Laithiangtho Dokna (Samuel Niina 11-12)

1. Uriah sia bang mi ziam?
a. Moab
b. Dan
c. Hit

2. Uriah inn cia ngawl in akuate taw lumh ziam?
a. kumpipa acingte taw
b. A zi taw
c. Uite taw

3. Ngalkisimna sungah Israelte in bang keng ziam?
a. Thukhamthingkuang
b. Ngalleang 500
c. Kumpi lukhu

4. Uriah zu akham sak sia akua ziam?
a. Ama-le-ama
b. David
c. Kongkhacingpa

5. Anngoaina suangtaw denlup in athipa sia ___ hi.
a. Abimelech
b. Ahimeleh
c. Uriah

6. Banghun zawk ciang Bathsheba sia David zi suak ziam?
a. Uriah thi azakni
b. Uriah thi zawk tha khat
c. A khuangai manh ciang

7. David kung ahaw kamsangpa min?
a. Nathanel
b. Nehamiah
c. Nathan

8. Tuuno sia mizawngpa atu ___ bangh hi.
a. tanu khat
b. khamh
c. sumngum

9. David in "tatsiapa na ___ in a lo kik kul tu hi" ci hi.
a. a zaa 4
b. a zaa 3
c. a zaa 2

10. Patangno thi thu akua in David tungah son ziam?
a. A naseamte
b. Kuama
c. A nu

11. Pathian ii phuasak Solomon ii mindang khat sia___ hi.
a. Jedidiah
b. Jupita
c. Mipilpa

12. Ammonte kham lukhu sia pound bangza ngit ziam.
a. 30
b. 55
c. 75

Samuel Niina 11
David le Bathsheba
1Kumpipate in ngalsim veu in a kuan hun tuk kik ciangin David in Joab le a ngalkap uliante le ngalkap honte kuan sak hi; amate in Ammonte zo in, a khuapi Rabbah uumci uh hi. Ahihang David ama sia Jerusalem ah om hi. *

2Nikhat sun ni niam zawkciang David sia a mutna pan hong tho a, kumpi tenna inn a khum tungah kaato hi. Ama tabangin inntung tamna ah a vavaa ciang numei khat a inn sungah kibual in a om mu hi. Ama a meal pha mama hi. 3Tua ahikom ama in kamtaite pai sak a, tua nu sia akua ziam ci in a kat sak ciang, Hit mi Eliam ii tapa Uriah ii zi Bathsheba hi ci in he hi. 4David in ama sam tu in kamtaite pai sak hi; amate in ama kungah numei nu ciapui uh a, ama in luppui hi. (Ama sia thasim in a zeksa kithiansua hun a manh zawk hiat bek ahi hi.) Tua zawkciang ama cia kik hi. 5A zawkciang ama ngai ahi hunlam kiphawk a, David munah son tu in kamtai pai sak hi.

6Tasia ciang David in Joab tungah kam thaak a, “Hit mi Uriah hong puak tan,” ci sak hi. Tua ahikom Joab in Uriah sia David kungah pai sak hi. 7Uriah hong thet ciang David in Joab le a ngalkapte bangbang hi ziam, ngal kidona bangbang hi ziam ci in dongh hi. 8Taciang, ama in Uriah munah, “Cia tan a tawm vei tawlngak hun la tan,” ci hi. Uriah in nusia a, taciang David in a inn ah letsong puak sak hi. 9Ahihang Uriah cia ngawl a; kumpi tenna inn kongpi ah kumpipa a cingte taw lum hi. 10Uriah inn ah cia ngawl hi ci in David in a zaak ciang ama dongh a: “Hun saupi inn taw kikhen hi ngawl ni ziam, banghangin cia ngawl ni ziam?” ci hi.

11Uriah in zo a, “Israelte le Judahte sia ngal kidona ah om a, taciang Thukham Thingkuang zongh amate taw om hi; hong ukpa Joab le a uliante zongh munmaaina ah ngiaphual saat hi. Bangbangin kei inn ah cia a, ne in dawn in ka zi taw koi bang lum thei thong tu khi ziam? Tabang peuma in ngamta ngei ngawl tu khi hi ci in biakna kisai a thiangtho nate theampo taw kiciam khi hi,” ci hi.

12Tua ahikom David in, “Tua ahile tuni bup hi sungah taam lai in tawlnga lai in, zing ciangin kong pai sak kik tu hi,” ci hi. Tua ahikom Uriah sia tua ni le a zing ciang dong Jerusalem ah taam hi. 13David in nitak an ne tu in Uriah sam a, zu kham sak hi. Ahihang tua ni zan zongh Uriah a inn ah cia peang ngawl hi; kumpi tenna inncingte khaan sungah ama puanvan tungah mu veve hi.

