in bangza lauhuai ziam? Kamsangte atu in thaankuul sia a et hoi tu in na vawt uh a, miphate atu in, khan sia na zep sak uh hi; 30Taciangin na pu le na pa te hun lai in, a nungtate hi leu te a mate ii septe seam buan ci-ung, kamsangte that buan ci-ung, ci nu hi. 31Tua ahikom kamsangte a thatlumte ii suante na hi uh hunlam noma pauna panin kipholaak na hi uh hi. 32Tua ahiciang na pu le na pate ii pat sa nate na zaw dong seam vet tavun! 33Ngul le ngul ii suante awng, hell sungah hong kikhiak suk natu panin, bangbangin suakta tu in ki um nu ziam! * 34Tua ahikom, kamsangte, mihing ciimte le syate sia note kungah kong pai sak tu hi; tuate pawlkhat na thatlum tu uh a, pawlkhat sia thinglamte tungah na kil tu a, pawlkhat sia synagogue inn sungah na vel tu uh a, khuapi khat pan khuapi khat ah na delkot tu uh hi. 35Tua hu in mawna nei ngawl Abel pan a kipan, sangaw na biaktau le Biakinn kilaklaw a na thalup uh Berechiah tapa Zechariah le mawna nei ngawl bul a na thalup uh theampo hangin thuak tu daan sia note tungah hong tung tu hi. * 36A tatak in kong ci ciang mihing that theampo daan sia tu hun a, a nungta mihingte ii tungah hong tung tu hi!

Jesu ii Jerusalem A itna
(Luke 13:34-35)
37“Jerusalem, Jerusalem awng! Nang in kamsangte na thatlum a, Pathian kamtaite suangtum taw na hua hi. Akpui in aknote a tha nuai ah a uap bangin, bang tan vei na mihingte angvan nuam khi ziam? ahihang na oai bua hi! 38Tua ahikom Biakinn sia kitaisan tu a, a hawm in om tu hi. * 39Hong ci khi hi; tu pan kipan, ‘Topa min taw hong pai pa sia Pathian in thupha pia tahen, na ci uh hun mateng in, kei nong mu kik nawn batu hi.’ ” a ci hi. *

Matthew 24
Jesu in Biakinnpi Lalthap natu Son
(Mark 13:1-2; Luke 21:5-6)
1Jesu sia Biakinn pan a pai zawkciang a nungzuite in Biakinn le a huangsung a inn dangte lak tu in pai uh hi. 2Jesu in, “Hi hi, en tek vun. A tatak in kong ci ciang, hi sungah suangte khat zongh a omna ngei san ah om nawn ngawl tu hi; a vekpi kipheltham siat tu hi,” ci hi.

Ngimna le Siatvawtna
(Mark 13:3-13; Luke 21:7-19)
3Jesu in Olive Mual tungah a to laitakin, a nungzuite ama kungah hong pai tuam uh hi. “Hi thu sia bang hun ciangin hong tung tu a, taciang nong pai kik tu le hun bo natu, a kilak natu in bang hong piang tu ziam?” ci in dongh uh hi.

4Jesu in, “Kidawm tavun, kuama in theam sak heak vun. 5Banghangziam cile mihing tam mamate kei min zanghin hong pai tu a, ‘Keima in Messiah ka hi hi’ ci tu a mihing tam mama theam tu hi. 6A naina ah ngal kidona aw na za tu uh a, a khualana ah ngal kidona thu hong kison tu hi; ahihang patau heak vun. Tabangte sia a piang tu hi a, hi bang hun bona hong theng zo hi, ci na hi ngawl hi. 7Ngam khat le ngam khat kisim tu hi; kumpi khat le khat kido tu hi. Mun theampo ah kialpi tung tu a, zinliing tu hi. 8Hite theampo sia nautut kipat ciang, a nat bang ahi hi.

9“Tua zawkciang note hong kiman tu a, daan piak tu le thalup tu in hong ki aap tu hi. Keima hu in mihing theampo in note hong ensan tu hi. * 10Mihing tam mama in tua hun ciangin, a upna uh nusia tu hi; amate khat le khat kileeheak tu a, khat le khat kingaimaw tu hi. 11Tua zawkciang leeilot kamsang tam mama piang tu a, mihing tam mama theam tu hi. 12Tabangin siatna hong kizel tu a, mihing tam mamate ki itna kiam tu hi. 13Ahihang a tawp dong a thumaante kingum tu hi. * 14Taciangin, hi Kumpingam Lungdamna Thupha sia, leitung theampo ah tetti tu in minam theampo tungah kihil kakoai tu hi; tua zawkciang hun bona hong hi tu hi.

A Kiitak huai Mama Thu
(Mark 13:14-23; Luke 21:20-24)
15“Kamsangpa Daniel ii son ‘A kiitak huai mama thu sia’ na mu tu uh hi. Tua in a thiangthona munah ding tu hi.” (Hi lai a sim sia in tel tahen!) * 16“Taciang Judea a omte in mual tungah tai tahen. 17Innkhum tung a om pasal khat in ama ii vanhte la tu in tuaksuk nawn heak hen. * 18Lo sungah a om pasal khat in a laktong puasilh la tu in, heak kik nawn heak hen. 19Tua hun sungah a om numei naupaaite le nau noailuaite atu in bangza he huai tu ziam? 20Na tai tu uh hun sia phalbi lai le Sabbath ni ahi ngawl natu in Pathian tungah thungen vun. 21Banghangziam cile tua hun ah ngimna sia leitung a kipat pan kipan, tuni dong a piang ngei ngimnate theampo sangin nasia zaw ngawp tu hi. Tabang ngimna sia maisang zongh ah om kik ngei nawn ngawl tu hi. * 22Ahihang Pathian in a ni sia khiam suk zo hi; tua hibale kuama a suakta batu hi. Ahitazong a tealtuam mihingte atu in Pathian in a ni khiam tu hi.

