Laithiangtho Dokna (Samuel Niina 15-16)

1. Absalom acing mihing bangza pha ziam?
a. 200
b. 100
c. 50

2. David ii advisor sia akua ziam?
a. Thiampi Zadok
b. Ahithophel
c. Zuriah

3. Absalom ii sap mi zanite in, bangthu he ngawl ziam?
a. Tualngal sawmna
b. A paina tu mun
c. Ngalsim zia

4.Gath pan ngaltai ngalkap bangza in David zui ziam?
a. 200
b. 300
c. 600

5. David ngaltai in apai ciang Thukham thingkuang ___ hi.
a. pua
b. phual
c. pua ngawl

6. Absalom ii nasep zia thukan David ii lawmpa min bang ziam?
a. Ahithophel
b. Hushai
c. Abishai

7. David tung ah adiktat Saul ii sila min bang ziam?
a. Ziba
b. Hushai
c. Abishai

8. Mephibosheth banghang David taw ngal tai ngawl ziam?
a. A peangbai hang
b. David ngaimaw
c. Apu neisa theampo ki lamen

9. David ahamsiat Saul ii bepa min bang ziam?
a. Zeba
b. Asahai
c. Shimei

10. David kumpipa le alawmte angaltaina koisungah tawlnga ziam?
a. Zion
b. Jordan Ngun
c. Damascus

11. Apa zinote luppui tu in Absalom tung ah ngaisut pia sia akua ziam?
a. Ahithophel
b. Hushai
c. Abishai

12. Akua ii pau nate Pathian ii kammal za in kisaang ziam?
a. Joab
b. Thiampi Zadok
c. Ahithophel

Samuel Niina 15
Absalom in Tualngal tho tu Ngeal
1Hisia zawkciang Absalom in ama atu ngalleang khat le siphu pawl khat heang a, ama a cing mihing sawmnga zongh koi hi. 2Ama in zing tuungin tho a, khuapi kongpi hui lampi ah ding hi. Mihing khat po ngual taw thu kinei om in, kumpipa khen sak tu in hong pai a om ciang, Absalom in samin koisung pan hong pai ni ziam ci in dongh bul hi. Taciang ama sia bang minam ahi Absalom tungah a son zawkciang, 3Absalom in hi bang veu ci hi, “En in, thukham in nang hong panpui hi, ahihang nang thu hong ngai tu kumpipa ii taangmi kuama om ngawl hi.” 4Taciang hi bang veu belap hi, “Keima thukhenmang hi leng uuk meak ing! Tua hile ngual taw thu kinei, ahibale neisa nga nuam khat papo kei kungah hong pai tu a, thu a tangin khen sak tu khi hi,” ci hi. 5Mihing khat po in Absalom mai ah kun tu in hong neak ciangin Absalom in ama zamh in koai a, namh hi. 6Kumpipa tung pan thutang khenna thangai a hong pai peuma Israel mi simin Absalom in hi bang veu in vawt ahikom amate ii panpuina nga hi.

7Kum li zawkciang Absalom in David munah, “Hebron ah hong pai sak tan, TOPA tungah sep tu kamciam teng seam nuam khi hi, topa awng, 8Syria ngam Geshur ah ka om lai in, TOPA tungah kamciam ka piakna pan, ama in kei, Jerusalem ah hong cia kik sak le ama Hebron ah pai in bia tu khi hi, ka ci hi,” ci hi.

9“Thin nuam takin pai tan,” kumpipa in ci hi. Tua ahikom Absalom sia Hebron ah pai hi. 10Ahihang Israel namte theampo tungah kamtai pai sak in, “Lemle aw na zaak uh ciang, ‘Hebron ah Absalom sia kumpi suak zo hi,’ ci in au vun ci sak hi. 11Absalom ii samna taw Jerusalem ah ama taw a paikhawm mihing zanii pha hi; amate in tualngal sawmna bangma he ngawlin, ngaisutna pha taw pai uh hi. 12Taciang ama in sangaw biakpiakna a vawt laitakin, Kumpipa David atu ngaisut pha a pia Gilo khua mi Ahithophel sam sak hi. Kumpipa langpan tu sawmna sia hong thahat va-ial a, Absalom ii nungzuite zongh mihing hong khang va-ial hi.

Jerusalem pan David Tai
13Kamtai khat in David munah, “Israelte in Absalom tungah thumaan tu kamciam pepia hi,” ci hi.

14Tua ahikom David in a uliante Jerusalem ah a om theampo munah, “Absalom khut panin ih suakta nuam le ih tai kul tu hi! Manlang vun! Tua ahibale ama hai ngawlin hi mun hong theng tu a, hong zo in khuapi sungah a om theampo hong that tu hi,” ci hi.