14A zing kik ciang David in Joab lai thaak a, Uriah in a lai puak sak hi. 15Ama in a lai sungah: “Uriah sia ngal kisim a nasia belna, ngal mai ah koi in, taciang thakhat in nungkin vun, ama sia kithat tahen,” ci in at hi. 16Tua ahikom Joab in khuapi a uumci laitakin ngalte thahat na munah Uriah puak hi. 17Ngalte ngalkapte khuapi panin hong pusuak uh a, Joab ii ngalkapte hong sim uh hi; David ii uliante pawlkhat thi a, Uriah zongh thi hi.

18Tua zawkciang Joab in David munah ngal kidona thu zaak sakna thaak hi, 19taciang ama in kamtai te hi bangin a pau natu hil a, “Kumpipa tungah ngal kidona thu na son siat zawk uh ciang, 20ama thin uukin, hi bangin hong dongh thei tu hi. ‘Banghangin amate sim tu in khuapi taw a kinai lei na dong pai nu ziam? Khuapi luphungte tung panin thaltangte hong kap tu ci in he ngawl nu ziam? 21Gideon ii tapa Abimelech ii kithalupna ciamtee nawn ngawl nu ziam? A mun sia Thebez hi a, numei khat in anngoai na suang khat luphung tung pan a khiaksuk sia in ama khalum hi. Tua ahile banghangin luphung neak lei in pai nu ziam?’ Kumpipa in tu a bangin hong dongh le ama munah, ‘Na ngalkap mang Uriah zongh kithat hi,’ ci vun,” ci hi. *

22Tua ahikom kamtai pa, David kungah hong pai in Joab ii son tu a thupiak bangin son hi. 23Ama in, “Ih ngalte sia ei sangin hat zaw a, khuapi sung pan hong pusuak in munmaaina ah ei hong sim tu in hong pai hi, ahihang amate sia khuapi kongpi dong ka nawt kik uh hi. 24Taciang amate in luphung tung pan thaltang taw hong kap in, na ngalkap uliante pawlkhat hong thalup sak a, Uriah zongh thi hi,” ci hi.

25Kamtaite munah David in, “Joab na hanthawn vun a, ngal kidona sung sia a kua teng thi tu ci in kuama in kison thei ngawl ahi nung sang na thinkiam heak hen. Khuapi sia nasia seseam in na sim hen a, na suan hen,” ci sak hi.

26Bathsheba in a pasal kithat ci in a zaak ciang ama atu in khuangai in tau hi. 27Khuangai tu hun teng a man ciangin David in ama sia kumpi tenna inn ah pai tu in sam hi; ama ii zi hong suak a, tapa khat hing hi. Ahihang TOPA sia David ii ngamtatna huvau ah a lungkim ngawl hi.

Samuel Niina 12
Nathan ii Thupuak le David ii Kisiikikna
1TOPA in kamsang pa Nathan David ii kungah sawl hi. Ama kungah Nathan pai in, “Pasal nii khuapi khat ii sungah teang khawm hi; khat sia hau a, a khat zaw sia zawng hi. * 2A hau sia pa in khui le tuu tam mama nei hi, 3taciang a zawng sia pa in a lei sa tuuno khat bek nei hi. Ama in tasia pha takin vaak a, a inn ah a tate taw khang khawm hi. Ama ii neak lai an pawlkhat taw vaakin, ama ii hai panin dawn sak a, taciang a kaang sungah toai hi. Tuuno sia ama atu in tanu khat taw kibang hi. 4Ni khat ni in leangna khat a hau pa inn ah hong theng hi. Mi haupa in leangna pa atu an a huan tu in ama ii ngannote khat a ngaw tu oai ngawl a, ama in mizawngpa tuuno la in a zinpa an neak tu in vawt hi,” ci in son hi.

5David sia mihau pa tungah a thin uuk mama a, “A nungta TOPA taw kiciam hi tong, hi bangin a ngamta pa a thi tu kilawm hi. 6Hi bangin a tatsiat hu in a laak za tungah a zaa li in a lo kik kul tu hi,” ci hi.

7“Nangma tasia pa ni hi,” Nathan in David munah ci hi. “Taciang hi sia Israel ii Pathian TOPA ii ci hi: ‘Saul ii khut sung pan kong suatak a, Israel kumpipa in kong koi hi. 8Ama ii kumpi ngam le a zite nang kong pia hi; Israel le Judahte ii kumpipa in kong koi hi. Hi sia kicing sa ngawl lai na hi le a see nii in a tamzaw zongh hong pia lai tu khi hi. 9Tua ahile banghangin kong thupiak ni ngawl ni ziam? Banghangin hi tatsiatna ngamtat in nei ni ziam? Nang in Uriah sia ngal sungah na thi sak hi: Ammonte in na thatlum sak hi, tua zawkciang a zi na la hi! 10Tu in na khang sim in na suan na paalte pawlkhat sia thi ngamh in thi tu hi, banghangziam cile nang in ka thu nong ni bua a, taciang Uriah ii zi na tang hi. 11Nangma ii baangkua sung pan ma in pawlkhat in nangma tungah ngimna hong tut tu in ka kiciam hi. Na zi sia nangma kung pan la a ka piak ciangin hi thu na mu tu hi. Ama in sun tangin amate luppui tu hi. 12A thimtham in mawna vawt ni hi, ahihang Israel theampo ii mu tu in sun tangin ka piang sak tu hi,” ci hi. *

13David in, “TOPA tungah maw zo khi hi,” ci hi.