23“Tasia ciang khat po in, ‘En in, hi sungah Messiah om hi!’ ci in ahizong, ‘Zia sungah om hi!’ ci in ahizong hong cile um heak vun. 24Banghangziam cile Messiah theam le kamsang theamte hong piang tu hi; hi thei hile Pathian teal sa mihingte ngangawn a theam natu in, amate in nalamdang lakna liante le a tumdang nate tam mama hong vawt tu hi. 25Ngai vun! a hun hong thet ma in hong sonkhol zo khi hi.

26“Tua ahibale mihingte in, ‘En vun, ama sia senneal ngam sungah om hi!’ hong cile zong, tua munah pai heak vun; tua ahibale ‘En vun, ama sia hi sungah bu hi,’ hong cile zong na um heak vun. * 27Banghangziam cile Mihing Tapa sia vantung buppi ah nisuana pan nitumna dong a kantan khualeng taang bangin hong pai tu hi.

28“Mithi luang omna mun po ah vaciikte kikhawmtua tu hi. *

Mihing Tapa hong Paina
(Mark 13:24-27; Luke 21:25-28)
29“Tua hun ah ngimnate zawk a hai ngawl in, ni hong taang nawn ngawl tu a, tha zongh taang nawn ngawl tu a, aksite van pan in taaksuk tu a, van ah a om nate sia amate ii zin tek panin pialmang siat tu hi. * 30Tasia ciang Mihing Tapa ii lim sia van ah hong kilangh tu hi; Mihing Tapa sia van ah meeikaai tung pan vaangletna le minthanna lianpi taw hong pai a mu uh ciangin, leitung mihing theampo kap tu uh hi. * 31Lemlepui aw hong nging tu a, taciang ama in leimong lite ah a vantung lalangte sawl in, amate in ama teal sa mite leimong khat pan mong khat dongin khawmtua tu hi.

Theikung taw Thuheak theina
(Mark 13:28-31; Luke 21:29-33)
32“Theikung in hil sak tavun. A baakte zongh hingin hong moi sua ciangin, a teeno meang tu in kithoai a, tasia ciang khuakhal hong nai hi ci in na he uh hi. 33Tasia bangma in, hite theampo na mu uh ciangin, a hun hong nai a, hong kipapan zo hi, ci in na he tu uh hi. 34Tu laitak a nungta mihingte a thi siat ma in, hi thu sia hong piang tu hi ci in phawk tavun. 35Vantung le simlei a bo tu hi, ahihang ka kammalte a bo ngei batu hi.

Kuama in a Ni le a Nai He ngawl
(Mark 13:32-37; Luke 17:26-30; 34-36)
36“Ahitazong tua a ni le a nai tu sia kuama in he ngawl hi— vantung ah vantung mite ahizong, Tapa ahizong, he ngawl hi; Pa bek in he hi. 37Mihing Tapa hong pai natu sia Noah hun lai thupiang bang hi tu hi. * 38Tuipi liim ma in mihingte an ne tui dawnin om a, nu le pa kiteangin, Noah ii teambaw sungah a tum tatak ni dong sia tabangin om uh hi. 39Tua hi napi tui ii a taikeak dongin, bang thu piang ziam ci in amate in a phawk bua uh hi. Mihing Tapa hong pai ciang zong tabangma hi tu hi. * 40Tua hun laitakin pasal nii sia lo sungah naseam khawm tu hi: khat kila tu a khat kikhe tu hi. 41Numei nii an ngoaina ah diang tu hi: khat kila tu a, khat kikhe tu hi. 42“A kingingta sa in om vun, banghangziam cile Topa hong pai tu ni sia na he bua uh hi. 43Inn neipa khat in ngutate ii hong pai hun tu he le, mu ngawlin om tu a, ngutate in inn a phuul sak batu hi, ci in na heak uh ahi hi. * 44Tua ahiciang no zongh, a tawntung kinging sa in om vun, banghangziam cile Mihing Tapa in na muanmawk ngawl hun laitakin hong pai tu hi.

Thumaan Ahibale Thumaan ngawl Naseampa
(Luke 12:41-48)
45“Thumaan a, a ciim naseampa sia akua bangte ziam? Ama sia naseam dangte a uk tu le a hun a hun in an a pia tu in a kikoipa ahi hi. 46A topa hong cia laitakin a kisawl bang a na seam hi ci in a topa ii mu naseampa sia bangza in lungdam tu ziam? 47A tatak in kong ci ciang, a topa in tua naseampa sia a neisa theampo uk tu in koi tu hi. 48Ahihang tua naseampa sia a ngina ngawl khat ahile, a topa sia hong cia hak lai vak, ci in ama le ama kitheam tu a, 49taciangin a nasep khoppui naseam dangte saatin, zukham theite taw, an ne zu ne in om tu hi. 50Taciangin tua naseampa ii topa sia a muanmawk ngawl hun le a heak ngawl ni hun khat ciang hong cia tu hi. 51A topa in ama sia nasia takin ngim pia tu hi, a kihisak minamte thuak tu teng thuak sak tu hi. Tua munah ama sia kap in ha ngoai tu hi,” ci hi.

0 comments:

Post a Comment