15Amate in zo kik a, “Hi hi, Kumpipa awng, na ci babangin ngamta tu in kinging khu hi,” ci uh hi. 16Tua ahikom kumpipa ding khia a,a uliante le a zino sawm kumpi inn en tu a nusiat teng ngawl, a innkuanpui dang teng taw pia uh hi.

17Kumpipa le a mihingte theampo hong dinkhiat ciangin khuapi inn mong khakbel sia ah hong tawlnga uh hi. 18A uliante theampo zongh ama kungah hong ding uh a, ama a cing ngalkapte ama ii mai pan paisuak uh hi. Gath pan hong zui ngalkap zaluk te zongh hong pai suak uh hi, 19taciang kumpipa in amate lampuipa Ittai munah, “Banghangin ko taw hong pai khawm nu ziam? Heak kik vun a, kumpi thak sia taw om tavun. No sia ngamdang mi nu hi, na ngam uh panin ngaltai te nu hi. 20No hi sungah tawmvei sung bekma hong teangte hi a, tua ahiciang banghang in kei taw hong vakthap kakoai sak tu khi ziam? Koi sung zuan tu khi ziam ci in keima zongh in heak ngawl khi hi. Heak kik tavun a, na ngam mipuite zong heak pui tan. TOPA no tungah hong dik tahen a hong thumaan tahen,” ci hi.

21Ahihang Ittai in zo a, “Kumpipa awng, TOPA min taw kiciam khi hi, thi keak a kul zong na paina po ah pai tu khi hi,” ci hi.

22“Pha hi,” David in ci hi. “Pai tawng,” ci hi. Tua ahikom Ittai in a mite le a beal te theampo taw pai uh hi. 23David hong dinkhiat tak ciang ngam mite nasia takin hong kap uh hi. Kumpipa in Kidron lui hong kantan a, a mite in zui in amate dui sung manaw in paikhawm hon uh hi.

24Thiampi Zadok zongh tua munah kihel a, taciang ama kungah Thukham Thingkuang a pua Levi mite zongh om uh hi. Amate in Thukham Thingkuang lei ah nga suk uh a, mipite ii khuapi a nusiat dong kisuan kik ngawl uh hi. Thiampi Abiathar zongh tua munah om hi. 25Tasia ciang kumpipa in Zadok munah, “Thukham Thingkuang khuapi sungah heak pui kik tan. TOPA in kei dik hong sa ahile ni khat ni ciang a mu tu in kei hong heak kik sak tu a, a omna mun zongh hong mu sak kik tu hi. 26Ahihang TOPA in kei dik hong sa bua ahile, tasia ciang ama ii hong law nop po hong law tahen,” ci hi. 27Taciang ama in Zadok munah a ci lai na pan, “En in. Na tapa Ahimaaz le Abiathar ii tapa Jonathan tonpuiin khuapi sungah thinnuam takin na cia kik tavun. 28Tua laanin nang tung pan thuthak ka zaak dong ngun kanna ah kong ngak tu hi,” ci hi. 29Tua ahikom Zadok le Abiathar in Thukham Thingkuang sia Jerusalem paipui kikin tua munah om uh hi.

30David in Olive Mualvum ah a kap sa in kaato a; khuangaina lim in peangdap thua ngawlin a lu siin hi. Ama a zuite theampo in zongh a lu uh puan taw siinin kap uh hi. 31Ahithophel in Absalom taw tualngal vai ah kipawl hi ci in David in a zaak ciangin thu ngen hi. “TOPA awng, Ahithophel ii ngaisut piaknate lui thathong suak sak in,” ci hi.

32Biakpiakna mun khat a omna mual tungah David hong thet ciangin, Arch mi ahi a muanbel a ngualtam Hushai taw kimu a, ama sia a puan ki eaukeak in a lu tungah leivui kibuak hi. 33David in, ama munah “Kei taw nong tonkhop hang kei nong hu theina bangma om ngawl hi, 34ahihang khuapi ah heak kik lete taciang Absalom mun ah na pa atu na ka sep bangma, nangma atu zongh thumaan takin sep sak tu khi hi, va ci lete kei hong hu thei zaw tu ni hi. Taciang Ahithophel ii ngaisut piakna peuma na langpan thei za in vawt in. 35Thiampi Zadok le Abiathar te zongh tua munah om hi; kumpi inn sungah na zaak theampo amate son in. 36Amate ii a tapate Ahimaaz le Jonathan amate kungah om hi, taciang thu na zaak theampo amate in kei hong puak tu in nong pai sak thei tu hi,” ci hi.

37Tua ahikom Hushai, David ngualtam pa sia Absalom hong thet bek laitakin khuapi sungah heak kik hi.


Samuel Niina 16
David le Ziba
1David in mualdawn a kan zawkciang thakhat thu in Mephibosheth ii naseampa Ziba taw kisi hi, ama in laa nii hong keng a, a laate in anluum luum zanii, sapitko bom zakhat, thingnga hing bom zakhat le savun ip khat dim zu hong pua hi. * 2Kumpipa David in, “Tuate theampo bang tu ci ni ziam?” ci in dongh hi.