Nathan in, “TOPA in hong mai sak hi; thi ngawl tu ni hi. 14Ahihang hi bangin na ngamtatna panin TOPA simmawkna lak na hikom na ta sia thi tu hi,” ci in zo kik hi. 15Tua zawkciang Nathan inn ah cia hi.

David ii Tapa Thi
Uriah zi taw David ii a hin nausen sia TOPA in a ciina mama sak hi. 16David in patang sia ii dam natu Pathian tungah thu ngen hi. Ama in bangma ne nuam ngawl a, zan simin ama ii khaan sungah pai in suat tungah lum hi. 17A kumpi inn sungah uliante in hong thaw natu hanciam hi kale tho nuam ngawl a, amate taw bangma ne khawm nuam ngawl hi. 18Nipi khat zawkciang a patang hong thi a, taciang David ii uliante in tua thu ama a son tu sia lau uh hi. Amate in, “Patang a nuntak lai zongin ih paupui ciang David in hong zo nuam ngawl hi. Patang sia thi zo hi ci in bangbangin son thei tu hi ziam? Ama le ama bang khat po kilaw tha tu hi,” ci uh hi.

19David in amate kihuau a mu ciang patangno thi zo hi ta a, ci in phawk hi. Tua ahikom ama in amate munah, “Patang thi zo ziam?” ci in dongh hi.

“Hi hi, thi zo hi,” ci in amate in zo uh hi.

20David in suat tung pan hong thoto a, kibualin, a sam hong pot a, a puan hong laih hi. Tua zawkciang ama TOPA ii inn sungah hong pai in biakpiakna vawt hi. Kumpi inn ah a heak kik ciangin an ngen a, a kilui po ciangin ne paih hi. 21Ama ii inn sung uliante in, ama munah, “Hi thu sia tel zo ngawl khu hi. Patangno a nuntak lai in ama na kaa a, an na ne bua hi; ahihang a thi po ciang thoto in an na ne hi!” ci uh hi.

22“Hi hi, A nuntak lai in kapin an tang peu khi hi. TOPA in kei hong hesuak tha tu a patang sia thi sak ngawl tu hi ci in ka ngaisun hi. 23Ahihang tu in a thi zawkciang banghangin an tatang nawn tu khi ziam? Patang nungta sak kik thei tu khi ziam? Ni khat ni ciang ama omna ah kei pai tu khi hi, ahihang ama kei kungah hong pai kik ngei ngawl tu hi,” ci hi.

Solomon hong Piang
24Tua zawkciang David in a zi Bathsheba heeneam hi. Ama in luppui in, tapa khat hong nei kik a, David in Solomon ci in a min phuak hi. TOPA in patangno sia it hi, 25taciang TOPA in kamsangpa Nathan sawl a, patangno min Jedidiah phuak sak hi, banghangziam cile TOPA in ama it hi.

David in Rabbah Khuapi La
(1Khang tangthu 20:1-3)
26Tua laan in Joab in Ammonte ii khuapi Rabbah a simna hong zomto suak a, suan tu in kipan hi. 27Ama in kamtaite pai sak a, David tungah, Rabbah sim zo khi hi, taciang a tuinaak zongh suan zo khi hi. 28Tu in na ngalkap om lai teng hong khawmtua tan a, a khuapi sim in, nangma tatak ma in la in, Tua khuapi la hi ci in min nga nuam ngawl khi hi,” ci in ko sak hi. 29Tua ahikom David in a ngalkapte khawmtua a, Rabbah ah kuanin sim hi. 30Ammonte ii biak milim pathian Molech lu tung pan David in pound sawmsali le pound nga bang a ngit kham kumpi lukhu le suangmanpha a kisuan sia la hi. David in la in ama lu ah khu hi. Ama in khuapi sung pan a phuul uh vanh tam mama la a, 31a mihingte thing at naam, thik tumanh, thik hei te taw naseam sakin, uksuang seak sak hi. Ammonte ii khuapino dangte sung a om mite zongh tabangma in zangh hi. Taciang ama le a mite Jerusalem ah cia kik uh hi.

0 comments:

Post a Comment