Ziba in zo a, “Laate sia kumpipa ii innkuanpuite to natu hi a, anluum le thingngate sia a mihingte ii neak tu, taciang zu sia dui sungah amate a toi ciang a dawn tu hi,” ci hi.

3“Na topa Saul ii tupa Mephibosheth koisung a om ziam?” kumpi pa in dongh hi.

“Ama Jerusalem ah om hi, banghangziam cile ama ii up tatakna pan a pu Saul ii neisa theampo Israelte in ama tungah pia tu hi,” ci in Ziba in zo hi. *

4“Mephibosheth ii neisa theampo nangma tang tu ni hi,” kumpipa in Ziba munah ci hi.

“Kei na naseam pa khi hi. Kumpipa nang hong lungkim sak tawntung hong suak sak tahen,” Ziba in ci hi.

David le Shimei
5Kumpipa David Bahurim hong thet ciangin Saul ii bete Gera ii tapa Shimei sia ama taw kisi tu in hong pai in ama haamsiat hi. 6David ii uliante le a cingte in ama uumci napi Shimei in suang taw deang tu in hong kipan hi. 7Shimei in haamsiat a, “Tai in! Tai in! Tual that pa! Mimaw pa! 8Nang in Saul ii kumpi ngam na suan a, tu in TOPA in Saul ii innkuanpuite na suamlup hu in daan hong pia hi. TOPA in na kumpi ngam sia na tapa Absalom hong piak sak hi, tu in lalcip zo ni hi, nang tualthat pa!” ci hi.

9A nu Zeruiah ahi Abishai in, “Kumpipa awng, banghangin ui hi sia in nang haamsiat sak ni ziam? Ama ii kungah hong pai sak tan a, a lu hong tan sak tan,” ci hi.

10“Hisia no taw bangma kisai bo,” kumpipa in Abishai le a suapuipa Joab munah ci hi. “TOPA in kei haamsiat in sawl ahile a kua in khaam thei tu ziam?” ci hi. 11Taciang David in Abishai le a uliante theampo munah, “Keima tapa in kei hong thatlum nuam a kipan ahile hi Benjamin pa ii ngamtatna banghangin lamdang sa nu ziam? TOPA in ama ii kei hong haamsiat tu in sawl hi tu hi, tua ahiciang koi po vun a, haamsiat sak vun. 12TOPA in ka cimawkna hong hesuak tha tu a, ama ii hong haamsiatna kei atu thupha hong suak sak nuam ahi na meal zongh kihe ngawl hi,” ci hi. 13Tua ahikom David le amate a lampai hong zom suak hi. Mualpangh a tona ah Shimei in pha valep a; a pai kakawm in ama in haamsiat a, suang le lei taw deang hi. 14Kumpipa le a mite Jordan Ngun hong thet sia in, amate a tha uh zawm mama zo ahikom tua munah tawlnga uh hi.

Absalom Jerusalem Khua sungah
15Absalom le ama taw kikop Israelte theampo Jerusalem khua ah tum a, Ahithophel zongh amate sungah kihel hi. 16David ii muan ngualtampa Hushai in Absalom taw a kisik ciang, “Kumpipa a khansau tahen! Kumpipa a khansau tahen!” ci in au hi.

17Absalom in, “Na lawmpa David tungah na thumaanna teng bang suak ziam? Banghangin ama taw ton ngawl ni ziam?” ci in dongh hi.

18Hushai in zo a, “Banghangin ton thei tu khi ziam? TOPA ii tealpa, mipite ii teal pa, le Israel mibup ii teal pa sangah pang khi hi. Kei nang taw om tu khi hi. 19A khakbel in ci leang, ka topa ii tapa atu ka seam bale akua dang atu seam tu khi ziam? Na pa atu ka sep sak bangma in tu in nang atu hong sep sak tu khi hi,” ci hi.

20Tua zawkciang Absalom in Ahithophel sang nga in, “Tu in hi sungah ei teng om ci leang bangbangin ngamta tu ci in ngaisutna hong pia tu ni ziam?” ci in dongh hi.

21Ahithophel in zo a, “Pai tan a, na pa ii zinote kumpi tenna inn encik tu in a nusiatte luppui tan. Tua hile Israel a om theampote in na pa in nang ngalin hong nei hi, ci in he tu hi, taciang na nungzuite nasia takin kihansua tu hi,” ci hi. 22Tua ahikom amate in kumpi inn tungah puanbuk khat Absalom atu khak sakin, Absalom tua sungah tumin a pa ii zinote luppui hi. *

23Tua hunin Ahithophel ii ngaisut piak papo sia Pathian ii kammal za in kisaang a; David le Absalom in zui khawm uh hi.

0 comments:

Post a Comment